CHUMA NACHIMIKAFWA HAKULINANGULA

Wanenu Vishina VyamuMazu aKalunga Munahase Kuzachisa

Nge tuli nakutanga Mbimbiliya tunahase kutondatonda vishina vyamuMazu aKalunga hakuhehwojola. Uno vyuma muka vinahase kutukafwa tunganyale chikuma?

Linangulenu vyakujiminyina mumijimbu yamuMbimbiliya. Chakutalilaho, fwilenu kutachikiza owo asonekele mujimbu kana, nowo ausonekelele, nalwola ausonekele. Vyuma muka vyapwile nakusoloka halwola kana, navize vyasolokele kunyima, navize vyasolokele hanyima yavyuma kana?

Wanenu vishina namulinangula kumujimbu kana hakulihulisa vihula vino: ‘Uno vatu vanavuluka mumujimbu kana vevwile ngachilihi? Vilinga muka vasolwele? Mwomwo ika ngwatela kupwa navilinga kana, chipwe kulihendako?’

Zachisenu vyuma namulinangula, pamo munahase kuvizachisa mumulimo wakwambulula chipwe hakutwama navakwenu. Nge namulinga ngocho, kaha namusolola ngwenu mukwechi mangana akufuma kuli Kalunga, ngana muze yahanjika Mbimbiliya ngwayo: “Weshowo akwechi mangana mwanyingilila vyuma kanevi.”—Samu 107:43.

• Vyuma Navimikafwa: Talenu omwo vihande vyakukunguluka chamukachi kachalumingo hachihanda chakwamba ngwavo, Vishina Vyavilemu VyamuMazu aKalunga vyeji kutukafwanga tushinganyeke omwo tunahase kuzachishilamo vyuma natulinangula. Chihanda kana chatwama navihula tunahase kulihulisa etu vavene, navishina tunahase kushinganyekaho, navyakutalilaho tunahase kukekesa.