PAYINIYA umwe walijina lyaSylviana uze ali namyaka yakusemuka yamuji 20 ambile ngwenyi, “Omu ngwatangilenga mijimbu yamasepa jami vaze vayile nakwambulwila kuze kwasakiwilenga vapayiniya, changulishile nayami ngufwile kuya nakuzachilako.” Ambile nawa ngwenyi, “Oloze ngwevwilenga woma mwomwo ngwashinganyekele ngwami kangwatelemo kuya nakuzachila kuze kuli nakusakiwa vaka-kwambululako.”

Kutala nayenu mweji kwivwanga nganomu evwile Sylviana tahi? Kutala nayenu mwafwila kuya nakwambulwila kuze kuli nakusakiwa vaka-kwambulula Wangana, oloze mweji kuhuhwasananga ngwenu kamweshi kuhasa kutesamo mulimo kanako tahi? Nge mukiko, kaha mwatela kumika. Yehova nakafwe vandumbwetu vavavulu vahonese ukalu uze wasakile kuvahonesa kuya nakuzachila kweka. Tutalenu omu Yehova nakafwenga vaze vanazachilanga mulifuchi lyaMadagascar, lize lyapwa litungu lyalinene muAfrica.

Hamyaka 10 yinahichimo, vaka-kwambulula vatwima navapayiniya 70 vakufuma kumafuchi 11, * vanezanga nakuzachila mulifuchi kaneli lyamuAfrica muze mwatwama vatu vavavulu vaze vamona Mbimbiliya kupwa yayilemu. Kaha nawa vaka-kwambulula vamulifuchi kana navakiko vanalisuulanga kuya nakutandakanyisa mujimbu waWangana mulitungu kana. Tuchishimutwilenuko hali vatu vamwe.

Louis napuwenyi Perrine vamyaka yakusemuka yamuji 30, vafumine kuFrance nakuya kuMadagascar. Hamyaka yayivulu, vashinganyekelenga vyakuya nakwambulwila kulifuchi lyeka, oloze Perrine apwile namichima yivali. Ambile ngwenyi: “Ngwevwilenga woma kuya kuchihela chaungeji. Kangwasakile kuseza vausoko wetu, navandumbwetu muchikungulwilo, nazuvo yetu nachiyoyelo chakwimbo lyetuko. Echi chikiko chuma chachinene chasakile kunguhonesa kuya nakwambulwila kulifuchi lyeka.” Kuheta mu 2012, Perrine ahamukile ngocho ikiye nalunga lyenyi vayile kuMadagascar. Kutala veji kuliveyanga havyuma vasakwile tahi? Ambile ngwenyi, “Kumona omu Yehova natukafwenga mukuyoya chetu, chinazamisa lufwelelo lwetu.” Louis nawa ambile ngwenyi, “Twawahililile chikuma omu vilongesa vyetu 10 vejile kuchilika chaKwanuka Kufwa chaMwata. Chilika kana chapwileko mumwaka watete twahetele muMadagascar.”

 Vyuma muka vyavakafwile vatwaleho kuzata mulimo wavo nomu wavasolokelele ukalu? Valombele Yehova avahane ngolo mangana vapwenga vakumika. (Fwili. 4:13) Louis ambile ngwenyi: “Yehova akumbulwile kulomba chetu, kaha atuhanyine ‘kuunda chaKalunga.’ Twashinganyekelenga kaha havyuma vyamwaza vize twalivwishilenga kuwaha. Kaha nawa masepa jetu vatutuminyinenga mijimbu hajishinga nakutusonekela mikanda yakutukolezeza tutwaleho kuzata natwima.”—Fwili. 4:6, 7; Koli. 2, 4:7.

Yehova akiswile Louis naPerrine hakumika chavo. Louis ambile ngwenyi: “MuOctober 2014, vatusanyikile kuShikola Yakulinangula Mbimbiliya yaVaka-Kulishitu Valimbata * yize yapwile muFrance. Kupwa kushikola kana chapwile hikutokwa chachinene chakufuma kuli Yehova.” Omu yakumine eyi shikola ava vapwevo nalunga vavatumine kuya nakuzachila cheka muMadagascar.

Omu Didier napuwenyi Nadine vamuFrance vayile kuMadagascar mu 2010, vapwile namyaka yakusemuka yamuji 50. Didier ambile ngwenyi: “Omu twapwile tuvakweze twazachilenga upayiniya oku nawa tuli navana vatatu. Omu vana vetu valingile hivanakolo lyehi, twashinganyekele vyakuya nakwambulwila kulifuchi lyeka.” Nadine naikiye ambile ngwenyi: “Hakavanga kangwasakile kuseza vana vamiko, oloze vakiko vatulwezele ngwavo: ‘Nge namuya nakuzachila kulifuchi lyeka, kaha natuwahilila chikuma.’ Mazu vahanjikile atukolezezele ngocho twayile. Numba tuhu twatwama kwakusuku navana vetu, oloze twawahilila mwomwo tweji kushimutwilanga navo mapapa kakavulu.”

Didier napuwenyi Nadine chavakaluhwilile kulinangula lilimi lyaMalagasy. Nadine ambile ngwenyi: “Hakuwana nge tunashinakajiwa, ngocho chapwa chachikalu kulinangula lilimi lyeka.” Vyuma muka vyavakafwile? Hakavanga vapwile muchikungulwilo chize chazachisa lilimi lyaFrench. Oloze kutwala muze vanungulukilile muchikungulwilo chize chazachisa lilimi lyaMalagasy. Nadine ambile ngwenyi: “Vatu vavavulu vaze twambulililenga vazangile chikuma kulinangula Mbimbiliya. Kakavulu vatusakwilililenga hakuvatambukila. Hakavanga chapwile kwijiva nge nguli nakulota. Ngwazanga kuzachila upayiniya mulifuchi kana. Nge kunachi ngweji kuhanjikanga mumuchima wami ngwami ‘chinawahe omu kunachi mangana ngulivwise kuwaha kwambulula.’”

Didier eji kusehanga hakwanuka omu aputukile kulinangula lilimi lyaMalagasy. Ambile ngwenyi: “Ngwatwaminyinyinenga vihande hakukunguluka oloze vyuma vakumbulwilenga vandumbwami kangwavivwishishilengako. Ngocho ngwambilenga kaha ngwami, ‘Twasakwililako mwane.’ Likumbi limwe omu ngwasakwililile ndumbwami wapwevo uze akumbulwile hakukunguluka, vandumbwami vaze vapwile mulizavu vangunyachililile nakungulweza ngwavo akumbulwile mwakuhenga. Shikaho ngwenyikile jino ndumbwami weka walunga uze pamo akumbulwile mwakwoloka.”

Hakukunguluka changalila chamu 2005, Thierry napuwenyi Nadia vatalile chimweso chakwamba ngwavo: “Pursue Goals That Honor God.” Mujimbu waChimoteu watwama muchimweso kana wavakwachile kumuchima,  ngocho vafwililile jino kuya nakuzachila kuze kwapwile nakusakiwa chikuma vaka-kwambulula Wangana. Thierry ambile ngwenyi: “Omu chakumine chize chimweso ngwayevetelele puwami oku vatu vachili nakusakwilila, nakumuhulisa ngwami, ‘Natuya nakuzachila kulihi?’ Puwami angukumbulwile ngwenyi nayikiye apwile navishinganyeka vyovimwe.” Nakushimbula chiku, vaputukile kuliwahisa mangana vayenga kulifuchi lyeka. Nadia ambile ngwenyi, “Twaputukile kulanjisa vikumba vyetu ngocho twasalile kaha navyuma vyavindende vyakuta mujingonga jiwana.”

Thierry naNadia vayile kuMadagascar mu 2006, kaha vaputukile kulivwisa kuwaha kuzata mulimo wakwambulula. Nadia ambile ngwenyi, “Vatu tweji kwambulilanga vapwa vamwaza michima ngocho tweji kuwahililanga.”

Omu mwahichile myaka 6, vaputukile kumona ukalu. Naye yaNadia, Marie-Madeleine uze apwile muFrance alimbukile, ngocho ahokokele livoko nakulikolesa kumutwe. Nadia nalunga lyenyi vamuhulishile numba nge mwetavila kwiza nakutwama navo kuMadagascar. Numba tuhu apwile namyaka yakusemuka 80, oloze etavilile kututuka. Kutala asuuluka kutwama mulifuchi lyeka tahi? Ambile ngwenyi: “Shimbu jimwe chapwa chachikalu kwijilila chiyoyelo chakulifuchi lyeka, oloze ngweji kwivwanga kuwaha hakutachikiza ngwami vandumbwami muchikungulwilo vanguzanga. Kaha nawa chuma cheji kungwivwisanga kuwaha chikuma shina kutachikiza ngwami vana vami vali nakutwalaho kuzata natwima mulimo wakwambulula mulifuchi kana.”

Riana ndumbwetu walunga uze ali namyaka yakusemuka yamuji 20, akolelele mungalila yaAlaotra Mangoro yize yatwamina kumututuko walifuchi lyaMadagascar. Alingilenga kanawa kushikola ngocho afwililile kuya kumashikola ahelu. Oloze omu aputukile kulinangula Mbimbiliya alumwine vishinganyeka vyenyi. Ambile ngwenyi: “Ngwafwililile kukumisa shikola, ngocho ngwashikile Yehova ngwami, ‘Nge nangukapasa vyeseko vyamakumishilo, kaha nangukaputuka kuzata upayiniya.’” Omu Riana akumishile shikola, ateselemo lushiko lwenyi. Ayile nakutwama nandumbwetu walunga uze apwa payiniya, kaha awanyine milimo yakuzata makumbi amwe muchalumingo nakuputuka kuzata upayiniya. Ambile ngwenyi: “Chuma ngwasakwile kulinga chapwile chamwaza chikuma mukuyoya chami.”

Chipwe ngocho, vausoko waRiana chavakaluhwilile kwivwishisa vyuma vyamulingishile ahone kuzata milimo yajimbongo jajivulu. Ambile ngwenyi: “Tata, natata wakanyike, nakaka vangushinjililenga nguyenga kumashikola ahelu. Oloze kangwasakile kulitwamina kuzata upayiniyako.” Nakushimbula chiku, Riana aputukile kushinganyeka kuya nakuzachila kuze kwapwile nakusakiwa vaka-kwambulula Wangana. Chuma muka chamulingishile apwenga navishingayeka kana? Ambile ngwenyi: “Veji vengilile muzuvo yetu, kaha vevile vyuma vyami. Echi changulingishile ngushinganyeka hamazu aYesu aze ahanjikile ngwenyi: ‘Lilunjikilenu luheto mwilu.’ Ngocho ngwashinganyekele kuzata nangolo mangana ngupwenga naluheto lwaluvulu lwakushipilitu.” (Mateu 6:19, 20) Riana ayile kungalila yakusulo kungalila yavyanga chikuma jikilomita kafwe 1,300 kufuma kuze apwile nakutwama. Kungalila kana kukiko kwatwama vatu vaze vahanjika lilimi lyaAntandroy. Mwomwo ika ayililile kungalila kana?

Kakweji umwe kunyima shimbu kanda veji vevenga vyuma venyi, Riana aputukile kulinangula Mbimbiliya namalunga vavali vaze vahanjika lilimi lyaAntandroy. Vamulwezele mijimbu yayivulu yavatu kana, ngocho ashinganyekele havatu vaze kanda vevwengangaho lyehi mujimbu waWangana waKalunga. Riana ambile ngwenyi, “Ngwalombele kuli Yehova angukafwe nguyenga kungalila yize yahanjika lilimi lyaTandroy.”

Kahomu ayile kuze kungalila, hahaze vene aputukile kumona ukalu. Kawanyine milimo yakuzatako. Lunga umwe amulwezele ngwenyi: “Mwomwo ika wejililile kuno? Vatu veji kufumanga kuno nakuya oku unafumu nakutonda milimo, keshi vatu kwiza kuno nakutonda milimoko.” Omu mwahichile vyalumingo vivali ayile kukukunguluka changalila chakuzeneka jimbongo, kaha alizakaminyine okwo mwakawana jimbongo jakukafwetela kuminyau mangana akakinduluke. Halikumbi lyamakumishilo lyakukunguluka, ndumbwetu umwe walunga amuhanyine jimbongo. Jimbongo kana japwile jajivulu, jize jamukafwile akinduluke nakukaputuka kusekasana. Aputukile kulanjisa yogurt. Riana ambile ngwenyi: “Ngwamwene ngwami Yehova ali nakungukafwa. Ngocho ngwatwalileho kukafwa vatu vaze kanda valinanguleho lyehi vyaYehova.” Muchikungulwilo nawa mwapwilenga milimo yayivulu. Ambile nawa ngwenyi: “Ngwahanjikilenga vihande  vyaMbimbiliya mukamwihi mukamwihi. Chikupu vene Yehova apwile nakungunangula kuhichila muliuka lyenyi.” Namakumbi ano Riana achili lika nakwambulula mujimbu waWangana kuvatu vahanjika lilimi lyaTandroy kungalila kana.

Yehova atufwelelesa ngwenyi, “weshowo mwakasaka kisu hamavu navakamukisula kuli Kalunga wamuchano.” (Isa. 65:16) Kachi nge natuzata nangolo tuhonese ukalu mangana tutwaleho kuzata mulimo wakwambulula, kaha Yehova mwatukisula. Tuchihunananenu hali Sylviana uze twavulukanga kumaputukilo achino chihande. Ashinganyekele ngwenyi keshi kuhasa kuya nakuzachila kuze kuli nakusakiwa vaka-kwambululako. Mwomwo ika ashinganyekele ngocho? Alumbunwine ngwenyi: “Apwa chitonji, lihinji lyenyi lyachimoswe lyapwa lyalihi, ngocho eji kuzeyanga washi.”

Kuheta mu 2014 Sylviana ayile naSylvie Ann payiniya wapwevo wakanyike wamuchikungulwilo chavo, kungalila yakwakusuku kafwe jikilomita 85. Chamokomoko naukalu, Sylviana ateselemo vyuma afwililile kulinga mukuyoya chenyi, kaha Yehova amukiswile. Sylviana ambile ngwenyi, “Omu mwahichile mwaka umwe, Doratine chisemi wapwevo uze ngwanangwilenga Mbimbiliya vamumbapachishile hakukunguluka chachihanda.”

Nganomu tunatange mijimbu yavandumbwetu vakushishika vaze vanazachilanga kuze kuli nakusakiwa vaka-kambulula wangana, nayetu nge natukilikita nangolo mangana tuhonese ukalu nakuzata chikuma mumulimo wakwambulula, kaha Yehova mwatesamo mazu enyi aze alweza vangamba jenyi ngwenyi, “Nangukujikijisa, nangukukafwa.” (Isa. 41:10) Echi nachilingisa usoko wetu naYehova uzame. Kaha nawa nge natulisuula kuzachila mungalila yetu chipwe kuya kulifuchi lyeka, nachitukafwa tulizange kukazata kanawa mulimo kana mukaye kakahya. Didier uze twavulukanga ambile ngwenyi, “kuzachila kuze kuli nakusakiwa vaka-kwambulula makumbi ano nachikatukafwa tukatesemo ou mulimo kulutwe.” Shikaho tuli nakumilomba muvosena mufwile kuzata ou mulimo.