“Fwelela Yehova, Linganga Mwamwaza”
“Fwelela Yehova, linganga mwamwaza . . . pwakonga uwakushishika.”—SAMU 37:3.
MYASO: 133, 63
1. Yehova atengele vatu nauhashi muka wakulipwila?
YEHOVA atengele vatu nauhashi wakulipwila. Atuhana uhashi wakushinganyeka vyuma vyakulutwe namwakukumishila ukalu. (Vishi. 2:11) Atuhana ngolo jakutukafwa tulinge vyuma twafwila nakuvitesamo. (Fwili. 2:13) Atutenga nawa nachivezu chize cheji kutukafwanga kutachikiza vyuma vyamwaza nevi vyavipi. Cheji kutukafwanga tulihende kukulinga vyuma vyavipi nakuzachila hatutenga twetu nge tunalimbenje.—Loma 2:15.
2. Yehova asaka tuzachise uhashi wetu mujila muka?
2 Yehova asaka tuzachisenga uhashi wetu mujila yamwaza. Mwomwo ika? Mwomwo atuzanga, kaha nawa atachikiza ngwenyi nachitulingisa tupwenga vakusuuluka. Kuhichila muMazu enyi, Yehova eji kutulwezanga tuzachise uhashi wetu mujila yamwaza. Chakutalilaho, muVisoneka VyachiHepeleu vasoneka ngwavo: “Vyuma veji kujinanga vaka-mangana vyeji kufukilanga,” kaha Vishi. 21:5; Kwambu. 9:10) MuVisoneka VyachiHelase vyaVaka-Kulishitu vasoneka ngwavo: “Heshoho natuwanyina lwola lwakulinga ngocho, tulingenunga vyuma vyamwaza kuli vosena,” kaha nawa ngwavo “kweseka nomu natambula mutu himutu wana, uzachisenu hakuzachila vakwenu.” (Ngale. 6:10; Petu. 1, 4:10) Chikupu vene, Yehova asaka tulinge vyuma vize navitunganyalisa hamwe kaha navakwetu.
nawa ngwavo “cheshocho naliwana livoko lyove, chilinge nangolo jove josena.” (3. Mwomwo ika vatu vahona kuzata vyuma vyosena mukulonga?
3 Chipwe ngocho, Yehova atachikiza ngwenyi katweshi kuhasa kuzata vyuma vyosena mukulongako. Mungolo jetu kaha, katweshi kuhasa kufumisako kuhona kukupuka, shili nakufwa, chipwe kulweza vakwetu vyakulingako mwomwo navakiko vatwama nalisesa lyakulisakwila vyakulinga. (Vamya. 1, 8:46) Numba tunangakana tuhu ngachilihi, chipwe tupwa nachinyingi chachivulu, hanga tuvana vavandende kuli Yehova.—Isa. 55:9.
Nge munakulipika naukalu kaha ‘fwelelenu Yehova, nakulinga mwamwaza’
4. Vyuma muka natushimutwila muchihande chino?
4 Muvyuma vyosena twatela kupendamina hali Yehova atutwaminyine, nakutukafwa, nakutulingila vyuma vize katweshi kuhasako. Oloze twatela nawa kuzata nangolo jetu josena mangana tukumise ukalu tuli nawo nakukafwako vakwetu. (Tangenu Samu 37:3.) Twatela ‘kufwelela Yehova, nakulinganga mwamwaza nakupwa vakushishika.’ Shikaho, tutalenu jino vyuma natulinangula kuli Nowa, Ndavichi, navangamba jaYehova veka vakushishika vaze vapendaminyine hali ikiye nakulinga vyuma vyamwaza. Kaha natuwana nge kwapwile vyuma vize vahashile kulinga navize kavahashile kulingako, ngocho valingile vize vahashile.
NGE MWATWAMA NAVATU VAVILINGA VYAVIPI
5. Lumbununenu vyuma amwene Nowa mukuyoya chenyi.
5 Nowa apwile mukaye muze mwapwile “ulyanyi lika” navilinga vyavipi. (Kupu. 6:4, 9-13) Atachikijile ngwenyi Yehova mwanongesa kaye kana. Chipwe ngocho, Nowa evwilenga kupihya havyuma vyavipi valingilenga vatu. Oloze ejivile ngwenyi kuli vyuma vimwe nahase kulinga navize keshi kuhasa kulingako.
Kukana kuvambulwila (Talenu palangalafu 6-9)
6, 7. (a) Vyuma muka vize Nowa kahashile kulingako? (b) Chiyoyelo chetu chinalifwane ngachilihi nachize chaNowa?
6 Vyuma vize Nowa kahashile kulingako: Numba tuhu Nowa ambulwilenga mazu aYehova akuhuhumuna vatu, oloze kahashile kuvashinjila vetavile mujimbu kanako, chipwe kulingisa Livaji lizenga washiko. Nowa atelelele kufwelela kaha ngwenyi Yehova mwatesamo vyuma nashiki vyakunongesa vatu vakuhuka halwola atongola.—7 Nayetu nawa twatwama mukaye muze mwazala navatu vavilinga vyavipi, vaze mwanongesa Yehova kalinwomu. (Yowa. 1, 2:17) Oloze katweshi kuhasa kushinjila vatu vetavile “mujimbu wamwaza waWangana[ko].” Kaha nawa katweshi kuhasa kulingisa “luyando lwalunene” lwizenga washiko. (Mateu 24:14, 21) Ngana muze alingile Nowa, nayetu twatela kupwa nalufwelelo lwakukola, nakufwelela ngwetu kalinwomu Kalunga atesemo vyuma ashika vyakunongesa vatu vakuhuka. (Samu 37:10, 11) Twafwelela chikupu ngwetu Yehova keshi kwechelela kano kaye kakapi katwaleho lika chipwe kumuhonesa kutesamo vyuma ajina halwola atongolako.—Hamba. 2:3.
8. Nowa ashishikile ngachilihi havyuma vize ahashile kulinga? (Talenu muvwimbimbi wakulivanga.)
8 Vyuma vize ahashile kulinga Nowa: Muchishishisa chakulitwamina mwomwo yavyuma vize kahashile kulingako, Nowa ashishikile havyuma ahashile kulinga. Hakupwa “muka-kwambulula kwoloka,” Nowa atwalileho kuzata mulimo wakwambulula mujimbu waKalunga wakusopesa. (Petu. 2, 2:5) Chakuhona kukakasana, echi chamukafwile kuzamisa lufwelelo lwenyi. Azachishile nawa ngolo nauhashi wenyi hakutesamo mulimo vamuhanyine wakusonga wato.—Tangenu WavaHepeleu 11:7.
9. Tunahase kulondezeza ngachilihi chakutalilaho chaNowa?
9 Ngana mwaNowa, nayetu nawa twafwila kupwa “navyuma vyavivulu vyakuzata mumulimo waMwata.” (Koli. 1, 15:58) Tunahase kuzata milimo yakufwana nge, kutunga nakutungulula vihela vyakulemesela Kalunga, nakulisuula kuzata mulimo wakulisakila hakukunguluka chachihanda nechi changalila, chipwe kuzachila haofesi yamutango naofesi yakwalumwina mikanda. Chikumanyi tweji kwazana mumulimo wakwambulula mwomwo twatachikiza ngwetu, mulimo kana nauzamisa lutalililo lwetu. Ndumbwetu umwe wapwevo wakushishika ambile ngwenyi: “Nge mulweza vatu vyuma naukalinga Wangana waKalunga, nautachikiza jino ngwove vatu kana kavatwama nalutalililoko, vamona ngwavo ukalu wavo kaweshi kukakumako.” Chapundu vene, kwazana mumulimo wakwambulula nachizamisa lutalililo lwetu nakutwalaho lika kulaha mujila yakuya kukuyoya.—Koli. 1, 9:24.
NGE TUNALINGI SHILI
10. Vyuma muka alingile Ndavichi?
10 Yehova avulukile Mwangana Ndavichi ngwenyi, apwile “lunga [evwililile] kuwaha kumuchima.” (Vili. 13:22) Ndavichi apwile wakushishika mukuyoya chenyi. Chipwe ngocho avulumwine mulonga washili waunene. Alingile ukoji naMbate-sheva. Hakusaka kusweka shili yenyi, asungamishile vyuma mangana Uliya, lunga lyaMbate-sheva vakamujihe kujita. Ndavichi asonekele mukanda nakuuhana kuli Uliya wakusolola nge vatela kukamujiha. (Samwe. 2, 11:1-21) Oloze mulonga avulumwine Ndavichi wasolokele hatoma. (Mako 4:22) Uno omu vatachikijile mulonga wenyi alingile ngachilihi?
Kwanuka shili mwalingile (Talenu palangalafu 11-14)
11, 12. (a) Vyuma muka kahashile kulinga Ndavichiko omu alingile shili? (b) Yehova mwalinga ika nge natupihilila nakwalumuka kumilonga yetu yashili yayinene?
11 Vyuma vize Ndavichi kahashile kulingako: Ndavichi kahashile kulifumisa mulonga alingileko. Kaha nawa kahashile kulihenda kuukalu uze wejile mwomwo yakulinga shiliko. Ukalu umwe alipikile nawo mukuyoya chenyi chosena. (Samwe. 2, 12:10-12, 14) Shikaho asakiwile kupwa nalufwelelo. Atelelele kufwelela ngwenyi Yehova mwamukonekela nakumukafwa omike muukalu nge mwapihilila nakwalumuka.
12 Tuvosena tweji kulinganga shili mwomwo katwakupukako. Milonga yimwe yapwa yayinene kuhambakana yikwavo. Shimbu jimwe katweshi kuhasa kulifumisa mumilonga natulingako. Natutwalaho lika kumona ukalu mukuyoya chetu mwomwo yashili twalingile. (Ngale. 6:7) Oloze Mazu aKalunga atukafwa tufwelele ngwetu nge natupihilila nakwalumuka kaha Yehova mwatukafwa mulwola lwaukalu, chipwe tuhu ukalu kana wakulikokela yetu vavene.—Tangenu Isaya 1:18, 19; Vilinga 3:19.
13. Ndavichi ejile nakupwa ngachilihi cheka wakushishika kuli Kalunga?
13 Vyuma ahashile kulinga Ndavichi: Ndavichi etavilile Yehova amukafwe kushipilitu. Jila yimwe alingililemo ngocho, shina yakwitavila vamuhuhumune kuli kapolofweto kaYehova Natane. (Samwe. 2, 12:13) Ndavichi nawa alombele kuli Yehova nakumulweza mulonga wenyi mangana amwivwile cheka uselewa. (Samu 51:1-17) Ndavichi kahombeleko, oloze azachilile hatutenga twenyi. Chapundu vene kalingile cheka milonga yashili kanako. Afwile wakushishika, kaha Yehova eji kumwanukanga mwomwo yakulonga chenyi.—Hepe. 11:32-34.
14. Vyuma muka natulinangula kuli Ndavichi?
14 Vyuma muka natulinangula kuchakutalilaho chaNdavichi? Nge tunalingi mulonga washili waunene, kaha twatela kupihilila nakwalumuka nakulomba Yehova atukonekele. Kaha nawa twatela kulitavila jishili jetu. (Yowa. 1, 1:9) Twatela nawa kulweza vakulwane vaze vanahase kutukafwa kushipilitu. (Tangenu WaYakova 5:14-16.) Hakwitavila nakukavangiza vyuma anoneka Yehova, natusolola nge twafwelela ngwetu mwatuhindula nakutukonekela. Kufumaho twatela jino kuzachila Yehova namuchima wetu wosena chakuzeneka kulinga cheka shili.—Hepe. 12:12, 13.
MUVYUMA VYEKA
Misongo (Talenu palangalafu 15)
15. Vyuma muka tunalinangula kuli Hana?
15 Munahase kushinganyeka hali vangamba jaKalunga veka vakushishika vakunyima vaze Samwe. 1, 1:9-11) Echi hichakutalilaho chamwaza kuli etu. Nge tuli nakulipika namisongo chipwe naukalu weka, kaha twatela kumbila kulizakamina chetu hali Yehova nakufwelela ngwetu eji kutuzakamanga. (Petu. 1, 5:6, 7) Kaha nawa twatela kuzata nangolo tupwenganga kukukunguluka nakunganyala kuvyuma vyeka vyakushipilitu.—Hepe. 10:24, 25.
vafwelelele muli Yehova hakulinga vyuma vahashile. Chakutalilaho, Hana kahashile kulifumisa umbako. Oloze afwelelele ngwenyi Yehova mwamuvendejeka, ngocho atwalileho lika kulomba namuchima wenyi wosena kuli Kalunga nakumulemesa hatavanaku. (Nge vana vanaseze muchano (Talenu palangalafu 16)
16. Vyuma muka navalinangula visemi kuli Samwele?
16 Nyi ngachilihi visemi vakushishika vaze vakwechi vana vavo vanaseze muchano? Kashinakaji Samwele kashinjilile vana venyi vashishike nakukavangiza jishimbi jakwoloka avanangwileko. (Samwe. 1, 8:1-3) Asezele vyuma vyosena kuli Yehova. Oloze ikiye alamine kulonga chenyi nakwivwisa Ise wamwilu Yehova kuwaha. (Vishi. 27:11) Makumbi ano visemi vaka-Kulishitu vavavulu vali nakumona ukalu woumwe. Vafwelela ngwavo ngana mwauze chisemi wamuchishimo chamwana wakujimbala, Yehova afwila kutambula vatu vaze navapihilila nakwalumuka. (Luka 15:20) Oloze nawa veji kukilikitanga vapwenga vakushishika kuli Yehova, nakufwelela ngwavo chakutalilaho chavo nachikafwa vana vavo vakinduluke kuutanga.
Kuhona jimbongo (Talenu palangalafu 17)
17. Mwomwo ika chakutalilaho chapwevo watuliwe muka-kukalikiza chatela kutukolezeza?
17 Tushimutwilenu nawa hali pwevo watuliwe muka-kukalikiza wamumakumbi aYesu. (Tangenu Luka 21:1-4.) Kahashile kulinga chuma numba chimwe haupi walingiwilenga mutembeleko. (Mateu 21:12, 13) Kaha nawa kapwile najimbongo jajivuluko. Oloze alisuwile kukundwiza “tujimbongo twachichele tuvali,” tuze twapwile ‘twakulikafwa natwo mukuyoya.’ Uze pwevo wakushishika asolwele lufwelelo lwenyi muli Yehova, hakutachikiza ngwenyi nge mwahaka vyuma vyakushipilitu kulutwe, kaha Yehova mwamuzakama kumujimba. Lufwelelo lwauze tuliwe lwamulingishile akundwize kulemesa chamuchano. Chochimwe nawa, nayetu twafwelela ngwetu nge natutondanga chatete Wangana, kaha Yehova mwatuhana vyuma vyosena natusaka.—Mateu 6:33.
18. Hanenu chakutalilaho chandumbwetu uze awahililile mukuyoya chamokomoko naukalu.
18 Vandumbwetu vavavulu makumbi ano vanasololanga hatoma lufwelelo lwavo muli Yehova, nakukilikita nangolo javo josena mangana valinge vyuma vyamwaza. Tutalenu chakutalilaho chandumbwetu Malcolm, uze ashishikile palanga nakukufwa chenyi mu 2015. Hamyaka yayivulu yize vazachilile Yehova napuwenyi, vamwene ukalu wauvulu. Ambile ngwenyi: “Kuyoya chapwa chachikalu, mwomwo vyuma vinahase kwalumuka kala lwola. Oloze Yehova eji kukisulanga vaze vapendamina hali ikiye.” Malcolm atukolezeza ngwenyi, “Lombenu mupwenga nangolo jakuzata chikuma milimo yaYehova. Shinganyekenu havyuma munahase kulinga keshi vize namuhona kulingako.” *
19. (a) Mwomwo ika chisoneka chamwaka wa 2017 chinapwila chakutamo? (b) Namukavangiza ngachilihi mazu amuchisoneka chamwaka wa 2017 mukuyoya chenu?
19 Omu kaye kano ‘kanakupihilako lika,’ tunahase kumona ukalu wauvulu. (Chimo. 2, 3:1, 13) Shikaho ukalu tunakumona makumbi ano kawatela kutuhombesako. Oloze twatela kufwelela muli Yehova nakulinga vyuma vyamwaza. Ngocho chisoneka chetu chamwaka wa 2017 chinatemo, chakwamba ngwavo: “Fwelela Yehova, linganga mwamwaza.”—Samu 37:3.
Chisoneka chamwaka wa 2017: “Fwelela Yehova, Linganga Mwamwaza.”
^ par. 18 Talenu Kaposhi Kakutalila kaOctober 15, 2013, mafwo 17-20.