1, 2. Chilika muka chachilemu nachipwako muno mu 2018, kaha mwomwo ika chapwila chachilemu? (Talenu muvwimbimbi wakulivanga.)

HAMARCH 31, 2018, vatu jaKalunga navatu veka vakuwahilila mukaye kosena navakalikungulula nachingoloshi kuchilika chaKwanuka Kufwa chaKulishitu. Chilika kana cheji kupwangako mwaka himwaka, kaha cheji kukafwanga vatu kupwa vakulinunga.

² Twatachikiza ngwetu Yehova naYesu veji kuwahililanga chikuma hakumona mayevuyevu avatu navapwa kuchilika kana. Mbimbiliya yamba ngwayo: “Liyongomena lyalinene lize [kaveshi kuhasa] kulava kuli mutu numba umweko, vakumafuchi osena, nakumiyachi yosena, nakuvatu veka naveka vosena, nakumalimi osena,” navakatambakana ngwavo: “Ulwilo wetu wafuma kuli Kalunga ketu ou atwama halitanda, nakuli Mwanamukoko.” (Kuso. 7:9, 10) Ocho kuwaha kana eji kwivwanga Yehova naYesu hakutumona tuli nakulinga chilika kanechi!

3. Vihula muka natukumbulula muchihande chino?

³ Chino chihande nachikumbulula vihula viwana. (1) Vyuma muka atela kulinga mutu himutu mangana alizange nakukanganyala kuchilika  chaKwanuka Kufwa chaMwata? (2) Chilika kana cheji kukafwanga ngachilihi vatu jaKalunga vapwenga vakulinunga? (3) Vyuma muka navitukafwa tupwenga tuvakulinunga? (4) Uno mwaka uka nakukapwa chilika chaKwanuka Kufwa chaMwata chamakumishilo?

4. Mwomwo ika chapwila chachilemu kupwanga kuchilika chaKwanuka Kufwa chaMwata lwola lwosena?

⁴ Mwatela kumona ngwenu chilika chaKwanuka Kufwa chaMwata chapwa chachilemu. Mwatela kutachikiza nawa ngwenu, kukunguluka yapwa hijila tweji kulemeselangamo Kalunga. Yehova naYesu veji kumonanga vosena vaze veji kuzatanga nangolo mangana vapwenga kuchilika kanechi chachilemu mwaka himwaka. Twasaka Yehova naYesu vamone ngwavo twafwila kupwa kuchilika kana, kuvangila kaha pamo tunaviji chikuma chipwe nge tuli muukalu wakulinga nahameso wi. Nge natusolola ngwetu twamona kukunguluka kupwa chachilemu, kaha Yehova mwatusoneka ‘mumukanda wakwanukilaho’ kulumbununa kutusoneka “mumukanda wakuyoya,” muze vasoneka majina avatu vosena vaze navakapwa nakuyoya chaya myaka yosena.—Mala. 3:16; Kuso. 20:15.

5. Nge chilika chaKwanuka Kufwa chaMwata chinapandama, tunahase ‘kulyeseka ngachilihi etu vavene tumone numba nge tuli mulufwelelo’?

⁵ Nge chilika chaKwanuka Kufwa chaMwata chinapandama, kaha twatela kuwanangako lwola lwakulomba nakushinganyeka chikuma hausoko wetu naYehova. (Tangenu Wavaka-Kolinde 2, 13:5.) Uno tunahase kulinga ngachilihi ngocho? Tunahase kulinga ngocho ‘hakulyeseka etu vavene tumone numba nge tuli mulufwelelo.’ Ngocho twatela kulihulisa ngwetu: ‘Kutala ngwafwelela ngwami ngwatwama muchihanda chaliuka lyaYehova lize nalikatesamo vyuma ajina tahi? Kutala nguli nakuzata natwima hakwambulula nakunangula vatu mujimbu wamwaza waWangana tahi? Uno vilinga vyami vili nakusolola nge ngwafwelela ngwami tuli mumakumbi akukuminyina kaha nawa kaye kaSatana kalinwomu kakume tahi? Uno lufwelelo lwami muli Yehova naYesu luchili lika lwakuzama ngana muze lwapwile halwola ngwalihanyine kuli Yehova Kalunga tahi?’ (Mateu 24:14; Chimo. 2, 3:1; Hepe. 3:14) Kuwana muvakumbulwila vihula kana nachitukafwa tulikekese etu vavene.

6. (a) Chuma muka nachitukafwa tukayoye haya myaka? (b) Kalama umwe eji kulizanganga ngachilihi vyachilika chaKwanuka Kufwa chaMwata, kaha munahase kumulondezeza ngachilihi?

⁶ Mwatela kutanga nakushinganyeka haVisoneka vize vyahanjika hakulema chachilika chaKwanuka Kufwa chaMwata. (Tangenu Yowano 3:16; 17:3.) Hakusaka tukawane kuyoya chahaya myaka yosena, twatela “kutachikiza” Yehova ‘nakufwelela’ Yesu uze apwa Mwanenyi wakulipwila. Hakusaka mulizange vyachilika chaKwanuka Kufwa chaMwata, munahase kusakula kulinangulako vihande vimwe vize navimikafwa mupandame chikuma kuli Yehova naYesu. Tutalenu vyuma eji kulinganga kalama umwe hakulizanga vyachilika kana. Hamyaka yayivulu nakungululanga vihande vyamuKaposhi Kakutalila vize vinahanjikanga hachilika chaKwanuka Kufwa chaMwata nazangi yize atusolwela Yehova naYesu. Havyalumingo vyakukokela kuchilika kana, eji kuhitulukanga muvihande kana nakushinganyeka hakulema chatwama hakulinga echi chilika. Shimbu jimwe eji kuwanyinangaho navihande vyeka vyavihya chimwe chipwe vivali. Ou kalama atachikiza ngwenyi kuhituluka muvihande kanevi nakutanga Mbimbiliya chaKwanuka Kufwa chaMwata nakushinganyekaho, cheji kumukafwanga alinangule vishina vyavihya mwaka himwaka. Kaha nawa zangi yenyi yakuzanga Yehova yeji kutohwelangako mwaka himwaka. Kulinangula mujila kaneyi nachimikafwa mutohwese zangi yenu yakuzanga Yehova naYesu nakuvasakwilila havyuma vyamwaza vatulingila. Echi nachimikafwa mukanganyale hakupwa kuchilika chaKwanuka Kufwa chaMwata.

7. (a) Vyuma muka alombele Yesu haufuku watete alingile chilika chaKulya chaMwata chaChingoloshi? (b) Vyuma muka vyasolola nge Yehova akumbulwile kulomba chaYesu?

⁷ Haufuku watete uze Yesu alingile chilika chaKulya chaMwata chaChingoloshi, alombele ngwenyi vaka-kumukavangiza vapwenga vakulinunga nganomu ikiye alinunga naIse. (Tangenu Yowano 17:20, 21.) Chikupu vene, Yehova akumbulwile kulomba chaMwanenyi, ngocho vatu vavavulu vatachikiza ngwavo Yehova atumine Mwanenyi. Echi chilika chapwa chakulipwila mwomwo cheji kusololanga Vinjiho jaYehova kupwa vatu vakulinunga chikuma. Mukaye kosena, vatu vakumafuchi navikova vyakulisezaseza veji kulikungulwilanga hamwe muvihela vyakulemesela Kalunga. Kujingalila jimwe, kanda vamonengaho lyehi vatu vakumiyachi yakulisezaseza navalikungulwila hamwe nakulemesa Kalunga, kaha veka nawa vachimona kupwa chakuhenga. Oloze Yehova naYesu veji kwivwanga kuwaha kumona vatu vanalikungulula kuchilika kana.

8. Yehova alwezele Ezekele mazu muka hachihande chakulinunga?

⁸ Etu vatu jaYehova katwalikomokela hakumona omu tweji kuzatanga mukulinunga navandumbwetuko. Yehova ahanjikilile chimweza vyakulinunga kanechi. Achishinganyekenu hamazu alwezele kapolofweto Ezekele ngwenyi awanyise vitondo vivali, chitondo “chaYuta” nachitondo “chaYosefwe.” (Tangenu Ezekele 37:15-17.) Chihande chakwamba ngwavo, “Vihula Vyakufuma Kuli Vaka-Kutanga” vasonekele muKaposhi Kakutalila waJuly 2016 chahanjikile ngwacho: “Yehova alwezele Ezekele mazu aze asolwele nge muyachi waIsalele naukalinunga cheka omu naukakinduluka muLifuchi lyaLushiko. Mazu kana asolwele nawa omu vatu jaKalunga navakalinunga hamwe hamakumbi akukuminyina.”

9. Upolofweto waEzekele weji kutesangamo ngachilihi mwaka himwaka hachilika chaKwanuka Kufwa chaMwata?

⁹ Kufuma vene mu 1919 nakuya kulutwe, Yehova aputukile kukungulula cheka vawavisa vaze vemanyinako “chitondo chaYuta” nakuvanunga hamwe. Kutwala muze, vaze vakwechi lutalililo lwakukayoyela hano hamavu vaze vemanyinako chitondo “chaYosefwe” valinungile navawavisa, nakupwa jino “utanga umwe.” (Yowa. 10:16; Zeka. 8:23) Yehova ambile ngwenyi mwakawanyisa evi vitondo vivali nakupwa chitondo chimwe mulivoko lyenyi. (Ezeke. 37:19) Oholyapwa awa mazavu avali ali nakuzachila hamwe mukulinunga hakuvatwaminyina kuli Mwangana Yesu Kulishitu uze vavulukile muupolofweto ngwavo, “ngamba yami Ndavichi.” (Ezeke. 37:24, 25) Kulinunga chize vavuluka muupolofweto waEzekele cheji kusolokanga hatoma mwaka himwaka omu vawavisa ‘namikoko veka’ veji kulikungululanga kuchilika chaKwanuka Kufwa chaKulishitu. Jino vyuma muka twatela kulinga mutu himutu mangana tutwaleho kulinunga navandumbwetu?

10. Chuma muka nachitukafwa tupwenga vakulinunga muchikungulwilo?

¹⁰ Chuma chatete nachitukafwa tupwenga vakulinunga shina kupwa vakulinyisa. Omu Yesu apwile hano hamavu, alwezele tumbaji twenyi vapwenga vakulinyisa. (Mateu 23:12) Nge natupwa vakulikehesa, kaha katweshi kulivwimba ngana mwavatu vakukayeko. Kulinyisa nachitukafwa tuliluule kuli vaze vali nakutwaminyina muliuka kahechi nachitukafwa tupwenga vakulinunga muchikungulwilo. Chachinenenyi Kalunga eji kwivwanga kuwaha nge natupwa vakulinyisa mwomwo “eji kwimanyinanga vaka-kulivwimba nakole, oloze eji kusolwelanga vaka-kulinyisa likoji lyalinene.”—Petu. 1, 5:5.

11. Uno kushinganyeka haulumbunwiso wavifwanyisa nachitukafwa ngachilihi tupwenga vakulinunga?

¹¹ Chuma chamuchivali nachitukafwa tupwenga vakulinunga, shina kushinganyeka haulumbunwiso  wavifwanyisa tweji kuzachisanga hachilika chaKwanuka Kufwa chaMwata. Shikaho, shimbu kanda chilika kana chihete mwatela kuputuka kushinganyeka haulumbunwiso wambolo yakuzeneka chimbalwila nahavinyo vichila. Oloze mwatela nawa kukalinga ngocho chikumanyi haufuku vene uze. (Koli. 1, 11:23-25) Mbolo yemanyinako mujimba waYesu wakuzeneka shili uze vahanyine mwachimuna wakuvatula, kaha vinyo vyemanyinako manyinga enyi aze amwangalile. Oloze katwatela kukumina kaha hakutachikiza ulumbunwiso wavifwanyisa kanako. Anukenu ngwenu ndando yakusokola yaKulishitu yasolola zangi atusolwela Yehova hakutuma Mwanenyi kwiza nakutufwila, nazangi atusolwela Yesu hakulisuula kuhana kuyoya chenyi hali etu. Kushinganyeka hazangi kaneyi vatusolwela nachitukafwa nayetu tuvazange. Ngocho kuzanga Yehova chikiko cheji kutukafwanga tupwenga vakulinunga hamwe navandumbwetu.

12. Chifwanyisa ahanjikile Yesu chasolola ngachilihi nge Yehova asaka tukonekelenga vakwetu?

¹² Chuma chamuchitatu nachitukafwa tupwenga vakulinunga, shina kukonekelanga vakwetu. Nge natukonekelanga vakwetu, kaha natusolola ngwetu twasakwilila Yehova hakutukonekela jishili jetu kuhichila mundando yakusokola yaKulishitu. Tutalenu hachifwanyisa ahanjikile Yesu chize chatwama hali Mateu 18:23-34. Jino lihulisenu ngwenu: ‘Kutala ngunakufwila kukavangiza mazu ahanjikile Yesu tahi? Kutala ngweji kutalililanga chikoki vandumbwami nge vanangwivwisa kupihya tahi? Uno ngwafwila kukonekela vaze veji kungulinganga mwamupi tahi?’ Hakuwana nge katwakupukako, shimbu jimwe cheji kutukaluhwilanga kukonekela milonga yimwe. Chipwe ngocho echi chifwanyisa chatunangula vyuma asaka Yehova ngwenyi tulingenga. (Tangenu Mateu 18:35.) Yesu asolwele hatoma ngwenyi Yehova keshi kutukonekelako nge natuhona kukonekela vandumbwetu okunyi tunahase kulinga ngocho. Mazu kana twatela kuwamona kupwa amalemu. Shikaho nge natukonekelanga vakwetu ngana muze atulweza Yesu, kaha natulinunga hamwe navandumbwetu.

13. Uno kuneha kuunda nachitukafwa ngachilihi tupwenga vakulinunga?

¹³ Nge natukonekelanga vakwetu, kaha natusolola ngwetu twasaka kuneha kuunda. Twatela kwanuka mazu ahanjikile kaposetolo Paulu akwamba ngwenyi, twatela “kufwilanga kulama kulinunga [chetu] hamwe mushipilitu chize  cheji [kutununganga] hamwe mukuunda.” (Efwe. 4:3) Shikaho omu tuli nakupanda kuchilika chaKwanuka Kufwa chaMwata chikumanyi omu likumbi kana nalikaheta, mwatela kushinganyeka chikuma omu mweji kutwaminangamo navakwenu. Lihulisenu ngwenu: ‘Kutala vakwetu vangutachikiza ngwavo kangwalama kokoko tahi? Uno ngwasaka kutakilika munayi muchima wami nakuhona kuneha kuunda tahi?’ Evi vikiko vihula vyavilemu twatela kulihulisa omu tuli mungonde yaKwanuka Kufwa chaMwata.

14. Natusolola ngachilihi ngwetu tuli ‘nakuliula tutenga twavakwetu muzangi’?

¹⁴ Chuma chamuchiwana nachitukafwa tupwenga vakulinunga shina kusolwela vakwetu zangi hakulondezeza Yehova uze apwa Kalunga wazangi. (Yowa. 1, 4:8) Katwatela kuhanjika hali vandumbwetu vamwe ngwetu, “Ngwavazanga vene, oloze kangwasaka kulikata navoko.” Nge natushinganyekanga ngocho, kaha natulimbalaka namazu ahanjikile Paulu ngwenyi, twatela ‘kuliula tutenga twavakwetu muzangi.’ (Efwe. 4:2) Paulu kahanjikile kaha ngwenyi mwatela “kuliula tutenga twavakwenu[ko],” oloze ambile ngwenyi mwatela kulinga ngocho “muzangi.” Echi chikiko chihandwa chatwamaho. Muvikungulwilo vyetu mwatwama vatu vakulisezaseza vaze Yehova asanyika mangana vezenga kuli ikiye. (Yowa. 6:44) Yehova azanga vatu kana, mwomwo ikiye avasanyika. Ngocho katwatela kushinganyeka ngwetu vandumbwetu vamwe muchikungulwilo kavatamo kuvasolwela zangiko. Shikaho tusolwelenunga zangi vandumbwetu vosena nganomu Yehova atulweza tulingenga.—Yowa. 1, 4:20, 21.

15. Twatachikiza ngachilihi ngwetu nakukapwa chilika chamakumishilo?

¹⁵ Likumbi limwe chilika chaKwanuka Kufwa chaMwata natukalinga chikiko nachikapwa chamakumishilo. Twatachikiza ngachilihi ngocho? Paulu vamuhwiminyine asonekelele vaka-Kulishitu vawavisa muKolinde mukanda watete ngwenyi, hakulinga chilika chakwanuka kufwa chaYesu mwaka himwaka veji “kuvilika kufwa chaMwata palanga nomu mwakeza.” (Koli. 1, 11:26) Lizu lyakwamba ngwavo “mwakeza” lyalifwana nalizu ahanjikile Yesu ngwenyi, “ali nakwiza” omu apwile nakuhanjika vyamakumbi akukuminyina. Yesu ahanjikile vyaluyando lwalunene luli nakwiza kulutwe ngwenyi: “Chinjikizo chaMwanamutu nachikasoloka jino mwilu, kaha vatu vakumiyachi yahamavu yosena navakalyonyinga, kaha navakamona Mwanamutu ali nakwiza hamavwi amwilu nangolo naupahu waunene. Jino [Yesu] mwakatuma vangelo jenyi naluneta lwakutezuka chikuma, kaha navakakungulwila hamwe vatu jenyi asakula kufuma kumitamba yiwana, kufuma kusongosongo yamelu mbwe nakusongosongo yikwavo.” (Mateu 24:29-31) Echi ‘kukungulwila hamwe vatu jenyi’ chatalisa kulwola luze vaka-Kulishitu vawavisa vaze vachili hano hamavu navakaya mwilu. Chuma kana nachikalingiwa nge luyando lwalunene lunahichi lyehi, oloze shimbu kanda jita yaAlamangetone. Kufumaho vaze 144,000 navakazachila hamwe naYesu nakufungulula vamyangana vahamavu. (Kuso. 17:12-14) Chilika chaKwanuka Kufwa chaMwata chize natukapwa nacho shimbu kanda vawavisa vavakungulule nakuya mwilu, chikiko nachikapwa chamakumishilo, mwomwo halwola kana Yesu ‘neza lyehi.’

16. Mwomwo ika muli nakufwila kukapwa kuchilika chaKwanuka Kufwa chaMwata uno mwaka?

¹⁶ Shikaho tufwilenu kukapwa kuchilika chaKwanuka Kufwa chaMwata chize nachikapwako haMarch 31, 2018 mangana tukanganyale. Kaha nawa tulombenu Yehova atukafwe tutwaleho kulinunga navandumbwetu. (Tangenu Samu 133:1.) Anukenu ngwenu likumbi limwe chilika chaKwanuka Kufwa chaMwata natukalinga chikiko nachikapwa chamakumishilo. Ngocho oholyapwa tufwilenu kupwanga kuchilika kana nakumona kulinunga tweji kupwanga nacho halwola kana kupwa chachilemu.