LYACHITATU ha 18 January, 2023, kwapwile kuvilika chakulipwila ha jw.org chakwamba ngwavo, ndumbwetu Gage Fleegle nandumbwetu Jeffrey Winder vanavatongola kupwa muLizavu lyaKutwaminyina lyaVinjiho jaYehova. Ava vandumbwetu vanazachila Yehova nakashishi hamyaka yayivulu.

Ndumbwetu Fleegle vamulelelele muPennsylvania, U.S.A. kuli visemi vaze vevwilenga Kalunga woma. Omu apwile mukweze, tanga yavo yalukilile kumbongi yakumembo nakuzachila kuze kwapwile nakusakiwa kukafwa. Nakushimbula chiku, vamumbapachishile ha 20 November, 1988.

Visemi jandumbwetu Fleegle vamukolezezelenga aputuke kuzata mulimo washimbu yosena. Ava visemi jenyi vasanyikilenga chikuma tulama vakujinguluka navaka-Mbetele kuzuvo yavo, ngocho ndumbwetu Fleegle amwenenga omu ava vandumbwetu vapwilenga vakuwahilila. Nakushimbula chiku kufuma hakumumbapachisa, aputukile kuzata upayiniya washimbu yosena ha 1 September, 1989. Kahomu mwahichile myaka yivali, vamusanyikile kuya nakuzachila haMbetele, chuma chize alitomenenene kulinga omu apwile namyaka 12. Ngocho aputukile kuzachila haMbetele yamuBrooklyn muOctober 1991.

Ndumbwetu Fleegle azachililenga haMbetele kulipatimende lyakulamika mikanda hamyaka 8, kufumaho vamutwalile kuLipatimende lyaMulimo. Halwola kana, apwile muchikungulwilo chazachisa lilimi lyaRussia hamyaka yayindende. Kuheta mumwaka wa 2006 ambachile puwenyi Nadia, kaha vaputukile kuzachila hamwe muMbetele. Vanazachilanga hamwe mungalila yahanjika lilimi lyaPortuguese, kaha vanazachila mungalila yahanjika lilimi lyaSpanish hamyaka yakuzomboka 10. Hanyima yakuzachila kuLipatimende lyaMulimo hamyaka yayivulu, ndumbwetu Fleegle vamuhanyine kuzachila muOfesi yaKomiti Yakunangula, kaha kutwala muze aputukile kuzachila muOfesi yaKomiti yaMulimo. Kuheta muMarch 2022 vamutongwele kupwa muka-kukafwa muKomiti yaMulimo yaLizavu lyaKutwaminyina.

 Ndumbwetu Winder vamulelelele munganda yaMurrieta, California, U.S.A. Vamulelele mumuchano kuli visemi jenyi, kaha vamumbapachishile ha 29 March, 1986. Mukakweji akavangijileho, aputukile kuzata upayiniya wakukafwa. Alivwishilenga kuwaha kuzata mulimo kana, ngocho asakile kutwalaho lika. Kahomu azachile upayiniya wakukafwa hatukweji vavavulu, aputukile kuzata upayiniya washimbu yosena ha 1 October, 1986.

Omu apwile mukweze, ndumbwetu Winder atambukilile vayaya jenyi vamalunga vavali vaze vapwile nakuzachila haMbetele halwola luze. Ou ungeji wamulingishile alisonekese kuya nakuzachila haMbetele omu akolele. Kaha kuheta muMay 1990, vamusanyikile kuya nakuzachila haMbetele muWallkill.

Ndumbwetu Winder azachile mumalipatimende ahaMbetele akulisezaseza akufwana nge Lipatimende lyaKutala haUnyoji, naLipatimende Lyatala haFwamu, naLipatimende Lyazakama vaka-Mbetele. Kaha kuheta mu 1997, ambachile puwenyi Angela, kaha vanazachilanga hamwe haMbetele kufuma halwola kana. Mu 2014 vavatumine kuya nakuzachila haWarwick, kaha ndumbwetu Winder atalilenga mulimo wakutunga chikota chetu. Kaha kuheta mu 2016 valukilile kuPatterson Watchtower Educational Center, kuze ndumbwetu Winder azachilenga muLipatimende lyaKutunga jiVindiyo Nakukopa Mazu. Kahomu mwahichile myaka yiwana, vavakindulwishile kuWarwick, kaha ndumbwetu Winder azachilililenga kuOfesi yaKomiti Yatala haJitanga jaMbetele. Kutwala muze, vamutongwele kupwa muka-kukafwa muKomiti Yatala haJitanga jaMbetele yaLizavu lyaKutwaminyina muMarch 2022.

Tuli nakulomba ngwetu Yehova atwaleho lika kukisula ava vandumbwetu vaze vapwa ‘malunga vaze vapwa wana,’ omu vali nakutwalaho lika kuzata nangolo kukundwiza Wangana.—Efwe. 4:8.