1-3. Uze kapolofweto afumine kuYuta ahonene kulinga vyuma muka, kaha vyuma muka vyafuminemo? (Talenu muvwimbimbi wakulivanga.)

LWOLA lumwe muchiyulo chaMwangana Yelovowame, Yehova atumine kapolofweto umwe wakuYuta kuya nakuvilika mujimbu wakusopesa mwangana wamupi wavaIsalele. Uze kapolofweto wakulinyisa azachile mulimo vamuhanyine, kaha Yehova amukingile kuli uze mwangana waulyanyi Yelovowame.—Vamya. 1, 13:1-10.

² Omu apwile nakukinduluka uze kapolofweto, aliwanyine nalunga umwe wakashinakaji apwile nakufuma kuMbetele. Uze lunga alivulukile ngwenyi apwile kapolofweto kaYehova. Ahungumwishile uze kapolofweto kaYehova alikange kujindongi amuhanyine Kalunga jakwamba ngwenyi, ‘katela kulya vyakulya chipwe kunwa meya muIsaleleko,’ kaha nawa ‘katela kukakinduluka mujila yize ejileko.’ Ngocho Yehova apihililile chikuma. Kaha omu apwile nakukinduluka kwimbo, aliwanyine nandumba uze amulile.—Vamya. 1, 13:11-24.

³ Mwomwo ika ou kapolofweto apwile wakulinyisa hakavanga etavilile vamuhungumwise kuli uze kashinakaji? Mbimbiliya  kayatulwezako. Oloze tunahase kwamba ngwetu avulyamine ngwenyi atelelele ‘kutambuka mukulinyisa naKalunga.’ (Tangenu Mika 6:8.) MuMbimbiliya kutambuka naYehova chalumbununa kumufwelela, nakukundwiza wata wenyi nakwitavila atutetekele. Mutu wakulinyisa atachikiza ngwenyi atela kuhanjikanga lwola lwosena naIse wazangi uze apwa wangolo josena. Uze kapolofweto atelelele kulomba kuli Yehova amulweze vyakulinga, oloze Visoneka kavyatulweza nge alingile ngochoko. Nayetu nawa shimbu jimwe cheji kutukaluhwilanga kusakula vyuma vyakulinga, mwomwo yakuhona kutachikiza kanawa vyuma twatela kulinga. Kulinyisa nakwitavila Yehova atutwaminyine nachitukafwa tulihende kukusakula vyuma mujila yakuhenga.

4. Vyuma muka natulinangula muchihande chino?

⁴ Muchihande chinafumuho twalinangulanga ovyo kulikehesa chipwe kulinyisa chapwila lika chachilemu kuli vaka-Kulishitu, novyo twatela kulinga numba tupwenga vakulinyisa. Uno vyuma muka vinahase kutulingisa chitukaluhwile kupwa vakulinyisa? Vyuma muka vinahase kutulingisa tupwenga lika vakulinyisa numba tuli muvyeseko? Hakusaka kukumbulula vihula vino, tuchitalenu havyuma vitatu navilingisa chitukaluhwile kupwa vakulinyisa nge tuli mucheseko, navyuma vyamwaza tunahase kulinga.—Vishi. 11:2.

5, 6. Mbalajilai asolwele ngachilihi kulinyisa chenyi?

⁵ Chapwa chachikalu kulinyisa nge vyuma vinalumuka mukuyoya chetu. Omu Ndavichi alwezele Mbalajilai wamyaka yakusemuka 80 ezenga nakutwama munganda, Mbalajilai atela evwile kuwaha. Nge etavilile kachi alivwishile kuwaha kutwama hamwe namwangana. Oloze Mbalajilai akanyine. Mwomwo ika? Mwomwo yaushinakaji, alwezele Ndavichi ngwenyi kasakile kumuhana chiteliko. Shikaho Mbalajilai alwezele Ndavichi ambate mwanenyi Kimihame akatwame munganda muchishishisa chayikiye.—Samwe. 2, 19:31-37.

⁶ Kulinyisa chakafwile Mbalajilai asakule kanawa vyuma. Mbalajilai kakanyine kuya nakutwama munganda mwomwo yakuchina milimo, chipwe kusaka kulitwamina hembo lyenyiko. Oloze atachikijile hakuminyinyine ngolo jenyi. Kasakile kwitavila milimo yize mwahona kuzatako. (Tangenu Wavaka-Ngalesha 6:4, 5.) Nge natufwila vihela, naulemu, napuho nachitulingisa tulitohwese, nakulipecha navakwetu chize chinahase kukatunehela sonyi kulutwe. (Ngale. 5:26) Kulinyisa nachitukafwa tuzachise uhashi nangolo jetu hakuvumbika Kalunga nakukafwako vakwetu nawa.—Koli. 1, 10:31.

7, 8. Kulinyisa nachitukafwa ngachilihi tuhone kulifwelela etu vavene?

⁷ Kuzata milimo yayinene cheji kunehanga ulemu, nakulingisa mutu ahone kupwa wakulinyisa. Omu Nehemiya evwile vyaukalu vapwilemo vatu muYelusalema, alombele kuli Yehova. (Nehe. 1:4, 11) Yehova akiswile Nehemiya hakumutongola kuli Mwangana Alatakaseleke kupwa nguvulu. Chamokomoko nachihela, naluheto lwenyi, naulemu apwile nawo, Nehemiya kapendaminyine hauhashi wenyiko. Atambukilenga lika naKalunga. Akekeselenga Jishimbi jaKalunga mangana alinge mwayile muchima waYehova. (Nehe. 8:1, 8, 9) Nehemiya katwamine vakwavo chivwotoko, oloze alisuwile kuvazachila.—Nehe. 5:14-19.

⁸ Chakutalilaho chaNehemiya chasolola omu kulinyisa nachitukafwa tuhone  kulifwelela etu vavene nge vanatuhane milimo yeka. Kalama muchikungulwilo nahase kupendamina hauhashi wenyi nge mwaputuka kuzata milimo yamuchikungulwilo chakuhona kuvangila kulomba kuli Yehova. Veka nawa vanahase kusakula vyuma numba jino valombe Yehova avakafwe kutesamo vyuma vanasakula. Uno echi chapwa kulinyisa tahi? Mutu wakulinyisa atachikiza milimo atwama nayo muliuka lyaKalunga. Uhashi wetu kawapwa waulemuko. Shikaho twatela kuzangama kuchina natulifwelelanga etu vavene chikumanyi nge tuli muukalu uze twahonesele kunyima. (Tangenu Vishimo 3:5, 6.) Hakupwa tuvatu jaKalunga, twalinangula omu tunahase kutesamo milimo yamutanga chipwe muchikungulwilo chakuhona kulimona kupwa vavalemu.—Chimo. 1, 3:15.

9, 10. Nge vali nakututoleka, kulinyisa nachitukafwa ngachilihi?

⁹ Tunahase kwivwa kupihya nge vanakututoleka. Chakutalilaho, Hana alililenga mwomwo vamutolekelenga kuli muhalika wenyi Penyina. Hana vamuzangile chikuma kuli lunga lyenyi, oloze apwile mumba. Kahomu apwile nakulomba hatavanaku, Kapilishitu Wakulitulaho Eli ashinganyekele ngwenyi napende. Achishinganyekenu ocho kupihya evwile Hana! Chipwe ngocho, alinyishile nakukumbulula Eli mukavumbi. Kulomba chenyi vachisoneka muMbimbiliya, kaha mwatwama mazu alufwelelo, akwalisa nakusakwilila.—Samwe. 1, 1:5-7, 12-16; 2:1-10.

¹⁰ Kulinyisa nachitukafwa tufungulule “upi hakulinganga mwamwaza.” (Loma 12:21) Chiyoyelo chinapihi chikuma mukaye kano kaSatana, ngocho twatela kuzangama kuchina natumona vatu vavilinga vyavipi mujila yayipi chikuma. (Samu 37:1) Tweji kwivwanga kupihya chikumanyi nge tunalimbalaka navandumbwetu muchikungulwilo. Mutu wakulinyisa eji kulondezezenga Yesu. Mbimbiliya yamba ngwayo: “Omu vapwile nakumutukana, ikiye kavahilwishililenga matukako . . . , oloze alihanyine mumavoko  ayaUze eji kuyulanga mwakwoloka.” (Petu. 1, 2:23) Yesu atachikijile ngwenyi Yehova kaha ikiye atela kulinga sambanjinga. (Loma 12:19) Vaka-Kulishitu vavalweza vapwenga vakulinyisa nakuhona ‘kuhilwisa upi kumutu navalingi mwamupi.’—Petu. 1, 3:8, 9.

11, 12. (a) Kulinyisa chinahase kutukafwa ngachilihi nge vanakutulumbilisa chipwe kutwalisa chikuma? (b) Kuvwala, nakulilenga navilinga vyetu navipwa ngachilihi nge natupwa vakulinyisa?

¹¹ Kutulumbilisa chipwe kutwalisa chikuma chinahase kutulingisa tuhone kulinyisa. Achitalenu vyuma ahanjikile Eseta omu vyuma vyalumukile mukuyoya chenyi. Apwile wamwaza chikuma, kaha nawa vamulaminenga kanawa hamwaka wamuundu. Apwilenga hamwe navana vamapwevo vamwaza vavavulu vakufuma muWangana wavaPeleja vaze vafwililile kukunyula muchima wamwangana. Oloze ikiye kalivwimbileko. Apwile lika namuchima wamwaza nomu vamusakwile kuli mwangana.—Ese. 2:9, 12, 15, 17.

¹² Kulinyisa cheji kutukafwanga tuvwale nakulilenga kanawa mukavumbi. Twatachikiza ngwetu vatu kaveshi kutuzanga mwomwo yakulitukwojola nakulitohwesako, oloze mwomwo yakusolola “shipilitu yayivwovu yakuunda.” (Tangenu WaPetulu 1, 3:3, 4; Yele. 9:23, 24) Vishinganyeka vyavipi vyamumichima yetu navikasoloka kulutwe muvilinga vyetu. Chakutalilaho, tunahase kusolola ngwetu twazanga milimo yayilemu, nakutachikiza washi mijimbu nakutuzanga chikuma kuli vakulwane muchikungulwilo. Pamo tunahase kulumbununa vyuma mujila yize nayilingisa vatu vatwalise, kwijiva nge yetu kaha twavilinganga chipwe nge yetu twanehanga vishinganyeka kana. Yesu atuhana nawa chakutalilaho chikwavo. Kakavulu ahanjikilenga mazu amuVisoneka VyachiHepeleu. Ahanjikilenga mujila kaneyi mangana vaka-kumwivwilila vamone ngwavo vyuma avalwezelenga vyafumine kuli Yehova keshi vyamumutwe wenyiko.—Yowa. 8:28.

13, 14. Kulinyisa nachitukafwa ngachilihi tusakule kanawa vyakulinga?

¹³ Cheji kutukaluhwilanga nawa kupwa vakulinyisa hakusakula vyakulinga. Omu kaposetolo Paulu apwile muKesaliya, kapolofweto Angavu amulwezele ngwenyi, nge mwaya kuYelusalema kaha navamukwata chipwe vene kumujiha. Vandumbwenyi vamukanyishile kuya mwomwo vevwile woma. Oloze Paulu kavevwililileko. Ikiye kalifwelelele ivene chipwe kwivwa womako. Oloze afwelelele muli Yehova nakufwila kuzata mulimo wenyi kweshokwo vamutumine. Ngocho vandumbwenyi valinyishile, kaha vamwechele ayenga tuhu kuYelusalema.—Vili. 21:10-14.

¹⁴ Kulinyisa nachitukafwa tusakule kanawa vyuma numba katwejivile vyuma navikafumamoko. Chakutalilaho, nge tuli mumulimo washimbu yosena, natukalinga ngachilihi nge twaviji? Nyi ngachilihi nge visemi jetu navasaka kuvakafwa mwomwo yaushinakaji? Natukayoya ngachilihi nge tunashinakajiwa? Numba tulomba nakuhehwojola ngachilihi, katweshi kuwana mwakukumbulwila evi vihulako. (Kwambu. 8:16, 17) Kufwelela muli Yehova nachitukafwa tutachikize hakumina ngolo jetu. Nge tunahehwojola, nakuhulisako vakwetu, nakulomba kuli Yehova kaha twatela kulinga vyuma kweseka nomu yinakututwaminyina shipilitu yaKalunga. (Tangenu Muka-kwambulula 11:4-6.) Nge natulinga  ngocho, kaha Yehova mwatukisula nakutesamo vyuma twafwila.—Vishi. 16:3, 9.

15. Uno kushinganyeka hali Yehova nachitukafwa ngachilihi tupwenga vakulinyisa?

¹⁵ Hakuwana nge kulinyisa cheji kutunganyalisanga mujijila jajivulu, vyuma muka twatela kulinga mangana tupwenga vakulinyisa chikuma? Tushimutwilenu hajijila jiwana tunahase kulingilamo ngocho. Chatete, tunahase kupwa vakulinyisa nakwivwa woma Yehova hakushinganyeka havilinga vyenyi vyangolo nachihela atwama nacho. (Isa. 8:13) Tachikizenu ngwenu tweji kutambukanga naKalunga Wangolo Josena, keshi nakangelo chipwe namutuko. Echi nachitukafwa ‘tulinyise mwishi yalivoko lyangolo lyaKalunga.’—Petu. 1, 5:6.

16. Kushinganyeka hazangi yaKalunga nachitukafwa ngachilihi tupwenga vakulinyisa?

¹⁶ Chamuchivali, kushinganyeka hazangi yaYehova nachitukafwa tupwenga vakulinyisa. Kaposetolo Paulu asonekele ngwenyi, Yehova amona vihanda vyamujimba vize twashinganyeka ngwetu vyamokomoko “kupwa vyavilemu chikuma.” (Koli. 1, 12:23, 24) Chochimwe nawa Yehova eji kutuzakamanga tuvosena chamokomoko nakuhehela chetu. Keshi kutwesekesa kuvakwetu, chipwe kutumbila nge tunalimbenjeko. Tweji kupwanga vakukingiwa kwosenokwo tuli nakuzachila Yehova, mwomwo yazangi yenyi.

17. Kuhona kutala hatutenga twavakwetu nachitukafwa ngachilihi?

¹⁷ Chamuchitatu, kumona milimo twazata muliuka lyaKalunga kupwa yayilemu nachitukafwa tuhone kutala hatutenga twavakwetu ngana mwaYehova. Muchishishisa chakulitohwesa, twatela kulinyisa nakwitavila vyuma navahanjika vakwetu. (Vishi. 13:10) Nge vandumbwetu vanavahane milimo muliuka, kaha twatela kuwahilila navo hamwe. Ngocho natwalisa Yehova hakumona omu ali nakukisula ‘vandumbwetu vosena mukaye.’—Petu. 1, 5:9.

18. Tunahase kunangula ngachilihi chivezu chetu mangana tupwenga navilinga vyamwaza?

¹⁸ Chamuchiwana, kunangula chivezu kweseka najindongi jamuMbimbiliya nachitukafwa tupwenga navilinga vyamwaza. Natupwa navilinga vyamwaza nge natulinyisa nakumona vyuma mujila avimwena Yehova. Kulinangulanga Mbimbiliya shimbu yosena, nakulomba nakukavangiza vyuma tunalinangula nachitomesa chivezu chetu. (Chimo. 1, 1:5) Twatela kulinangula kumona vakwetu kupwa vavalemu. Yehova atufwelelesa ngwenyi nge natuzata kweseka nangolo jetu, kaha ‘mwakamanyisa kutulongesa,’ nakutukafwa tupwenga vakulinyisa nakupwa navilinga vyeka nawa.—Petu. 1, 5:10.

19. Vyuma muka navitukafwa tupwenganga lika vakulinyisa mukuyoya chetu chosena?

¹⁹ Kapolofweto kaKalunga uze afumine kuYuta ajimbalishile usoko wenyi naKalunga, kaha afwile mwomwo yakuhona kulinyisa. Chipwe ngocho, tunahase kupwa vakulinyisa numba nge tuli mucheseko, mwomwo tukwechi vyakutalilaho vyavatu vaze vapwile vakulinyisa kunyima namakumbi ano. Nge natutwalaho lika kutambuka naYehova, kaha natupwa vakulinyisa chikuma. (Vishi. 8:13) Kutambuka naKalunga chapwa chachilemu, chamokomoko namilimo tuli nakuzata oholyapwa. Mwatela kumona kutambuka naYehova kupwa chachilemu mukuyoya chenu chosena.