1. Ukalu muka tweji kulipikanga nawo, kaha vyuma muka vanakulinga vangamba jaYehova vize vinakumwivwisa kuwaha? (Talenu mivwimbimbi yakulivanga.)

MAKUMBI ano, vatu mukaye vali nakumona chikuma ukalu. Enu vandumbwetu vavavulu muli nakulipika namisongo yayinene. Numba tuhu enu vamwe munakolo, oloze muli nakuzakama vausoko wenu vatushinakaji. Veka nawa chili nakuvakaluhwila kutondela vaka-tanga yavo vyuma vyakulikafwa navyo mukuyoya. Kaha nawa tunatachikiza ngwetu vatu vavavulu vali nakulipika naukalu kanou halwola lwolumwe. Ngocho kuzata mulimo kanou chasakiwa kulisuula kuzachisa lwola lwenu, nangolo jenu najimbongo. Chamokomoko naukalu kanou, muchili lika nakufwelela muvyuma amishika Kalunga kukamilingila kulutwe. Echi chili nakwivwisa Yehova kuwaha.

2. Chisoneka chaIsaya 40:29 chinatukolezeza ngachilihi, kaha vishinganyeka muka katwatela kupwa navyoko?

² Kutala shimbu jimwe mweji kushinganyekanga ngwenu ukalu wamukuyoya unamitohwela tahi? Nge mukiko, kaha keshi yenu kahako. Mbimbiliya yasolola ngwayo, kakavulu vangamba jaKalunga vakushishika vakunyima navakiko kavasakile kutwalaho lika kuyoyako. (Vamya. 1, 19:4; Yopa 7:7) Oloze muchishishisa chakuhomba chikuma, vapendaminyine hali Yehova avajikijise.  Kavashinganyekele ngwavo Kalunga navambiliko mwomwo eji “kuhananga ngolo vaze vanazeye.” (Isa. 40:29) Oloze chaluvinda vangamba jaKalunga vamwe makumbi ano, veji kushinganyekanga ngwavo jila yakukumishilamo ukalu wavo mukuyoya shina ‘kusezako muchano chachindende’ kwijiva nge ngwavo kwazana mumilimo yavaka-Kulishitu chapwa hichiteli kumana nduma. Ngocho veji kulitwaminanga kutanga Mazu aKalunga, nakuya kukukunguluka, namumulimo wamuwande ngana muze ashinganyeka Satana ngwenyi navalinga kachi nge vali muukalu.

3. (a) Tunahase kuhonesa ngachilihi Satana? (b) Vyuma muka natushimutwila muchihande chino?

³ Hakuwana nge Liyavolo atachikiza ngwenyi kwazana chikuma mumilimo yakushipilitu nachitukolezeza, ngocho kasaka tulinge vyuma kanako. Shikaho kachi nge munahombo, kaha kamwatela kusosoloka kuli Yehovako. Mwatela kupandama chikuma kuli ikiye mwomwo ‘mwamizamisa, nakumijikijisa.’ (Petu. 1, 5:10; Yako. 4:8) Muchihande chino natushimutwila havyuma vivali vinahase kutuzeyesa kushipilitu nakuhona kuzata mulimo Kalunga, kaha natushimutwila nawa omu kukavangiza jindongi jamuMbimbiliya nachitukafwa tutwaleho lika kumika nge tuli muukalu. Chatete, tushimutwilenu hali Isaya 40:26-31 mangana tumone ngolo atwama najo Yehova jakutukafwa.

4. Vyuma muka natulinangula hali Isaya 40:26?

⁴ Tangenu Isaya 40:26. Kakweshi mutu atachikiza kuvula chavatanganyikako. Vaka-sayasi vafwelela ngwavo mumulalaji umwe vavuluka ngwavo Milky Way, mwatwama vatanganyika vakuheta kujimbiliyoni 400. Oloze Yehova atachikiza lijina lyatanganyika hitanganyika. Vyuma muka natulinangulako? Kachi nge Yehova azakama vyuma atenga vize kavyahwimako, kahanyi eji kwivwanga chikuma kuwaha hakumona yenu muli nakumuzachila keshi mwomwo yakumishinjilako oloze mwomwo yakumuzanga. (Samu 19:1, 3, 14) Setu wazangi amitachikiza kanawa. Kaha nawa “najikambu jakumitwe yenu vajilava lyehi josena” kuli ikiye. (Mateu 10:30) Muka-kwimba jisamu atufwelelesa ngwenyi: “Yehova atachikiza vyuma veji kuhitangamo vatu vakuzeneka mulonga.” (Samu 37:18) Chapundu vene atachikiza ukalu muli nakuhitamo kaha nahase kumihana ngolo mangana mumike muukalu wenu.

5. Vyuma muka navitulingisa tufwelele ngwetu Yehova mwatujikijisa?

⁵ Tangenu Isaya 40:28. Yehova atwama nangolo jajinene. Chakutalilaho, achishinganyekenu hajingolo jalikumbi. Muka-kusoneka vyasayasi David Bodanis ambile ngwenyi: “Jingolo jize jeji kufumanga kulikumbi musekondi yimwe jeseka hamwe nangolo jatupata vavavulu chikuma vaze navapilukila halwola lwolumwe.” Muka-kuhehwojola weka ambile ngwenyi, “jingolo jeji kufumanga kulikumbi musekondi yimwe jinahase kukafwa vatu muvyuma vyakulisezaseza hamyaka 200,000.” Kutala ou ahana likumbi ngolo keshi kuhasa kutuhana nayetu ngolo jakumika muukalu wetuko tahi?

6. Mujila muka toka yaYesu yapwila yayashi kumbata, kaha kutachikiza chuma kana nachitukafwa ngachilihi?

⁶ Tangenu Isaya 40:29. Kuzachila Yehova cheji kunehanga kuwahilila. Yesu alwezele tumbaji twenyi ngwenyi: “Mbatenu toka yami.” Ambile nawa ngwenyi: “Namupwa vakuhizumuka. Mwomwo toka yami yayashi kumbata, kaha chiteli chami chachilelu.” (Mateu 11:28-30) Mazu kana apwa amuchano. Shimbu jimwe, tweji kwivwanga kuzeya kufuma hembo tuyenga nakukunguluka chipwe mumulimo wamuwande. Jino tweji kwivwanga ngachilihi nge tunakinduluka hembo? Tweji kwivwanga kumuchima hwo nakupwa vakulizanga kuhonesa kala vyeseko navituwana. Chikupu vene, toka yaYesu yapwa yayashi kumbata.

7. Hanjikenu chakutalilaho chize chasolola nge mazu ahali Mateu 11:28-30 apwa amuchano?

 ⁷ Ndumbwetu umwe wapwevo natwamba ngwetu Kutemba apwile namusongo wakuzeyazeya, nakuhomba, namutwe. Shimbu jimwe chamukaluhwililenga kuya nakukunguluka. Oloze lwola lumwe omu alikakile nakuya kukukunguluka, evwililile kuchihande chaMbimbiliya kaha asonekele ngwenyi: “Chihande kana chapwile nakuhanjika havyuma vyeji kutuhombesanga. Kaha changuvendejekele chikuma ngocho ngwaputukile nakulila. Echi changwanukishile nge ngwatela kupwanga kukunguluka.” Ou ndumbwetu evwile kuwaha chikuma mwomwo likumbi kana ayile kukukunguluka.

8, 9. Kaposetolo Paulu alumbunwine ika hakusoneka ngwenyi: “Nge ngunahehela, kaha ngunakwate ngolo”?

⁸ Tangenu Isaya 40:30. Numba tupwa vakuhya ngachilihi kushipilitu oloze katweshi kuhasa kulinga vyuma vyosena mungolo jetuko. Echi chikiko chishina twatela kutachikiza tuvosena. Numba tuhu kaposetolo Paulu apwile lunga wakuhya kushipilitu, oloze shimbu jimwe ahonenenga kutesamo vyuma asakilenga kulinga. Omu alwezele Kalunga ukalu wenyi, Kalunga amulwezele ngwenyi: “Ngolo jami vanajikupwisa mukuhehela chove.” Paulu evwishishile kanawa mazu kana, kaha ambile ngwenyi: “Nge ngunahehela, kaha ngunakwate ngolo.” (Koli. 2, 12:7-10) Uno alumbunwine ika hakuhanjika mazu kana?

⁹ Paulu atachikijile ngwenyi milimo yimwe vatelele kumukafwa kuli Kalunga numba ayitesemo. Shipilitu yajila yaKalunga yahanyine Paulu ngolo jize jamukafwile atesemo milimo yize kachi kahashile kuzata mungolo jenyiko. Omu mukiko chapwa nakuli etu, mwomwo nge Yehova mwatuhana ngolo, kaha natujikiza chikupu.

10. Yehova akafwile ngachilihi Ndavichi alipike naukalu amwene?

¹⁰ Muka-kwimba jisamu Ndavichi amwenenga omu shipilitu yaKalunga yamukafwilenga. Embile ngwenyi: “Nanguhasa kulitalasana nalizavu lyavaka-kungunyemukila hakungukafwa kuli yove. Nanguhasa kunyina hakembwe mungolo jove.” (Samu 18:29) Nayetu tukwechi ukalu wakufwana nge jikembwe uze katweshi kuhasa kukumisa mungolo jetuko ngocho vatela kutukafwa kaha kuli Yehova.

11. Lumbununenu omu shipilitu yajila yinahase kutukafwa tulipike naukalu wetu.

¹¹ Tangenu Isaya 40:31. Ngonga keshi kupendamina kaha hangolo jenyi hakutuka nahakuzajika mavava enyi hatando yayisukuko. Eji kutukanga hakuzachisa peho yizuma yize yeji kumukafwanga ahone kuzachisa chikuma ngolo jenyi. Shikaho nge munalitalasana naukalu waunene, kaha mwatela kwanuka ngonga. Lombenu Yehova mangana amihane “muka-kumikafwa, shipilitu yajila.” (Yowa. 14:26) Mwatuhanayo heshoho natumulombelayo. Lwola lukwavo nawa tweji kusakiwanga kutukafwa kuli Kalunga shina nge tunalimbalaka nandumbwetu muchikungulwilo. Uno mwomwo ika tweji kulimbalakilanga?

12, 13. (a) Mwomwo ika vaka-Kulishitu veji kulimbalakilanga? (b) Mujimbu waYosefwe watunangula vyuma muka hali Yehova?

¹² Tweji kulimbalakanga mwomwo tuvosena katwakupukako. Shimbu jimwe mazu navahanjika vandumbwetu chipwe vilinga vyavo vinahase kutwivwisa kupihya kaha nawa yetu tunahase kuhanjika chipwe kulinga vyuma vize navivevwisa kupihya. Echi chinahase kupwa hicheseko chachinene. Nganomu tweji kumikanga muvyeseko vikwavo, Yehova eji kusakanga tusolole kulonga chetu hakulikata navandumbwetu chamokomoko natutenga twavo.

¹³ Mujimbu waYosefwe watukafwa tutachikize ngwetu Yehova keshi kukinga vangamba jenyi kuvyesekoko. Omu Yosefwe apwile mukweze, vamulanjishile muundungo muEjipitu kuli vandumbwenyi. (Kupu. 37:28) Yehova amwenenga vyuma vyapwile nakusoloka, kaha  alinyengelenga hakumona sepa lyenyi wakwoloka Yosefwe vali nakumuyanjisa. Oloze Yehova kamukafwile hahaze veneko. Kaha nawa omu vamuvangijikilile ngwavo asakile kupika pwevo lyaPotefwale Yehova kamukafwile chekako. Uno Kalunga kazakamine Yosefweko tahi? Nduma. Mbimbiliya yamba ngwayo: “Yehova alingishile vyuma vyosena alingilenga Yosefwe vifukile.”—Kupu. 39:21-23.

14. Natunganyala ngachilihi kushipilitu nakumujimba nge ‘natumbila’ utenu?

¹⁴ Tutalenu hachakutalilaho chikwavo. Vatu vamwe vanavayanjisanga ngana muze vayanjishile Ndavichi. Chipwe ngocho ou sepa lyaKalunga kechelelele matoto amuhombeseko. Oloze asonekele ngwenyi: “Mbila utenu, seza matoto. Kanda naupihilila nakulinga upiko.” (Samu 37:8) Chuma chachinene chatela kutulingisa ‘tumbile’ utenu shina kulondezeza Yehova uze “katulingile kweseka najishili jetuko.” (Samu 103:10) Oloze kuli vyuma vyeka nawa tunahase kunganyala nge ‘natumbila’ utenu. Matoto anahase kulingisa mutu avize musongo wamuchima, nakuhona kuhwima kanawa nakwenyeka lisuli nakulingisa vyakulya vihone kuchikika kanawa mujimo. Kaha nawa wongo kawazata kanawako nge tunapihilila. Shimbu jimwe matoto anahase kulingisa mutu ahombe hatando yayisuku. Oloze Mbimbiliya yamba ngwayo: “Muchima wakuunda weji kunehanga kuyoya kumujimba.” (Vishi. 14:30) Jino vyuma muka twatela kulinga mangana tunganyale ndumbwetu kachi nge tunapihilila? Tunahase kulinga ngocho hakukavangiza jindongi jamuMbimbiliya.

15, 16. Uno namuhasa kuhanjika ngachilihi namutu uze namivwisa kupihya kumuchima?

¹⁵ Tangenu Wavaka-Efwesu 4:26. Katweshi kulikomokelako nge vatu mukaye navatuyanjisa. Oloze nge ndumbwetu chipwe kausoko ketu mwahanjika chipwe kulinga vyuma vize navitwivwisa kupihya, kaha tunahase kuhomba chikuma. Nyi ngachilihi nge chinakutukaluhwila kuliula vyuma kana? kutala natutwalaho kulama koko hatando yayisuku tahi? Nyi natukavangiza mazu amuMbimbiliya aze atulweza tukumisenga washi vikokojola? Nge katweshi kukumisa washi vikokojola nandumbwetuko, kaha nachituhonesa kutwama mukuunda naikiye.

¹⁶ Ngachilihi nge vanakwivwisa kupihya kuli ndumbwove, kaha uli nakwivwa lika kukola kumuchima? Vyuma muka watela kulinga mangana unehe kuunda? Chatete, watela kulomba kuli Yehova namuchima wove wosena. Mulombe akukafwe uhanjike mukuunda nandumbwove. Anuka ngwove naikiye nawa apwa sepa lyaYehova. (Samu 25:14) Kaha nawa naikiye  vamuzanga kuli Kalunga. Yehova eji kusolwelanga masepa jenyi likoji, kaha asaka nayetu tulingenga mwomumwe. (Vishi. 15:23; Mateu 7:12; Kolo. 4:6) Kufumaho, shinganyeka havyuma naukahanjika omu nauya kuli ndumbwove. Kanda kukukulula ngwove ndumbwove asakanga kaha kukwivwisa kupihyako, oloze watela kushinganyeka ngwove pamo katachikiza ngwenyi naupihililako. Watela kutachikiza nawa ngwove pamo yove walingisanga ikiye ahanjike chipwe kulinga vyuma kana. Unahase kuputuka kuhanjika hakwamba ngwove, “Pamo ngunashinganyeka kaha chikuma hachihande kana, oloze mazu wahanjika zau angwivwisanga . . .” Kachi nge keshi kukwivwililako, kaha vandamina lwola lweka mangana ukahanjike nenyi cheka. Oloze twalaho lika kulombelako ndumbwove mangana Yehova amukisule. Lomba Kalunga akukafwe ushinganyeke havilinga vyamwaza atwama navyo ndumbwove. Numba nge mwakwivwilila chipwe nduma oloze tachikiza ngwove Yehova mwevwa kuwaha mwomwo unazate nangolo mangana unganyale ndumbwove uze apwa sepa lyaKalunga.

17. Jila muka eji kuzachisanga Yehova hakutukafwa nge tunavulumuna mulonga washili, kaha mwomwo ika twatela kukavangiza jila kaneyi?

¹⁷ Vatu vamwe veji kushinganyekanga ngwavo, kavatamo kuzachila Yehovako mwomwo yakuvulumuna milonga yashili yayinene. Kulihana mulonga cheji kuhombesanga mutu. Mwangana Ndavichi uze ahombele mwomwo yamulonga avulumwine ambile ngwenyi: “Omu ngwahonene kwambulula shili yami, vifuwa vyami vyatakiwile mwomwo yakulishimwoka shimbu yosena. Mwomwo ove wangwivwilile kupihya chikuma musana naufuku.” Oloze hakuwana nge Ndavichi apwile wakuhya kushipilitu akumishile ukalu wenyi. Asonekele ngwenyi: “Kutwala muze ngwambulwile shili yami kuli ove,” kaha ngwenyi, “ove wangukonekelele jishili jami.” (Samu 32:3-5) Kachi nge munavulumuna mulonga washili waunene, kaha tachikizenu ngwenu Yehova mwamikafwa. Mwatela kwitavila vyuma navamikafwa kuchikungulwilo. (Vishi. 24:16; Yako. 5:13-15) Ngocho kamwatela kulangisako mwomwo kuyoya chenu chahaya myaka yosena chili muponde. Nyi ngachilihi nge vamikonekela lyehi oloze chivezu chenu chichili nakumihana mulonga?

18. Chakutalilaho chaPaulu nachikafwa ngachilihi vaze veji kulihananga milonga havyuma valingile kunyima?

¹⁸ Shimbu jimwe kaposetolo Paulu ahombelenga mwomwo yavyuma vyavipi alingilenga kunyima. Ambile ngwenyi: “Ami yami wamundende hali vaposetolo vosena, kaha kangwatelemo kunguvuluka ngwavo kaposetoloko, mwomwo ngwayanjishilenga chikungulwilo chaKalunga.” Ambile nawa ngwenyi: “Oloze halikoji lyalinene lyaKalunga hakiko ngunapwila nge omu nguli.” (Koli. 1, 15:9, 10) Yehova amwene Paulu kupwa wamulemu, kaha asakile naivene atachikize chuma kana. Kachi nge mwapihilila lyehi nakwalumuka nakwambulula milonga yenu, kaha Yehova mwamikonekela. Mwatela kufwelela chikupu ngwenu Yehova namikonekela.—Isa. 55:6, 7.

19. Chisoneka chamwaka wa 2018 chika, kaha mwomwo ika chinapwila chachilemu?

¹⁹ Omu kukuma chakatwamino kamyaka yino chili nakupandama, ukalu nauvulilako. Oloze tachikizenu ngwenu uze “Eji kuhananga ngolo vaze vanazeye, [nakujikijisa] vaze vanazeneka ngolo,” mwamihana vyuma vyasakiwa mangana mutwaleho kumuzachila. (Isa. 40:29; Samu 55:22; 68:19) Uno mwaka wosena wa 2018 natushinganyekanga hamazu kanawa amalemu kala lwola natupwanga kukukunguluka kuZuvo yaWangana. Mazu kana ali hachisoneka chamwaka chakwamba ngwavo: “Vaze vatalilila kuli Yehova navakakwata ngolo.”—Isa. 40:31.