1. Uno Yehova amona ngachilihi kuyoya chetu?

 ACHISHINGANYEKENU sepa lyenu namihane zuvo. Numba tuhu zuvo kana yili namyaji nakusotowela, eyi zuvo vachili kuyilanjisa handando yayinene chikuma. Tunafwelela ngwetu namumona zuvo kana kupwa yayilemu nakuyikinga. Chochimwe nawa, Yehova atuhana wana waulemu wakuyoya. Shikaho, asolola ngwenyi amona kuyoya chetu kupwa chachilemu hakututumina Mwanenyi kupwa ndando yakutusokola.—Yowa. 3:16.

2. Ngana muze vasolola hali Wavaka-Kolinde 2, 7:1, vyuma muka Yehova asaka tulinge?

² Kuli Yehova kukiko kwafuma kuyoya. (Samu 36:9) Kaposetolo Paulu atachikijile muchano kanou hakwamba ngwenyi: “Twayoya, tweji kutambukanga, kaha nawa twapwako mwomwo yaikiye.” (Vili. 17:25, 28) Shikaho chinahase kupwa chakutamo kwamba ngwetu kuyoya chetu chapwa wana wakufuma kuli Kalunga. Atuhana vyuma twasakiwa mangana tuyoye. (Vili. 14:15-17) Chipwe ngocho, Yehova kakinga kuyoya chetu mujila yakukomwesako. Oloze asaka tuzate noho hakumina ngolo jetu mangana tuzakame kuyoya chetu chakumujimba nachechi chakushipilitu. (Tangenu Wavaka-Kolinde 2, 7:1.) Mwomwo ika twatela kukilikita mangana tupwenga vakulikangula nakutwalaho lika kuyoya, kaha natulinga ngachilihi ngocho?

3. Chuma muka chimwe chatulingisa tufwile kupwa vakulikangula?

³ Chuma chimwe chatela kutulingisa tufwile kupwa vakulikangula shina mwomwo tuli nakusaka kuzachila Yehova kweseka noho hakumina ngolo jetu. (Mako 12:30) Twafwila ‘kuhana mijimba yetu kupwa chimuna wakuvatula wamutonyi, wajila, wakwitavila  kuli Kalunga,’ shikaho tweji kulihendanga kukulinga vyuma vize twejiva ngwetu navitunehela ukalu kumujimba. (Loma 12:1) Chipwe ngocho, shimbu jimwe tunahase kuviza numba tuhu natukilikita ngachilihi. Oloze tweji kuzatanga kweseka noho hakumina ngolo jetu, mwomwo twasaka Setu wamwilu amone ngwenyi twamusakwilila hakutuhana kuyoya.

4. Uno Mwangana Ndavichi afwililile kulinga ika?

⁴ Mwangana Ndavichi alumbunwine ovyo twatela kumona kuyoya chize atuhana Kalunga kupwa chachilemu. Ambile ngwenyi: “Nauwanyinaho ika hakufwa chami, hakushikumuka chami muwina? Uno lukungu nalukwalisa numba? Kutala naluhanjika vyakushishika chove numba?” (Samu 30:9) Chasoloka nge Ndavichi asonekele awa mazu omu apwile kwakamwihi nakufwa. Oloze afwililile kutwalaho lika kuyoya nakupwa wakulikangula mangana alise Yehova. Omu mukiko twafwila nayetu tuvosena.

5. Vyuma muka twatela kulinga chamokomoko naushinakaji chipwe misongo?

⁵ Misongo naushinakaji vinahase kutuhonesa kulinga vyuma vyavivulu vize twalingilenga hakavanga. Echi chinahase kutuhombesa nakwivwa kupihya. Oloze twatela kutwalaho lika kukilikita mangana tupwenga vakulikangula. Mwomwo ika? Mwomwo chamokomoko naushinakaji chipwe misongo, tunahase kutwalaho lika kwalisa Yehova ngana muze alingile Mwangana Ndavichi. Shikaho kutachikiza ngwetu Kalunga atumona kupwa tuvavalemu numba tuhu katwakupukako cheji kutwivwisanga kuwaha. (Mateu 10:29-31) Twafwelela ngwetu numba nge natufwa, oloze Yehova afwila kutusangula. (Yopa 14:14, 15) Shikaho, shimbu tuchili nakuyoya, twatela kuzata nangolo mangana tupwenga vakulikangula nakukinga kuyoya chetu.

6. Vyuma muka asaka Yehova kuli yetu kutalisa kukulya nakukunwa?

⁶ Numba tuhu Mbimbiliya kayapwa mukanda wakutulweza vyuma twatela kulinga mangana tupwenga vakulikangula chipwe kutulweza vyuma twatela kulyako, oloze yasolola vishinganyeka vyaYehova kutalisa kukulikangula. Chakutalilaho, Yehova atukolezeza ‘tukingenga mijimba yetu kuvyuma vyavipi.’ (Kwambu. 11:10) Mbimbiliya yamba ngwayo katwatela kufwa hakulya chipwe kunwa chikuma vinyoko mwomwo echi nachitwenyeka. (Vishi. 23:20) Yehova asaka tupwenga namuchima wakulikanyisa hakusakula vyuma twatela kulya nakunwa najila twatela kuvililamo nakuvinwinamo.—Koli. 1, 6:12; 9:25.

7. Uno mazu atwama hali Vishimo 2:11 nawatukafwa ngachilihi tusakulenga kanawa vyuma kutalisa kukulikangula chetu?

⁷ Tunahase kusakula vyuma vyakulinga vize navisolola nge twasakwilila Yehova hakutuhana kuyoya nge natuzachisanga uhashi wetu wakushinganyeka. (Samu 119:99, 100; tangenu Vishimo 2:11.) Chakutalilaho, tweji kushinganyekanga kanawa hakusakula vyuma twatela kulya. Nge twazanga vyakulya vimwe, oloze vyeji kutuvijisanga nge natuvilya, kaha uhashi wetu wakushinganyeka nautulingisa tulihende kuvyakulya kana. Natusolola nawa ngwetu tweji kushinganyekanga mwamangana nge natusavalanga washi, nakunyukanga mujimba, nakusananga nakulama membo etu kupwa aunyoji.

8. Vyuma muka Mbimbiliya yasolola hatoma kutalisa kuvishinganyeka vyaKalunga hachihande chakulihenda kujiponde?

⁸ MuJishimbi jaYehova jize vahanyine vaIsalele mwapwile najindongi jakuvakafwa  valihende kujiponde jize jinahase kusoloka hembo nakumilimo. (Kulo. 21:28, 29; Lushi. 22:8) Mutu apwilenga muukalu waunene chikuma nge mwajiha mukwavo numba vene nge kachijinangako. (Lushi. 19:4, 5) Jishimbi jahanjikilenga ngwajo namutu uze mwajiha mwana ali mujimo chakuzeneka kuchisakula vatelelelenga kumuzangamisa. (Kulo. 21:22, 23) Visoneka vyahanjika hatoma ngwavyo Yehova asaka tulihendenga kujiponde.

9. Vyuma muka twatela kulinga mangana tulihende kujiponde? (Talenu nawa mivwimbimbi.)

⁹ Tweji kusololanga ngwetu twasakwilila Kalunga hakutuhana kuyoya nge natulinganga vyuma vize navitukinga kujiponde hembo nakumilimo. Chakutalilaho, nge tuli nakumbila vyuma vyakuvambuka chipwe vitumbo, tweji kuvimbilanga mujila yize nayihona kuvulumuna vakwetu. Kaha nawa tweji kuvimbililanga kuze vanyike navahona kuviwana. Tweji kupwanga vakuvanguluka hakukwata vyuma vizuma, nameya azuma, navinoma vyakakahya, nakuhona kuviseza chamusezela. Katweshi kutambukisa minyau nge tunanu vitumbo vize navituzenga, chipwe nge tunanu wala, chipwe nge katwasavalanga washiko. Kaha nawa katweshi  kukwata jishinga nge tuli nakutambukisako.

10. Vyuma muka tunahase kulinga shimbu kanda ukalu utuwane, nomu nautuwana?

¹⁰ Shimbu jimwe katweshi kuhasa kuhonesa vyuma vize navitunehela ukalu mukuyoyako. Ukalu kana unahase kupwa ukalu wakulijila chipwe misongo yachihita navikokojola. Oloze nge ukalu kana unatuwane, tunahase kulinga vyuma vize navitukinga, hakukavangiza jindongi jakutulweza tuchine najindongi jeka jakufuma kufulumende. (Loma 13:1, 5-7) Ukalu umwe tweji kuutachikijilanga chimweza, shikaho nachiwaha kukavangiza jindongi navatuhana kufulumende mangana jitukafwe tupwenga vakulizanga. Chakutalilaho, tunahase kutulika meya, navitumbo navyakulya vize kavyapolako.

11. Nge kunepuka musongo wakulitambwisa, vyuma muka twatela kulisuula kulinga?

¹¹ Vyuma muka twatela kulinga nge mungalila yetu munepuka musongo wakulitambwisa? Twatela kukavangizanga jindongi navatuhana vaka-fulumende, chakutalilaho, kusananga kumavoko, nakulisosoloka nakuvwala tumahina twakufwika kukanwa nakutumbika muveji kwauka wenyi. Kulinga vyuma kana nachisolola nge twamona kuyoya chize atuhana Kalunga kupwa chachilemu.

12. Uno lundongi lwahali Vishimo 14:15 nalutukafwa ngachilihi tusakulenga kanawa mijimbu yize natwivwilila nge kunasoloka ukalu?

¹² Nge kunasoloka ukalu wakukasumuna tunahase kwivwa vyuma vyamakuli vali nakuhanjika masepa jetu navaze twalihata navo navaka-kwazana mijimbu. Oloze katwatela kwitavila “vyuma vyosena” natwivwako, oloze twatela kukavangiza vyuma navahanjika vaka-fulumende navaka-chipatela. (Tangenu Vishimo 14:15.) Lizavu lyaKutwaminyina najiofesi jamitango veji kuzatanga nangolo vatambule mijimbu yakwoloka shimbu kanda vahane jindongi kutalisa kukukunguluka chachikungulwilo namwakuzachila mulimo wakwambulula. (Hepe. 13:17) Nge natukavangizanga jindongi kana, kaha natulikinga etu vavene nakukinga nawa vakwetu. Nachikafwa nawa chikungulwilo chipwenga napuho yamwaza mungalila.—Petu. 1, 2:12.

13. Natusolola ngachilihi ngwetu twamona kuyoya chize atuhana Kalunga kupwa chachilemu nge vali nakusaka kutuhaka manyinga?

¹³ Vinjiho jaYehova vavatachikijila hakumona manyinga kupwa ajila. Tweji kukavangizanga lushimbi lwaYehova kutalisa kumanyinga, hakukana kutuhaka manyinga numba tuhu tunaviji misongo yakufwa nakuyoya. (Vili. 15:28, 29) Chipwe ngocho, echi kachalumbununa nge twasaka kufwako. Oloze twamona kuyoya chize atuhana Kalunga kupwa chachilemu. Twasaka kutukafwa kuli vandotolo vaze navetavila kutuka mujila yamwaza chakuzeneka kutuhaka manyinga.

14. Natuhasa ngachilihi kukehesako misongo yayinene?

¹⁴ Tunahase kukehesako misongo yayinene nge natukavangizanga vyuma vanahanjika muchihande chino kutalisa kukulikangula. Nge natupwa vakulikangula kaha natuyoyanga washi nge vanatupulu. Tunahase nawa kukehesako ukalu wakusakiwa kutupula, nge natumbilanga vyuma vize vinahase kuneha ponde hembo chipwe kumilimo, nakukavangizanga jishimbi jahamukwakwa.

15. (a) Mwomwo ika twatela kutambukanga nakati yajishiko jakupandama kumanyinga yize tunasoneka mukalinwaha? (Talenu nawa muvwimbimbi.) (b) Kweseka navindiyo, vyuma muka navitukafwa tusakule kanawa mwakutukila hachihande chamanyinga?

¹⁵ Twasakwilila Kalunga hakutuhana kuyoya, ngocho tweji kusonekanga kati yakwamba  ngwavo Jishiko Ngunalikase Hakulikangula chaMujimba, nakutambukanga nayo lwola lwosena. b Eyi kati yikiko tweji kuzachisanga hakulumbununa vishinganyeka vyetu kutalisa kukuhaka manyinga najijila jeka jakukilamo. Kutala muli nakati yize munasoneka kalinwomu tahi? Nge kamweshi nayoko, chipwe nge muli nakusaka kusoneka yayihya, kaha kanda kulangisa kuyisonekako. Kusoneka kanawa vishinganyeka vyetu hakati kana nachikatukafwa vakatuke washi chakuzeneka kwenyeka lwola. Nachikafwa nawa vandotolo vatuhane vitumbo navilita namusongo wetu vize kavyeshi kutuhitulako. c

16. Chuma muka twatela kulinga nge katwatachikijile kanawa mwakusonekela kati yajishiko jamwakutukilako?

¹⁶ Numba tupwa tuvakweze chipwe vakulikangula ngachilihi, tuvosena tunahase kupwa muponde chipwe kuviza. (Kwambu. 9:11) Shikaho nachiwaha kusonekela chimweza kati yajishiko jamwakutukila. Nge kamwatachikijile kanawa mwakusonekela kati kanako, kaha lwezenu vakulwane muchikungulwilo chenu vamikafwe.  Veji kuzatanga nangolo vevwishise mwakusonekela kati kana, olozenyi kaveshi kumisakwila jila yakumyukilamoko. Mwatela kulisakwila enu vavene. (Ngale. 6:4, 5) Chipwe ngocho, navamikafwa mwivwishise kanawa mwalumbunukila vyuma muli nakusaka kusakula, nakuvisoneka nawa.

17. Natusolola ngachilihi ngwetu tuvaka-kwashiwisa muchima hachihande chamwakutukila?

¹⁷ Vyuma vyavivulu tweji kusakulanga kutalisa kukulikangula chetu najijila jakutukilamo, vyapendamina hachivezu chetu chize vanangula naMbimbiliya. (Vili. 24:16; Chimo. 1, 3:9) Nge tunasakula vyakulinga nakuvishimutwila navakwetu, nachiwaha nge natukavangizanga lundongi lwahali Wavaka-Fwilipi 4:5 lwakwamba ngwavo: “Vatu vosena vamone ngwavo mwapwa muvaka-kwashiwisa muchima.” Nge natupwa vaka-kwashiwisa muchima kaha katweshi kulizakaminanga chikuma hakulikangula chetu, chipwe kushinjila vakwetu vakavangize vishinganyeka vyetuko. Twazanga vandumbwetu nakuvavumbika numba tuhu vyuma navasakula navilihandununa navize tunasakula etu.—Loma 14:10-12.

18. Natusolola ngachilihi ngwetu twasakwilila Yehova hakutuhana kuyoya?

¹⁸ Tweji kusololanga ngwetu twasakwilila Yehova uze atuhana kuyoya, hakukinga kuyoya chetu nakumuzachila kweseka noho hakumina ngolo jetu. (Kuso. 4:11) Muholyapwanyi, tunatachikiza ngwetu natuvizanga nakumona ukalu. Oloze Tengi yetu kajinyine tuyoye mujila kanako. Kalinwomu atuhane kuyoya chahaya myaka chakuzeneka kwivwa kukola nakufwa. (Kuso. 21:4) Oholyapwa twawahilila hakupwa tuvavatonyi nakuzachila Setu wamwilu wazangi, Yehova.