1. Vyuma muka vyasolola nge Yesu amwenenga Visoneka kupwa vyavilemu?

 ACHISHINGANYEKENU omwo vevwilenga vaze vevwilililenga kukunangula chaYesu. Kakavulu ahanjikilenga mazu amuVisoneka Vyajila vize alaminyinyinenga mumutwe. Chakutalilaho, mazu enyi atete aze ahanjikile hanyima yakumumbapachisa namazu amwe aze ahanjikile shimbu kanda afwenga, apwile amuVisoneka. b (Lushi. 8:3; Samu 31:5; Luka 4:4; 23:46) Kaha hamyaka yitatu nachimbwa kufuma hakumumbapachisa nakuheta kukufwa chenyi, ahanjikilenga mazu amuVisoneka kumeso avatu, nakuvitanga nakuvilumbununa.—Mateu 5:17, 18, 21, 22, 27, 28; Luka 4:16-20.

2. Omu Yesu apwile nakukola, vyuma muka vyamukafwile atachikize kanawa Visoneka? (Talenu muvwimbimbi wahalipapilo lyahelu.)

² Hamyaka yayivulu shimbu kanda Yesu aputuke kuzata mulimo wenyi, atangilenga Mazu aKalunga nakuwevwilila mapapa kakavulu. Twatachikiza ngwetu omu apwilenga hembo, evwilenga Maliya naYosefwe navahanjika mazu amuVisoneka hakushimutwila mwatanga. c (Lushi. 6:6, 7) Kaha nawa Yesu ayilenga kusunangonga haSambata hiSambata navisemi jenyi mwatanga. (Luka 4:16) Chasoloka nge, hakupwa kuSunangonga, ahakilengako chikuma muchima omu vatangilenga Visoneka. Kaha kutwala muze, Yesu alinangwile jino kulitangila ivene yize Mikanda Yajila. Echi chalingishile Yesu atachikize Visoneka nakuvizanga nakuvizachisa mukuyoya chenyi. Chakutalilaho, anukenu vyuma vyasolokele mutembele omu Yesu apwile namyaka yakusemuka 12. Vaka-kunangula  vaze vatachikijile kanawa Jishimbi jize vahanyine Mose, “valikomokelele chikuma hakunangakana [chaYesu] nomu akumbulwilenga vihula.”—Luka 2:46, 47, 52.

3. Vyuma muka natushimutwila muchihande chino?

³ Nayetu tunahase kutachikiza Mazu aKalunga nakuwazanga kachi nge natutanganga Visoneka hakumbi hakumbi. Vyuma muka navitukafwa tunganyale kumazu natutanga? Tunahase kulinangula kumazu ahanjikile Yesu kuli vaka-kusoneka, navaFwaliseu, navaSatuse navatu veka vaze vatachikijile Jishimbi. Vaze vatwamina vamukwitava vatangilenga Visoneka mapapa kakavulu, oloze kavanganyalilenga kuvyuma vatangilengako. Yesu avulukile vyuma vitatu vize vyavalingishile vahone kunganyala kuVisoneka. Mazu ahanjikile kuli vakiko nawatukafwa tuhotole uhashi wetu (1) wakwivwishisa vyuma natutanga, (2) nakuwana vishina vyavilemu, (3) nakwitavila Mazu aKalunga atwalumune.

4. Uno mukanda waLuka 10:25-29 watunangula vyuma muka kutalisa kukutanga Mazu aKalunga?

⁴ Twasaka kwivwishisa omwo vyatalikisa vyuma tweji kutanganga muMazu aKalunga. Nge katweshi kwivwishisako, kaha katweshi kunganyala kuvyuma natutangako. Chakutalilaho, achishinganyekenu vyuma ashimutwilile Yesu “[namutu] umwe uze atachikijile chikuma Jishimbi.” (Tangenu Luka 10:25-29.) Omu uze mutu ahulishile Yesu amulweze vyuma atelele kulinga mangana akapwe nakuyoya chahaya myaka, Yesu azachishile Mazu aKalunga hakumuhulisa ngwenyi: “MuJishimbi vasoneka ngwavo ika? Weji kutangangamo ika?” Ou mutu akumbulwile mwakwoloka hakuhanjika mazu amuvisoneka vize vyahanjika hakuzanga Kalunga navakwetu vatu. (Levi 19:18; Lushi. 6:5) Oloze ivwenu chihula ahulishile cheka. Ambile ngwenyi: “Uno iya chikupu napu mukwetu?” Ou mutu asolwele nge kevwishishilenga mwalumbunukilile vyuma atangilengako. Ngocho katachikijile mwakuzachishila kanawa vize Visoneka mukuyoya chenyiko.

5. Uno kulomba nakutanga chikoki navitukafwa ngachilihi nge tuli nakutanga Mbimbiliya?

⁵ Tunahase kwivwishisa kanawa Mazu aKalunga kachi nge natulinga vyuma vize navitukafwa nge tuli nakutanga. Ivwenu vyuma vinakavangizaho vize vinahase kumikafwa. Lombenunga shimbu kanda muputuke kutanga. Hakuwana nge twasakiwa kutukafwa kuli Yehova numba twivwishise kanawa Visoneka, tweji kumulombanga atuhane shipilitu yenyi yajila mangana yitukafwe tuhake muchima kuvyuma tuli nakutanga. Kaha nawa, echi nachimikafwa mwivwishise vyuma muli nakutanga. Chuma chikwavo nachimikafwa mwivwishise vyuma muli nakutanga shina kutanganga chikoki chikoki. Kutangila helu chipwe kwivwilila kumazu akukopa oku muli nakukavangiza muMbimbiliya yenu nachimikafwa. Kwivwilila kumazu akukopa oku muli nakuwamona, nachimikafwa muwevwishise nakuwanuka, nakulinangula nawa vyavivulu kuMazu aKalunga aze muli nakutanga. (Yoshu. 1:8) Nge munakumisa kutanga, kaha lombenu cheka kuli Yehova nakumusakwilila haMazu enyi aze atuhana kupwa wana, nakumulomba nawa amikafwe muzachise vyuma munatange.

6. Uno kulihulisa vihula nakusoneka vishina mukavatu nachimikafwa ngachilihi omu muli nakutanga? (Talenu nawa muvwimbimbi.)

⁶ Kuli nawa vyuma vyeka vivali vize vinahase kumikafwa mwivwishisenga kanawa Mbimbiliya. Lihulisenunga vihula kutalisa kuvyuma munatange. Omu namutanga lihulisenu ngwenu: ‘Vatu muka vali mumujimbu kana? Iya ali nakuhanjika? Ali nakuhanjika neya, kaha mwomwo  ika? Uno vyuma kana vyalingiwilile kumwe kulihi, kaha lwola muka?’ Vihula kana navimikafwa mushinganyeke havishina vili mumujimbu nakuvikavangiza. Kaha nawa omu namutanga, sonekenunga vishina mukavatu. Nge namusoneka vyuma munatange, kaha namuvishinganyeka chikuma nakumikafwa muvivwishise kanawa. Kusoneka nachimikafwa nawa mwanukenga vyuma munatange. Munahase kusoneka vihula, chipwe vyuma munawane omu munahehwojola, chipwe vishina vyavinene, chipwe omwo muli nakusaka kuzachishilamo vyuma munatange, chipwe omwo muli nakwivwa havyuma munatange. Kusoneka vyuma kana nachimikafwa mumone Mazu aKalunga kupwa himujimbu uze Kalunga amisonekela enu halwenu.

7. Uhashi muka twasakiwa nge tuli nakutanga, kaha mwomwo ika? (Mateu 24:15)

⁷ Yesu ambile ngwenyi chuma chachilemu nachitukafwa twivwishise kanawa vyuma tuli nakutanga muMazu aKalunga, shina kunangakana. (Tangenu Mateu 24:15.) Uno kunangakana chapwa chika? Chapwa uhashi wakukekesa omwo chishina chimwe chalikwatasana nachikwavo, nomwo nawa chalihandununa nachishina cheka, nakumona nawa vishina vize kavalumbunwine hatomako. Kaha nawa ngana muze asolwelele Yesu, twasakiwa kupwa vakunangakana numba tumone vyuma vili nakusoloka vize vili nakutesamo upolofweto wamuMbimbiliya. Twasakiwa nawa uhashi kana mangana tunganyale chikuma kuvyuma vyosena tweji kutanganga muMbimbiliya.

8. Uno kutanga nauhashi wakunangakana chasakiwa kulinga ika?

⁸ Yehova eji kuhananga vangamba jenyi uhashi wakunangakana. Shikaho mulombenunga amikafwe mupwenga nauhashi kana. (Vishi. 2:6) Vyuma muka namulinga vize navilita navyuma munalombo? Kekesenunga vyuma munatange nakumona omwo vinalikwatasana navyuma vyeka vize mwatachikiza lyehi. Zachisenunga mikanda yakukafwa kulinangula Mbimbiliya mangana yimikafwe. Chakutalilaho, munahase kuzachisa  Chinoma Chakukafwa Vinjiho jaYehova Kuhehwojola. Evi vinoma vyakuzachisa hakulinangula navimikafwa mwivwishise mijimbu yamuMbimbiliya nakumona omwo munahase kuyizachisa mukuyoya chenu. (Hepe. 5:14) Omu namutanganga nauhashi wakunangakana namwivwishisanga jino chikuma Visoneka.

9. Muchano muka waulemu wamuVisoneka uze vakanyine kwitavila vaSatuse?

⁹ VaSatuse vatachikijile kanawa mikanda yakulivanga yitanu yamuVisoneka vyachiHepeleu. Oloze kavetavilile vishina vyamuze mumikanda vahwimako. Chakutalilaho, achishinganyekenu omwo Yesu akumbulwile vaSatuse vaze vamuhulishile hachihande chakusanguka. Avahulishile ngwenyi: “Uno kanda mutangengaho lyehi mujimbu wachiputa, mumukanda waMose omu Kalunga ambile kuli ikiye ngwenyi: ‘Ami yami Kalunga kaApalahama, Kalunga kaIsaka, Kalunga kaYakovako’ tahi?” (Mako 12:18, 26) Numba tuhu vaSatuse vatangilenga mujimbu kana mapapa kakavulu, oloze chihula chaYesu chasolwele nge vakanyine kwitavila kunangula chachilemu chamuVisoneka chize chahanjika hakusanguka.—Mako 12:27; Luka 20:38. d

10. Uno twatela kuhaka muchima kuvyuma muka nge tuli nakutanga?

¹⁰ Chishina muka natulinangulako? Nge tuli nakutanga, twatela kuhakanga muchima kuvishina vyosena nayitunangula vesi chipwe mujimbu wamuMbimbiliya. Katwatela kukuminanga kaha hakunangula chamaputukiloko, oloze navishina najindongi jakujiminyina.

11. Kweseka nachisoneka chaWaChimoteu 2, 3:16, 17, namuhasa ngachilihi kuwana vishina vyavilemu muMbimbiliya?

¹¹ Namuhasa ngachilihi kuwana vishina vyavilemu nge muli nakutanga Mbimbiliya? Talenu vyuma chahanjika chisoneka chaWaChimoteu 2, 3:16, 17. (Tangenu.) Ngwavo “Visoneka vyosena . . . vinawahila” (1) kunangula, (2) nakuhanjikila, (3) nakwolola vyuma, (4) nakuzangamisa. Munahase kulinangula vyumevi viwana namumikanda yamuMbimbiliya yize kamwavula kuzachisako. Kekesenu mujimbu wamuMbimbiliya mangana mumone vyuma nauminangula hali Yehova, chipwe havyuma ajina, chipwe hajindongi jaKalunga. Shinganyekenu omwo mujimbu kana unawahila kuhanjikila. Lingenu ngocho hakukekesa mumone omwo jivesi munatange najimikafwa mumone jitato jajipi jize mwatela kulihendako nakutwalaho lika kupwa vakushishika kuli Yehova. Kekesenu mumone omwo mujimbu munatange unahase kumikafwa mwolole vishinganyeka vyakuhenga, pamo vize mwaliwananga navyo mumulimo wamuwande. Kaha nawa talenu omwo jivesi munatange jinahase kumizangamisa nakuminangula mushinganyeke ngana muze eji kushinganyekanga Yehova. Nge namushinganyekanga havyumevi viwana, kaha namuwananga vishina vyavilemu vize navimikafwa munganyale hakutanga Mbimbiliya.

12. Mwomwo ika Yesu ahulishile vaFwaliseu chihula chakwamba ngwavo, “Uno kanda mutangengaho lyehi [nyi]?”

¹² Yesu hakusaka asolole ngwenyi vaFwaliseu vapwile navishinganyeka vyakuhenga kutalisa kuVisoneka, avahulishile nawa ngwenyi “Uno kanda mutangengaho lyehi [nyi]?” (Mateu 12:1-7) e Halwola kana, vaFwaliseu vahanjikile ngwavo tumbaji twaYesu vahokwele lushimbi lwaSambata. Yesu akumbulwile vaFwaliseu hakuvuluka vyakutalilaho vivali vyamuVisoneka, nakuhanjika mazu amumukanda waHozeya mangana asolole ngwenyi vaFwaliseu kavevwishishile lushimbi lwaSambatako, kaha nawa kavapwile namuchima wakutetelako. Mwomwo ika ava malunga vahonene kwalumuka havyuma vatangilenga muMazu aKalunga? Mwomwo vatangilenga Mazu aKalunga mangana vawanyine vakwavo tutenga. Muchima kana wavalingishile vahone kwivwishisa vyuma vatangilenga.—Mateu 23:23; Yowa. 5:39, 40.

13. Muchima muka twatela kupwa nawo nge tuli nakutanga Mbimbiliya, kaha mwomwo ika?

¹³ Vyuma tunalinangula kumazu aYesu shina, twatela kutanganga Mbimbiliya namuchima wakulinyisa. Katwatela kupwa ngana mwavaFwaliseuko, oloze twatela kulinyisa nakwitavila vatunangule. Twatela ‘kuvwovuwisa muchima nakwitavila mazu awa navatumba muli etu.’ (Yako. 1:21) Nge natuvwovuwisa michima yetu, kaha natwitavila Mazu aKalunga atwalumune. Nge katweshi kupwa namuchima wakulivwimba wakufwila kuwanyina vakwetu tutengako, kaha vishina vyamuMbimbiliya vyakutalisa kukeke, nakutetela nazangi navitwalumuna.

14. Natutachikiza ngachilihi ngwetu tunetavila Mbimbiliya yitwalumune? (Talenu nawa mivwimbimbi.)

¹⁴ Jila natutwaminamo navakwetu nayisolola  nge tunetavila Mazu aKalunga atwalumune chipwe chiku. VaFwaliseu kavetavilile Mazu aKalunga avalumuneko, ngocho ‘vawanyinyine milonga vatu vakuzeneka milonga.’ (Mateu 12:7) Chochimwe nawa, jila natutwaminamo navakwetu nayisolola nge tunetavila Mazu aKalunga atwalumune chipwe chiku. Kutala twavula kuhanjika havyuma vyamwaza tweji kumonanga muli vakwetu tahi, nyi tweji kulahilanga kaha kuvuluka tutenga twavo? Kutala tweji kutetelanga vakwetu nakuvakonekela, nyi tweji kuvawanyinanga tutenga nakuvalamina koko? Kulikekesa mujila kana nachitukafwa tumone numba nge tunetavila vyuma tweji kutanganga vyalumune vishinganyeka vyetu navilinga vyetu nomwo tweji kwivwanga.—Chimo. 1, 4:12, 15; Hepe. 4:12.

15. Uno Yesu amwenenga ngachilihi Visoneka Vyajila?

¹⁵ Yesu azangile chikuma Visoneka vyajila, kaha jila avimwenenenemo vayipolofwetelele chimweza hali Samu 40:8, ngwavo: “Ove Kalunga kami, ngwasaka kulinga mwaya muchima wove, jishimbi jove jili mumuchima wami.” Echi chamulingishile apwenga wakuwahilila nakutwalaho lika kuzachila Yehova. Nayetu nawa tunahase kupwa vakuwahilila nakutwalaho lika kuzachila Yehova nge natwitavila Mazu aKalunga apwenga mumichima yetu.—Samu 1:1-3.

16. Vyuma muka muli nakufwila kulinga mangana munganyale chikuma hakutanga Mazu aKalunga? (Talenu lipwata lyakwamba ngwavo “ Mazu aYesu Anahase Kumikafwa Mwivwishise Vyuma Muli Nakutanga.”)

¹⁶ Tuhotolenu uhashi wetu wakutanganga Mbimbiliya kweseka namuze ahanjikile Yesu navyuma alingile. Tunahase kuhotola uhashi wetu wakwivwishisa mijimbu yamuMbimbiliya hakulomba kuli Yehova, nahakutanganga chikoki, nahakulihulisanga vihula nahakusonekanga vishina mukavatu. Tunahase kuzachisa uhashi wakunangakana hakukekesa kanawa vyuma tunatange, kuzachisa mikanda yetu yize yahanjika haMbimbiliya. Tunahase kulinangula mwakuzachishila kanawa Mbimbiliya kuhakilako vene namijimbu yize katwatachikiza kanawako hakufwila kuwana vishina vyamumijimbu natutanga. Tunahase nawa kwitavila Mazu aKalunga atwalumune hakuwatanganga namuchima wamwaza. Shikaho nge natuzachisa eji jijila tunashimutwila, kaha natwivwishisa chikuma vyuma tunatange muMbimbiliya nakupandama chikuma kuli Yehova.—Samu 119:17, 18; Yako. 4:8.