Mbimbiliya yasolola hatoma ngwayo Yehova nahase kuhanjikila chimweza vyuma navikasoloka kulutwe. (Isa. 45:21) Chipwe ngocho, kayahanjika vyuma vyosena kutalisa kujila eji kulingilangamo ngocho, chipwe lwola eji kuvihanjikanga, chipwe kusakula vyuma vize atela kutachikijila chimwezako. Shikaho, katwatachikiza kanawa vyuma vyosena kutalisa kuchihande kanako. Chipwe ngocho, tushimutwilenu havyuma vimwe twatachikiza.

Yehova nahase kulinga kala vyeshovyo nasake, oloze shimbu jimwe eji kusakulanga kuhona kuvilinga. Yehova nahase kuhanjikila chimweza kala vyuma nasake mwomwo atwama namangana chikuma. (Loma 11:33) Hakuwana nge atwama namuchima wakulikanyisa, ngocho nahase kusakula kuhona kuhanjikila chimweza vyuma vimwe.—Esekesenuko Isaya 42:14.

Yehova eji kulingisanga mwaya muchima wenyi mulingiwe. Uno chuma kana chalifwana ngachilihi nauhashi wenyi wakuhanjikila chimweza vyakulutwe? Mukanda waIsaya 46:10 ngwawo: “Kufuma vene kumaputukilo, ngweji kwambululanga vyuma vyakulutwe, kufuma kushikulu ngweji kwambululanga vyuma vize kanda visoloke. Ngweji kwambanga ngwami, ‘Vyuma ngunajinyi navikalingiwa, nangukalinga vyeshovyo ngunasake.’”

Chuma chimwe cheji kulingisanga Yehova ahanjikile chimweza vyuma navikasoloka kulutwe shina mwomwo akwechi ngolo jakutesamo vyuma. Etu vatu tweji kulahilanga kutanga kusongo yamukanda shimbu kanda tuheteko mangana tutachikize omu chinakumu chihande, oloze omwo keshi mukiko eji kulinganga Yehova hakusaka kutachikijila chimweza vyuma navikasoloka kulutweko. Nge nahanjika ngwenyi nakukasoloka vyuma vimwe, kaha eji kulingisanga vyuma kana vitesemo halwola vene luze atongola.—Kulo. 9:​5, 6; Mateu 24:36; Vili. 17:31.

Shikaho, Mbimbiliya yazachisa mazu akufwana nge ‘kulongesa,’ ‘nakutenga,’ ‘nakujina’ hakulumbununa vyuma eji kulinganga Yehova kutalisa kuvyuma navikasoloka kulutwe. (Vamya. 2, 19:25; kwinyikila; Isa. 46:11) Mazu kana afuma kulizu lyachiHepeleu lize lyalumbununa “kutenga.” (Yele. 18:4) Ngana muze muka-kutenga unonga eji kutenganga unonga muchuma chimwe, mukiko nawa Yehova nahase kulingisa vyuma vitesemo kweseka namwaya muchima wenyi.—Efwe. 1:11.

Yehova avumbika wana atuhana wakulisakwila vyakulinga. Kahanjika vyuma navikasolokela mutu himutuko. Kaha nawa kalingisa vatu vamwaza michima valinge vyuma vize navikavatwala kukunongako. Etavisa vosena valisakwile vavene chiyoyelo chavo, kaha eji kuvakolezezanga vasakule chiyoyelo chamwaza.

Shinganyekenu havyakutalilaho vino vivali. Chakutalilaho chatete shina chavaka-Nyineve. Yehova ahanjikilile chimweza ngwenyi nganda yaNyineve mwakayinongesa mwomwo yazalile navilinga vyavipi. Oloze omu vatu vamunganda kana vapihililile nakwalumuka, Yehova “alumwine vishinganyeka vyenyi halupi luze ambile kuvanehela. Ngocho kaluneheleko.” (Yona 3:​1-10) Yehova alumwine vishinganyeka vyenyi kutalisa kuvyuma ahanjikilile chimweza ngwenyi navisolokela vaka-Nyineve, mwomwo vatu kana vazachishile wana wavo wakulisakwila vyakulinga hakwakula kanawa kumujimbu wakuvahuhumuna uze avatuminyinyine Yehova.

Chakutalilaho chamuchivali shina chaupolofweto uze wahanjikile hali Kuluse muka-kufungulula, uze asokwele vaYuleya muufunge nakuhana lushimbi lwakutungulula tembele yaYehova. (Isa. 44:26–45:4) Mwangana Kuluse waPeleja ikiye ateselemo upolofweto kana. (Ezela 1:​1-4) Chipwe ngocho, Kuluse kapwile muka-kulemesa Kalunga wamuchanoko. Yehova azachishile Kuluse atesemo upolofweto wenyi chakuzeneka kumushinjila amulemese.—Vishi. 21:1.

Evi hivyuma vyavindende kaha vize vyeji kulingisanga Yehova ahanjikile chimweza vyuma navikasoloka kulutwe. Kuhanjika muchano, namutu numba umwe wauchi nahase kutachikiza kanawa jijila jaYehovako. (Isa. 55:​8, 9) Eyo, vyuma asolola Yehova vyeji kuzamisanga lufwelelo lwetu nakusolola hatoma nge eji kulinganga vyuma vyakwoloka, kuhakilako vene navyuma vize atulweza ngwenyi navikasoloka kulutwe.