1, 2. Ukalu muka vali nakumona vatu jaKalunga makumbi ano? (Talenu mivwimbimbi yakulivanga.)

VAKA-KUZATA muvipatela vavavulu veji kukanga vaveji vaze veji kuvizanga misongo yakulitambwisa. Oloze veji kufwilanga kuvakafwa mangana vayoye. Chipwe ngocho, ava vaka-kuzata muvipatela vatela kulikinga vavene kuchina kutambula misongo kana. Chochimwe nawa, etu vavavulu twatunga kaha nawa twazata navatu vaze vatwama navilinga vyavipi. Shikaho chapwa chachikalu kuli etu kulihenda kuvilinga kana.

² Makumbi ano, vatu vaze kavazanga Kalungako vali nakuliula jishimbi jize jahanjika havyuma vyakwoloka nevi vyakuhenga. Mumukanda wamuchivali uze Paulu asonekelele Chimoteu, vavulukamo vilinga vyavatu vaze vasosoloka kuli Kalunga vize vinalisale makumbi ano. (Tangenu WaChimoteu 2, 3:1-5, 13.) Numba tuhu tunahase kwivwa kupihya hakumonomu vilinga kanevi vinakuvula mukaye, oloze nayetu vanahase kutuhungumwisa kuvatu vaze vakwechi vilinga kana. (Vishi. 13:20) Muchihande chino, natushimutwila havilinga vali navyo vatu vize vili nakusolola nge tuli mumakumbi  akukuminyina nakumona omu vyalihandununa navilinga vyavatu jaKalunga. Natushimutwila nawa omu tunahase kulikinga kuvilinga vyavo vyavipi oku nawa tuli nakuzata nangolo mangana tukafwe vakwetu kushipilitu.

3. Vatu muka veji kusololanga vilinga vize vavuluka hali WaChimoteu 2, 3:2-5?

³ Kaposetolo Paulu asonekele ngwenyi: “Hamakumbi akukuminyina nahakapwa lwola lwalukalu.” Kufumaho avulukile vilinga 19 vize vali navyo vatu makumbi ano. Vilinga kana vyalifwana navize vavuluka hali Wavaka-Loma 1:29-31. Oloze mazu vazachisa mumukanda uze Paulu asonekelele Chimoteu, kakwatwama heka vawazachisa muVisoneka VyachiHelase vyaVaka-Kulishituko. Chipwe ngocho, kwatwama vatu vamwe vaze kavasolola vilinga kaneviko. Vaka-Kulishitu veji kusololanga vilinga vyeka.—Tangenu Malaki 3:18.

4. Uno kulivwimba chapwa ngachilihi?

⁴ Omu Paulu akumishile kusoneka ngwenyi vatu navakapwa vaka-kuzanga jimbongo, asonekele nawa ngwenyi vatu navakapwa vaka-kulitukwojola, vaka-kulitohwesa, vaka-kulivwimba, vilinga vize vali nakusolola vatu mwomwo yakupwa nauhashi umwe, chipwe luheto, chipwe chihela vatwama nacho kumilimo chipwe mwomwo yakuwaha chavo. Vatu kanava vasaka kuvamona kupwa vavalemu nakuvavumbika. Mutu alinangula chikuma asonekele kutalisa kuli vaka-kulivwimba ngwenyi: “Vatu kana veji kulitohwesanga mumichima yavo nakulimona nge kakwatwama mutu weka wamulemu kuhambakana vakikoko.” Kulivwimba chapwa chachipi mwomwo navatu vaze veji kulivwimbanga kavasaka kumona vakwavo vali nakulivwimbako.

5. Hanenu vyakutalilaho vyavangamba jaYehova vakushishika vaze valivwimbilenga?

⁵ Yehova ahunga vaka-kulivwimba. Ahunga: “Meso akatangalakaji.” (Vishi. 6:16, 17) Kulivwimba cheji kulingisanga vatu vahone kupandama kuli Kalunga. (Samu 10:4) Liyavolo ikiye mwenya kulivwimba. (Chimo. 1, 3:6) Chaluvinda, navangamba jaYehova vakushishika vamwe navakiko veji kulivwimbanga. Chakutalilaho, Ujiya mwangana waYuta apwile wakushishika hamyaka yayivulu, oloze Mbimbiliya ngwayo: “Omu Ujiya alingile nakwate lyehi ngolo, aputukile kulivwimba, ngocho ahichikishilemo mwono wenyi. Avulumwine mulonga kumeso aYehova Kalunga kenyi hakwingila mutembele yaYehova mangana alumbe vyuma vyalivumba lyamwaza halijiko lyakulumbila vyuma vyalivumba lyamwaza.” Kufumaho, Mwangana Hezekiya nawa alivwimbile numba tuhu alingile ngocho hakashimbu kakandende kaha.—Miji. 2, 26:16; 32:25, 26.

6. Vyuma muka vyatelele kulingisa Ndavichi apwenga wakulivwimba, oloze mwomwo ika ahonene kulivwimba?

⁶ Vatu vamwe veji kulivwimbanga mwomwo yakuwaha chavo, nakuya fuma, nauhashi wakulinga vyuma, nangolo javo chipwe mwomwo yamilimo vazata. Ndavichi apwile wamwaza chihanga, kaha nawa apwile navyuma vyosenevi tunavuluka, oloze apwile wakulinyisa chikuma mukuyoya chenyi chosena. Omu Ndavichi ajihile Ngolyate, vamuhanyine mwana Mwangana Saulu mangana apwenga puwenyi, oloze ambile ngwenyi: “Ami yami iyaze? Mokomoko vausoko wami, vaka-tanga yatata vakiko veyaze muIsalele numba ngupwenga nguisewenu yamwangana?” (Samwe. 1, 18:18) Vyuma muka vyakafwile Ndavichi apwenga wakulinyisa? Kalunga ikiye akafwile Ndavichi apwenga nauhashi kana. (Samu 113:5-8) Ndavichi atachikijile ngwenyi vyuma vyosena vyamwaza apwile navyo vyafumine kuli Yehova.—Esekesenuko Wavaka-Kolinde 1, 4:7.

7. Vyuma muka navitukafwa tupwenga vakulinyisa?

⁷ Vatu jaKalunga makumbi ano, vafwila kupwa vakulinyisa ngana mwaNdavichi. Tweji kwivwanga kuwaha kutachikiza ngwetu Yehova  uze apwa mutu wamulemu chikuma mwilu nahamavu, apwa wakulinyisa. (Samu 18:35) Tweji kukavangizanga mazu akwamba ngwavo: “Vwalenu muchima wakeke, nalikoji, nakulinyisa, nakuvova, nakutalilila chikoki.” (Kolo. 3:12) Kaha nawa twatachikiza ngwetu zangi “kayeshi kulitukwojolako, kayeshi kulivwimbako.” (Koli. 1, 13:4) Kachi nge natupwanga vakulinyisa, kaha vatu vavavulu vanahase kupandama kuli Yehova. Ngana muze lunga vanahase kumukunyula kuli puwenyi apwenga muka-Kulishitu chakuzeneka mazu, navatu nawa vanahase kwiza kuli Kalunga hakumona kulinyisa chavatu jenyi.—Petu. 1, 3:1.

8. (a) Vatu makumbi ano vamona ngachilihi kulikanga kuli visemi? (b) Visoneka vyakolezeza vana valinge vyuma muka?

⁸ Paulu avulukile muchima navakapwa nawo vatu mumakumbi akukuminyina. Asonekele ngwenyi mumakumbi akukuminyina vana navakapwa vaka-kulikanga kuli visemi javo. Makumbi ano vatu vamona vilinga kana kupwa vyamwaza nganomu veji kuvisonekanga mumikanda, nakuvisolola havisaji vyamivwimbimbi. Oloze kulikanga cheji kulingisanga tanga yihone kupwa yakulinunga ngana muze chatela. Kahomu mukiko vatachikiza vatu vavavulu. MuHelase yakushikulu, mutu uze avetelenga chisemi chenyi, vamuhangilenga hembo. Kaha mujishimbi javaLoma nawa nge mutu mwaveta ise, wapwile himulonga waunene ngana uze wakujiha mutu. Visoneka VyachiHepeleu naVisoneka VyachiHelase vyaVaka-Kulishitu vyakolezeza vana vavumbikenga visemi javo.—Kulo. 20:12; Efwe. 6:1-3.

9. Chuma muka nachikafwa vana vononoke visemi javo?

⁹ Nge vana navashinganyekanga havyuma vanavalingila visemi javo, kaha kaveshi kulikanga kuli vakikoko. Kutachikiza ngwavo Kalunga ikiye asaka ngwenyi vana vononokenga nachivakafwa vapwenga namuchima wakusakwilila. Nge vana navahanjikanga vyuma vyamwaza hali visemi javo, kaha nachikafwanga navakwavo vanyike vavumbikenga visemi javo. Chipwe ngocho, nge visemi kavazanga vana vavoko, kaha vana kaveshi kuvavumbika namuchima wavo wosenako. Oloze nge mwana mwatachikiza ngwenyi visemi jenyi vamuzanga, kaha nachimukafwa ahone kulikanga kuli vakiko. Austin ambile ngwenyi, “Numba tuhu shimbu jimwe ngwasakilenga kulikanga kuli visemi jami, oloze vakiko vangukafwilenga ngumone kulema chakukavangiza jishimbi, kaha nawa vapwilenga vavashi kuhanjikisa.” Echi changulingishile nguhone kulikanga kuli vakiko. Ngwamwene nawa ngwami vanguzakama ngocho ngwasakilenga kuvasuulwisa.

10, 11. (a) Vilinga muka vyavipi vize vinakusolola nge vatu kavazanga vakwavoko? (b) Vaka-Kulishitu vamuchano veji kusolwelanga vatu muka zangi?

¹⁰ Paulu avulukile nawa vilinga vyeka vyavipi vyakutachikijilaho vatu vaze kavazanga vakwavoko. Omu akumishile kuvuluka ‘vyavaka-kulikanga kuli visemi,’ ahanjikile nawa hali “vaka-kuhona kusakwilila” nakulumbununa muchima vatwama nawo vaze vahona kusakwilila havyuma vyamwaza veji kuvalingilanga vakwavo. Avulukile nawa ngwenyi, vatu navakapwa vaka-kuhona kushishika. Vatu kana kaveshi kwitavila vivwasanoko kaha nawa kavasolola muchima wakulikonekela navakwavoko. Ambile nawa ngwenyi navakapwa vaka-kusaula kaha nawa vaka-kusolola vakwavo, nakuhanjika mazu amapi hali vakwavo vatu nahali Kalunga. Ambile cheka ngwenyi, nakukapwa vaka-kuvangila vakwavo vaze navakahanjikanga mazu amapi hali vakwavo mangana vavapihise lijina. *

 ¹¹ Numba tuhu vatu vavavulu makumbi ano veji kusololanga vilinga kanevi vyavipi, oloze vaze veji kulemesanga Yehova vazanga chikuma vakwavo. Mazu kana apwa amuchano. Yesu ambile ngwenyi kusolwela vakwetu zangi yaa·ga’pe chapwa chachilemu, mwomwo zangi yakuzanga vakwetu lwapwa hilushimbi lwalulemu lwamuchivali haJishimbi jize vahanyine Mose. (Mateu 22:38, 39) Ambile nawa ngwenyi zangi yakuzanga vakwetu nayikapwa katachikijilo kakutachikijilaho vaka-Kulishitu vamuchano. (Tangenu Yowano 13:34, 35.) Zangi kaneyi veji kuyisolwelanga navaka-kole javo.—Mateu 5:43, 44.

12. Mujila muka Yesu asolwelelemo vatu zangi?

¹² Yesu asolwelelenga vatu zangi. Ayile mujinganda josena nakulweza vatu mujimbu wamwaza waWangana waKalunga. Okilenga tupuputa, navitonji, navaka-mbumba, natujika matwitwi, kaha nawa asangwilenga vafu. (Luka 7:22) Kaha nawa Yesu afwililile vatu vosena numba tuhu vatu vamujinjile. Zangi asolwele Yesu yasolola zangi atwama nayo Yehova. Mukaye kosena Vinjiho jaYehova veji kusolwelanga vakwavo zangi.

13. Uno zangi tweji kusolwelanga vatu yinahase kuvakafwa ngachilihi vapandame kuli Yehova?

¹³ Zangi tweji kusolwelanga vatu yeji kuvalingisanga vapandame kuli Setu wamwilu. Chakutalilaho, lunga umwe muThailand akunyukile hakumona zangi vasolwele vandumbwetu omu vapwile kukukunguluka changalila. Omu akindulukile kwimbo, alombele vamunangulenga chilongesa chaMbimbiliya kavali muchalumingo. Aputukile kwambulila vausoko wenyi vosena, kahomu mwahichile kaha tukweji 6 kufuma hakukunguluka changalila, ahanjikile chihande chenyi chatete chakutanga Mbimbiliya muZuvo yaWangana. Shikaho twatela kulihulisa ngwetu: ‘Kutala ngweji kuzata nangolo mangana ngukafwe vatanga jami, navandumbwami muchikungulwilo namumulimo wakwambulula tahi? Kutala ngweji kumonanga vatu ngana muze avamona Yehova tahi?’

14, 15. Vilinga muka vyaunyama veji kusololanga vatu vamwe, kaha vatu vamwe vanalumuna ngachilihi vilinga kana?

¹⁴ Vaka-Kulishitu vatela kulihenda kuvilinga vyavipi vize vali nakusolola vatu mumakumbi ano akukuminyina. Vatu vaze kavazanga Kalungako  kavazanga vyuma vyamwazako. Kaha vaka-kwalumuna vamwe valumuna mazu kana ngwavo, “vaka-kuhunga vyuma vyamwaza.” Vatu kana vapwa vaka-kuhona muchima wakulikanyisa vavene, vaka-ukenya, kaha nawa vaka-kunjinjavala.

¹⁵ Vatu vavavulu vaze vapwilenga navilinga kanevi vyaunyama vali jino nakusolola vilinga vyamwaza. Kwalumuka kanechi vachivulukilile chimweza muupolofweto wamuMbimbiliya. (Tangenu Isaya 11:6, 7.) Mbimbiliya yavuluka ngwayo, tungunge navandumba navakatwama hamwe mukuunda namikoko navangombe. Tachikizenu ngwenu kuunda kanechi nachikapwako “mwomwo hamavu hosena nahakazala nachinyingi chakumutachikiza Yehova.” (Isa. 11:9) Hakuwana nge tunyama kavalinangula vyaYehovako, ngocho kutesamo chaupolofweto kanou chatalisa kuli vatu.

16. Mbimbiliya yinakafwe ngachilihi vatu valumune vilinga vyavo?

¹⁶ Vatu vavavulu vapwilenga naukenya ngana mwatungunge oloze vali jino nakutwama mukuunda navakwavo. Munahase kutanga mijimbu yavatu kanava muvihande vyakwamba ngwavo “Mbimbiliya Yeji Kwalumunanga Kuyoya chaVatu,” yize yatwama ha jw.org. Vatu vaze vanakuzachila Yehova kavapwa ngana mwavaka-kulisolola nge vakwechi vilinga vyakumwivwa Kalunga woma, olozenyi kaveshi kwitavila ngolo jachoko. Vatu kana veji kulisololanga kuvatu nge veji kuzachilanga Kalunga oloze vilinga vyavo kavyavasolola ngochoko. Vatu vaze vapwilenga vaka-ukenya, ‘vanavwale mutu wamuhya uze vatengele kweseka nomu mwaya muchima waKalunga namukwoloka chamuchano namukushishika.’ (Efwe. 4:23, 24) Omu vatu veji kulinangulanga vyaKalunga veji kufwilanga kukavangiza jindongi jenyi. Ngocho veji kwalumunangako vilinga navyuma vafwelela. Kwalumuna vilinga kana kachapwa chachashiko, oloze vatu vaze vafwila kulinga mwaya kujina chaKalunga vanahase kulinga ngocho mwomwo yakuvatwaminyina nashipilitu yaKalunga.

17. Tunahase kulihenda ngachilihi kuvatu vavilinga vyavipi?

¹⁷ Chihandwa chatwama hali vatu vaze veji kuzachilanga Kalunga navaze kavamuzachilako chili jino nakusoloka hatoma makumbi ano. Etu tweji kuzachilanga Kalunga twatela kuzangama kuchina vilinga kanevi vyavipi navituhungumwisa. Tweji kufwilanga kukavangiza mazu akutuhuhumuna ahali WaChimoteu 2, 3:2-5 akwamba ngwavo, vatalisenga nyima. Tunatachikiza ngwetu kachapwa chachashi kulihenda kuvatu vaze kavasaka kulemesa Kalungako, mwomwo vatu kana tweji kuzatanga navo, nakutanga navo kushikola chipwe vene kutwama navo. Oloze tunahase kulihenda kuvishinganyeka vize vinahase kutulingisa tuvalondezeze. Tunahase kulihenda kuvishinganyeka kana hakutanganga Mbimbiliya nakulikatanga navatu vaze vafwila kuzachila Yehova.

18. Uno hanjikiso navilinga vyetu vinahase kukafwa ngachilihi vakwetu kushipilitu?

¹⁸ Twatela kufwila kukafwa vakwetu vazovoloke kushipilitu. Ambulilenunga vatu hakala lwola, nakulomba Yehova amikafwe muhanjike mazu akwoloka halwola lwakutamo. Twatela kukafwa vakwetu vatachikiza ngwavo twapwa tuVinjiho jaYehova. Ngocho vilinga vyetu vyamwaza navineha kavumbika hali Yehova keshi hali yetuko. Vatunangula “tukane vilinga vyakuhona kumwivwa Kalunga woma, namuchima wakufwila vyuma vyahakaye, oloze tupwenga tuvaka-kushinganyeka mwamangana, vakwoloka, vakwechi muchima wakuzachila Kalunga mukatwamino kamyaka yino.” (Chitu. 2:11-14) Kachi nge natupwanga navilinga vyamwaza, nachilingisa navakwetu vaze navatumona vambenga ngwavo: “Natuya nayove mwomwo tunevu ngwavo Kalunga ali nayove.”—Zeka. 8:23.