Pwenunga Vakuwahilila Omu Muli Nakuvandamina Yehova
UNO muli nakutalilila kulwola luze Yehova mwakafumisako vyuma vyavipi vyosena nakulingisa vyuma vyosena kupwa vyavihya tahi? (Kuso. 21:1-5) Eyo. Chipwe ngocho, kachapwa chachashi kutwalaho lika kuvandamina Yehova chikumanyi nge tuli nakumona ukaluko. Nge vyuma tuli nakutalilila kavyateselemo washiko, kaha cheji kwivwisanga kupihya kumuchima.—Vishi. 13:12.
Chipwe ngocho, Yehova asaka tumuvandamine lika kuheta noho mwakatesamo vyuma twatalilila halwola atongola. Mwomwo ika asaka tutwaleho lika kuvandamina? Vyuma muka navitukafwa tupwenga vakuwahilila omu tuli nakuvandamina Yehova?
MWOMWO IKA YEHOVA ASAKA TUVANDAMINENGA?
Mbimbiliya yamba ngwayo: “Yehova ali nakumitalilila chikoki mangana amivwile uselewa, mwakatuka mangana amitetele. Mwomwo Yehova apwa Kalunga wachiyulo. Vawahilila vaze veji kumuvandaminanga.” (Isa. 30:18) Mazu kana vawasonekelele vaYuleya vakunjinjavala. (Isa. 30:1) Chipwe ngocho, kwapwile vaYuleya vamwe vakushishika, kaha awa mazu avahanyine lutalililo. Namakumbi ano, awa mazu ahana lutalililo kuli vangamba jaYehova vakushishika.
Shikaho, twatela kutwalaho lika kuvandamina, mwomwo Yehova achili lika nakuvandamina. Atongola lwola luze mwakanongesa kano kaye, kaha ali nakuvandamina likumbi nalwola kana. (Mateu 24:36) Halwola kana, natukamona hatoma ngwetu vyuma vize Liyavolo avangijikilile Yehova navangamba jenyi vakushishika vyamakuli. Shikaho, mwakanongesa Satana navatu vaze veji kumukundwizanga, oloze etu ‘mwakatutetela.’
Oloze oholyapwa, Yehova keshi kufumisako ukalu tuli nakuhitamoko, oloze atufwelelesa ngwenyi tunahase kupwa vakuwahilila omu tuli nakumuvandamina. Ngana muze ahanjikile Isaya, tunahase kupwa vakuwahilila omu tuli nakutalilila lwola luze natukamona vyuma vyamwaza. (Isa. 30:18) a Uno tunahase kupwa ngachilihi vakuwahilila? Kuli vyuma viwana vinahase kutukafwa.
OMWO TUNAHASE KUPWA VAKUWAHILILA HALWOLA TULI NAKUVANDAMINA
Shinganyekenunga havyuma vyamwaza. Mwangana Ndavichi amwenenga vyuma vyavipi valingilenga vatu mukuyoya chenyi chosena. (Samu 37:35) Chipwe ngocho, asonekele ngwenyi: “Hola kulu kumeso aYehova, muvandaminenga. Kanda nawivwila kupihya mutu uze mwatesamo vyuma najinyiko.” (Samu 37:7) Ndavichi akavangijile mazu kana hakushishika havyuma vize amushikile Yehova ngwenyi mwakamuyovola. Amwenenga nawa omu Yehova amukiswilenga. (Samu 40:5) Chochimwe nayetu nawa, nge natushishika havyuma vyamwaza vize vyeji kutusolokelanga mukuyoya chetu nakuhona kushinganyeka havyuma vyavipi vili nakusoloka, kaha natuchiwana kupwa chachashi kuvandamina hali Yehova.
Twalenuho lika kwalisanga Yehova. Ndavichi uze asonekele Samu 71, ambile kuli Yehova ngwenyi: “Ami nangukuvandaminanga lika, nangukwalisanga chikuma.” (Samu 71:14) Uno alishilenga ngachilihi Yehova? Hakulwezako vakwavo hali Yehova nakumwimbilanga myaso. (Samu 71:16, 23) Nayetu tunahase kupwa vakuwahilila omu tuli nakuvandamina hali Yehova, ngana muze alingile Ndavichi. Tweji kumwalisanga hakwambulula, nahakushimutwilanga navakwetu hakumbi hakumbi, nahakwimba myaso yakumulemesa. Shikaho, tuli nakumikolezeza ngwetu, likumbi namukemba mwaso waWangana, mukevwishise kanawa mazu akumikolezeza atwamamo.
Itavilenu vandumbwenu vamikolezeze. Omu Ndavichi amwene ukalu, alwezele Yehova ngwenyi: “Nangufwelelanga mulijina lyove kumeso avatu jove vakushishika.” (Samu 52:9) Nayetu nawa vanahase kutukolezeza kuli vandumbwetu kukukunguluka, namumulimo wakwambulula, nahakushikama navo.—Loma 1:11, 12.
Zamisenunga lutalililo lwenu. Mukanda waSamu 62:5 ngwavo: “Ngweji kuholanga kulu nakuvandamina Kalunga, mwomwo lutalililo lwami lwafuma kuli ikiye.” Chapwa chachilemu kuzamisa lutalililo lwetu, chikumanyi nge vyuma twatalilila vinashimbula kusoloka. Twatela kufwelela ngwetu vyuma atushika Yehova navikatesamo chamokomoko nalwola natuvandamina. Tunahase kuzamisa lutalililo lwetu hakulinangulanga Mazu aKalunga. Chakutalilaho, tunahase kulinangula haupolofweto, nomwo vyuma vasonekamo vyalitombola, navyuma ahanjika Yehova hali ivene. (Samu 1:2, 3) Kaha nawa twatela kutwalaho lika “kulomba nashipilitu yajila,” mangana tutwaleho lika kupwa nausoko wakukola naYehova omu tuli nakuvandamina akatesemo lushiko lwenyi lwakutuhana kuyoya chahaya myaka yosena.—Yuta 20, 21.
Ngana mwaMwangana Ndavichi, fwelelenu ngwenu Yehova eji kumonanga vosena vaze veji kumuvandaminanga nakuvasolwela zangi yenyi yakwilila. (Samu 33:18, 22) Twalenuho lika kuvandaminanga Yehova hakushishikanga havyuma vyamwaza vinakusoloka mukuyoya chenu, nahakumwalisa, nahakwitavila vandumbwenu vamikolezeze nakutwalaho lika kuzamisa lutalililo lwenu.
a Lizu lyachiHepeleu valumuna ngwavo ‘kuvandamina’ linahase nawa kulumbununa “kutalilila vyuma vitesemo.” Echi chasolola hatoma nge chapwa chakwoloka kuvandamina kuyovoka chetu.
