1-2. Vyuma muka navitukafwa twivwishise omwo Yehova eji kwivwanga kachi nge lijina lyenyi vanalipihisa?

 ACHISHINGANYEKENU hachumechi: Mutu uze mwazakama chikuma mwahanjika vyuma vyavipi hali enu. Kaha munatachikiza ngwenu vyuma ali nakuhanjika vyamakuli, oloze vamwe vanavitavila. Chuma chachipi chikumanyi shina, navatwalaho kuhanjika vyuma kana nakulingisa vatu vavavulu vavifwelele. Namwivwa ngachilihi? Kachi nge, mwazakama vatu napuho yenu yamwaza, kaha twafwelela ngwetu munahase kwivwa kupihya havyuma vyamakuli vanahanjika.—Vishi. 22:1.

² Echi chakutalilaho nachitukafwa twivwishise omwo Yehova eji kwivwanga kachi nge lijina lyenyi vanalipihisa. Mwanenyi umwe wakushipilitu ahanjikile vyuma vyamakuli hali ikiye kuli Eve pwevo watete kutenga. Ou pwevo afwelelele makuli kana. Makuli kana alingishile visemi jetu vatete valikange kuli Yehova. Ngocho, vatu vosena vaswana shili nakufwa. (Kupu. 3:​1-6; Loma 5:12) Ukalu wosena uze tweji kumonanga mukaye wakufwana nge kufwa, najijita naluyando, weza mwomwo yamakuli aze Satana atanjishile mumilemba lyaEtene. Chakuzeneka kuhuhwasana twafwelela ngwetu Yehova eji kwivwanga kupihya havyuma vyamakuli vamuvangijikilile naukalu wafumamo. Chipwe ngocho, Yehova kakwata matoto chipwe kulama kokoko. Oloze apwa lika ‘Kalunga wakuwahilila.’—Chimo. 1, 1:11.

3. Kutokwa muka twatwama nacho?

³ Tuvosena twatwama nakutokwa chakulingisa lijina lyaYehova lipwenga lyajila hakukavangiza lushimbi luno lwalwashi lwakwamba ngwavo: “Alisenunga lijina lyaYehova.” (Samu 113:1) Tweji kulinganga ngocho hakuhanjika vyuma vyamwaza hali Ou emanyinako lijina eli lyajila. Kutala nayenu namwalisa lijina lyaYehova lyajila tahi? Tushimutwilenu havyuma vitatu vyatela kutulingisa  twalise lijina lyaKalunga namuchima wetu wosena.

TWEJI KWIVWISANGA YEHOVA KUWAHA NGE NATWALISA LIJINA LYENYI

4. Mwomwo ika Yehova eji kwivwanga kuwaha nge natumwalisa? Hanenu chakutalilaho. (Talenu nawa muvwimbimbi.)

⁴ Tweji kwivwisanga kuwaha Setu wamwilu nge natwalisa lijina lyenyi. (Samu 119:108) Uno echi chalumbununa nge Kalunga wangolo josena apwa ngana mwavatu vakuhona kukupuka vaze vafwila kuvalisa mwomwo yakusaka kupwa vakukingiwa tahi? Nduma. Shinganyekenu hachakutalilaho chino: Kanyike wapwevo uze vanazundula kuli ise, mwapakata ise mushingo nakumulweza ngwenyi, “Wapwa uchisemi wamwaza chikuma.” Uze chisemi walunga mwamwesa kukanwa nakwivwa kuwaha chikuma hamazu kana. Mwomwo ika? Kutala tunahase kwamba ngwetu apwa chisemi uze anakufwila kumukolezeza nakumwalisa nakuli mwanenyi tahi? Nduma. Oloze, natukukulula ngwetu, chisemi kana apwa wakujikiza uze nawa nevu kuwaha hakumusakwilila nakumuzanga kuli mwanenyi. Kaha natachikiza ngwenyi, chapwa chamwaza mwanenyi kupwa navilinga kana, mwomwo nachimulingisa apwenga wakuwahilila omu ali nakuya nakukola. Chochimwe naYehova uze apwa Setu wamunene, eji kwivwanga kuwaha chikuma kachi nge natumwalisa.

5. Uno kwalisa lijina lyaKalunga chinahase kutukafwa tukane makuli muka?

⁵ Nge natwalisanga Setu wamwilu, kaha natusolola hatoma ngwetu vyuma atuvangijikilile Satana vyapwa vyamakuli. Satana avangijikila vatu ngwenyi kaveshi kuhasa kuhakwila lijina lyaKalungako. Namutu numba umwe wauchi nahase kulama kulonga chenyi. Ambile nawa ngwenyi, tuvosena tunahase kulikanga kuli Yehova kachi nge tunamono ngwetu kulinga ngocho nachitunganyalisa. (Yopa 1:​9-11; 2:4) Oloze Yopa lunga wakushishika asolwele hatoma ngwenyi vyuma ahanjikile Satana vyapwile vyamakuli. Nyi ngachilihi yenu? Tuvosena twatwama nakutokwa chakuhakwila lijina lyaSetu nakumwivwisa kuwaha hakumuzachila nakashishi. (Vishi. 27:11) Echi chapwa hikutokwa chachinene.

6. Tunahase kulondezeza ngachilihi Mwangana Ndavichi navaLevi? (Nehemiya 9:5)

⁶ Kuzanga Kalunga chikiko cheji kulingisanga vatu vakushishika valise lijina lyenyi namuchima wavo wosena. Mwangana Ndavichi asonekele ngwenyi: “Nangwalisanga Yehova, Nangwalisanga lijina lyenyi lyajila.” (Samu 103:1) Ndavichi atachikijile ngwenyi kwalisa lijina lyaYehova chinapu kwalisa Yehova ivene. Nge tunevu lijina lyaYehova, tweji kushinganyeka  omwo apwa navilinga atwama navyo namilimo yenyi yakukomwesa. Ndavichi afwililile kumona lijina lyaIse kupwa lyalilemu nakulyalisa. Asakile ‘kwalisa lijina lyaYehova’ namwono wenyi wosena. Chochimwe nawa, vaLevi vatwaminyinenga vakwavo hakwalisa Yehova. Vahanjikile mujila yakulinyisa ngwavo kavapwile namazu ambwende, akuzachisa hakwalisa lijina lyaYehova lyajilako. (Tangenu Nehemiya 9:5.) Chakuzeneka kuhuhwasana Yehova evwile kuwaha chikuma hakumona omu vatu jenyi vamwalishilenga mujila yakulinyisa.

7. Tunahase kwalisa ngachilihi Yehova mumulimo wakwambulula namukuyoya chetu chahakumbi hakumbi?

⁷ Makumbi ano, tunahase kwivwisa Yehova kuwaha hakuhanjikanga hali ikiye mujila yize nayisolola nge twamusakwilila chikuma kaha nawa twamuzanga. Nge tuli mumulimo wakwambulula, chuma chachinene tweji kufwilanga shina, kulingisa vatu vezanga kuli Yehova, nakuvakafwa vamone ou Setu wazangi nganomu tweji kumumonanga. (Yako. 4:8) Tweji kwivwanga kuwaha kulweza vatu omu Mbimbiliya yalumbununa Yehova, nomu eji kusololanga vilinga vyenyi vyamwaza vyakufwana nge zangi, nachiyulo, namangana, nangolo navilinga vyeka. Tweji kwalisanga nawa Yehova nakumwivwisa kuwaha kumuchima hakufwila kumulondezeza. (Efwe. 5:1) Nge natulinga ngocho kaha natulihandununa navatu vamukaye kano kakuhuka. Vatu navamona ngwavo, twalihandununa navakiko, kaha vanahase kufwila kutachikiza ovyo vyatulingisa tulihandunune navakiko. (Mateu 5:​14-16) Omu natutwalaho lika kulikata navo hakumbi hakumbi, kaha natuvalumbunwina ovyo tweji kulingilanga vyuma veji kumonanga. Kaha echi nachilingisa vatu vamwaza michima vapandame kuli Yehova. Nge natwalisa Yehova mujila kaneyi, kaha natumwivwisa kuwaha kumuchima.—Chimo. 1, 2:​3, 4.

TWEJI KWIVWISANGA YESU KUWAHA NGE NATWALISA LIJINA LYAYEHOVA

8. Uno Yesu asolwele ngachilihi chakutalilaho chamwaza kutalisa kukwalisa lijina lyaYehova?

⁸ Naumwe wauchi mwilu nahamavu atachikiza kanawa Yehova, kuhambakana Mwanenyi. (Mateu 11:27) Yesu azanga Ise, ngocho apwa ndundu mutete hakwalisa lijina lyaYehova. (Yowa. 14:31) Haufuku wamakumishilo wakukokela kukufwa chenyi, Yesu alombele kuli Ise nakuvuluka chuma chize ateselemo mumulimo wenyi wakwambulula hano hamavu hakwamba ngwenyi: “Ami ngunalingisa lijina lyove valitachikize.” (Yowa. 17:26) Uno atalikishile mulihi?

9. Uno Yesu azachishile ngachilihi chifwanyisa hakulumbununa kanawa omwo apwa Ise?

⁹ Yesu anangwilenga vatu vyuma vyavivulu, nakuvanangula nawa, ngwenyi Kalunga ikiye Yehova. VaYuleya vaze Yesu anangwilenga, vatachikijile lyehi lijina lyaKalunga. Chipwe ngocho Yesu ‘ikiye alumbununa,’ Kanawa Ise. (Yowa. 1:​17, 18) Chakutalilaho, Visoneka VyachiHepeleu vyasolola nge Yehova apwa muka-kutetela kaha nawa wakeke. (Kulo. 34:​5-7) Yesu alumbunwine hatoma omwo apwa Yehova, hakuzachisa chifwanyisa chamwana wakujimbala naise. Tweji kumonanga muchima waYehova wakeke nakutetela, omu tweji kutanganga vyachisemi walunga uze amwene mwanenyi uze apihililile nakwalumuka ali nakwiza “shimbu apwile hahasuku,” amulahililile nakumupakata mukasamba, nakumukonekela namuchima wenyi wosena. (Luka 15:​11-32) Chikupu vene, Yesu alumbununa kanawa omu apwa Ise.

10. (a) Uno twatachikiza ngachilihi ngwetu Yesu azachishile lijina lyaIse, kaha asaka navatu kulizachisa? (Mako 5:19) (Talenu nawa muvwimbimbi.) (b) Uno makumbi ano Yesu asaka tulinge ika?

¹⁰ Uno Yesu asaka nawa vatu vazachisenga lijina lyaIse tahi? Eyo. Vatwamina vamwe vamukwitava pamo vafwelela ngwavo, kachapwa  chakutamo kuzachisa lijina lyaKalungako, mwomwo lyapwa lyajila. Oloze Yesu kechelele visemwa vize vyalimbalaka navisoneka vimuhonese kuvumbika lijina lyaIseko. Achishinganyekenu, halwola luze okile lunga uze apwile navandemone mungalila yavaka-Ngelase. Vatu vevwile woma nakuputuka kulembelela Yesu afume kuchihela kana. Ngocho Yesu katwamine kungalila kanako. (Mako 5:​16, 17) Chipwe ngocho, Yesu asakile lijina lyaKalunga valitachikiza halwola kana. Ngocho alwezele lunga uze okile ayenga nakulweza vatu vyuma amulingilile Yehova, keshi vize amulingililileko. (Tangenu Mako 5:19.) a Namakumbi ano, asaka tulingise lijina lyaIse valitachikize mumafuchi osena. (Mateu 24:14; 28:​19, 20) Nge natulinga ngocho, kaha natwivwisa kuwaha Mwangana wetu Yesu.

11. Yesu anangwile vaka-kumukavangiza valombenga ika, kaha mwomwo ika chuma kana chapwila chachilemu? (Ezekele 36:23)

¹¹ Yesu atachikijile ngwenyi vyuma ajinyine Yehova shina kulingisa lijina lyenyi lipwenga lyajila, kulumbununa kulitomesa kumakuli osena vamuvangijikilile. Evi vikiko vyalingishile Mwata wetu anangule vaka-kumukavangiza valombenga ngwavo: “Ove Setu uli mwilu, lijina lyove lipwenga lyajila.” (Mateu 6:9) Yesu atachikijile ngwenyi echi hichihande chachinene chakwata havyuma vyosena atenga Kalunga. (Tangenu Ezekele 36:23.) Yesu kaha ikiye alingisa chikuma lijina lyaKalunga lipwenga lyajila. Oloze omu Yesu vamukashile, vaka-kole jenyi vamuvangijikilile ngwavo nasaula Ise. Yesu atachikijile ngwenyi kuzachisa lijina lyaIse lyajila mujila yakuhenga chipwe kulisaula, hishili yayinene chikuma. Shikaho, evwile kupihya chikuma hakutachikiza ngwenyi vanamuvangijikila mujila kana. Echi pamo chikiko chamulingishile ‘alyonyinge chikuma’ omu kwasalile jiola jajindende nakumukasa.—Luka 22:​41-44.

12. Yesu alingishile ngachilihi lijina lyaIse kupwa lyajila mujila yakulipwila?

¹² Yesu omikilenga omu vamutolekele nakumusaula nomu nawa vamuvangijikililenga, mangana alingise lijina lyaIse kupwa lyajila. Atachikijile ngwenyi nononoka Ise muvyuma vyosena kaha keshi nachuma numba chimwe chakumuhanyina mulonga. (Hepe. 12:2) Atachikijile nawa ngwenyi Satana ikiye apwile nakumufumbukila halwola lwalukalu. (Luka 22:​2-4; 23:​33, 34) Numba tuhu Satana  afwililile kuhokola kulonga chaYesu, oloze ahonene. Chikupu vene, Yesu asolwele hatoma ngwenyi Satana apwa muka-makuli, kaha nawa ngwenyi Yehova akwechi vangamba jenyi vaze veji kulamanga kulonga chavo chamokomoko navyeseko.

13. Uno munahase kwivwisa ngachilihi kuwaha Mwangana wenu?

¹³ Uno muli nakufwila kwivwisa kuwaha Mwangana wenu uze ali nakuyula tahi? Twalenuho lika kwalisa lijina lyaYehova, nakukafwa vakwenu vatachikize omwo apwa Kalunga ketu. Nge namulinga ngocho, kaha namukavangiza mujitambo jaYesu. (Petu. 1, 2:21) Ngana mwaYesu, nayenu muli nakwivwisa Yehova kuwaha nakusolola hatoma ngwenu muka-kole wenyi Satana apwa muka-makuli.

TWEJI KUYOVOLANGA MYONO YAVATU OMU TWEJI KWALISANGA LIJINA LYAYEHOVA

14-15. Vyuma muka vyamwaza vinahase kusoloka kachi nge natunangula hali Yehova?

¹⁴ Tweji kuyovolanga myono yavatu omu tweji kwalisanga lijina lyaYehova. Mujila muka? Satana “nelavisa vishinganyeka vyavaze kavetavako.” (Koli. 2, 4:4) Echi chinalingisa vatu vafwelele makuli aSatana akufwana nge ano: Kakwatwama Kalungako, kaha nawa ngwavo Kalunga atwama kwakusuku navatu, kaha nawa kavazakamako, Kalunga apwa waukenya kaha mwakayekelesa vaka-kulinga vyuma vyavipi mukakahya. Makuli kana awa eji kupihisanga lijina lyaKalunga napuho yenyi yamwaza, nakulingisa vatu vahone kupandama kuli ikiye. Oloze omu tweji kwambululanga, tweji kuhonesanga Satana ahone kutesamo vyuma afwila. Tweji kunangulanga vatu muchano wakutalisa kuli Setu, nakwalisa lijina lyaKalunga ketu. Vyuma muka vinafumumo?

¹⁵ Muchano wamuMazu aKalunga watwama nangolo jajinene. Tweji kumonanga vyuma vyamwaza chikuma hakunangula vatu hali Yehova nomwo apwa. Vatu vaze velavisa kumakuli aSatana veji kuputukanga jino kutaunuka hameso, nakumona jino ou Setu wazangi nganomu tweji kumumonanga etu. Veji kulikomokelanga hakumona ngolo jaKalunga jajinene. (Isa. 40:26) Veji kumufwelelanga mwomwo chiyulo chenyi chapwa chakukupuka. (Lushi. 32:4) Veji kulinangulanga vyavivulu kumangana enyi akukomwesa. (Isa. 55:9; Loma 11:33) Kaha  cheji kuvavendejekanga chikuma hakutachikiza ngwavo, Yehova ikiye zangi. (Yowa. 1, 4:8) Omu veji kupandamanga chikuma kuli Yehova, lutalililo lwavo lwakukayoya haya myaka yosena hakupwa vana venyi lweji kuzaminangako lika. Ocho kutokwa kana enu vayaya kuzata mulimo wakukafwa vatu vapandame kuli Sevo! Nge natulinga ngocho, kaha Yehova mwatuvuluka kupwa “tuvaka-kuzachila hamwe” naikiye.—Koli. 1, 3:​5, 9.

16. Vyuma muka vyeji kusolokanga kuli vatu vamwe kachi nge vanatachikiza lijina lyaKalunga? Hanenu vyakutalilaho.

¹⁶ Hakavanga tunahase kuputuka kunangula vatu ngwetu Kalunga lijina lyenyi ikiye Yehova. Echi chinahase kwalumuna kuyoya chavatu vamwaza michima. Chakutalilaho, mwanapwevo walijina lyaAaliyah b akolelele mutanga yize kavapwa vaka-Kulishituko. Oloze, kazangile kwitava chenyi chipwe Kalungako. Oloze omu aputukile kulinangula naVinjiho, vishinganyeka vyenyi vyalumukile. Aputukile kumona Kalunga kupwa hisepa lyenyi. Kaha alikomokelele omu alinangwile ngwenyi lijina lyaKalunga valifumisa mujiMbimbiliya jajivulu nakulishishisa najivulukiso jakufwana nge Mwata. Kulinangula lijina lyaYehova chalumwine kuyoya chenyi. Ngocho ahanjikile ngwenyi: “Sepa lyami wamwenemwene akwechi lijina.” Vyuma muka vyafuminemo? Ambile ngwenyi: “Oholyapwa ngwapwa wakuunda mumuchima, nakulivwa kupwa wamulemu.” Lunga umwe walijina lya Steve apwilenga muka-kwimba myaso uze apwile mukwitava chavaYuleya. Kasakile kulikata nakala liuka mwomwo yavilinga vyavipi amwenengako. Oloze omu apwile nakulishona kufwa chanaye, etavililile kulinangula Mbimbiliya naChinjiho chaYehova. Evwile kuwaha chikuma kutachikiza lijina lyaKalunga. Ambile ngwenyi: “Kangwatachikijile lijina lyaKalunga hakavangako.” Ambile nawa ngwenyi: “Elu lukiko lwola lwatete ngwatachikijile ngwami Kalunga kwatwama kaha apwa mutu nahenyi. Kaha nawa, ngwatachikijile ngwami ngunawane sepa.”

17. Mwomwo ika muli nakufwila kutwalaho lika kwalisa lijina lyaYehova? (Talenu nawa muvwimbimbi.)

¹⁷ Uno mweji kulwezanga vatu lijina lyaYehova lyajila omu mweji kupwanga mumulimo wakwambulula tahi? Kutala mweji kuvakafwanga vamone omwo apwa Kalunga ketu tahi? Kachi nge namulinga ngocho, kaha muli nakwalisa lijina lyaKalunga. Shikaho, twalenuho lika kwalisa lijina lyaYehova lyajila hakukafwa vatu vatachikize omu apwa. Kulinga ngocho, nachimikafwa muyovole myono yavatu. Kaha nawa, namulondezeza Mwangana wenu Kulishitu Yesu. Chachilemu chikumanyi shina, namwivwisa kuwaha Senu wazangi Yehova. Shikaho twalenuho lika ‘kwalisanga lijina lyenyi haya myaka namyaka.’—Samu 145:2.