VAKA-KUSONEKA Mbimbiliya vavavulu vahilukilile-hilukilile mazu wowamwe. Achishinganyekenu havyuma vitatu vize pamo vyalingishile vaka-kusoneka valinge ngocho:

Lwola vasonekele mazu kana. MuIsalele yakushikulu, vatu vavavulu kavapwilenga namikanda yaJishimbiko. Vevwilenga Jishimbi kana omu vavatangilililengajo halwola valikungulwililenga hatavanaku. (Lushi. 31:​10-12) Chasoloka nge kwapwilenga vyuma vyakuvatangula omu vevwilililenga nakwimana hajiola jajivulu muvatu vavavulu. (Nehe. 8:​2, 3, 7) Shikaho halwola kana chapwile chachilemu kuhilukilahilukila mazu mangana chipwenga chachashi vatu kwanuka mazu kana nakuwazachisa. Kuhilukila mazu kana pamo chakafwile vatu kwanuka jishimbi jize avahanyine Kalunga.—Levi 18:​4-22; Lushi. 5:1.

Jila vasonekelelengamo. Mikanda yimwe yamuMbimbiliya yapwa myaso. Chakutalilaho, mukanda waSamu, naMwaso waSolomone naLungungu. Mumyaso yimwe vahilukila-hilukila mazu, kahechi chakafwilenga vaka-kwivwilila vanukenga mazu amumwaso kana. Chakutalilaho, talenu mazu atwama hali Samu 115:​9-11, ngwawo: “Enu vaIsalele, fwelelenunga muli Yehova. Ikiye muka-kumikafwa, ikiye kepwe yenu. Enu vakuzuvo yaAlone, fwelelenunga muli Yehova. Ikiye muka-kumikafwa, ikiye kepwe yenu. Enu mwevwa Yehova woma, fwelelenunga muli Yehova. Ikiye muka-kumikafwa, ikiye kepwe yenu.” Chikupu vene, kuhilukila-hilukila mazu kana chakafwile vatu vevwishise muchano nakuvaheta kumuchima.

Kwasakiwile kushindakanya vishina vyavilemu. Shimbu jimwe, vaka-kusoneka Mbimbiliya vahilukililenga mazu aze apwilenga amalemu. Chakutalilaho, omu Yehova akanyishile vaIsalele kulya manyinga, alwezele Mose ahanjike mapapa kakavulu mazu akusolola ovyo avakanyishililile kulinga ngocho. Kalunga asakile kushindakanya ngwenyi kuyoya chamutu chatwama mumanyinga, ngocho manyinga emanyinako kuyoya. (Levi 17:​11, 14) Kutwala muze, omu vaposetolo navakulwane muYelusalema vasonekele vyuma vize vatu vatela kulihendako vize vyeji kwivwisanga Kalunga kupihya, vashindakanyine cheka ovyo vatu vatela kulihendela kumanyinga.—Vili. 15:​20, 29.

Chipwe ngocho, Yehova kasakile ngwenyi tuhilukile-hilukilenga mazu amuVisonekako. Chakutalilaho, Yesu ambile ngwenyi: “Enu omu namulomba, kanda namuhilukila hilukila nakuvuluka vyuma vyovimweko.” (Mateu 6:7) Kaha atwalileho kutulweza vihande vize twatela kuvulukanga mukulomba chetu, kweseka namwaya kujina chaKalunga. (Mateu 6:​9-13) Shikaho, numba tuhu natulihendanga kukuhilukila mazu wowamwe mukulomba chetu, oloze tunahase kuhilukila hilukila vihande vyovimwe.—Mateu 7:​7-11.

Kuli vyuma vimwe vyalingisa mazu amwe vawahilukile-hilukile muMbimbiliya. Eyi hijila yimwe yize Muka-kunangula Wamunene eji kutunangulanga mangana tunganyale.—Isa. 48:​17, 18.