1. Mwomwo ika lwola tunakuyoyelamo lunapu lwakulipwila?

TULI nakuyoyela mulwola lwakulipwila. Ngana muze yahanjikilile chimweza Mbimbiliya, Yehova ali nakukungulula “liyongomena lyalinene . . . [lyavatu] vakumafuchi osena, nakumiyachi yosena, nakuvatu veka naveka vosena, nakumalimi osena.” Vatu vaze ali nakukungulula vapwa “lifuchi lyangolo” vakuzomboka hajimiliyoni 8, vaze “vali nakumuzachilanga mulimo wajila musana naufuku.” (Kuso. 7:9, 15; Isa. 60:22) Eyi zangi vanakusolola vatu makumbi ano yakuzanga Kalunga navakwavo vatu yinapu yakulipwila mwomwo kanda lyehi yisolokengaho.

2. Zangi muka vatwama nayo vatu vaze vasosoloka kuli Kalunga? (Talenu muvwimbimbi wakulivanga.)

² Visoneka nawa vyahanjikile chimweza ngwavyo, mumakumbi akukuminyina vatu vaze vasosoloka kuli Kalunga navakasolola zangi yakulizanga vavene. Kaposetolo Paulu asonekele ngwenyi: “Hamakumbi akukuminyina . . . , vatu navakapwa vaka-kulizanga vavene, vaka-kuzanga jimbongo, . . . vaka-kuzanga viseke muchishishisa chakuzanga Kalunga.” (Chimo. 2, 3:1-4) Zangi kaneyi yakulizanga mutu ivene yalihandununa  nazangi yize vatwama nayo vaka-Kulishitu vamuchano. Zangi kaneyi avulukile Paulu kayeshi kunehela vatu kuwahilila chamwenemweneko. Shikaho eyi zangi vatwama nayo vatu mukaye yikiko yalingisa ‘lwola tuli nakuyoyelamo kupwa lwalukalu.’

3. Vyuma muka natushimutwila muchihande chino, kaha mwomwo ika?

³ Paulu amwene ngwenyi zangi yakulizanga mutu ivene nayikaneha ukalu kuli vaka-Kulishitu. Ngocho avahuhumwine ngwenyi “vatalisenga nyima” kuli vaze veji kusololanga zangi kana. (Chimo. 2, 3:5) Chipwe ngocho, chinahase kupwa chachikalu kulihenda kuvatu kana. Jino tunahase kulihenda ngachilihi kuvilinga vyamukaye mangana twivwise kuwaha Yehova Kalunga wazangi? Tuvangilenu kuhanjika chihandwa chatwama hazangi yakuzanga Kalunga nayize valumbununa hali WaChimoteu 2, 3:2-4. Kutachikiza chihandwa kana nachitukafwa twijive zangi yize twatela kusolola yize yeji kunehanga kuwahilila chamwenemwene.

4. Mwomwo ika natwambila ngwetu mutu kulizanga ivene kachapwa chakuhengako?

⁴ Kaposetolo Paulu asonekele ngwenyi hamakumbi akukuminyina “vatu navakapwa vaka-kulizanga vavene.” Uno chapwa chakuhenga kulizanga etu vavene tahi? Nduma, kachapwa chakuhengako, mwomwo naYehova kachimona kupwa chakuhengako. Yesu ambile: “Zangenunga vakwenu nganomu mwalizanga enu vavene.” (Mako 12:31) Nge katwalizanga etu vaveneko, kaha katweshi kuhasa kuzanga vakwetuko. Visoneka nawa vyamba ngwavyo: “Malunga nawa vatela kuzanganga mapwevo javo nganomu vazanga mijimba yavo. Lunga uze azanga pwevo lyenyi alizanga ivene, mwomwo kakweshi mutu ahunga mujimba wenyiko, oloze eji kuulisanga nakuuzakamanga.” (Efwe. 5:28, 29) Shikaho chapwa chakutamo mutu kulizanga ivene.

5. Namutachikiza ngachilihi ngwenu mutu alizanga chikuma ivene?

⁵ Zangi yakulizanga mutu ivene vavuluka hali WaChimoteu 2, 3:2, kayapwa zangi yamuchanoko, oloze yapwa yalifwi. Vatu vaze valizanga chikuma vavene, veji kulishinganyekanga chikuma kuhambakana omu vatela kushinganyeka. (Tangenu Wavaka-Loma 12:3.) Lwola lwosena veji kulizakamanga kaha vavene nakuhona kuzakama vakwavo. Kachi nge vyuma vimwe vinalimbenje, vafwila kaha kuhananga vakwavo milonga. Vatu kana kavapwa vakuwahililako.

6. Vatu vaze vazanga Kalunga veji kulinganga ika?

⁶ Vatu vaze valinangula chikuma Mbimbiliya vamba ngwavo, kaposetolo Paulu avulukile chatete zangi yakulizanga mutu ivene mwomwo vilinga vyeka vyavipi vyosena vize vinalisale mumakumbi ano akukuminyina vyafuma kuzangi kana. Oloze vatu vaze vazanga Kalunga veji kusololanga mihako yeka yakulipwila. Mbimbiliya yamba ngwayo, zangi yakuzanga Kalunga yatambukila hamwe nakuwahilila, nakuunda, nakutalilila chikoki, nalikoji, nakuwaha, nalufwelelo, nakuvova, namuchima wakulikanyisa. (Ngale. 5:22, 23) Muka-kwimba jisamu asonekele ngwenyi, “vawahilila vatu vaze vakwechi Kalunga kavo Yehova.” (Samu 144:15) Yehova apwa Kalunga wakuwahilila, kaha navatu jenyi nawa vapwa vakuwahilila. Vatu vaze valizanga vavene vazanga kaha vakwavo vavakafwe, oloze vangamba jaYehova vazakama vakwavo nakufwila kuvakafwa.—Vili. 20:35.

7. Vihula muka navitukafwa twijive nge twazanga chikuma Kalunga?

⁷ Natutachikiza ngachilihi ngwetu tunaputuka kulizanga chikuma etu vavene muchishishisa chakuzanga Kalunga? Tuchitalenu hamazu atwama hali Wavaka-Fwilipi 2:3, 4. Vasonekaho ngwavo: “Kanda kulinga chuma numba chimwe namuchima wakulikindukilako, chipwe namuchima wakulitohwesa chamokomokoko, oloze linyisenunga nakumona vakwenu ngwenu  vamihambakana enu. Kanda kuhakanga kulutwe vyuma mwasaka enu kahako, oloze navyuma vasaka vakwenu nawa.” Twatela kulihulisa etu vavene ngwetu: ‘Uno ngweji kukavangizanga mazu kana mukuyoya chami tahi? Kutala ngwafwila kulinga mwaya muchima waKalunga tahi? Uno ngwafwila kukafwa vandumbwami muchikungulwilo navatu ngweji kuwananga muwande tahi?’ Kachapwa chachashi kukafwa vakwetuko mwomwo chasakiwa kulisuula nakuzata nangolo. Chipwe ngocho, twapwa tuvakuwahilila hakulinga chuma kana mwomwo twatachikiza ngwetu Mwata wakulitulaho mwatwivwila kuwaha.

8. Zangi yakuzanga Kalunga yinalingisa vatu vamwe valinge ika?

⁸ Zangi yakuzanga Kalunga yinalingisa vatu vamwe vaseze milimo yajimbongo mangana vazachile chikuma Yehova. Ericka, wamuUnited States uze apwa ndotolo, asakwile kuzata upayiniya muchishishisa chakuhaka milimo yenyi kulutwe. Ikiye nalunga lyenyi vanazachilanga mumafuchi akulisezaseza. Ambile ngwenyi: “Vyuma tunalivwisanga kuwaha hakuzachila mujingalila muze vahanjika malimi eka, nakupwa namasepa vavahya vinatulingisa tuwahilile chikuma mukuyoya chetu. Numba tuhu nguchili lika nakuzata mulimo waundotolo, oloze kuzata chikuma mulimo wakushipilitu nakukafwa vandumbwami muchikungulwilo chikiko chinangunehela kuwahilila chamwenemwene.”

9. Mwomwo ika kuzanga chikuma jimbongo kachaneha kuwahililako?

⁹ Paulu asonekele ngwenyi vatu navakapwa “vaka-kuzanga jimbongo.” Myaka yimwe kunyima, omu payiniya umwe muIreland apwile nakwambulila lunga umwe vyaKalunga, uze lunga ambachile jimbongo musweko yenyi nakulitukwojola ngwenyi, “Ou ikiye kalunga kami!” Numba tuhu vatu vavavulu kaveshi kuhanjika hatoma ngwavo vasaka chikuma jimbongoko, oloze kaye kanazale navatu vazanga chikuma jimbongo. Shikaho Mbimbiliya yatuhuhumuna ngwayo: “Ou azanga palata keshi kukasuuluka napalatako, kahou azanga nawa luheto keshi kukasuuluka najimbongo mwawanako.” (Kwambu. 5:10) Vatu kana vafwila kupwa chikuma najimbongo jajivulu, kahechi chinahase kuvanehela “makava amavulu.”—Chimo. 1, 6:9, 10.

10. Vyuma muka yahanjika Mbimbiliya kutalisa kuluheto nauhutu?

¹⁰ Tuvosena twasaka kupwa najimbongo, mwomwo japwa mukingo. (Kwambu. 7:12) Kutala mutu nahase kupwa wakuwahilila nge mwapwa kaha najimbongo jakutamo jize najimukafwa mukuyoya tahi? Eyo. (Tangenu Muka-kwambulula 5:12.) Angule mwanaYake asonekele ngwenyi: “Kanda naunguhutwisa, chipwe kunguhetesa luhetoko. Ngulyenga kaha vyakulya nguli navyo.” Tunejiva ovyo ahanjikilile ngwenyi kasakile kupwa chihutuko. Ambile ngwenyi uhutu unahase kumulingisa evenga, nakwivwisa jino Kalunga kupihya. Kaha mwomwo ika kalombele ngwenyi apwenga naluhetoko? Asonekele ngwenyi: “Kuchina omu nangwikuta nangukukana, nakwamba ngwami: ‘Yehova ikiye iyaze?’” (Vishi. 30:8, 9) Tunatachikiza ngwetu pamo nayenu mwatachikizako vatu vamwe vaze vazanga chikuma luheto kuhambakana Kalunga.

11. Mazu muka akuhuhumuna ahanjikile Yesu kutalisa kujimbongo?

¹¹ Vatu vaze vazanga jimbongo kaveshi kwivwisa Kalunga kuwahako. Yesu ambile ngwenyi: “Kakweshi ndungo mwahasa kuzachila vamyata vavaliko, mokomoko mwahunga umwe nakuzanga mukwavo, chipwe mwalipanjika naumwe nakulumbilisa mukwavo. Kamweshi kuhasa kuzachila Kalunga naLuheto hamweko.” Kaha ambile nawa ngwenyi: “Litwaminenu kulilunjikila luheto hano hamavu, haze hatwama shingwe natututu veji kulyanga luheto, haze hatwama nawa veji vaze veji kupupanga nakwiva. Oloze lilunjikilenu luheto mwilu muze kamweshi shingwe chipwe  tututu vakulya luhetoko, muze nawa veji kaveshi kupupa nakwivako.”—Mateu 6:19, 20, 24.

12. Uno kwashiwisako chiyoyelo chinahase kutukafwa ngachilihi tuzachile Kalunga? Hanenu chakutalilaho.

¹² Vatu vavavulu vamona ngwavo kwashiwisako chiyoyelo chavo cheji kuvalingisanga vapwenga vakuwahilila, nakuzachila kanawa Yehova. Jack, uze atwama muUnited States, alanjishile zuvo yenyi yayinene nakapani yenyi mangana azate kanawa upayiniya hamwe napuwenyi. Ambile ngwenyi: “Chapwile chachikalu kulanjisa zuvo yetu yaulangaji yize yapwililile kungalila yamwaza. Oloze hamyaka yayivulu omu ngwapwilenga nakuzata ngwejilenga hembo ngunapihilila mwomwo yaukalu ngwamwenenga kumilimo. Oloze pwevo lyami uze azachilenga upayiniya washimbu yosena apwilenga wakuwahilila lwola lwosena. Ambilenga ngwenyi, ‘Mukulwane wami wamilimo apwa kanawa chikuma!’ Hakuwana nge nayami jino ngwapwa ngupayiniya, tuvosena tweji kuzachilanga mutu youmwe Yehova.”

13. Vyuma muka navitukafwa twijive nge twazanga chikuma jimbongo?

¹³ Hakusaka tutachikize numba nge twazanga chikuma jimbongo nyi chiku, twatela kulihulisa vihula vino: ‘Kutala ngwetavila mazu yahanjika Mbimbiliya hajimbongo nakuwakavangiza tahi? Kutala ngwamona jimbongo kupwa jajilemu mukuyoya chami kuhambakana vyuma vyeka tahi? Uno ngwamona luheto kupwa lwalulemu kuhambakana usoko wami naYehova navakwetu vatu tahi? Kutala ngwafwelela ngwami Yehova mwanguzakama mukuyoya chami tahi?’ Twafwelela ngwetu mwatwalaho kukafwanga vaze vatalilila kuli ikiye.—Mateu 6:33.

14. Uno chapwa chakuhenga kulihizumuna tahi?

¹⁴ Nganomu vahanjikilile chimweza, vatu vavavulu makumbi ano vapwa “vaka-kuzanga viseke.” Ngana muze kachapwa chakuhenga mutu kulizanga ivene nakupwa najimbongo jakulikafwa najoko, nakulihizumuna nawa kachapwa chakuhengako. Yehova asaka twazane mukulihizumuna chize nachitulingisa tuwahilile. Mbimbiliya yakolezeza vangamba jaKalunga vakushishika ngwayo: “Lyakonga vyakulya vyove nakuwahilila, nwakonga vinyo vyove namuchima wakusuuluka.”—Kwambu. 9:7.

15. Uno kuzanga chikuma viseke chalumbununa ika?

¹⁵ Mukanda WaChimoteu 2, 3:4 wahanjika hali vatu vaze vazanga viseke muchishishisa  chakuzanga Kalunga. Vesi kana kayahanjika ngwayo vatu navakazanga chikuma viseke kuhambakana Kalunga, kwijiva nge Kalunga vamuzanga chachindende kahako. Oloze yamba ngwayo, “muchishishisa chakuzanga Kalunga.” Mutu umwe alinangula chikuma asonekele ngwenyi: “Eyi vesi yasolola hatoma ngwayo vatu kana kavazanga Kalunga numba chachindendeko.” Awa mazu anahase kukafwa vatu vaze vazanga chikuma viseke. Mazu akwamba ngwavo “vaka-kuzanga viseke” atalisa kuvatu vaze vatanguka “naviseke vyamukuyoya.”—Luka 8:14.

16, 17. Yesu atusela chakutalilaho muka kutalisa kukulihizumuna?

¹⁶ Shimbu jimwe nawa Yesu alihizumwinenga. Chakutalilaho, ayile “kuchifupawenga” “[naku]chiwanyino chakulya chachinene.” (Yowa. 2:1-10; Luka 5:29) Omu apwile kuchifupawenga alumwine meya kupwa vinyo, mwomwo vinyo vyakumine. Halwola lukwavo ahuhumwine vaze vamutolekelenga ngwavo afwa hakulya nakunwa.—Luka 7:33-36.

¹⁷ Chipwe ngocho, Yesu kandupukilile muvisekeko. Oloze ahakile Yehova kulutwe nakufwila kukafwa vatu. Hakusaka vatu vakayoye haya myaka yosena, alisuwile kufwa hachitondo chakumuyanjishila. Yesu alwezele vaka-kumukavangiza ngwenyi: “Mwawahilila enu navasaula kuvatu nakumiyanjisa nakumivangijikila vyuma vyavipi vyeka navyeka vyosena mwomwo yayami. Wahililenu, lisambenu, mwomwo fweto yenu yinapu yayinene mwilu, mwomwo mukiko vene vayanjishile navapolofweto vaze valivangile kupwako shimbu kanda enu muchisemuke.”—Mateu 5:11, 12.

18. Vihula muka navitukafwa tulikekese twijive numba nge twazanga chikuma viseke?

¹⁸ Natuhasa kulikekesa ngachilihi tumone numba nge twazanga chikuma viseke? Twatela kulihulisa ngwetu: ‘Uno ngwamona kukunguluka nakuya mumulimo wamuwande kupwa vyavilemu kuhambakana kulihizumuna tahi? Kutala ngweji kulikanyisanga kulinga vyuma vimwe mwomwo yakusaka kuzachila Kalunga tahi? Kutala ngweji kushinganyekanga omu Yehova amona vyakulihizumuna ngweji kusakulanga tahi?’ Kachi nge twazanga Kalunga, kaha katweshi kulihenda kaha kuvyuma vize twatachikiza ngwetu ahungako oloze navize tweji kushinganyekanga ngwetu vinahase kumwivwisa kupihya.—Tangenu Mateu 22:37, 38.

19. Vatu muka vaze kaveshi kukapwa vakuwahilila mukuyoya chavoko?

¹⁹ Satana nayanjisanga vatu hamyaka 6,000, oloze jino kalinwomu vamunongese. Kaye kosena kanazale navatu vaze valizanga chikuma vavene, nakuzanga chikuma jimbongo naviseke. Vatu kana vasaka kaha kulinganyalisa vavene, nakusaka kulinga kaha vyuma vafwila mukuyoya. Chipwe ngocho vatu kana kaveshi kukapwa vakuwahilila mukuyoya chavoko. Oloze muka-kwimba jisamu asonekele ngwenyi: “Awahilila mutu uze veji kukafwanga kuli Kalunga kaYakova, uze atalilila muli Yehova Kalunga kenyi.”—Samu 146:5.

20. Kuzanga Kalunga chinamilingisa ngachilihi kupwa muvakuwahilila?

²⁰ Vatu jaYehova vakiko vazanga chikuma Kalunga, kaha mwaka himwaka vatu kana vanakuvulilako lika. Echi chinakulumbununa nge Wangana waKalunga uli nakuyula, kaha kalinwomu unehe vyuma vyamwaza hano hamavu. Kuwahilila chamwenemwene cheji kufuma hakulinga vyuma asaka Kalunga nakutachikiza ngwetu tuli nakwivwisa kuwaha Mwata wakutenga chosena. Kaha vaze vazanga Yehova navawahililanga haya myaka yosena! Muchihande nachikavangizaho, natushimutwila havyuma vyavipi vyeji kwizanga mwomwo yakupwa nazangi yakulizanga mutu ivene, nomu vyuma kana vyalihandununa navilinga vyamwaza vatwama navyo vangamba jaYehova.