1. Vyuma muka vyamilingisa musakwilile Yehova hakumihana Mbimbiliya?

 TWASAKWILILA Yehova Kalunga hakutuhana Mbimbiliya. Atuhana jindongi kuhichila muMbimbiliya mangana tulipike naukalu uze tweji kumonanga. Atuhana nawa vyuma vyamwaza vize twatalilila kulutwe. Chuma chachilemunyi, Yehova nazachisa Mbimbiliya mangana asolole vilinga vyenyi vyavivulu. Omu tweji kushinganyekanga havilinga vyenyi vyamwaza, tweji kwivwanga kuwaha chikuma kumuchima nakutukafwa nawa tupandame chikuma kuli Kalunga ketu hakupwa nausoko wamwaza naikiye.—Samu 25:14.

2. Jijila muka jakulisezaseza jize Yehova nalisolwelangamo kuvatu?

² Yehova asaka vatu vamutachikize. Kushikulu alisolwelenga kuhichila muvilota namuvyakumwenesa namuvangelo. (Kula. 12:6; Vili. 10:3, 4) Uno vilota navyakumwenesa chipwe mijimbu yakufuma kuli vangelo tunahase kuvitachikiza ngachilihi kachi nge kavavisonekeleko? Echi chikiko chalingishile Yehova alweze vatu ‘vasoneke mumukanda’ vyuma vize asakile tutachikize. (Yele. 30:2) Hakuwana nge “jila yaKalunga wamuchano yapwa yakukupuka,” ngocho twafwelela ngwetu eyi jila azachisa yakushimutwililamo nayetu yapwa yamwenemwene kaha nawa yanganyo.—Samu 18:30.

3. Uno Yehova nakinginga ngachilihi Mbimbiliya? (Isaya 40:8)

³ Tangenu Isaya 40:8. Mazu aKalunga anahanenga jindongi jamwenemwene kumalunga namapwevo vakushishika hamyaka yayivulu. Uno chinapunga ngachilihi ngocho? Visoneka vavisonekele kushikulu havyuma vize vyeji kupolanga. Ngocho makumbi ano kakweshi mikanda yakulivangako. Oloze Yehova akafwile vatu mangana vanungulule kanawa mazu ajila. Numba tuhu vaka-kunungulula kavapwile vakukupukako, oloze vapwile  vakuvanguluka. Lunga umwe asonekele kutalisa kuVisoneka vyachiHepeleu ngwenyi: “Twafwelela chikupu ngwetu kakweshi mukanda weka uze wapwa wakwoloka kuhambakana Mbimbiliyako.” Numba tuhu mazu tweji kutanganga mujiMbimbiliya jetu vawasonekele kushikulu kaha nawa havyuma vize vyeji kupolanga, vaka-kunungulula nawa kavapwile vakukupukako, oloze twafwelela ngwetu mazu kana afuma kuli Yehova uze apwa Mwenyayo.

4. Vyuma muka natushimutwila muchihande chino?

⁴ Kuli Yehova kukiko kwafuma “mawana amwaza osena namawana akukupuka osena.” (Yako. 1:17) Mbimbiliya hiwana wamwaza uze atuhana Yehova. Nge mutu natuhane wana, cheji kusololanga nge mutu kana atutachikiza kanawa, kaha nawa atachikiza vyuma twasakiwa. Omu mukiko chapwa nakuli Yehova uze atuhana Mbimbiliya. Kachi nge natukekesa kanawa wana kana, kaha natutachikiza vyavivulu hali Yehova. Natumona nawa ngwetu atutachikiza kanawa, kaha nawa atachikiza vyuma twasakiwa. Muchihande chino, natushimutwila omwo Mbimbiliya yasolola vilinga vitatu vyaYehova. Vilinga kana shina mangana, nachiyulo nazangi yenyi. Tushimutwilenu chatete jila Mbimbiliya yasolwelamo mangana aKalunga.

5. Jila muka yimwe yize Mbimbiliya yasolwelamo mangana aKalunga?

⁵ Yehova atachikiza ngwenyi twasakiwa kuhuhumuna chamangana chakufuma kuli ikiye. Kaha mangana kana atwama muMbimbiliya yize atuhana kupwa wana. Kuhuhumuna chamuMbimbiliya cheji kunehanga vyuma vyamwaza kuvatu. Mbimbiliya yeji kwalumunanga kuyoya chavatu. Omu mikanda yakulivanga yamuMbimbiliya vayisonekele, Mose alwezele vaIsalele vatu jaKalunga ngwenyi: “Awa kaweshi himazu amokomokoko, oloze anapu kuyoya chenu.” (Lushi. 32:47) Vaze vakavangijilenga Visoneka vapwilenga vakusuuluka, kaha nawa vakuwahilila mukuyoya. (Samu 1:2, 3) Numba tuhu Mazu aKalunga vawasonekele kushikulu, oloze achili nakwalumuna kuyoya chavatu noholyapwa. Chakutalilaho, ha jw.org, hachihanda chakwamba ngwavo, “Mbimbiliya Yeji Kwalumunanga Kuyoya chaVatu,” hali vihande vyavivulu vinasolola omwo Mbimbiliya ‘yili nakuzata muli vaka-kwitava’ makumbi ano.—Teso. 1, 2:13.

6. Mwomwo ika natwambila ngwetu Mbimbiliya yahambakana mikanda yosena?

⁶ Kakweshi mukanda weka wahambakana Mazu aKalungako. Mwomwo ika? Mwomwo Yehova Kalunga uze apwa Mwenyamukanda kana apwa wangolo josena, wahaya myaka, kaha nawa wamangana chikuma kuhambakana kala mutu. Numba tuhu mikanda veji kusonekanga vamwe yeji kushimbulanga kuzomboka navenyayo vaze vayisonekele oloze mijimbu yatwamamo yeji kusekanga mukuhita chalwola. Omwo keshi mukiko yapwa Mbimbiliyako, mwomwo jindongi jamwenemwene jatwamamo japwa jahaya myaka, kaha nawa jeji kunganyalisanga vatu vosena kala lwola. Omu tweji kutanganga ou mukanda wajila, nakushinganyeka havyuma tweji kulinangulanga, Mwenyamukanda kana eji kuzachisanga ngolo jenyi yikiko shipilitu yenyi yajila mangana yitukafwe tumone omwo tunahase kuzachisa jindongi jamuMbimbiliya mukuyoya chetu. (Samu 119:27; Mala. 3:16; Hepe. 4:12) Chikupu vene, Mwenya-Mbimbiliya uze ayoya afwila kumikafwa. Echi chatela kutukunyula tutangenga Mbimbiliya hakumbi hakumbi.

7. Uno Mbimbiliya yakafwile ngachilihi vatu jaKalunga kushikulu vapwenga vakulinunga?

⁷ Chuma chikwavo chasolola nge muMbimbiliya mwatwama mangana aKalunga shina,  yeji kukafwanga vatu jaKalunga vapwenga vakulinunga. Omu vaIsalele vengilile muLifuchi lyaLushiko vatwaminenga kuvihela vyakulisezaseza. VaIsalele vamwe vapwilenga vaka-kuta ishi, veka valaminenga vimuna, kaha vakwavo nawa vapwilenga vanjimi. VaIsalele vaze vatwaminenga kuchihela chimwe, chapwilenga chachashi kuhona kuzakama vakwavo vaIsalele vaze vatwaminenga kuvihela vyeka. Oloze Yehova alongesele vyuma mangana vaIsalele valikungulwilenga hamwe nakwivwilila kuMazu enyi navatanga nakuwalumbununa. (Lushi. 31:10-13; Nehe. 8:2, 8, 18) Achishinganyekenu kuwaha evwilenga kaIsalele wakushishika nge nahete kuYelusalema, nakumona pamo vakwavo vaka-kulemesa Kalunga vavavulu vakufuma kuvihela vyakulisezaseza mulifuchi. Yehova akafwilenga vatu jenyi vapwenga vakulinunga. Kutwala muze, omu chikungulwilo chavaka-Kulishitu vachitungile chapwilenga navatu vahanjikilenga malimi akulisezaseza, navatu vavalemu navava vamokomoko navaka-luheto navihutu. Oloze vatu kana vapwile vakulinunga mukulemesa chaKalunga wamuchano mwomwo vazangile Visoneka. Vaze vejile nakupwa vaka-kwitava vevwishishilenga Mazu aKalunga hakuvakafwa kuli vakwavo vaka-kwitava nakulikungulwilanga navo hamwe.—Vili. 2:42; 8:30, 31.

8. Uno Mbimbiliya yili nakukafwa ngachilihi vatu jaYehova makumbi ano vapwenga vakulinunga?

⁸ Kalunga ketu wamangana achili lika nakunangula  vatu jenyi kuzachisa Mbimbiliya nakuvakafwa vapwenga vakulinunga. MuMbimbiliya mukiko mwatwama kulya chakushipilitu chize tweji kulivwisanga kuwaha. Tweji kulikungulwilanga hamwe kukukunguluka chachikungulwilo nachachihanda nachangalila mangana twivwilile kuVisoneka navatanga nakuvilumbununa nakuvishimutwila. Shikaho Mbimbiliya yapwa hichinoma chachilemu chize Yehova eji kuzachisanga mangana akafwe vaka-kumulemesa ‘valinunge hamwe nakumuzachila.’—Zefwa. 3:9.

9. Muchima muka twatela kupwa nawo numba twivwishise mujimbu wamuMbimbiliya? (Luka 10:21)

⁹ Tushimutwilenu nawa chuma chikwavo chasolola mangana aYehova. Asoneka Visoneka vyavivulu mujila yize navevwishisa kaha kuli vatu vakulinyisa. (Tangenu Luka 10:21.) Vatu kuvihela vyosena veji kutanganga Mbimbiliya. Mutu umwe uze alinangula chikuma ambile ngwenyi, Mbimbiliya “ukiko kaha mukanda veji kutanganga kuvatu vavavulu, kaha nawa veji kuutanganga kanawa kuhambakana mikanda yeka.” Oloze vatu vakulinyisa kaha vakiko veji kuyivwishisanga nakukavangiza vyuma vyatwamamo.—Koli. 2, 3:15, 16.

10. Jila muka yikwavo yize Mbimbiliya yasolwelamo mangana aYehova?

¹⁰ Tweji kulinangulanga nawa mangana aYehova amuMbimbiliya mujila yeka. Yehova eji kuzachisanga Visoneka hakutunangula mwalizavu nakutuhana jindongi nakutuvendejeka mutu himutu. Omu tweji kutanganga Mazu aYehova tweji kumonanga ngwetu Yehova atuzakama mutu himutu. (Isa. 30:21) Nge muli nakumona ukalu, mapapa kangahi mweji kumbatanga Mbimbiliya nakutanga jivesi jize najisoloka kwijiva nge vajisonekelele yenu? Vatu vavavulu veji kwivwishisanga Mbimbiliya. Mwomwo ika mujimbu wamuMbimbiliya wapwila lika himujimbu uze unahase kumikafwa mutu himutu? Mwomwo MwenyaMbimbiliya apwa wamangana chikuma.—Chimo. 2, 3:16, 17.

11. Uno Kalunga asolwele ngachilihi nge katala vatu kumesoko halwola vasonekele Mbimbiliya?

¹¹ Havilinga vize atwama navyo Yehova, hatwama nachiyulo. (Lushi. 32:4) Chiyulo chatambukila hamwe nakuhona kutala vatu kumeso, kaha Yehova katala vatu kumesoko. (Vili. 10:34, 35; Loma. 2:11) Kuhona chenyi kutala vatu kumeso chasolokelele mumalimi aze vazachishile hakusoneka Mbimbiliya. Mikanda 39 yakulivanga yamuMbimbiliya vayisonekele chikumanyi muchiHepeleu, lilimi lize vevwishishilenga vatu jaKalunga halwola kana. Oloze kuheta mulikulukaji lyamyaka lyakulivanga C.E., lilimi lyachiHelase likiko vahanjikilenga kuvatu vavavulu. Ngocho mikanda 27 yamakumishilo yamuMbimbiliya vayisonekele mulilimi kana. Yehova kasakile Mazu enyi vawasoneke mulilimi limwe kahako. Makumbi ano, vatu vakukokela kujimbiliyoni 8 vatwama hano hamavu veji kuhanjikanga malimi akulisezaseza. Uno vatu vavavulu ngana navahasa kulinangula ngachilihi hali Yehova?

12. Jila muka yimwe chinateselamo chisoneka chaNdanyele 12:4 mumakumbi ano akukuminyina?

¹² Yehova ashikile kuhichila muli kapolofweto Ndanyele ngwenyi hamakumbi akukuminyina, “chinyingi chamwenemwene” chamuMbimbiliya “nachikavula.” Kaha vavavulu navakachivwishisa. (Tangenu Ndanyele 12:4.) Chuma chimwe chinalingisa chinyingi kana chivule shina kuhichila mukwalumuna Mbimbiliya namikanda yahanjika haMbimbiliya nakuyihaka hakeyala yetu nakuyipangila kuvatu. Mbimbiliya ukiko mukanda uze valumuna chikuma nakuupangila kuvatu vavavulu mukaye kosena. Lwola lumwe jiMbimbiliya jize veji kulanjisanga japwa jandando yayinene  chikuma. Oloze vatu jaYehova vanalumuna Mbimbiliya yamuundu chipwe yachihanda mumalimi akuzomboka 240, kaha kala mutu nahase kupwa nayo hawana wakanyombo. Echi chinalingisa vatu vavavulu vakumafuchi osena vetavile “mujimbu wamwaza waWangana” shimbu kanda kukuma chizenga. (Mateu 24:14) Kalunga ketu wachiyulo asaka vatu vavavulu vamutachikize hakutanganga Mazu enyi. Echi chasolola nge atuzanga chikuma tuvosena.

13. Mwomwo ika natwambila ngwetu Mbimbiliya yasolola zangi yaYehova? (Yowano 21:25)

¹³ Mbimbiliya yasolola zangi yaMwenyayo, yize yapwa yayilemu havilinga vyosena atwama navyo. (Yowa. 1, 4:8) Achishinganyekenu hamijimbu yize Yehova ahakile muMbimbiliya nayize kahakilemoko. Asonekamo vyuma twasakiwa mangana tutunge usoko naikiye nakupwa vakuwahilila oholyapwa nakukapwa nakuyoya chahaya myaka. Chipwe ngocho, hakuwana nge Yehova atuzanga, katuhana mijimbu yayivulu yize katwasakiwako.—Tangenu Yowano 21:25.

14. Mujila muka yikwavo yize Mbimbiliya yasolola nge Kalunga atuzanga?

¹⁴ Yehova asolola nawa zangi yenyi hakushimutwila nayetu mujila yize yasolola nge atuvumbika. MuMbimbiliya Yehova kasonekamo mukana wajishimbi jize twatela kukavangiza munonamunona mukala chuma natulinga mukuyoyako. Oloze, azachisa mijimbu yakuyoya chavatu naupolofweto namazu akuhuhumuna mangana vitukafwe tusakule kanawa vyakulinga. Mazu aKalunga eji kutukafwanga tuzange Yehova nakumwononoka namuchima wetu wosena kuhichila mujijila kaneji.

15. (a) Uno Mbimbiliya yasolola ngachilihi nge Yehova atuzakama? (b) Kweseka namuvwimbimbi, uno ou kanyike kapwevo namukweze walunga nakashinakaji wapwevo, vali nakushinganyeka havatu muka vamuMbimbiliya? (Kupu. 39:1, 10-12; Vamya. 2, 5:1-3; Luka 2:25-38)

 ¹⁵ Mbimbiliya yasolola nge Yehova atuzakama chikuma. Mujila muka? MuMazu enyi mwatwama mijimbu yakuyoya chavatu vaze vasonekamo, yize yatukafwa twivwishise omwo vapwilenga nakwivwa hakuwana nge navakiko ‘vevwilenga nganomu tweji kwivwanga nayetu.’ (Yako. 5:17) Chuma chachilemu chikumanyi shina, tweji kutachikizanga ngwetu “Yehova atwama nazangi chikuma, apwa muka-kutetela” hakumona vyuma alingilenga kuvatu vaze vapwile ngana mwayetu.—Yako. 5:11.

16. Vyuma muka tweji kulinangulanga hali Yehova nge tuli nakutanga mijimbu yamuMbimbiliya yavatu vaze valimbenjelenga? (Isaya 55:7)

¹⁶ Kuli jila yikwavo yize Mbimbiliya yasolwelamo nge Yehova atuzanga. Visoneka vyatufwelelesa ngwavyo Kalunga ketu keshi kukatusezako numba nge tunalimbenje. VaIsalele valingilenga shili kuli Yehova mapapa kakavulu. Chipwe ngocho, Kalunga avakonekelelenga omu vapihilililenga nakwalumuka. (Tangenu Isaya 55:7.) Vaka-Kulishitu vamulikulukaji lyamyaka lyakulivanga, navakiko vatachikijile ngwavo Kalunga avazangile. Kaposetolo Paulu vamuhwiminyinyine akolezeze vakwavo vaka-kwitava ‘vakonekelenga nakuvendejeka’ mutu uze alingilenga shili yayinene, nge napihilila nakwalumuka. (Koli. 2, 2:6, 7; Koli. 1, 5:1-5) Ocho kuwaha kana hakutachikiza ngwetu Yehova kakanyinenga vaka-kumulemesa mwomwo yakulimbenja chavoko. Oloze avakafwilenga mujila yazangi nakuvolola nakuvalweza vakinduluke cheka kuli ikiye vapwenga masepa jenyi. Ashika kulinga mwomumwe nakuli vaka-shili vosena vaze navapihilila nakwalumuka makumbi ano.—Yako. 4:8-10.

17. Mwomwo ika Mbimbiliya yapwila wana waulemu?

¹⁷ Yehova atuhana wana wamwaza. Mwomwo ika Mazu enyi apwila amalemu? Ngana muze tunalinangula, Mbimbiliya yasolola mangana aKalunga, nachiyulo chenyi nazangi yenyi. Ou mukanda wasolola nge Yehova asaka tumutachikize nakupwa tumasepa jenyi.

18. Natusolola ngachilihi ngwetu twasakwilila Yehova hakutuhana “wana wamwaza” waMbimbiliya?

¹⁸ Twatela kwanukanga ngwetu Mazu aKalunga apwa “wana wamwaza.” (Yako. 1:17) Shikaho tutwalenuho lika kusakwilila Yehova hakutuhana wana kana. Tunahase kulinga ngocho hakutanganga mazu ajila atwamamo nakuwashinganyekanga. Nge natulinga ngocho kaha natufwelela ngwetu MwenyaMbimbiliya mwatukisula hakukilikita chetu “nakupwa nachinyingi chakumutachikiza Kalunga.”—Vishi. 2:5.