1, 2. Yehova eji kuzachisanga ngachilihi luheto lwenyi?

YEHOVA apwa Kalunga muka-kuhana. Vyuma vyosena twatwama navyo vyafuma kuli ikiye. Yehova ikiye mwenya palata naulu navyuma vyeka vyakutenga, kaha eji kuvizachisanga mangana akafwe vyuma vyakuyoya vyosena. (Samu 104:13-15; Hangai 2:8) MuMbimbiliya mwatwama mijimbu yayivulu yize yasolola omu Yehova azachishilenga vyuma kanevi atenga mangana akafwe vatu jenyi mujila yakukomwesa.

² Chakutalilaho, Yehova ahanyinenga vaIsalele mana hamyaka 40 omu vapwile nakutambuka mupambo. (Kulo. 16:35) Ngocho “kavakalikijile chuma numba chimweko.” (Nehe. 9:20, 21) Kaha nawa avulishile maji atuliwe wakushishika kuhichila muli kapolofweto Elisha. Echi chakafwile ou tuliwe afwete mikuli apwile nayo nakupwa najimbongo jakulikafwa najo namwanenyi. (Vamya. 2, 4:1-7) Yehova akafwile nawa Yesu alise vatu, nakuvahana jimbongo mujila yakukomwesa.—Mateu 15:35-38; 17:27.

3. Vyuma muka natushimutwila muchihande chino?

³ Yehova atachikiza okwo kwatwama luheto luze lunahase kukafwa vyuma vyakuyoya atenga. Chipwe ngocho, asaka vangamba jenyi  vazachise luheto lwavo hakukundwiza mulimo lili nakuzata liuka lyenyi. (Kulo. 36:3-7; tangenu Vishimo 3:9.) Mwomwo ika Yehova asakila tumuhane mawana kuvyuma vize vyafuma kuli ikiye? Vangamba jaKalunga vakushishika kushikulu vakundwijilenga ngachilihi mulimo waYehova? Liuka lyaYehova makumbi ano lyeji kuzachisanga ngachilihi jimbongo tweji kuhananga? Vihula kanevi navavikumbulula muchihande chino.

4. Nge natukundwiza mulimo waYehova kaha natusolola ika?

⁴ Tweji kuhananga Yehova mawana hakusolola kusakwilila chetu kaha nawa mwomwo twamuzanga. Tweji kuwahililanga chikuma kachi nge natushinganyeka havyuma vize Yehova atulingila. Omu mukiko evwile naNdavichi omu vatu vakungulwile vyuma vyakuzachisa hakutunga tembele. Ambile ngwenyi vyuma vyosena twatwama navyo vyafuma kuli Yehova, kaha nawa vyuma tweji kumuhananga vyapwa vyenyi.—Tangenu Mijimbu 1, 29:11-14.

5. Visoneka vyasolola ngachilihi nge kuhana mawana yapwa hijila yakulemeselamo Yehova?

⁵ Kuhana mawana nawa yapwa hijila yakulemeselamo Yehova. Kaposetolo Yowano evwile vangamba jaYehova vamwilu muchakumwenesa vamumwenesele navahanjika ngwavo: “Ove Yehova Kalunga ketu, ove watamo kutambula upahu nakavumbi nangolo, mwomwo ove yove watangile vyuma vyosena, kaha mwomwo mukiko mwaya muchima wove, shikaho vyapwileko kaha nawa wavitangile.” (Kuso. 4:11) Hakuwana nge Yehova atamo kumuhana kavumbi nangolo, chasolola nge atamo kumuhana mawana amwaza akufuma kumuchima. Yehova alwezele vaIsalele kuhichila muli Mose ngwenyi valingenga viwanyino katatu hamwaka. Halwola vapwilenga kuze kuviwanyino vaIsalele kavatelelele kusoloka “mavokovoko kumeso aYehovako.” (Lushi. 16:16) Namakumbi ano nawa, kuhana mawana akukundwiza mulimo vali nakuzata muchihanda chaliuka lyaYehova chahano hamavu cheji kusololanga nge tuli nakulemesa Yehova.

6. Mwomwo ika kuhana chapwila changanyo kuli etu? (Talenu muvwimbimbi wakulivanga.)

⁶ Kuhana cheji kutunganyalisanga. Shikaho chapwa chamwaza kupwa tuvaka-kuhana kuhambakana kupwa tuvaka-kutambula kaha. (Tangenu Vishimo 29:21.) Achishinganyekenu mwana ali nakuhana chisemi chenyi wana hajimbongo jize amuhananga uze chisemi. Twafwelela ngwetu ou chisemi mwasakwilila chikuma. Kaha nawa mwana uze ali nakuzata upayiniya oku ali nakutwama hembo navisemi jenyi nahase kulandako vyuma vimwe vize vili nakusakiwa hembo. Numba tuhu visemi kaveshi kusaka alinge vyuma kanako, oloze navawahilila mwomwo yapwa hijila yize mwana eji kusolwelangamo kusakwilila havyuma veji kumulingilanga visemi jenyi. NaYehova nawa ejiva ngwenyi kumuhana mawana kuluheto lwetu luze atuhana nachitunganyalisa.

7, 8. Vatu jaYehova vakushikulu vatuhana chakutalilaho muka chakuhana mawana akuzachisa (a) kumulimo umwe uze unakusakiwa? (b) kumilimo yayivulu yakulisezaseza?

⁷ Visoneka vyasolola nge kushikulu vangamba jaKalunga vahanyinenga mawana. Shimbu jimwe vahanyinenga wana mangana vauzachise kumulimo umwe uze wasakiwile. Chakutalilaho, Mose alwezele vatu vakungulule wana mangana vatungise tavanaku, kaha nawa omu mukiko alingile Mwangana Ndavichi omu atungile tembele. (Kulo. 35:5; Miji. 1, 29:5-9) Mulwola lwaMwangana Yehowashe, vapilishitu vazachishile jimbongo jize vakungulwile vatu mangana vatungulule zuvo yaYehova. (Vamya. 2, 12:4, 5) Omu vandumbwetu muchikungulwilo chavaka-Kulishitu vakulivanga, vavalwezele ngwavo vandumbwavo vali muzala yakalombolombo, “vafwililile kutuma vyuma vyakulikafwa navyo kuli vandumbwavo  vaze vatwaminenga muYuleya, kweseka nomu ahashilile mutu himutu.”—Vili. 11:27-30.

⁸ Halwola lweka nawa vatu jaYehova vahanyinenga jimbongo mangana vakafwe vandumbwavo vaze vapwile nakutwaminyina. MuJishimbi jaMose, vaLevi kavatambwile uswana ngana muze yalingilenga miyachi yikwavo yavaIsaleleko. Oloze vaIsalele vavahanyinenga wana wakusokesa mulikumi mangana uvakafwe hakuzata milimo yavo hatavanaku. (Kula. 18:21) Chochimwe nawa Yesu navaposetolo jenyi navakiko vanganyalile kuzumbu vavasolwelele kuli mapwevo “vaze vazachishilenga vyuma vyavo hakuvazachila.”—Luka 8:1-3.

9. Mawana vahanyinenga kushikulu vawawanyinenga kulihi?

⁹ Mawana tweji kuhananga tweji kuwawananga mujijila jakulisezaseza. Chakutalilaho, hakutunga tavanaku mupambo, vaIsalele pamo vakungulwile vyuma vafumine navyo muEjipitu. (Kulo. 3:21, 22; 35:22-24) Mulikulukaji lyamyaka lyakulivanga nawa, vaka-Kulishitu vamwe valanjishilenga upite wavo wakufwana nge, mande najizuvo kaha jimbongo vajinehelenga kuli vaposetolo. Ngocho vaposetolo vapangililenga jimbongo kana kuvatu vosena vaze vakalikijile. (Vili. 4:34, 35) Veka nawa valaminengako jimbongo mangana vahanenga wana wakukundwiza kumulimo waYehova. (Koli. 1, 16:2) Chikupu vene, vatu vakumiyachi yosena vihutu navapichi vahanyinenga mawana.—Luka 21:1-4.

10, 11. (a) Natulondezeza ngachilihi muchima wakuhana wavangamba jaYehova vakushikulu? (b) Mweji kwivwanga ngachilihi hakutokwa mwatwama nacho chakukundwiza mulimo waWangana?

¹⁰ Nayetu makumbi ano vanahase kutulweza tuhane mawana akuzachisa kumulimo umwe uze uli nakusakiwa. Chakutalilaho, nge chikungulwilo chetu chili nakusakiwa Zuvo yaWangana yayihya, chipwe nge Zuvo yetu yaWangana vali nakusaka kuyitungulula, kaha vanahase kutulweza tuhane mawana. Kaha nawa vanahase kutulweza tuhane mawana nge vali nakutungulula ofesi yamutango yize yatala hangalila yetu, chipwe kukundwiza kukunguluka changalila, chipwe mangana tukafwe vandumbwetu vali muponde yakulijila. Tweji kuhananga nawa wana wakukundwiza vaze vali nakuzata mulimo hachikota chetu nahajiofesi jamitango mukaye kosena. Mawana tweji kuhananga nawa eji kukafwanga vamishonali, navapayiniya vakulipwila navaze vali nakuzata mulimo wakutambwojoka. Twafwelela nawa ngwetu nachikungulwilo chenu nawa chalitomena kuhana jimbongo jakukundwiza kumulimo wakutunga jiZuvo jaKukunguluka Chachinene najiZuvo jaWangana, mangana vandumbwetu mukaye kosena vaze kaveshi najoko vanganyale.

¹¹ Tuvosena tunahase kukundwiza mulimo waYehova mumakumbi ano akukuminyina. Oloze katwasaka kulisolola kuvatu ngwetu tunahane wanako. Tweji kuhakanga jimbongo jetu muvikasha vize vyatwama muZuvo yaWangana chipwe kuutuma kuzachisa keyala yetu ya jw.org. Shimbu jimwe tunahase kushinganyeka ngwetu wana tunahane waundende chikuma kaha nevi nauzata vene vyauchi. Oloze twatela kutachikiza ngwetu mawana vali nakuzachisa muliuka eji kufumanga kuli vandumbwetu vakuhutwa vaze veji kuhananga tujimbongo twatundende. Vandumbwetu kuhakilako navaze vatwama mumafuchi akuhutwa vakwechi muchima ngana uze vapwile nawo vandumbwetu vamuMasetonya vaze vapwile ‘nauhutu waunene’ oloze valembelelelenga lika mangana ngwavo vapwenga nakutokwa chakuhananga wana, kaha valingile ngocho namuchima wakusuuluka.—Koli. 2, 8:1-4.

12. Liuka lyetu lyeji kuzachisanga ngachilihi mawana?

¹² Lizavu Lyakutwaminyina lyeji kufwilanga kupwa lyakushishika, kaha nawa lyakuzangama hakuzachisa kanawa jimbongo jaliuka. (Mateu 24:45) Jimbongo jize veji kutambulanga veji  kujizachisanga kanawa kweseka navyuma vili nakusakiwa. (Luka 14:28) Kushikulu, tuselwa vaze vahanyinenga mulimo wakulama jimbongo, vakavangijilenga jindongi mangana vajizachise mujila yamwaza. Chakutalilaho, Ezela akindulukile kuYelusalema namawana aze vamuhanyine kuli mwangana wavaPeleja. Wana kana wapwile ulu, palata navyuma vyeka vyandando yayinene vize vyafwikile jimbongo jakuhambakana hajimiliyoni $100 (U.S.) kweseka nakulava chamakumbi ano. Ezela amwene eji jimbongo kupwa mawana aYehova amalemu, ngocho awalamine kanawa kuchina nawalyenyeka omu apwile nakutambuka mujila. (Ezela 8:24-34) Kaposetolo Paulu naikiye atambwile mawana akukafwa vandumbwenyi muYuleya. Ngocho akavangijile jindongi mangana vaze vahanyinenga mulimo wakupangila wana kana valinge “vyuma vyosena nakashishi, keshi kumeso aYehova kahako, oloze nakumeso avatu nawa.” (Tangenu Wavaka-Kolinde 2, 8:18-21.) Ngana mwaEzela naPaulu, naliuka lyetu makumbi ano lyeji kukavangizanga jindongi hakuzachisa mawana aze veji kuhananga vandumbwetu.

13. Mwomwo ika liuka linalumwinako jila yakuzachilamo milimo mumyaka yakalinwomu?

¹³ Tuchitalenu hachakutalilaho chino. Tanga yinahase kwalumunako jila veji kuzachishilangamo jimbongo javo kuchina navazachisanga jimbongo jajivulu kuhambakana jize vali najo nakwingila jino mumikuli. Chipwe vanahase kukehesako vyakulandalanda mangana vazate chikuma milimo yaYehova. Naliuka lyaYehova mukiko lili nakulinga. Mumyaka yakalinwomu, muliuka munapunga milimo yakulisezaseza, ngocho vanazachisanga jimbongo jajivulu kuhambakana jize vanahanenga vatu. Shikaho ngana mwatanga yize nayalumunako jila yakuzachishilamo jimbongo, naliuka nawa lili nakwalumunako jijila jakuzachilamo mangana lihone kuzachisa jimbongo jajivulu nakwashiwisako jijila jakuzachilamo milimo mangana milimo navazata yitenga mujimbongo jize mweji kuhananga.

14-16. (a) Uno mawana mweji kuhananga vali nakuwazachisa kumilimo muka? (b) Munakunganyala ngachilihi kumawana kana?

¹⁴ Vangamba jaYehova vavavulu vaze vanashimbula mumuchano vali nakuhanjikanga ngwavo, makumbi ano kulya chakushipilitu chinalisale chikuma kuhambakana muze chapwile kunyima. Kalinwomu vene ngana twaputukanga kuzachisa keyala ya jw.org na JW Broadcasting. Kaha nawa Mbimbiliya yaVisoneka vyaKaye Kakahya yili jino mumalimi amavulu. Mumwaka wa 2014 na 2015, kukunguluka chamafuchi amavulu chize chapwile namutwe wakwamba ngwavo “Twalenuho Lika Kutondanga Chatete Wangana waKalunga,” chapwililile muvivaza vyavinene vyakuhemena mujinganda  14 mukaye kosena. Vosena vaze vapwileko vawahililile chikuma.

¹⁵ Vandumbwetu vavavulu veji kusakwililanga chikuma havyuma vali nakunganyala muliuka lyaYehova. Chakutalilaho, vapwevo nalunga vaze vazachila mulifuchi lyamuAsia vambile ngwavo: “Hakuwana nge twazachila munganda yayindende yatwamina kwakusuku nambaka, ngocho tweji kwivwanga uli nakuvulyama vyuma vyamwaza ali nakulinga Yehova. Oloze omu tweji kutalanga jivindiyo jaha JW Broadcasting tweji kumonanga jino ngwetu tuli hamwe navandumbwetu vamukaye kosena. Navandumbwetu vosena mukiko veji kwivwinga. Veji kwambanga ngwavo, nge vanakumisa kutala vindiyo ya JW Broadcasting veji kwivwanga jino nge vali nakulikata chikuma naLizavu Lyakutwaminyina. Shikaho makumbi ano vapwa vakuwahilila hakupwa muchihanda chaliuka lyaKalunga.”

¹⁶ Kuli nakusakiwa jiZuvo jaWangana 2,500 mukaye kosena. Jeka nawa jili nakusakiwa kujitungulula. Omu vandumbwetu muHonduras vaputukile kuzachisa Zuvo yavo yaWangana yayihya, vambile ngwavo: “Twawahilila chikuma hakupwa mutanga yaYehova yamukaye kosena nakulivwisa kuwaha hakupwa navandumbwetu vaze nawa vanatukafwe tupwenga naZuvo yaWangana yize katwashinganyekele ngwetu natukapwa nayoko.” Vandumbwetu vavavulu vanahanjikanga mwomumwe omu vanatambulanga jiMbimbiliya namikanda yetu yize vanakwalumunanga mumalimi akulisezaseza. Veka nawa vanahanjikanga mazu kana hanyima yakuvakafwa nge vanahichi muukalu wakulijila chipwe hakumona mihako yamwaza yize yeji kufumanga hakuzata mulimo wakwambulula kuvihela vyasanga vyavatu vavavulu chipwe hakwambulwila kuvihela vyasanga vyamungalila yavo.

17. Tunejiva ngachilihi ngwetu Yehova ali nakukafwa liuka lyenyi makumbi ano?

¹⁷ Vatu vavavulu mukaye, veji kulikomokelanga hakumona milimo tuli nakuzata kuzachisa kaha mawana. Mukulwane umwe wahakapani yayinene ejile nakutala chihela chetu chakupulitila mikanda, kaha alikomokele chikuma hakutachikiza ngwenyi milimo yosena veji kuyizatanga kuli vatu vakulisuula, kaha nawa kuzachisa mawana akulisakila chakuzeneka liuka kuzachisako jila yeka yakuwanyinamo jimbongo. Ambile ngwenyi jila tweji kuzachilangamo yayikalu chikuma. Mazu ahanjikile amuchano. Mwomwo nayetu twatachikiza ngwetu tweji kuzatanga milimo kana mwomwo yakutukafwa kushipilitu yajila yaYehova.—Yopa 42:2.

18. (a) Nganyo muka yeji kufumanga hakukundwiza milimo yaWangana? (b) Natunangula ngachilihi vana vetu navaze vavahya mangana vamone kulema chakuhananga mawana?

¹⁸ Yehova atuvumbika hakutuhana lisesa lyakukundwiza milimo yenyi makumbi ano. Atulweza ngwenyi nge natukundwiza Wangana, kaha mwatukisula. (Mala. 3:10) Amba ngwenyi ou mwahana nakusuuluka mwafukilanga. (Tangenu Vishimo 11:24, 25.) Kuhana nawa chapwa chamwaza mwomwo “cheji kunehanga kuwahilila chikuma kuhambakana kutambula.” (Vili. 20:35) Vilinga nahanjikiso yetu vyatela kuhana chakutalilaho kuli vana vetu navaze vavahya mumuchano mangana vamone kulema chakuhananga mawana nomu navanganyala hakulinga ngocho.

19. Chino chihande chinamikafwe ngachilihi?

¹⁹ Vyuma vyosena twatwama navyo vyafuma kuli Yehova. Shikaho kumuhana mawana kuvyuma vize vyafuma kuli ikiye nachisolola nge twamuzanga kaha nawa twasakwilila havyuma vyosena vize atulingila. (Miji. 1, 29:17) Omu vatu vakungulwile wana wakuzachisa hakutunga tembele, “vawahililile hakuhana awa mawana akulisakila mwomwo vawahanyine kuli Yehova namichima yavo yosena.” (Miji. 1, 29:9) Shikaho nayetu tulivwisenu kuwaha kuhananga Yehova mawana kuvyuma vize vyafuma kuli ikiye.