1. Uno Ndavichi evwilenga ngachilihi hali Yehova, kaha echi chamulingishile alinge ika?

MWANGANA NDAVICHI asonekele ngwenyi: “Yehova apwa wamunene, kaha atamo kumwalisa.” (Samu 145:3) Chikupu vene Ndavichi azangile chikuma Yehova ngocho zangi kana yamulingishile alise Kalunga “mukachi kachikungulwilo.” (Samu 22:22; 40:5) Twafwelela ngwetu nayenu mwazanga Yehova, kaha mweji kwivwanga ngana muze evwile Ndavichi uze asonekele ngwenyi: “Ove Yehova Kalunga kasetu Isalele, vakwalisenga haya myaka yosena.”—Miji. 1, 29:10-13.

2. Uno tweji kwalisanga ngachilihi Yehova? (b) Ukalu muka veji kumonanga vatu vamwe, kaha vyuma muka natushimutwila?

² Jila yimwe tweji kwalishilangamo Yehova makumbi ano shina kukumbululaho nge tuli kukukunguluka chavaka-Kulishitu. Oloze vandumbwetu vavavulu cheji kuvakaluhwilanga. Numba tuhu vasaka kukumbululaho, oloze veji kwivwanga woma. Uno navahasa ngachilihi kuhonesa ukalu kana? Kaha vishina muka navitukafwa tuvosena mangana tukumbululenga mujila yize nayikolezeza vakwetu? Shimbu kanda tukumbulule evi vihula, tuchishimutwilenu havyuma viwana vize vyeji kutulingisanga tukumbulule hakukunguluka.

3-5. (a) Kweseka nomu vahanjika hamukanda WavaHepeleu 13:15, mwomwo ika tweji kukumbulwilanga hakukunguluka? (b) Uno tuvosena twatela kupwa nauhashi woumwe hakukumbulula tahi? Lumbununenu.

³ Yehova asaka tuvosena tumwalisenga. (Samu 119:108) Kukumbululanga hakukunguluka nachikiko chapwa kuhana Kalunga “chimuna wakuvatula wakumwalisa,” kaha kakweshi mutu nahase kutuhanyina chimuna kanako. (Tangenu WavaHepeleu 13:15.) Uno Yehova asaka tuvosena tumuhane wana wachimuna wakuvatula woumwe chipwe ngwetu tupwenganga nauhashi woumwe hakukumbulula tahi? Nduma.

 ⁴ Yehova atachikiza ngwenyi vatu vakwechi uhashi wakulihandununa handununa kaha nawa atachikiza vyuma tweji kuhitangamo, ngocho eji kwivwanga kuwaha hawana tweji kumuhananga kweseka nomwo tunahashila. Achishinganyekenu hamawana vamuhanyinenga vaIsalele aze etavililenga. VaIsalele vamwe vamuhanyinenga mwanamukoko chipwe pembe. Oloze vaze vapwile vakuhutwa vamuhanyinenga “tutela vavali chipwe vana vatukwilimba vavali.” Kaha kaIsalele uze ahonenenga kuhana tujila vavali, ahanyinenga “chimbwa chimwe chaunga wamwaza chakusokesa muvimbwa 10 vyalifwa,” kaha Yehova etavililenga wana kana. (Levi 5:7, 11) Shikaho, numba tuhu unga uze vahanyinenga wapwilenga wandando yayindende, oloze Yehova etavililenga wana kana, chikalu kaha nge wapwile “unga wamwaza.”

⁵ Namakumbi ano nawa, Kalunga ali nakulinga mwomumwe. Shikaho kasaka ngwenyi tuvosena tupwenganga nauhashi wakuhanjika ngana mwaApolo chipwe vaka-kuhanjika nakukunyula ngana mwaPauluko. (Vili. 18:24; 26:28) Oloze Yehova asaka tukumbululenga kweseka nauhashi wetu. Achishinganyekenu hali pwevo watuliwe uze ahanyine tujimbongo twachichele tuvali. Yehova amumwene kupwa wamulemu mwomwo ahanyine wana kweseka nomwo ahashililile.—Luka 21:1-4.

6. (a) Kweseka namukanda WavaHepeleu 10:24, 25, uno vishina veji kukumbululanga vandumbwetu vinahase kutukafwa ngachilihi? (b) Namusolola ngachilihi ngwenu mwamona vyuma veji kukumbululanga vakwenu kupwa vyavilemu?

⁶ Kukumbulula yapwa jila yakulikolezezelamo navakwetu. (Tangenu WavaHepeleu 10:24, 25.) Tuvosena tweji kwivwanga kuwaha kwivwilila kuvishina vyakulisezaseza veji kukumbululanga vakwetu hakukunguluka. Tweji kwivwanga kuwaha nge kanyike wamundende nakumbulula kanawa. Cheji kutukolezezanga nawa kachi nge ndumbwetu mwakumbulula nakuvuluka muchano wauhya uze nalinangula kalinwomu. Tweji kuwahililanga nawa hakumona vaze ‘navomika’ nakukumbululaho numba tuhu veji kwivwanga sonyi chipwe nge vali nakulinangula lilimi lyetu. (Teso. 1, 2:2) Uno natusolola ngachilihi ngwetu twamona kukilikita chavo kupwa chachilemu? Tunahase kulinga ngocho hakuvasangejeka hanyima yakukunguluka. Jila yikwavo shina yakukumbululaho nayetu nawa. Echi nachisolola nge tuvosena tuli nakulikolezeza umwe namukwavo.—Loma 1:11, 12.

7. Uno natunganyala ngachilihi nge natukumbululanga hakukunguluka?

⁷ Natunganyala kachi nge natukumbululangaho. (Isa. 48:17) Mujila muka? Chatete, nge natufwila kukakumbululaho, kaha  nachitulingisa tuhituluke muvihande shimbu kanda tuyenga nakukunguluka. Nge natuhitulukanga kanawa muvyuma natukalinangula, kaha nachitukafwa twivwishise chikuma Mazu aKalunga. Ngocho kwivwishisa kanawa Mazu aKalunga nachitulingisa tuzachisenga vyuma natulinangula. Chamuchivali, kwazananga muvihande vyahakukunguluka nachitukafwa tulivwise kuwaha kukunguluka nakuhona kwivwa uli. Chamuchitatu, hakuwana nge kukumbulula hakukunguluka chasakiwa kukilikita nangolo, shikaho kakavulu tweji kwanukanga vyuma vize tweji kukumbululanga numba tuhu nahahita lwola lwalusuku.

8-9. (a) Kweseka namazu ahali Malaki 3:16, uno Yehova eji kwivwanga ngachilihi nge natukumbulula hakukunguluka? (b) Ukalu muka veji kumonanga vatu vamwe?

⁸ Kuhanjika halufwelelo lwetu cheji kwivwisanga Yehova kuwaha. Twafwelela ngwetu Yehova eji kwivwanga vyuma tweji kuhanjikanga, kaha nawa eji kumonanga kukilikita chetu mangana tukumbululengaho hakukunguluka kupwa chachilemu. (Tangenu Malaki 3:16.) Eji kutukisulanga kachi nge natuzata nangolo jetu josena mangana tumwivwisenga kuwaha.—Mala. 3:10.

⁹ Chapundu vene tukwechi vyuma vyavivulu vyatela kutulingisa tuhanjikengaho nge tuli kukukunguluka. Chipwe ngocho vatu vamwe veji kwivwanga woma kwimika livoko mangana vakumbulule. Kachi nge nayenu mweji kwivwanga woma, kaha kamwatela kuhombako. Tushimutwilenu hajindongi jamuMbimbiliya, navyakutalilaho, navishina vize navitukafwa tukumbululenga chikuma nge tuli kukukunguluka.

10. (a) Mwomwo ika etu vavavulu tweji kwivwilanga woma wakukumbulula? (b) Mwomwo ika chapwila chamwaza kwivwa woma kukumbulula hakukunguluka?

¹⁰ Kachi nge muli nakusaka kwimika livoko mangana mukumbululeho, kutala mweji kwivwanga muchima uli nakuluta chikuma tahi? Nge mukiko, kaha keshi yenu kahako mwomwo tuvosena tweji kwivwanga woma. Hakusaka kuhonesa ukalu kana mwatela kutachikiza chatete vyuma vyeji kumilingisa mwivwenga woma. Kutala mweji kulizakaminanga ngwenu namuvulyama vyuma mwasakanga kuhanjika, chipwe ngwenu namuhanjika vyuma vyakuhenga tahi? Uno mweji kushinganyekanga ngwenu kamweshi kuhasa kukumbulula mujila yamwaza ngana  muze vali nakulinga vakwenuko tahi? Kulizakamina havyuma kana chapwa chamwaza, mwomwo cheji kusololanga nge mwapwa muvakulinyisa kaha nawa mwamona ngwenu vakwenu vamihambakana. Yehova azanga muchima kanou. (Samu 138:6; Fwili. 2:3) Azanga nawa mumwalisenga nakukolezeza vandumbwenu hakukunguluka. (Teso. 1, 5:11) Tachikizenu ngwenu amizanga chikuma, kaha mwamikafwa mupwenga vakumika.

11. Visoneka muka navitukafwa kachi nge tweji kwivwanga woma kukumbulula hakukunguluka?

¹¹ Tutalenu haVisoneka vimwe. Mbimbiliya yamba ngwayo tuvosena tweji kuhukananga muhanjikiso. (Yako. 3:2) Yehova ejiva ngwenyi katwakupukako, kaha navandumbwetu nawa mukiko vatachikiza. (Samu 103:12-14) Vandumbwetu vapwa tanga yetu yakushipilitu, ngocho vatuzanga chikuma. (Mako 10:29, 30; Yowa. 13:35) Vatachikiza ngwavo katweshi kuhasa kukumbululanga mwakwoloka lwola lwosenako.

12-13. Vyuma muka tunalinangula kuli Nehemiya naYona?

¹² Achishinganyekenu havyakutalilaho vyamuMbimbiliya vize navimikafwa muhonese woma. Anukenu chakutalilaho chaNehemiya uze azachilililenga kuchipango chamwangana wangolo. Nehemiya ahombele hakwivwa ngwavo jikembwe navikolo vyaYelusalema vanavipuzula. (Nehe. 1:1-4) Achishinganyekenu owo woma evwile omu mwangana amuhulishile ovyo vyamulingishile ahombe. Hahaze vene Nehemiya alombele kuli Kalunga, kufumaho akumbulwile mwangana. Echi chalingishile mwangana akafwe vatu jaKalunga. (Nehe. 2:1-8) Tutalenu nawa hali Yona. Omu Yehova amulwezele ahuhumune vatu vamuNyineve, ikiye evwile woma nakuchinyina kuchihela cheka. (Yona 1:1-3) Oloze Yehova amukafwile azate mulimo amuhanyine. Kaha mujimbu ambulwile wakafwile vatu vamuNyineve. (Yona 3:5-10) Tunalinangula kuli Nehemiya ovyo chapwila chachilemu kulomba kuli Kalunga shimbu kanda tukumbulule. Kaha nawa kuli Yona tunalinangula nge Yehova nahase kutukafwa tumuzachile numba tuhu tweji kwivwanga woma. Twatachikiza ngwetu kwambulula mujimbu wakusopesa kuli vaka-Nyineve chapwile chachikalu chikuma kuhambakana kukumbulula muZuvo yaWangana nyi mweka?

¹³ Vishina muka navimikafwa mangana mukumbululenga hakukunguluka? Tuchishimutwilenuko vimwe.

14. Mwomwo ika twatela kuwahishilanga chimweza vyakukunguluka, kaha lwola muka tunahase kulinga ngocho?

¹⁴ Wahisenunga chimweza vyakukunguluka. Chuma nachimikafwa mukumbululenga chakuzeneka kwivwa woma shina kuhitulukilanga chimweza. (Vishi. 21:5) Chipwe ngocho, vatu kaveshi kuwahishila vihande halwola lwolumweko. Eloise, wamyaka yakusemuka yamuji 80 uze apwa tuliwe, eji kuputukanga kuwahisa vyaChilongesa chaKaposhi Kakutalila kumaputukilo achalumingo. Ambile ngwenyi: “Ngweji kulivwisanga kuwaha kupwa kukukunguluka kachi nge ngunawahishila chimweza vyakukunguluka.” Joy nawa eji kunonekanga lwola halikumbi lyaSateli mangana ahituluke muKaposhi Kakutalila numba tuhu eji kuyanga  kumilimo hakumbi hakumbi. Ambile ngwenyi: “Echi cheji kungukafwanga ngwanuke vyuma ngwapwanga nakuwahisa.” Ike uze apwa kalama kaha nawa payiniya ambile ngwenyi: “Ngweji kuchiwananga kupwa chachashi kuwahisanga vihande chindende chindende muchalumingo kuhambakana kuviwahishila halwola lwolumwe.”

15. Namuhasa kuwahisa ngachilihi vyakukunguluka?

¹⁵ Vyuma muka mwatela kulinga mangana muwahisenga kanawa vihande vyakukukunguluka? Vangilenunga kulomba Yehova amihane shipilitu yenyi yajila mangana yimikafwe. (Luka 11:13; Yowa. 1, 5:14) Kufumaho, wanenu chishina chilimo hakukekesa mutwe wachihande, natumitwe twatundende, namivwimbimbi namapwata avishina vikwavo. Omu namutanga jipalangalafu, tangenu navisoneka vanenyikilamo. Kaha mwatela kushinganyeka havishina vyavilemu vize namusaka kukakumbulula. Shikaho kuwahishila chimweza chinahase kumikafwa mupwenga nachinyingi kaha nawa nachipwa chachashi kuli enu kukumbululangaho.—Koli. 2, 9:6.

16. Vinoma muka mwatwama navyo, kaha mweji kuvizachisanga ngachilihi?

¹⁶ Nge chinahase, kaha zachisenunga vinoma vyahaInternet vize vili mulilimi mwatachikiza. Liuka lyaYehova linatuwahishila vinoma vyahaInternet vize navitukafwanga hakuwahisa vihande vyakukunguluka. Chakutalilaho, munahase kututulula mikanda yakuzachisa hakulinangula yize yili haChisete cha JW. Nge munayitutulula lyehi, kaha munahase kuyitanga kala lwola munasake kwosenokwo muli. Vamwe veji kuzachisanga echi chisete nge vali kushikola chipwe kumilimo halwola lwakulya chamusana chipwe nge vali nakuya ungeji. Kaha nawa Chisete chaMikanda naCHISETE CHAMIKANDA CHAHAINTERNET vyeji kutukafwanga hakuhehwojola vishina vize tuli nakusaka kwivwishisa kanawa.

17. (a) Mwomwo ika chapwila chachilemu kuwahisanga vishina vyavivulu? (b) Vyuma muka munalinangula muvindiyo yakwamba ngwavo Pwenu Masepa jaYehova—Wahisenunga Chimweza Vyuma Namukakumbululaho?

¹⁷ Nge chinahase kaha wahisenunga vishina vyavivulu. Mwomwo ika? Mwomwo lwola lumwe vatu vanahase kwimikila hamwe mavoko, kaha muka-kutwaminyina eji kusakulangaho umwe. Shikaho pamo nahase kwinyika mukwenu weka. Kaha nawa muka-kutwaminyina keshi kwinyika vatu vosenako kuchina mwalya lwola. Shikaho kachi nge kavaminyikile halwola namwimika livokoko, kaha kamwatela kupihililako. Ngocho hakusaka mukumbululeho mwatela kuwahisanga vishina vyavivulu. Munahase kulizanga mukatange chisoneka. Kaha nawa munahase kulizanga mukakumbulule kuzachisa mazu enu. *

18. Mwomwo ika twatela kukumbululanga mukavatu?

¹⁸ Kumbululenunga mukavatu. Kakavulu vaze veji kukumbululanga mukavatu vakiko veji kuhanjikanga vishina vize navikolezeza vatu. Shikaho fwilenunga kukumbululanga mukavatu.  Esekenu kukumbulula mujisekondi 30. (Vishi. 10:19; 15:23) Kachi nge munakumbululanga hakukunguluka hamyaka yayivulu, kaha mwatela kukumbululanga mukavatu mangana muhane chakutalilaho chamwaza kuli vavahya. Nge namuhanjikanga vyavivulu hakukumbulula kaha namwivwisa vaze vavahya woma mwomwo navashinganyeka ngwavo kaveshi nauhashi wakweseka hamwe nayenuko. Kaha nawa kukumbululanga mukavatu cheji kukafwanga vatu vavavulu vazanemo. Shikaho kachi nge enu yenu vanavangila kwinyika mukumbulule hapalangalafu, kaha mwatela kuhanjika mukavatu kweseka nomwo munayi chihula. Kanda kukumisa vishina vyosena vili mupalangalafuko. Nge chishina chachinene vanachihanjika lyehi, kaha munahase kuhanjika jino havishina vyeka vilimo.—Talenu lipwata lyakwamba ngwavo “ Vyuma Muka Ngwatela Kukumbululaho?”

19. Chuma muka mwatela kulinga hakusaka muka-kutwaminyina aminyike mukumbulule?

¹⁹ Lwezenu muka-kutwaminyina palangalafu munakusaka kukumbulula. Nge munakusaka mukakumbulule hapalangalafu yimwe, kaha mwatela kulweza muka-kutwaminyina shimbu kanda kukunguluka chiputuke. Nge munahete hapalangalafu kana, kaha mwatela kwimika washi livoko helu mangana muka-kutwaminyina amimone.

20. Uno kukunguluka chachikungulwilo chalifwana ngachilihi nakulila hamwe navakwenu?

²⁰ Kukunguluka mwatela kuchimona nge hivyakulya vize namulila hamwe namasepa jenu. Achishinganyekenu nge vandumbwenu muchikungulwilo vanamisanyika mukalye navo vyakulya, kaha vanamilweze muwahiseko tuvyakulya twatundende. Uno namwivwa ngachilihi? Pamo kamweshi kulizakamina chikumako, oloze namukilikita nangolo jenu mangana muwahise vyakulya vize navazanga vatu vosena. Yehova uze eji kutusanyikanga, atuhana vyakulya vyavivulu kumesa yenyi vize tweji kulyanga nge tuli kukukunguluka. (Samu 23:5; Mateu 24:45) Kaha eji kwivwanga kuwaha hakutumona natuneha wana waundende kweseka noho hakumina ngolo jetu. Shikaho wahisenunga kanawa mangana mukumbululengaho kweseka nomu munahashila. Ngocho kamweshi kuya kumesa yaYehova nakulya kahako oloze nayenu namumbata wana uze namukalya navakwenu.