1, 2. (a) Vyuma muka veji kuhanjikanga vatu hachihande chakulisakwila vyakulinga? (b) Mbimbiliya yanangula vyuma muka hachihande chakulisakwila vyakulinga, kaha vihula muka natushimutwila?

PWEVO umwe ahonene kusakula vyakulinga, kaha alwezele sepa lyenyi ngwenyi: “Ngulweze vyuma nangulinga, kanda kungulingisa ngushinganyekeko. Kuli yami chachashi kulinga vyuma naungulweza kuhambakana nguchishinganyeke.” Uze pwevo asakile kumulweza vyakulinga muchishishisa chakuzachisa wana vamuhana kuli Tengi yenyi wakulisakwila vyakulinga. Nyi ngachilihi yenu? Kutala mwasaka kulisakwila vyakulinga tahi nyi mwasaka vakwenu vamisakwile vyakulinga? Uno wana wakulisakwila vyakulinga mwaumona ngachilihi?

² Vatu vanahanjikanga hachihande kanechi hamyaka yayivulu. Vamwe vashinganyeka ngwavo kakwatwama lisesa lyakulisakwila vyakulingako, mwomwo vyuma tweji kulinganga vavitongola chimweza kuli Kalunga. Veka nawa ngwavo lisesa kana tunahase kupwa nalyo nge tunasokoka kuukalu wosena. Hakusaka tutachikize kanawa chihande kana, twatela kutanga muMazu aKalunga Mbimbiliya. Mwomwo ika? Mwomwo Mbimbiliya yasolola ngwayo, Yehova  atutenga nalisesa lyakulisakwila vyakulinga. (Tangenu Yoshuwa 24:15.) Mbimbiliya nawa yakumbulula vihula vino: Twatela kuzachisa ngachilihi lisesa lyetu lyakulisakwila vyakulinga? Kutala lwola lwosena twatela kulinga vyuma tuli nakusaka yetu vavene tahi? Jila natusakwilamo vyakulinga nayisolola ngachilihi zangi twazanga Yehova? Natusolola ngachilihi ngwetu twavumbika vyuma navasakula vakwetu?

3. Yehova azachishile ngachilihi lisesa lyenyi lyakulisakwila vyakulinga?

³ Yehova kaha ikiye akwechi lisesa lyakulipwila, kaha twatela kumulondezeza mujila eji kulizachishilangamo. Chakutalilaho, asakwile muyachi wavaIsalele vapwenga “vatu jenyi vakulipwila.” (Lushi. 7:6-8) Akekesele kanawa vyuma numba asakule vatu kana. Yehova ateselemo lushiko ashikile sepa lyenyi Apalahama kunyima. (Kupu. 22:15-18) Kaha nawa eji kuzachisanga lisesa lyenyi mujila yazangi nachiyulo. Asolwele vilinga kana hakuzangamisa vaIsalele vaze vasezelenga kulemesa chamuchano. Omu vapihilililenga nakwalumuka Yehova avasolwelelenga zangi nakeke, kaha ambile ngwenyi: “Nanguvoka kuvilinga vyavo vyakuhenga. Nanguvazanga chakufuma kumuchima wami.” (Hoze. 14:4) Chikupu vene azachishile lisesa lyenyi mujila yamwaza nakunganyalisa vakwavo.

4, 5. (a) Iya vavangilile kuhana lisesa lyakulisakwila vyakulinga, kaha alizachishile ngachilihi? (b) Chihula muka twatela kulihulisa tuvosena?

⁴ Omu Yehova aputukile kutenga vyuma, ahanyine vangelo navatu lisesa lyakulisakwila vyakulinga. Avangilile kuhana lisesa kana kuli Mwanenyi watwatwa uze apwa “chifwanyisa chaKalunga uze vazeneka kumona.” (Kolo. 1:15) Nahashimbu apwile mwilu, Yesu apwile wakushishika kuli Ise, kakundwijile kulikanga chaSatanako. Kaha nawa omu ejile hano hamavu, azachishile lisesa kana hakukana vyeseko vyaMuka-kole wamunene. (Mateu 4:10) Haufuku wamakumishilo akuyoya chenyi hano hamavu, alombele kuli Ise nakumulweza ngwenyi, anakufwila lika kulinga mwaya muchima waKalunga. Ambile ngwenyi: “Ove Tata, kachi nge unasake, fumisa lupasa kanelu kuli ami. Oloze kanda ulinga munayi muchima wamiko, shina omu munayi muchima wove.” (Luka 22:42) Twatela kulondezeza Yesu nakuzachisa lisesa lyetu lyakulisakwila vyakulinga tuvumbike Yehova nakulinga mwaya muchima wenyi. Uno chachashi kulinga ngocho tahi?

⁵ Eyo, tunahase kulondezeza Yesu mwomwo nayetu vatutenga muchifwanyisa chaKalunga. (Kupu. 1:26) Chipwe ngocho katweshi kulisakwila vyakulinga muvyuma vyosenako. Katwatwama nalisesa lyakulipwila ngana lize atwama nalyo Yehovako. Mazu aKalunga alumbununa ngwawo, lisesa lyetu lyatwama noho lyakumina, shikaho twatela kukavangiza vyuma anoneka Yehova. Chakutalilaho, mapwevo vatela kwononoka kuli malunga javo, kaha vana nawa vatela kwononoka visemi javo. (Efwe. 5:22; 6:1) Uno vyuma kanevi vyasolola ngachilihi omu twatela kuzachishilamo lisesa lyetu? Jila natukumbulwilamo chihula kana nayisolola omu nachikapwa chiyoyelo chetu kulutwe.

6. Hanenu chakutalilaho chakusolola ovyo chapwila chakutamo kuhona kuzachisa lisesa lyetu muvyuma vyosena.

⁶ Uno kuhona kulisakwila vyakulinga muvyuma vyosena hikulihehwa chikupu tahi? Eyo. Mwomwo ika? Kuhona kulinga vyuma vimwe chinahase kukinga vatu kuponde. Chakutalilaho, tunahase kusakula kuya  naminyau kuchihela chakwakusuku. Kutala munahase kukasunuka kutambukisa mujila muze vatu kaveshi nakukavangiza jishimbi jahamukwakwako, muze vatu vosena vanakulisakwila kutambukisa kala sali vanasake tahi? Nduma. Kuhona kuzachisa lisesa lyetu muvyuma vimwe chihanase kulingisa vatu vosena vapwenga vakusuuluka. Tutalenu havyakutalilaho vikwavo vyamuMbimbiliya mangana tumone ovyo chapwila chakutamo kukavangiza vyuma ahakako Yehova.

7. (a) Lisesa lyakulisakwila vyakulinga lyahandunwine ngachilihi Alama kutunyama muEtene? (b) Lumbununenu jila yimwe yize Alama azachishililemo lisesa vamuhanyine.

⁷ Omu Kalunga atengele mutu watete Alama, amuhanyine lisesa lyakulisakwila vyakulinga ngana lize ahanyine vangelo mwilu. Echi chahandunwine Alama kutunyama vaze valinga vyuma chakuhona kushinganyeka. Tuchitalenu omu Alama azachishile lisesa lyenyi mujila yamwaza. Yehova atengele tunyama shimbu kanda atenge mutu. Oloze kavalukile majinako, ahanyine mulimo kana kuli mutu watete. Kalunga ‘avanehelenga kuli uze lunga mangana amone omu mwavaluka majina.’ Alama akekesele kanyama hikanyama nakumuluka lijina lyamutelelele, kaha Yehova kalumwine majina kanako. “Mweshomwo alukilenga evi vyuma vyakuyoya vyosena, mukiko vene mwayile majina avyo.”—Kupu. 2:19.

8. Alama azachishile ngachilihi lisesa lyenyi mujila yakuhenga, kaha vyuma muka vyafuminemo?

⁸ Chaluvinda Alama kasuulukile namulimo vamuhanyine kuli Kalunga wakulima nakulama palachise hamavuko. Kasuulukile namilimo amuhanyine Kalunga, ngwenyi: “Semenunga muvule chikuma, muzalise hamavu, nakuwalamanga, kaha pwenunga nawata havaishi . . . , navyuma vyakutuka . . . , navyuma vyakuyoya vyosena vyakutambuka hamavu.” (Kupu. 1:28) Oloze alikangile kuli Kalunga nakulya muhako uze vamukanyishile. Kuzachisa lisesa lyenyi mujila kaneyi yakuhenga chaneha kuyanda kuvatu vosena. (Loma 5:12) Kutachikiza ukalu aneha Alama chatela kutulingisa tuzachise kanawa lisesa lyetu lyakulisakwila vyakulinga, kweseka najindongi jaYehova.

9. Yehova alwezele vatu jenyi vaIsalele vasakule vyuma muka, kaha vakwileko ngachilihi?

⁹ Vana vaAlama naEve vaswana shili nakufwa kuli visemi javo vakulikanga. Chipwe ngocho, vakwechi lisesa lyakulisakwila vyakulinga. Chuma kana chapwa chamuchano kweseka nomu Kalunga azachililemo namuyachi wavaIsalele. Yehova ahanyine vatu jenyi lisesa lyakwitavila chipwe kukana kupwa vatu jenyi vakulipwila, kuhichila muli ngamba yenyi Mose. (Kulo. 19:3-6) Vakwileko ngachilihi? Vetavilile kupwa vatu vavulukila lijina lyaKalunga hakuhanjikila hamwe ngwavo: “Tunetavila kulinga vyuma vyosena nahanjika Yehova.” (Kulo. 19:8) Chaluvinda, mukuhita chalwola vatu kana kavalingile vyuma valitavilileko. Twatela kulihenda kuchuma kanechi nakumona lisesa lyetu vatuhana kupwa lyalilemu hakupandama lika kuli Yehova nakukavangiza jishimbi jenyi.—Koli. 1, 10:11.

10. Vyakutalilaho muka vyasolola nge vatu vakuhona kukupuka vanahase kuzachisa lisesa lyavo nakuvumbika Kalunga? (Talenu muvwimbimbi wakulivanga.)

¹⁰ Mumukanda WavaHepeleu kapetulu 11, mwatwama majina avangamba jaKalunga 16 vaze vazachishile lisesa lyavo lyakulisakwila vyakulinga kweseka navyuma avalweza Yehova. Ngocho vavakiswile chikuma nakupwa nalutalililo lwakulutwe. Chakutalilaho, Nowa asolwele lufwelelo lyakukola kaha ononokele nakuzata mulimo amuhanyine Kalunga wakutunga wato uze wakingile tanga yenyi. (Hepe. 11:7) Apalahama naSala valisuwile nakwitavila Kalunga avatetekele mulifuchi lyalushiko. Nge vasakile “kachi vakindulukile cheka” mulifuchi  lyaluheto lyaUle. Oloze vashishikile ‘havyuma vize [Kalunga] avashikile,’ kaha vasakile “chihela chakuhambakana kuwaha.” (Hepe. 11:8, 13, 15, 16) Mose ahungile luheto lwamuEjipitu, “asakwileho kumuyanjishila hamwe navatu jaKalunga, mukutela kulivwisa kuwaha viseke vyashili hatando yayindende.” (Hepe. 11:24-26) Twatela kulondezeza lufwelelo lwavatu kanava vakushikulu hakumona wana wakulisakwila vyakulinga kupwa waulemu nakuuzachisa hakulinga mwaya muchima waKalunga.

11. (a) Jila muka yamwaza yakuzachishilamo lisesa lyakulisakwila vyakulinga? (b) Vyuma muka vyeji kumilingisanga muzachise kanawa lisesa lyenu?

¹¹ Numba tuhu chinahase kupwa chamwaza kutusakwila vyakulinga kuli vakwetu, oloze kulinga ngocho nachituhonesa kuzachisa wana wetu wakulisakwila vyakulinga. Wana kana vauvuluka hali Lushimbi lwamuchivali 30:19, 20. (Tangenu.) Muvesi 19 vavulukamo vyuma vize Kalunga alwezele vaIsalele valisakwile. Kaha muvesi 20 Yehova avahanyine lisesa lyakusolola vyuma vyapwile mumichima yavo. Nayetu nawa tunahase kusakula kulemesa Yehova. Nachiwaha kuzachisa uhashi wetu wakulisakwila vyakulinga mangana tunehe kavumbi naupahu kuli Kalunga.

12. Twatela kuzachisa ngachilihi wana wetu atuhana Kalunga?

¹² Achishinganyekenu mwahananga sepa lyenu wana waulemu chikuma. Oloze nge navamilweza ngwavo wana kana naumbili chipwe nauzachisa hakulemeka mukwavo, twafwelela namupihilila chikuma. Jino achishinganyekenu omu eji kwivwanga Yehova hakumona vatu vavavulu vali nakuzachisa lisesa lyavo mujila yakuhenga nakulemeka vakwavo. Ngana muze yahanjikile chimweza Mbimbiliya ngwayo “hamakumbi akukuminyina” vatu navakapwa “vaka-kuhona kusakwilila.” (Chimo. 2, 3:1, 2) Shikaho tuzachisenu kanawa wana kanou atuhana Yehova. Uno tunahase kulihenda ngachilihi kukuzachisa wana kanou mujila yayipi?

13. Tunahase kulihenda ngachilihi kukuzachisa wana vatuhana mujila yakuhenga?

¹³ Tuvosena tukwechi lisesa lyakulisakwila masepa, mwakuvwalila nakulilenga navyuma vyakulihizumuna. Oloze lisesa lyetu twatwama nalyo linahase kupwa “kanyinyilo kakulingilaho vyuma vyavipi” nge natusakula kupwa vandungo kukufwila chamujimba chipwe kufwila vilinga vyamukaye. (Tangenu WaPetulu 1, 2:16.) Muchishishisa chakuzachisa lisesa  lyetu “kupwa kengililo kakulinga vyuma vyakumujimba,” twafwila kusakula vyuma vize navitukafwa tulinge “vyuma vyosena mujila yize nayimutohwesa Kalunga.”—Ngale. 5:13; Koli. 1, 10:31.

14. Twatela kuzachisa ngachilihi lisesa lyetu hakuwana nge twafwelela muli Yehova?

¹⁴ Jila yikwavo yakuzachishilamo lisesa lyetu mujila yamwaza shina kufwelela muli Yehova nakwitavila atutetekele. Ikiye ‘eji kutunangulanga mangana tunganyale, eji kututwaminyinanga mujila yize twatela kuya.’ (Isa. 48:17) Twatela kwitavila mazu ano vahwima akwamba ngwavo: “Mutu katwama nangolo jakusakula jila yenyiko. Mutu katwama nangolo jakulitwaminyina iveneko.” (Yele. 10:23) Shikaho kanda natufwa mumuheto wakupendamina hakunangakana chetu ngana muze alingile Alama navaIsalelele vakulikangako. Oloze ‘tufwelelenunga Yehova namichima yetu yosena.’—Vishi. 3:5.

15. Vyuma muka natulinangula hali Wavaka-Ngalesha 6:5?

¹⁵ Numba tuhu tukwechi lisesa lyakulisakwila vyakulinga, oloze twatela nawa kuvumbika lisesa lyavakwetu. Mwomwo ika? Mwomwo navakiko vatwama nalisesa kana, shikaho vyuma natusakula kavyeshi kulifwana navyuma mwasakula mukwetuko. Omu mukiko chapwa namutwamiso yetu nomu tweji kulemeselangamo Kalunga. Anukenu mazu ahali Wavaka-Ngalesha 6:5. (Tangenu.) Nge natutachikiza ngwetu kala muka-Kulishitu “mwalimbachila vyuma vyenyi ivene,” kaha natuvumbikanga lisesa lyavakwetu lyakulisakwilanga vyakulinga.

16, 17. (a) Ukalu muka wepukile muKolinde hachihande chakusakula vyakulinga? (b) Paulu akumishile ngachilihi echi chihande, kaha nachitunangula ika kutalisa kulisesa lyavandumbwetu?

¹⁶ Achitalenu chakutalilaho chamuMbimbiliya chize chasolola ovyo twatela kuvumbikila lisesa lyavakwetu lyakusakula vyuma kweseka nachivezu chavo. Vaka-Kulishitu muKolinde vapwile navishinganyeka vyakulihandununa hachihande chakulya nyama yize valanjishilenga havisakano oku pamo vavangililenga kuyihana kumakombelo. Vamwe vashinganyekelenga ngwavo: ‘Hakuwana nge likombelo kalyapwa chumako, mutu nahase tuhu kulya nyama nachivezu chitoma.’ Oloze vaze vavangilile kulemesa makombelo, vamwene ngwavo kulya nyama kana chapwile kulemesa makombelo. (Koli. 1, 8:4, 7) Echi chapwile chihande chachinene, chize kachi chanehele chihandwa muchikungulwilo. Uno Paulu akafwile ngachilihi vaka-Kulishitu muKolinde vamone omu Kalunga amwene chihande kana.

¹⁷ Chatete, Paulu alwezele vaka-Kulishitu kana ngwenyi, vyakulya kavyeshi kuvapandamisa kuli Kalungako. (Koli. 1, 8:8) Chamuchivali, avahuhumwine vahone kulingisa ‘lisesa lyavo lyakulisakwila vyuma’ kupwa “chimbunji chakuhukanyisa vaze [vapwile vakuhehela].” (Koli. 1, 8:9) Kufumaho, ahuhumwine vaze vahonenenga kulya nyama vahone kusopesa vaze valilenga. (Koli. 1, 10:25, 29, 30) Shikaho muka-Kulishitu wosena atelelele kusakula vyakulinga kweseka nachivezu chenyi. Ngocho twatela kuvumbika lisesa lyavandumbwetu lyakulisakwila vyakulinga mukuyoya.—Koli. 1, 10:32, 33.

18. Namusolola ngachilihi ngwenu mwamona wana wakulisakwila vyakulinga kupwa waulemu?

¹⁸ Yehova atuhana wana wakulisakwila vyakulinga kaha twapwa jino vakulihehwa. (Koli. 2, 3:17) Twasakwilila hakutuhana wana kana, mwomwo weji kutukafwa tusakule vyuma navisolola nge twazanga Yehova. Tutwalenuho kusolola kusakwilila hawana kanou hakuuzachisanga mujila yize nayivumbika Kalunga, nakuvumbikanga jila veji kuzachishilangamo vandumbwetu wana kana.