1. Hanenu chakutalilaho chize chasolola ovyo vyatela kutulingisa twitavile Yehova kupwa Muka-Kututwaminyina.

 ACHISHINGANYEKENU munajimbala mumusenge. Kaha muli nakwivwa woma wavisuma, natututu vakuneha misongo, namitondo yausungu, namena amalolwa malolwa. Oloze kachi nge namupwa namutu wakumitwaminyina uze atachikiza kanawa chihela kana, nakumilweza jila mwatela kuya kaha kamweshi kwivwa womako. Kano kaye kanafwane nge uze musenge. Muli vyuma vyavipi vyavivulu chikuma vize vinahase kwenyeka usepa wetu naYehova. Chipwe ngocho, tuli naYehova Muka-Kututwaminyina wakukupuka. Eji kututwaminyinanga nakutufumisa kuponde tunahase kumona, nakututwaminyina nawa muungeji wetu wakuya kukuyoya chahaya myaka yosena mukaye kakahya.

2. Uno Yehova eji kututwaminyinanga ngachilihi?

² Uno Yehova eji kututwaminyinanga ngachilihi? Eji kulinganga ngocho, chikumanyi kuhichila muMazu enyi Mbimbiliya. Kaha nawa eji kuzachisanga vatu vaze veji kumwimanyinangako. Chakutalilaho, eji kuzachisanga “ndungo wakushishika wakuzangama,” uze eji kutuhananga kulya chakushipilitu chize cheji kutukafwanga kusakula kanawa vyakulinga. (Mateu 24:45) Yehova eji kuzachisanga nawa malunga vakuhya kushipilitu mangana vatutwaminyine. Chakutalilaho, eji kuzachisanga tulama vakujinguluka navakulwane muvikungulwilo vatukolezeze nakutuhana jindongi jize jeji kutukafwanga nge tuli muukalu. Chikupu vene, twapwa vakutokwa chikuma hakututwaminyina kuli Yehova mumakumbi ano amakalu. Echi cheji kutukafwanga tupwenga lika nausepa wakukola naYehova nakutambuka lika mujila yakuya kukuyoya.

3. Vyuma muka natushimutwila muchihande chino?

³ Shimbu jimwe, chinahase kutukaluhwila kukavangiza jindongi eji kutuhananga Yehova kuhichila muli malunga vakuhona kukupuka. Mwomwo ika? Mwomwo yavyuma vimwe twazanga chipwe  vize katwazangako. Chipwe tunahase kushinganyeka ngwetu jindongi vanatuhane kajeshi kuzatako, nakukukulula ngwetu kajeshi nakufuma kuli Yehovako. Halwola kana, twatela kufwelela ngwetu Yehova ikiye ali nakutwaminyina vatu jenyi, kaha nawa ngwetu kukavangiza jindongi jenyi nachilingisa vatukisule. Chihande chino nachitukafwa tufwelele chikuma Yehova. Shikaho, natushimutwila (1) omwo Yehova atwaminyinyinenga vatu jenyi kushikulu, (2) nomwo ali nakututwaminyina makumbi ano (3) nomwo tweji kunganyalanga kachi nge natwitavila atutwaminyine.

OMWO YEHOVA ATWAMINYINYINENGA MUYACHI WAISALELE

4-5. Uno Yehova asolwele ngachilihi ngwenyi apwile nakuzachisa Mose hakutwaminyina vaIsalele? (Talenu muvwimbimbi wahalipapilo lyahelu.)

⁴ Yehova atongwele Mose mangana atwaminyine vaIsalele hakufuma muEjipitu. Kaha ahanyine unjiho wakusolola nge, apwile nakutwaminyina vaIsalele kuhichila muli Mose. Chakutalilaho, ahakileko panda yalivwi namusana, kaha naufuku panda yakakahya. (Kulo. 13:21) Ngocho, Mose akavangijilenga yize panda yamutwaminyinyine hamwe navaIsalele kuKalungalwiji Uchila. Vatu vevwile woma chikuma omu maswalale vavaEjipitu vapwile nakuvahangasana nakushinganyeka ngwavo navavajiha. Ngocho, vakukulwile ngwavo Mose alimbenjele chikuma kuvatwala kuKalungalwiji Uchila. Oloze kalimbenjeleko. Yehova ikiye azachishile Mose atwale vatu jenyi kuKalungalwiji Uchila. (Kulo. 14:2) Shikaho, Kalunga avayowele mujila yakukomwesa.—Kulo. 14:​26-28.

⁵ Hamyaka 40 yakavangijileho, Mose atwalilileho lika kufwelela ngwenyi Yehova apwile nakuzachisa lika panda yalivwi hakutwaminyina vatu mupambo. a Shikaho, halwola lwalusuku Yehova ahakile yize panda hambalaka yaMose, mangana vaIsalele vosena vayimone. (Kulo. 33:​7, 9-10) Yehova ahanjikilenga naMose kuzachisa yize panda, kaha Mose alwezelenga vatu jindongi josena jize Yehova amulwezelenga. (Samu 99:7) Chikupu vene, vaIsalele vapwile naunjiho wakutamo wakusolola nge Yehova apwilenga nakuzachisa Mose avatwaminyine.

6. Uno vaIsalele vakwile ngachilihi kujila Yehova avatwaminyinyinengamo? (Kulava 14:​2, 10, 11)

⁶ Chaluvinda, vaIsalele vavavulu vakanyine unjiho wakusolola nge Yehova apwile nakuzachisa Mose hakuvatwaminyina. (Tangenu Kulava 14:​2, 10, 11.) Chikupu vene, mapapa kakavulu vakanyine kuvatwaminyina kuli Mose. Ngocho, kavengilile muLifuchi lyaLushikoko.—Kula. 14:30.

7. Hanenu chakutalilaho chavatu vaze vakavangijile Yehova. (Kulava 14:24) (Talenu nawa muvwimbimbi.)

⁷ Chipwe ngocho, vaIsalele vamwe vakavangijilenga Yehova. Chakutalilaho Yehova ambile ngwenyi: “Kaleve . . . [na]ngukavangizanga namuchima wenyi wosena.” (Tangenu Kulava 14:24.) Kalunga akiswile Kaleve nakumwitavisa asakule chihela mwasaka muKanane. (Yoshu. 14:​12-14) Chisemwinwino chavaIsalele chize chakavangijileho nachikiko nawa chahanyine chakutalilaho chamwaza hakwitavila Yehova achitwaminyine. Omu Yoshuwa aswanyine Mose kupwa twamina yavaIsalele, vatu vavaIsalele vosena “vamuvumbikilenga chikuma hamakumbi akuyoya chenyi osena.” (Yoshu. 4:14) Echi chalingishile Yehova avakisule hakuvaneha mulifuchi lize avashikile kuvahana.—Yoshu. 21:​43, 44.

8. Lumbununenu omwo Yehova atwaminyinyinenga vatu jenyi mulwola lwavamyangana. (Talenu nawa muvwimbimbi.)

⁸ Omu mwahichile myaka Yehova atongwela vaka-kuyula mangana vatwaminyine vatu jenyi. Mukuhita chalwola nawa, mulwola lwavamyangana Yehova atongwele vapolofweto mangana vatwaminyine vatu jenyi. Vamyangana vakushishika vevwilililenga kuvyuma vavahuhumwinenga vapolofweto. Chakutalilaho Mwangana Ndavichi etavilile vamwolole kuli kapolofweto Natane.  (Samwe. 2, 12:​7, 13 Miji. 1, 17:​3, 4) Mwangana Yehoshafwate akavangijile vyuma amulwezele kapolofweto Yahajele kaha nawa akolezezele vatu muYuta ‘vafwelele vapolofweto jaKalunga.’ (Miji. 2, 20:​14, 15, 20) Omu Mwangana Hezekiya apwile muukalu, apendaminyine hali kapolofweto Isaya. (Isa. 37:​1-6) Lwola lwosena luze vamyangana vetavililenga Yehova avatwaminyine, vavakiswilenga kaha lifuchi nawa valikingilenga. (Miji. 2, 20:​29, 30; 32:22) Vatu vosena vatachikijile ngwavo Yehova apwile nakuzachisa vapolofweto jenyi mangana vatwaminyine vatu jenyi. Chipwe ngocho, vamyangana vavavulu kuhakilako navatu javo vakanyinenga vapolofweto jaYehova.—Yele. 35:​12-15.

OMWO YEHOVA ATWAMINYINYINENGA VAKA-KULISHITU VAKULIVANGA

9. Uno Yehova azachishile iya mangana atwaminyine vaka-Kulishitu mulikulukaji lyamyaka lyakulivanga? (Talenu nawa muvwimbimbi.)

⁹ Yehova atungile chikungulwilo chavaka-Kulishitu mulikulukaji lyamyaka lyakulivanga C.E. Uno atwaminyinyinenga ngachilihi ava vaka-Kulishitu vakulivanga? Atongwele Yesu kupwa mutwe wachikungulwilo. (Efwe. 5:23) Chipwe ngocho, Yesu kalwezelenga kambaji hikambaji vyuma atela kulingako. Azachishilenga vaposetolo navakulwane muYelusalema vatwaminyine vatu jenyi. (Vili. 15:​1, 2) Kaha nawa vakulwane vavatongwelenga mangana vatwaminyine chikungulwilo.—Teso. 1, 5:12; Chitu. 1:5.

10. (a) Uno vaka-Kulishitu vamulikulukaji lyamyaka lyakulivanga vakwileko ngachilihi kujindongi vatambwile? (Vilinga 15:​30, 31) (b) Mwomwo ika vatu vamwe vakushikulu vahonene kwitavila vatu vaze Yehova atongwele? (Talenu lipwata lyakwamba ngwavo, “ Ovyo Vatu Vamwe Vanakanyina Unjiho Wasoloka Hatoma.”)

¹⁰ Uno vaka-Kulishitu vamulikulukaji lyamyaka lyakulivanga vakwileko ngachilihi? Vavavulu vakavangijilenga jindongi vavahanyinenga. Mbimbiliya yahanjika ngwayo, “vawahililile hamazu akuvakolezeza.” (Tangenu Vilinga 15:​30, 31.) Uno Yehova natwaminyinanga ngachilihi vatu jenyi mumakumbi etu?

OMWO YEHOVA ALI NAKUTUTWAMINYINA MAKUMBI ANO

11. Hanenu chakutalilaho chasolola omwo Yehova natwaminyinanga vaze vali nakututwaminyina makumbi ano.

¹¹ Yehova ali nakutwalaho kutwaminyina vatu jenyi makumbi ano. Ali nakulinga ngocho kuhichila muMazu enyi namuli Mwanenyi uze apwa mutwe wachikungulwilo. Kutala tuli nakumono  unjiho wakusolola nge Kalunga ali nakutwalaho lika kuzachisa vatu mangana atutwaminyine tahi? Eyo. Chakutalilaho, talenu vyuma vimwe vyasolokele hanyima yamwaka wa 1870. Charles Taze Russell namasepa jenyi vaputukile kwivwishisa mwaka wa 1914 kupwa himwaka waulemu uze Wangana waKalunga naukaputuka kuyula. (Ndanye. 4:​25, 26) Chuma chavakafwile vakukulule ngocho shina, kupendamina haupolofweto wamuMbimbiliya. Kutala Yehova apwile nakuvatwaminyina omwo vapwile nakuhehwojolanga muMbimbiliya tahi? Eyo. Mu 1914, vyuma vyasolokele mukaye vyasolwele nge Wangana waKalunga waputukile kuyula. Mumwaka kana kwapwile Jita yaKaye yatete, kufumaho kwepukile misongo yachihita, namindenda, naukalu wakuhona vyakulya. (Luka 21:​10, 11) Chikupu vene, Yehova apwile nakuzachisa ava vaka-Kulishitu vamichima yamwaza mangana vakafwe vatu jenyi.

12-13. Uno vandumbwetu vapwile nakutetekela valongesele vyuma muka haJita yaKaye yamuchivali, mangana vazate chikuma mulimo wakwambulula nakunangula?

¹² Shinganyekenu nawa vyuma vyasolokele haJita yaKaye yamuchivali. Omu vandumbwetu vahachikota chetu vaze vapwile nakutwaminyina valinangwile chisoneka chaKusoloka 17:​8, vatachikijile ngwavo jita kana kayeshi kututwala kuAlamangetoneko, oloze nayitutwala kukuunda chize nachitukafwa twambulule chikuma. Numba tuhu halwola kana chapwile nakusoloka nge kachapwile chamangana kupwa naShikola yaNgileyate Yakulinangula Mbimbiliyako, oloze vandumbwetu vapwile nakutetekela vahakileko shikola kana mangana vanangule vamishonali vapwenga nauhashi wakwambulula nakunangula vatu mumafuchi osena. Vamishonali vavatuminenga mumafuchi nahalwola kwapwile jita. Kaha nawa ndungo wakushishika alongesele vyuma mangana kupwenga shikola yakunangula vatu vosena muchikungulwilo vapwenga vaka-kwambulula navaka-kunangula vakwipangweji. b Ngocho vatu jaKalunga vavalingishilenga vapwenga vakulizanga vyamulimo wapwile nakwiza kulutwe.

¹³ Tunamono unjiho wakusolola hatoma nge Yehova atwaminyinyinenga vatu jenyi mulwola lwalukalu. Kufuma vene haJita yaKaye yamuchivali, vatu jaYehova mumafuchi amavulu vanapunga vakulihehwa kwambulula mujimbu wamwaza mumafuchi amavulu. Kaha mulimo kana uli nakuzovoloka chikupu.

14. Mwomwo ika twatela kufwelela jindongi jakufuma kuliuka lyaYehova nakuli vakulwane vaze vatongola? (Kusoloka 2:1) (Talenu nawa muvwimbimbi.)

¹⁴ Makumbi ano, vandumbwetu vamuLizavu lyaKutwaminyina vali nakutwalaho lika kwitavila Kulishitu avatwaminyine. Veji kulinganga ngocho mwomwo vasaka jindongi jize veji kuhananga vandumbwavo jisolole omwo Yehova amwenamo vyuma. Kaha nawa tulama vakujinguluka navakulwane veji kuhananga jindongi kuvikungulwilo. c Vakulwane vawavisa vatwama ‘mulivoko lyaKulishitu lyachilyo.’ (Tangenu Kusoloka 2:1.) Chipwe ngocho, ava vakulwane vanahase kulimbenja mwomwo kavapwa vakukupukako. Mose naYoshuwa valimbenjelenga mapapa kakavulu, kahomu mukiko chapwilenga nakuli vaposetolo. (Kula. 20:12; Yoshu. 9:​14, 15; Loma 3:23) Chipwe ngocho, Kulishitu ali nakutwaminyina ndungo wakushishika navakulwane atongola, kaha mwatwalaho lika kulinga ngocho “makumbi osena palanga nakuchikukulwishi chakatwamino kamyaka yino.” (Mateu 28:20) Shikaho kuli vyuma vyavivulu vize vyatela kutulingisa tufwelele jindongi jize vali nakutuhana kuhichila muli vaze atongola kututwaminyina.

TWEJI KUNGANYALANGA NGE NATUTWALAHO LIKA KWITAVILA YEHOVA ATUTWAMINYINE

15-16. Vyuma muka munalinangula kuvyakutalilaho vyavatu vaze veji kwitavilanga Yehova avatwaminyine?

¹⁵ Nge natutwalaho lika kwitavila Yehova atutwaminyine, kaha natulivwisa kuwaha jikisu jajivulu namakumbi ano. Chakutalilaho, Andy napuwenyi Robyn vakavangijile lundongi lwakufuma kuli ndungo wakushishika lwakwashiwisa chiyoyelo. (Hepe. 13:5) Echi chavakafwile valisuule kuzata milimo yakutungatunga yamuliuka. Robyn ambile ngwenyi: “Tunatwamenga mukazuvo kakandende, kaha nawa shimbu jimwe kamwapwilenga fwashi yakutelekelako. Kaha nawa ngwalanjishile vinoma ngwazachishilenga hakukopa jifwato numba tuhu ngwazangile kukopa jifwato. Ngocho ngwalilile chikuma omu ngwavilanjishile. Oloze ngana mwaSala pwevo lyaApalahama, ngwafwililile kutalilila vyuma vyakulutwe nakuvulyama vyuma vyakunyima.” (Hepe. 11:15) Vyuma muka vanganyalile ava vapwevo nalunga? Robyn ambile ngwenyi: “Twasuuluka chikuma hakutachikiza ngwetu tuli nakuhana Yehova vyuma vyosena twatwama navyo. Nge tuli nakuzata milimo yamuliuka, kaha tweji kumonanga omwo chiyoyelo nachikapwa mukaye kakahya.” Andy naikiye ambile ngwenyi: “Twapwa vakusuuluka hakuzachisa lwola lwetu nangolo jetu hakukundwiza mulimo waYehova.”

 ¹⁶ Mujila muka yikwavo tweji kunganyalanga kachi nge natwitavila Yehova atutwaminyine? Omu Marcia akumishile shikola, afwililile kuzata mulimo waupaniya, kweseka namuze vamukolezezele. (Mateu 6:33; Loma 12:11) Ambile ngwenyi: “Fulumende yangufwelelesele kungutangisa kuyunivesiti hamyaka yiwana. Oloze ami ngwafwililile kuzata milimo yakushipilitu. Ngocho ngwasakwile kulinangula milimo yakungukafwa ngupwenga nauhashi wakungukafwa nguzate kanawa mulimo wakwambulula. Chuma kanechi ngwasakwile kulinga chapwile chakwoloka chikuma. Oholyapwa ngweji kulivwisanga kuwaha kuzata mulimo waupayiniya, kaha milimo ngweji kuzatanga yeji kunguhanangako lwola lwakuzachila haMbetele hamakumbi amwe nakulivwisa kuwaha kuzata milimo yeka yakushipilitu.”

17. Vyuma muka vikwavo vyamwaza tunahase kulivwisa kuwaha kachi nge natukavangiza jindongi jaYehova? (Isaya 48:​17, 18)

¹⁷ Shimbu jimwe veji kutuhuhumunanga kutalisa kuvyuma vize vinahase kutuhungumwisa vyakufwana nge kufwila luheto navyuma vyeka vize vinahase kutulingisa tuhokole jishimbi jaKalunga. Namuvyuma kanevi, Yehova eji kutukisulanga nge natukavangiza jindongi jenyi. Tweji kupwanga nachivezu chitoma nakulihenda kumaukalu amwe. (Chimo. 1, 6:​9, 10) Ngocho tweji kulemesanga Yehova namuchima wetu wosena, kaha echi cheji kutulingisanga tupwenga vakuwahilila, nakutwama mukuunda nakupwa vakusuuluka.—Tangenu Isaya 48:​17, 18.

18. Mwomwo ika muli nakufwila kutwalaho lika kukavangiza jindongi jaYehova?

¹⁸ Chakuzeneka kuhuhwasana, Yehova mwatwalaho lika kuzachisa vatu vakumwimanyinako mangana vakatuhanenga jindongi haluyando lwalunene swi namuChiyulo chaMyaka 1,000. (Samu 45:16) Kutala natukatwalaho lika kukavangiza jindongi kana numba nge kulinga ngocho nachikasakiwa kuseza vyuma vimwe twazanga tahi? Chuma kana nachikapendamina hajila tweji kwakwilangamo kujindongi jaYehova oholyapwa. Shikaho, tutwalenuho lika kukavangiza jindongi jaYehova kuhakilako vene najize veji kutuhananga malunga atongola vaze veji kutulamanga. (Isa. 32:​1, 2; Hepe. 13:17) Kulinga ngocho nachitukafwa tufwelele chikuma Yehova Muku-Kututwaminyina wamunene uze eji kutukinganga kuponde nakututwaminyina kukuyoya chahaya myaka yosena mukaye kakahya.