1, 2. Mwomwo ika mutu uze apwile wakulikehesa hakavanga vamukanyinyine kuli Kalunga? (Talenu muvwimbimbi wakulivanga.)

MWANGANA SAULU apwile mutu wakulikehesa kaha nawa wamwaza muchima omu aputukile kuyula vaIsalele. (Samwe. 1, 9:1, 2, 21; 10:20-24) Oloze mukuhita chalwola alingile vilinga vyakazamuzamu vyavivulu. Likumbi limwe omu Samwele kapolofweto kaKalunga ahonene kwiza washi kuNgilingale, Saulu ahonene kumuvandamina. VaFwilishite vapwile nakulizanga valwenga jita, kaha vaIsalele vaputukile kumuseza Saulu. Atela ashinganyekele ngwenyi, ‘Ngwatela kulingako washi vyuma vimwe.’ Ngocho alumbile wana kuli Kalunga, mulimo uze kavamwitavishile kulingako. Kaha Yehova apihililile chikuma.—Samwe. 1, 13:5-9.

² Omu Samwele ahetele kuNgilingale, atenukilile Saulu. Oloze muchishishisa chakwitavila vyuma vamuhumwine, Saulu avangijikilile vakwavo mangana asoloke nge kapwile namulongako. (Samwe. 1, 13:10-14) Aha hakiko aputukilile kazamuzamu kenyi, kaha kutwala muze vamutambwile wangana nakuhona kumwivwila uselewa kuli Yehova. (Samwe. 1, 15:22, 23) Numba tuhu  Saulu apwile namuchima wamwaza hakavanga, oloze kusongo apwile mutu wamupi.—Samwe. 1, 31:1-6.

3. (a) Vatu vavavulu vamona ngachilihi kulikehesa? (b) Vihula muka natushimutwila?

³ Mukaye kano kakulipecha, vatu vavavulu vasaka kulisolola kupwa vavalemu kuhambakana vakwavo. Ngocho kavapwa vakulikehesako. Chakutalilaho, mutu umwe uze apwile kuluwa muvyakuhemahema ejile nakupwa muka-mapolitiki ambile ngwenyi: “Kulikehesa kaveshi kuhasa kuchivulukila hali amiko.” Mwomwo ika kulikehesa chapwila lika chachilemu? Kulikehesa chapwa chika, kaha kachalumbununa ika? Tunahase kutwalaho ngachilihi kupwa vakulikehesa chamokomoko naukalu natumona? Muchihande chino natushimutwila havihula vivali vyakulivanga. Chihula chamuchitatu natuchishimutwila muchihande chinakavangizaho.

4. Munahase kulumbununa ngachilihi omu vyapwa vilinga vyakazamuzamu?

⁴ Mbimbiliya yahandununa kulikehesa nakazamuzamu. (Tangenu Vishimo 11:2.) Ndavichi alombele Yehova amukinge “kuvilinga vyakazamuzamu.” (Samu 19:13) Uno “vilinga vyakazamuzamu” vyapwa vika? Chakutalilaho, nge mutu mwalusuka kulinga vyuma vimwe vize kavamwitavishile kulingako, kaha ali nakulinga vyuma mukazamuzamu. Lwola lumwe tuvosena tweji kulinganga vyuma mukazamuzamu, mwomwo yashili twaswana. Oloze nge natutwalaho namuchima kana, kaha katweshi kupwa nausoko wamwaza naKalungako ngana muze chapwile kuli Mwangana Saulu. Samu 119:21 yahanjika hali Yehova ngwayo: “Weji kutenukilanga vaka-kazamuzamu.” Mwomwo ika eji kuvatenukililanga?

5. Mwomwo ika vilinga vyakazamuzamu vyapwila vyavipi chikuma?

⁵ Vilinga vyakazamuzamu vyapwa vyavipi chikuma kuhambakana tutenga. Chatete, kulinga vyuma mukazamuzamu nachisolola nge katweshi nakuvumbika Yehova hakupwa Mwata wetuko. Chamuchivali, kulinga vyuma vize kavatwitavisako nachilingisa tulikokojwese navakwetu. (Vishi. 13:10) Chamuchitatu, tunahase kwivwa sonyi hakwijiva ngwetu tunalingi vyuma mukazamuzamu. (Luka 14:8, 9) Chikupu vene, vilinga vyakazamuzamu vyeji kunehenga ukalu. Shikaho chapwa chamwaza kupwa vakulikehesa, nganomu vyasolola Visoneka.

6, 7. Kulinyisa chapwa chika, kaha chatambukila ngachilihi hamwe nakulikehesa?

⁶ Kulikehesa chatambukila hamwe nakulinyisa. MuMbimbiliya, kulinyisa chapwa kuhona kulivwimba chipwe kulitukwojola. (Fwili. 2:3) Mutu wakulinyisa eji kutachikizanga hakumina ngolo jenyi, nakwitavila tutenga twenyi, nakwitavila vyuma navamulweza vakwavo. Yehova eji kwivwilanga kuwaha mutu wakulinyisa.

⁷ MuMbimbiliya, kulikehesa chapwa kutachikiza hakumina ngolo jetu. Mulilimi lyachiHelase, lizu kana lyalumbununa vyuma mwalinga mutu kuli vakwavo mwomwo yakutachikiza hakumina ngolo jenyi.

8. Vinjikizo muka navisolola nge tunaputuka kulivwimba?

⁸ Vyuma muka navisolola nge tunaputuka kulivwimba? Talenu havinjikizo vino. Pamo tunaputuka kulimona kupwa tuvatu vakulipwila chikuma. (Loma 12:16) Tunahase kuputuka nawa kulimona kupwa tuvavalemu kuhambakana  vakwetu. (Chimo. 1, 2:9, 10) Chipwe pamo twamona vyuma tweji kuhanjikanga kupwa vyakwoloka kuhambakana vyavakwetu. (Koli. 1, 4:6) Kakavulu tweji kulinganga vyumevi chakuzeneka kuchitachikiza.

9. Vyuma muka vyalingishile vatu vamwe vapwenga nakazamuzamu? Hanenu chakutalilaho chamuMbimbiliya.

⁹ Mutu wosena nahase kupwa nakazamuzamu nge mwechelela vilinga vyamujimba vimufungulule. Lizangamina, lushiushiu namatoto vinalingisa vatu vavavulu valinge vyuma mukazamuzamu. Vatu vavuluka muMbimbiliya vakufwana nge Avasalome, Ujiya naNevukataneza vafwililile vilinga vyakumujimba kaha Yehova avenyishile havilinga vyavo vyakazamuzamu.—Samwe. 2, 15:1-6; 18:9-17; Miji. 2, 26:16-21; Ndanye. 5:18-21.

10. Mwomwo ika katwatela kupopolola vyuma navalinga vakwetuko? Hanenu chakutalilaho chamuMbimbiliya.

¹⁰ Kwatwama vyuma vyeka vinahase kulingisa mutu apwenga nakazamuzamu. Achitalenu hamijimbu yimwe yamuMbimbiliya: Kuputuka 20:2-7 naMateu 26:31-35. Uno vilinga vyakazamuzamu apwile navyo Avimeleke naPetulu vyasolwele nge vavahungumwishile kushili tahi? Kutala vavilingile chakuzeneka kutachikiza tahi? Hakuwana nge katweshi kutachikiza vili mumichima yavakwetuko, shikaho katwatela kukukulula washi havyuma navalingako.—Tangenu WaYakova 4:12.

11. Kutachikiza milimo twatwama nayo muliuka lyaKalunga nachitukafwa ngachilihi tupwenga vakulikehesa?

¹¹ Kulikehesa chapwa kwijiva milimo twatwama nayo muliuka lyaKalunga. Hakuwana nge Yehova kapwa Kalunga waliuyako, atuhana milimo twatela kuzata mutu himutu. Mutu himutu atwama namulimo wakulipwila muchikungulwilo, oloze tuvosena twapwa tuvavalemu. Halikoji lyenyi lyalinene, Yehova ahana mutu himutu wana nauhashi wakulisezaseza. Kaha tunahase kuzachisa vyuma kana hakumwalisa nakukafwa vakwetu. (Loma 12:4-8) Yehova atuhana mulimo waulemu wasolola nge atuvumbika nakutufwelela.—Tangenu WaPetulu 1, 4:10.

12, 13. Mwomwo ika katwatela kulikomokelako nge tuli namilimo yeka muliuka lyaKalunga?

¹² Chipwe ngocho milimo twazata muliuka lyaKalunga yinahase kwalumuka kala lwola. Chakutalilaho, achishinganyekenu hali Yesu. Ikiye watete kutenga kuli Yehova. (Vishi. 8:22) Akafwilenga Kalunga mumulimo wakutenga vyuma vyamumelu, kaha kukuminyinako vatu. (Kolo. 1:16) Kutwala muze, Yesu vamuhanyine mulimo weka uze azachilile hamavu, apwile kemba kaha akolele nakupwa jino shina lyalunga. (Fwili. 2:7) Omu afwile, Yesu akindulukile mwilu mwamutu wakushipilitu nakupwa Mwangana waWangana waKalunga mu 1914. (Hepe. 2:9) Ou keshi ukiko mulimo wamakumishiloko. Hanyima yaChiyulo chenyi chaMyaka Likombakaji, Yesu mwakahana Wangana kuli Ise, mangana ‘Kalunga akapwe vyuma vyosena kuli vosena.’—Koli. 1, 15:28.

¹³ Nayetu nawa twatela kutachikiza ngwetu kala lwola tunahase kupwa namilimo yeka kweseka navyuma natusakula kulinga. Twambenga ngana ngwetu mwapwile muvajike, oloze munengila muulo, kaha muli jino navana. Pamo munashiwisangako chiyoyelo chenu mangana muzate mulimo washimbu yosena. Chikupu vene mwazachile nangolo mangana mutesemo vyuma kanevi mwasakwile. Kwalumuka chavyuma vimwe mukuyoya chetu chinahase kutulingisa tuzate chikuma chipwe nduma. Kutala muchili muvakweze tahi, nyi munashinakajiwa lyehi? Uno mujimba wenu wapwa wakulikangula  tahi, nyi chiku? Yehova atachikiza omu nahase kuzachisa mutu himutu mumulimo wenyi. Atachikiza hakumina ngolo jetu, kaha eji kwivwanga kuwaha kachi nge natumuzachila kweseka noho hakumina ngolo jetu.—Hepe. 6:10.

14. Kulikehesa nachitukafwa ngachilihi tusuuluke namilimo natuzata?

¹⁴ Yesu evwilenga kuwaha hamilimo azachilenga, nayetu nawa natuwahilila hakuzata milimo yetu. (Vishi. 8:30, 31) Mutu wakulikehesa keshi kupihilila chipwe kulivwa nge nakashiwa namilimo vamuhana muchikungulwiloko. Keshi kushinganyeka chikuma hamilimo yeka chipwe yize vanakuzata vakwavoko. Oloze apwa wakusuuluka kuzata milimo yenyi vamuhana, mwomwo ayimona kupwa yakufuma kuli Yehova. Kaha nawa keshi kuleununa milimo vazata vakwavo muchikungulwiloko. Chapundu vene, kulikehesa nachitukafwa tuvumbike vakwetu nakuvakafwa.—Loma 12:10.

15. Vyuma muka natulinangula kuli Ngiteyone hakupwa wakulikehesa?

¹⁵ Ngiteyone atuhana chakutalilaho chamwaza chakupwa vakulikehesa. Omu kangelo kaYehova ejile chatete kuli ikiye, Ngiteyone hahaze vene asolwele muchima wakulikehesa hakuvuluka vyachiyoyelo chenyi. (Kuyu. 6:15) Kahomu etavilile mulimo amuhanyine Yehova, auzachile kanawa kweseka najindongi  vamuhanyine, nakupendamina hali Yehova. (Kuyu. 6:36-40) Ngiteyone apwile wakumika kaha nawa wakuhamuka. Alingilenga nawa vyuma mukuzangama. (Kuyu. 6:11, 27) Kazachile natwima mangana ayenga puhoko, oloze hamwe nahamwe akindulukilenga kwimbo lyenyi nge nalihehwe.—Kuyu. 8:22, 23, 29.

16, 17. Mutu wakulikehesa eji kuvangilanga kushinganyeka havyuma muka nge ali nakusaka kuzovoloka?

¹⁶ Kupwa vakulikehesa kachalumbununa nge katwatela kuzovoloka nakutamo kuzata chipwe kwitavila milimo yekako. Visoneka vyatukolezeza tuzatenga nangolo mangana tuzovoloke. (Chimo. 1, 4:13-15) Uno twatela kaha kuzata nangolo nge vanatuhane mulimo weka tahi? Nduma, keshi ngochoko. Twatela kuzata nangolo mangana tuzovoloke mukala milimo yaYehova tuli nakuzata. Twatela kutwalaho kuzachisa kanawa uhashi wetu vatuhana kuli Kalunga mangana tuzovoloke mumilimo yetu.

¹⁷ Mutu wakulinyisa keshi kulahila kwitavila milimoko, oloze eji kuvangilanga kuhulisa vyasakiwa hakuzata mulimo kana. Kufumaho eji kulikekesanga nakumona numba nge mwauhasa. Chakutalilaho, eji kulihulisanga vihula vyakufwana nge, kutala mulimo kana nanguuzata kanawa chakuzeneka kusuvilila milimo yeka yayilemu tahi? Uno ngwatela kuhanako vakwetu milimo yimwe numba nguzate kanawa ou mulimo wauhya tahi? Nge mwakumbulula ngwenyi nduma kuchihula chimwe chipwe vyosena, kaha pamo mulimo kana vanahase kuuhana kuli ndumbwetu weka uze nalihehwe. Shikaho twatela kulomba chikuma nakuhunanana kanawa hachihande kana kuchina kulivulishila milimo. Ngocho kulikehesa nachitukafwa tuhone kulilunjikila milimo.

18. (a) Kulinyisa nachitukafwa tulinge vyuma muka nge vanatuhane milimo yeka? (b) Chisoneka chaWavaka-Loma 12:3 nachikafwa ngachilihi mutu wakulinyisa?

¹⁸ Nge vanatuhane mulimo weka, kaha twatela kukavangiza chakutalilaho chaNgiteyone chize chasolola nge tunahase kufukila nge navatutwaminyina kuli Yehova. Enga, twatela kupwa vakulinyisa “hakutambuka naKalunga” ketu. (Mika 6:8) Shikaho nge vanatuhane milimo muchikungulwilo, twatela kumulomba Yehova atukafwe tukavangize vyuma mwatulweza kuhichila muMazu enyi naliuka lyenyi. Twatela kufwila kwalumunako vyuma vimwe mukuyoya chetu mangana Yehova atutetekele. Twijivenu ngwetu kulinyisa chaYehova chikiko cheji ‘kutunehelanga ulemu,’ keshi uhashi wetuko. (Samu 18:35) Nge natutambukanga naKalunga mukulinyisa, nachitukafwa tuhone kulishinganyekela muze kamwatelako.—Tangenu Wavaka-Loma 12:3.

19. Mwomwo ika twatela kufwila kupwa vakulikehesa?

¹⁹ Mutu wakulikehesa eji kuvumbikanga Yehova hakupwa ikiye Tengi yetu kaha nawa Mwata Atengele Vyuma Vyosena. (Kuso. 4:11) Kulikehesa cheji kutukafwanga tusuuluke nakuzata nangolo milimo vatuhana muliuka lyaKalunga. Kulikehesa nachitukafwa tuhonenga kufwefulula vakwetu nakuneha kuunda muchikungululwilo. Cheji kutukafwanga nawa tumone vakwetu kupwa vavalemu, kaha kulinga ngocho cheji kutulingisanga tulihende kukuvulumuna milonga yayinene. Echi chasolola nge vatu jaKalunga vatela kumona kulikehesa kupwa chachilemu, kaha Yehova amona vatu vakulikehesa kupwa vavalemu. Nyi ngachilihi nge milimo yinatuvulila? Chihande nachikavangizaho nachisolola omu tunahase kutwalaho kupwa vakulikehesa nge milimo yatuvulila.