Vamwene Omwo Vavasolwelele Zangi
YOMARA navasongo jenyi vamalunga Marcelo naHiver vatwama mungalila yakumembo yamuGuatemala. Yomara aputukile kulinangula Mbimbiliya naVinjiho jaYehova, kaha kutwala muze navasongo jenyi vaputukile kulinangula. Oloze kwapwile ukalu umwe. Vosena vatatu vapwa tupuputa kaha kavatachikijile kutanga vasona vatupuputako. Shikaho, muka-kuvanangula Mbimbiliya ikiye atangilenga mukanda vapwile nakulinangula, nakutanga nawa jivesi jamuMbimbiliya.
Chapwilenga nawa chachikalu kuya kukukunguluka. Kavahashilenga kutambuka minyutu 40 ukawavo mangana vahete kuZuvo yaWangana yapwile mwakamwihi navakikoko. Oloze vandumbwetu muchikungulwilo valongesele vyuma mangana ava vatu vayenganga kukukunguluka. Kaha omu vaputukile kuhanjikanga vihande mushikola hakukunguluka chamukachi kachalumingo, vandumbwetu vavakafwilenga valamine mumutwe vihande vyavo.
Kuheta muMay 2019, vaputukile jino kukungulukila kwakamwihi nangalila yavo. Kaha halwola kana mungalila yavo mwejile valunga napwevo vaze vapwile vapayiniya vashimbu yosena. Ava vapayiniya kavatachikijile kutanga nakusoneka vasona vatupuputako, oloze vasakile kunangula ava tupuputa kutanga nakusoneka. Ngocho vayile kuzuvo yakulamina mikanda nakukambata mikanda yamuvasona vatupuputa nakuputuka kulinangula mwakunangwila vakwavo.
Marcelo ali nakukumbulula hakukunguluka chachikungulwilo
Mutukweji vavandende kaha, ava tupuputa vaputukile kutanga vasona vatupuputa, ngocho vaputukile kuzovoloka kushipilitu. a Oholyapwa Yomara, naMarcelo, naHiver vapwa vapayiniya vashimbu yosena. Kaha Marcelo apwa muka-kuzachila. Vosena veji kuzachilanga Yehova natwima chalumingo hichalumingo. Ngocho navandumbwetu veka vali nakuvalondezeza mwomwo yatwima yavo.
Ava vandumbwetu vatatu veji kusakwililanga chikungulwilo hakuvakafwa mujila yazangi. Yomara ambile ngwenyi: “Kufuma vene halwola twatachikijile Vinjiho jaYehova, tunamononga zangi yauKulishitu vanatusolwelanga.” Marcelo nawa ambile ngwenyi: “Twatwama namasepa vamwenemwene muchikungulwilo chetu, kaha twamona ngwetu twatwama mutanga yamukaye kosena yize yalinunga muzangi.” Yomara navasongo jenyi veji kutalililanga likumbi lize Yehova mwakalumuna mavu kupwa palachise.—Samu 37:10, 11; Isa. 35:5.
a Mbuloshuwa yamuChingeleshi yakwamba ngwavo Learn to Read Braille (Linangule Kutanga Vasona vaTupuputa) vayihakako mangana yikafwe tupuputa chipwe vaze kavamona kanawako vatachikize kutanga nakusoneka vasona vatupuputa.
Pamo Nauzanga Nawa
MUJILA LIUKA LYEJI KUZACHISHILANGAMO MAWANA ENU
Matomeka Aze Eji Kwalumunanga Kuyoya chaVatu
Katwalovola kaha mikanda yamuvasona vatupuputako, oloze tweji kunangulanga nawa vatu vatachikize kutanga vasona vatupuputa.
