EYO. Shimbu jimwe valingilenga vene ngocho Tutalenu hachakutalilaho chize chasolola nge valingilenga ngocho. Mazu atwama hamukanda waLushimbi lwamuchivali 24:14, 15 amba ngwawo: “Kanda namukalyapula ngamba wakukamba uze nakalikiza chipwe nahutuko, numba apwa ndumbwenu chipwe mwiza uze ali muli enu . . . Mokomoko mwakayayavala kuli Yehova hali enu, kaha namukalinga shili.”

Vaka-kuvumbwojola vawanyine chihanda chamulondo haze hapwile mazu vasonekele mulikulukaji lyamyaka lyakusokesa 7 B.C.E. Echi chihanda chamulondo vachiwanyine kwakamwihi nangalila yaAshatote. Pamo awa mazu vawasonekelele muka-kuzata muwande uze vavangijikilile ngwavo ahonene kukumisa mulimo vamuhanyine wakwaha jimbuto. Ambile ngwenyi: “Omu ami ngamba yove ngwakumisanga kulonga jimbuto jize ngwahanga, Hoshayahu mwana Shobay ezanga nakumbata uvwalo wayami ngamba yove. . . . Vakwetu ngwapwanga nakwaha navo vanahase kunguhakwila . . . ngwavo mazu ngunakuhanjika amuchano. Kangwalinganga chuma numba chimwe chachipiko. . . . Kachi nge ove nguvulu kawachimwene kupwa mulonga kungukindulwishila ami ngamba yove uvwaloko, kaha linga ngocho mwomwo yakungwivwila keke. Kanda naulyungumikako mwomwo ami ngamba yove nguli muukalu.”

Simon Schama uze alinangula vyakushikulu ahanjikile ngwenyi: “Mazu kana asolola nge ou mutu kapwile nakusaka kaha kumukindulwishila uvwalo wenyiko. Oloze hakuhanjika mazu kana chasolola nawa nge atachikijile jishimbi jamuMbimbiliya, chikumanyi jize jatwama mumukanda waVyavaLevi naLushimbi lwamuchivali jize jakanyishile kuyanjisa vatu vakuhutwa.”