1. Lwola muka vawavisa vosena navakapwa mwilu?

 MYAKA kunyima, vatu jaYehova valihulishilenga ngwavo, ‘Uno lwola muka vaka-Kulishitu vawavisa vasalaho navakaya mwilu?’ Lwola lumwe twashinganyekele ngwetu vawavisa vamwe navakapwa muPalachise hano hamavu halwola lwalundende, hanyima yajita yaAlamangetone. Oloze muKaposhi Kakutalila waJuly 15, 2013, twalinangwile ngwetu vawavisa vosena navakapwa mwilu shimbu kanda Alamangetone yiputuke.—Mateu 24:31.

2. Chihula muka vanahase kulihulisa vandumbwetu vamwe, kaha vyuma muka natushimutwila muchihande chino?

² Vandumbwetu vamwe vanahase kulihulisa ngwavo: Vyuma muka navikasoloka kuli “mikoko veka” vaKulishitu vaze navakazachila Yehova nakashishi hano hamavu halwola “[lwa]luyando lwalunene”? (Yowa. 10:16; Mateu 24:21) Vatu vamwe vanahase kulizakamina ngwavo navakavasuvilila omu vandumbwavo vawavisa vamalunga navava vamapwevo navakaya mwilu. Tushimutwilenu hamijimbu yivali yamuVisoneka yize yinahase kuvalingisa vapwenga navishinganyeka kana. Kufumaho, natushimutwila havyuma vyatela kuvalingisa vahone kulizakamina.

VYUMA MUKA VIZE KAVYESHI KUKASOLOKAKO?

3-4. Uno vatu vamwe vanahase kushinganyeka ngwavo ika, kaha mwomwo ika?

³ Vamwe vanahase kushinganyeka ngwavo mikoko veka navakaseza muchano omu vandumbwetu vawavisa vamuLizavu lyaKutwaminyina vakutuhana jindongi navakaya mwilu. Pamo mijimbu yimwe yamuMbimbiliya yikiko yeji kuvalingisanga valizakamine. Tushimutwilenu havyakutalilaho vivali vyamuMbimbiliya. Chatete tushimutwilenu hachakutalilaho chaKapilishitu Wakulitulaho Yehoyata. Ou kapilishitu apwile ngamba yaKalunga wakushishika. Ikiye napuwenyi Yehoshaveyate vakingile kanyike Yehowashe nakumukafwa apwenga mwangana wamwenemwene kaha nawa wakashishi.  Yehowashe atwalilileho lika kupwa navilinga vyamwaza halwola Yehoyata apwile nakuyoya. Oloze omu Yehoyata afwile, Yehowashe aputukile kulinga vyuma vyavipi. Evwilililenga kuli vilolo vakuhuka ngocho asezele Yehova.—Miji. 2, 24:​2, 15-19.

⁴ Chakutalilaho chikwavo shina chavaka-Kulishitu vamulikulukaji lyamyaka lyamuchivali. Kaposetolo Yowano uze apwile wamakumishilo kufwa akafwile vaka-Kulishitu vatwaleho lika kupwa vakushishika kuli Yehova. (Yowa. 3, 4) Ngana muze valingilenga vaposetolo jaYesu vosena, naYowano akilikichile mangana akinge vikungulwilo, kuvatu vaze vanangwilenga vyuma vyamakuli. (Yowa. 1, 2:18; Teso. 2, 2:7) Oloze omu Yowano afwile, vatu vaze vanangwilenga vyuma vyamakuli vatanjile washiwashi ngana muze kakahya keji kutandanga. Mumyaka yayindende kaha, muchikungulwilo chavaka-Kulishitu mwazalile nakunangula chamakuli.

5. Mwomwo ika katwatela kukukulwila ngwetu vyuma vyasolokele kumijimbu yivali yamuVisoneka navikasoloka nakuli yetu?

⁵ Kutala mijimbu kaneyi yivali yamuVisoneka yasolola nge chuma chochimwe chinahase kukasolokela mikoko veka vaKulishitu omu vawavisa navakaya mwilu tahi? Kutala halwola kana, vaka-Kulishitu vakushishika navakakana vyuma vavanangwile ngana muze alingile Yehowashe chipwe kuputuka kunangula vyuma vyamakuli, ngana muze valingile vaka-Kulishitu vamulikulukaji lyamyaka lyamuchivali C.E. tahi? Nduma. Tunafwelela ngwetu omu vawavisa navakaya mwilu, mikoko veka navakatwalaho lika kuvazakama nakutwalaho kutambula kulya chakushipilitu. Mwomwo ika tunahase kufwelela chuma kana?

KULEMESA CHAMUCHANO KAVESHI KUKACHIPIHISAKO

6. Lwola muka lutatu luze natushimutwila?

⁶ Mwomwo ika twatela kufwelela ngwetu kulemesa chamuchano kaveshi kukachipihisa nakunangula chamakuli, nahalwola lwalukalu luze lunakwiza kulutweko? Mwomwo yavyuma tunalinangula muMbimbiliya vize vyahanjika kutalisa kulwola tuli nakuyoyelamo. Lwola kana lwalihandununa chikuma nalwola lwavaIsalele vakushikulu nalwola lwavaka-Kulishitu vamulikulukaji lyamyaka lyamuchivali. Tushimutwilenu jino hali elu lwola lutatu lwakulihandununa: (1) Lwola lwavaIsalele vakushikulu, (2) nalwola luze valingile vaposetolo vanafu lyehi, (3) nalwola lwetu, kulumbununa lwola “lwakukindulwisa cheka vyuma vyosena.”—Vili. 3:21.

7. Mwomwo ika mulwola lwavaIsalele vakushikulu vatu vakushishika vahonene kwivwa kupihya omu muyachi navamyangana valingilenga vyuma vyavipi?

⁷ Lwola lwavaIsalele vakushikulu. Mose alwezele vaIsalele omu kwasalile kashimbu kakandende shimbu kanda afwenga ngwenyi: “Mwomwo ngunatachikiza ngwami omu nangulinga hingunafu lyehi, namukahuka nakuseza kulinga muze ngunamilweze.” (Lushi. 31:29) Mose ahanjikile nawa ngwenyi nge vaIsalele navalikanga, kaha vosena navaya muufunge. (Lushi. 28:​35, 36) Kutala mazu kana ateselemo tahi? Eyo. Hamyaka yayivulu, vamyangana vavavulu valingilenga vyuma vyavipi, kaha echi chalingishile vatu jaKalunga valikange. Ngocho Yehova azangamishile vatu jenyi vakulikanga nakwecha kutongola vamyangana hano hamavu. (Ezeke. 21:​25-27) Oloze vaIsalele vakushishika vahamukile omu vamwene ngwavo mazu aKalunga anatesamo.—Isa. 55:​10, 11.

8. Uno twatela kulikomokela hakutachikiza ngwetu muchikungulwilo chavaka-Kulishitu chamulikulukaji lyamyaka lyamuchivali mwengilile kunangula chamakuli tahi? Lumbununenu.

⁸ Lwola luze valingile vaposetolo vanafu lyehi. Uno twatela kulikomokela hakutachikiza ngwetu muchikungulwilo chavaka-Kulishitu chamulikulukaji lyamyaka lyamuchivali mwengilile kunangula chamakuli tahi? Nduma. Yesu apolofwetele ngwenyi vatu vavavulu navakanangulanga vyuma vyamakuli. (Mateu 7:​21-23; 13:​24-30, 36-43)  Kaposetolo Paulu, naPetulu naYowano vetavilile chikupu ngwavo upolofweto ahanjikile Yesu waputukile kutesamo mulikulukaji lyamyaka lyakulivanga C.E. (Teso. 2, 2:​3, 7; Petu. 2, 2:1; Yowa. 1, 2:18) Kuheta mulikulukaji lyamyaka lyamuchivali C.E., muchikungulwilo chavaka-Kulishitu mwazalile nakunangula chamakuli. Kunangula kana chatanjile chikuma nakupwa jino chihanda chaMbavilone Yayinene, yize yapwa kwitava chamakuli chamukaye kosena. Upolofweto uze vahwima wateselemo cheka.

9. Uno lwola tuli nakuyoyelamo lwalihandununa ngachilihi nalwola lwavaIsalele vakushikulu nalwola lwamulikulukaji lyamyaka lyamuchivali?

⁹ “Lwola lwakukindulwisa cheka vyuma vyosena.” Lwola tuli nakuyoyelamo lwalihandununa nalwola lwavaIsalele vakushikulu nalwola luze kwitava chamakuli chatanjile chikuma mulikulukaji lyamyaka lyamuchivali C.E. Uno lwola tuli nakuyoyelamo valuvuluka ngwavo ika? Kakavulu twavula kuvuluka lwola kana ngwetu “makumbi akukuminyina” akatwamino kamyaka yino kakuhuka. (Chimo. 2, 3:1) Oloze Mbimbiliya yasolola ngwayo, lwola lwalusuku kaha nawa lwakulipwila lwaputukilile hamwe namakumbi akukuminyina. Lwola kana nalukatwalaho lika swi nomu Wangana wauMeshiya naukalingisa vatu vosena kupwa vakukupuka nakwalumuna mavu kupwa palachise. Lwola kana valuvuluka ngwavo, “lwola lwakukindulwisa cheka vyuma vyosena.” (Vili. 3:21) Lwola kana lwaputukile mu 1914. Uno vyuma muka vakindulwishile? Yesu vamuswanyishile haWangana mwilu. Shikaho, Yehova apwile cheka namuka-kuyula wakumwimanyinako uze apwile swana afumine kuchisaka chaMwangana wakushishika Ndavichi. Chipwe ngocho, Yehova kakindulwishile kaha wanganako. Omu mwahichile kashimbu kakandende, kulemesa chamuchano vachikindulwishile. (Isa. 2:​2-4; Ezeke. 11:​17-20) Kutala navakachipihisa cheka tahi?

10. (a) Vyuma muka yahanjikilile chimweza Mbimbiliya kutalisa kukulemesa chamuchano mumakumbi etu? (Isaya 54:17) (b) Mwomwo ika upolofweto kana watukolezezela?

¹⁰ Tangenu Isaya 54:17. Achishinganyekenu haupolofweto uno wakwamba ngwavo: “Vyeshovyo vitwa navakafula mangana vakakuzungise, kavyeshi kukafukilako.” Awa mazu vahwima ali nakutesamo makumbi ano. Mazu akuvendejeka anakavangizaho anahase kuzata namakumbi ano. Mazu kana amba ngwawo: “Vana vove vosena navakavanangula kuli Yehova, kaha kuunda chavana vove nachikavula. Nangukakuzamisa mukwoloka. . . . Kaweshi kukevwa woma chipwe kulizuzukilako, mwomwo vyuma vyakukwivwisa woma navikapwila kwakusuku nayove.” (Isa. 54:​13, 14) Satana “kalunga wakatwamino kamyaka yino” katwama nangolo jakuhonesa mulimo wakunangula uze vali nakuzata vatu jaYehovako.  (Koli. 2, 4:4) Kulemesa chamuchano vachikindulwisa lyehi, kaha kaveshi kukachipihisa chekako. Nachipwangako lika haya myaka. Vyeshovyo vitwa navakafula mangana vakatuzungise, kavyeshi kukafukilako.

VYUMA MUKA VIZE NAVIKASOLOKA?

11. Vyuma muka vyatulingisa tufwelele ngwetu liyongomena lyalinene kaveshi kukalisuvililako omu vawavisa navakaya mwilu?

¹¹ Vyuma muka navikasoloka nge vawavisa vanayi lyehi mwilu? Anukenu ngwenu, Yesu ikiye Kafunga ketu, kaha nawa ikiye mutwe wachikungulwilo chavaka-Kulishitu. Ahanjikile hatoma ngwenyi: “Twamina yenu apwa umwe kaha, Kulishitu.” (Mateu 23:10) Mwangana wetu uze ali nakuyula keshi kukahona kutesamo mulimo wenyiko. Vaka-kukavangiza Kulishitu vaze navakapwa hano hamavu kavatela kukevwa womako, mwomwo Kulishitu ikiye mwakavatwaminyinanga. Chipwe ngocho, katwatachikiza mijimbu yosena yakutalisa kujila Kulishitu mwakatwaminyinangamo vatu jenyi halwola kanako. Shikaho, tushimutwilenu havyakutalilaho vimwe vyamuMbimbiliya vize vinahase kutukafwa.

12. Uno Yehova azakamine ngachilihi vatu jenyi (a) omu Mose afwile? (b) omu Elija vamuhanyine mulimo weka? (Talenu nawa muvwimbimbi.)

¹² Mose afwile shimbu kanda vaIsalele vengile muLifuchi lyaLushiko. Uno vyuma muka vyasolokele kuli vatu jaKalunga? Kutala Yehova avasuvililile omu Mose mutu wakushishika afwile tahi? Nduma. Yehova avazakaminenga omu vapwilenga lika vakushishika. Yehova alwezele Mose shimbu kanda afwenga ngwenyi atongole Yoshuwa mangana atwaminyine vaIsalele. Mose anangwile Yoshuwa hamyaka yayivulu. (Kulo. 33:11; Lushi. 34:9) Kaha nawa halwola kana kwapwile malunga veka vakulindunuka vaze vatwaminyinyinenga vatu. Malunga kana shina tupitau twamakombakaji, natupitau twamakulukaji, natupitau twamakumi atanu, kuhakilako vene natupitau twamakumi. (Lushi. 1:15) Chikupu vene, vatu jaKalunga vavazakaminenga. Omu mukiko chapwile nakuli Elija. Atetekelele vaIsalele mukulemesa chamuchano hamyaka yayivulu. Oloze Yehova amunungulwilile kuchihela cheka muYuta, kuze akazachililile mulimo weka. (Vamya. 2, 2:1; Miji. 2, 21:12) Kutala vatu vakushishika vaze vapwile muwangana wavaIsalele wamiyachi likumi vavasuvililile tahi? Nduma, mwomwo Elija anangwile Elisha hamyaka yayivulu. Kwapwile nawa “vana vavapolofweto,” vaze nawa vanangwile. (Vamya. 2, 2:7) Shikaho, ava malunga vakushishika vapwileko mangana vatwaminyine vatu jaKalunga. Chikupu vene, Yehova atwalileho lika kutesamo vyuma ajinyine nakuzakama nawa vaka-kumulemesa vakushishika.

13. Vyuma muka atufwelelesa Yehova hali WavaHepeleu 13:5b? (Talenu nawa muvwimbimbi.)

 ¹³ Kweseka navyuma tunashimutwila, munashinganyeka ngwenu vyuma muka navikasoloka nge vawavisa vamakumishilo vanayi mwilu? Katwatela kuhuhwasanako. Mbimbiliya yasolola muchano uno wawashi ngwayo: Yehova keshi kukasuvilila vatu jenyi hano hamavuko. (Tangenu WavaHepeleu 13:5b.) Ngana mwaMose naElija, nalizavu lyalindende lyavaka-Kulishitu vawavisa lize lili nakutwaminyina vatu jaKalunga makumbi ano, lyatachikiza kulema chakunangulako vakwavo. Vandumbwetu vamuLizavu lyaKutwaminyina vananangulanga malunga vahautanga wamikoko veka hamyaka yayivulu mangana vatwaminyine vatu jaKalunga. Chakutalilaho, vanalongesanga mashikola amavulu mangana vanangule vakulwane muvikungulwilo, natulama vakujinguluka, navandumbwetu vamuKomiti yaMutango, navakulwane vamalipatimende ahaMbetele, naveka nawa. Lizavu lyaKutwaminyina linanangulanga nawa vaka-kuvakafwa mujikomiti jakulisezaseza jaLizavu lyaKutwaminyina. Ava vaka-kukafwa vali nakuzata milimo yayivulu muliuka. Shikaho vanapu jino vakulizanga mangana vakatwaleho lika kuzakama mikoko jaKulishitu.

14. Chishina muka chachinene tunashimutwila?

¹⁴ Chishina chachinene tunashimutwila shina chino: Omu vawavisa vamakumishilo navakaya mwilu kusongo yaluyando lwalunene, kulemesa chamuchano nachikatwalangaho lika hano hamavu. Vaka-kulemesa Kalunga navakatwalaho lika kuvazakama mwomwo yachiyulo chaYesu Kulishitu. Chikupu vene, tunatachikiza ngwetu Ngonge wakuMangonge, kulumbununa kulifutula chavaka-mafuchi, mwakafumbukila vatu jaKalunga. (Ezeke. 38:​18-20) Oloze vatu jaKalunga navakatwalaho lika kulemesa Yehova, kaveshi kukavahonesako. Yehova mwakavayovola. Kaposetolo Yowano vamumwenesele “liyongomena lyalinene” lyamikoko veka jaKulishitu. Yowano vamulwezele ngwavo eli “liyongomena lyalinene” linapu vatu vaze “vanafumu muluyando lwalunene.” (Kuso. 7:​9, 14) Chikupu vene, vatu kana navakapwa vakukingiwa.

15-16. Kweseka naKusoloka 17:​14, mulimo muka navakazata vawavisa vaKulishitu hajita yaAlamangetone, kaha chuma kana chatukolezeza ngachilihi?

¹⁵ Chipwe ngocho, vamwe vanahase kuhulisa ngwavo: ‘Nyi ngachilihi vawavisa? Vyuma muka navakalinga hanyima yakuya mwilu?’ Mbimbiliya yakumbulula hatoma chihula kana. Yahanjika  ngwayo, vilolo vamujifulumende jamuno mukaye “navakalwa jita naMwanamukoko.” Chipwe ngocho navakavafungulula. Mbimbiliya ngwayo: “Mwanamukoko mwakavafungulula.” Jino veya navakamukafwa? Mbimbiliya ngwayo, “vaze vasanyika, vaze vasakula, vaze vakushishika.” (Tangenu Kusoloka 17:14.) Uno vatu muka vene ava? Vatu kana shina vawavisa vaze navakasanguka. Shikaho omu vawavisa vamakumishilo vaze vali hano navakaya mwilu kusongo yaluyando lwalunene, mulimo wavo watete navakazata shina kulwa jita. Chikupu vene, ou himulimo waulemu chikuma. Vaka-Kulishitu vawavisa vamwe vapwilenga nakulwa jita shimbu kanda vapwenga Vinjiho jaYehova. Vamwe pamo vapwilenga maswalale mukaye kano. Oloze kutwala muze, vapwile jino vaka-Kulishitu vamuchano, vatachikijile mwakutwamina mukuunda navakwavo. (Ngale. 5:22; Teso. 2, 3:16) Vanalitwamina kukundwiza jijita. Oloze omu navakaya mwilu, navakaputuka kuzachila hamwe naKulishitu navangelo, mangana vakalwe jita yamakumishilo navaka-kole jaKalunga.

¹⁶ Achishinganyekenu hachumechi. Vaka-Kulishitu vawavisa vamwe hano hamavu vanashinakaja lyehi kaha veka kaveshi nangoloko. Oloze omu navakavasangula nakukayoyela mwilu, navakapwa namujimba wakushipilitu, nakukazachila hamwe naYesu Kulishitu, Mwangana Muka-kufungulula. Hanyima yajita yaAlamangetone navakazata nawa mulimo wakulingisa vatu vakapwe vakukupuka. Chakuzeneka kuhuhwasana, vawavisa navakazata chikuma mulimo wakukafwa vandumbwavo vaze navakayoyelanga hano hamavu, kuhambakana muze vavakafwilenga omu vapwile vakuhona kukupuka hano hamavu.

17. Tunatachikiza ngachilihi ngwetu vangamba jaKalunga vosena navakapwa vakukingiwa hajita yaAlamangetone?

¹⁷ Kutala mwatwama hamukana wamikoko veka tahi? Nge mukiko, kaha vyuma muka mwatela kukalinga nge jita yaAlamangetone yinaputuka? Shina, kukafwelela Yehova nakukavangiza jindongi jenyi. Echi chaliweza kulinga ika? Mbimbiliya ngwayo: “Yenunga mwingile mutupete twenu, lisokelelenumo. Swamenu hakapyapya kakandende, palanga nomu naukuma utenu.” (Isa. 26:20) Shikaho, vangamba jaKalunga vosena vakushishika, mwilu nahamavu navakapwa vakukingiwa halwola kana. Ngana mwakaposetolo Paulu, nayetu twakunyuka ngwetu “jifulumende, chipwe vyuma viliko, chipwe vyuma navikeza kulutwe . . . kavyeshi kuhasa kutuhandununa kuzangi yaKalunga eyi yili muli Kulishitu Yesu Mwata wetuko.” (Loma 8:​38, 39) Shikaho, shimbu yosena anukenu ngwenu Yehova amizanga kaha keshi kukamimbilako.