1-2. (a) Uno mazu ahali Isaya 41:10 akafwile ngachilihi ndumbwetu Yoshiko? (b) Uno mazu aze Yehova ahwiminyinyine Isaya asoneke anahase kunganyalisa veya?

NDUMBWETU walunga wakushishika Yoshiko vamulwezele kuli ndotolo ngwavo nasale natukweji vavandende kaha mwafwa. Oloze ikiye kalizakaminyineko mwomwo anukile mazu amuMbimbiliya aze azangile chikuma. Mazu kana atwama hali Isaya 41:10. (Tangenu.) Kaha alwezele uze ndotolo ngwenyi, ikiye kalizakaminyineko mwomwo Yehova amukwachililile kulivoko lyenyi. * Mazu atwama hachisoneka kana akafwile ou ndumbwetu afwelele chikuma Yehova. Shikaho mazu kana anahase kutukafwa nayetu tuhone kulizakamina kachi nge tuli nakuhita muvyeseko. Hakusaka tutachikize mujila anahase kutukafwilamo, tushimutwilenu chatete ovyo Kalunga alwezelele Isaya asoneke mazu kana.

² Yehova ahwiminyinyine Isaya asoneke mazu kana mangana avendejeke vaYuleya vaze vapwile hakamwihi nakuya muufunge muMbavilone. Chipwe ngocho, mazu kana vawasonekele mangana akolezezenga vatu jaYehova vosena keshi nge vaYuleya kahako. (Isa. 40:8; Loma 15:4) Oholyapwa hakiko tuli nakusakiwa chikuma mazu akutukolezeza aze atwama hamukanda waIsaya mwomwo tuli nakuyoyela ‘mulwola lwalukalu.’—Chimo. 2, 3:1.

3. (a) Vyuma muka atufwelelesa Yehova hachisoneka chaIsaya 41:10? (b) Mwomwo ika vyuma kana vyapwila vyavilemu?

³ Muchihande chino natushimutwila havyuma vitatu vize Yehova afwelelesa vangamba jenyi hali Isaya 41:10, chisoneka vanasakula chamwaka wa 2019. Vyuma kana shina: (1) Yehova mwapwanga nayetu, (2) apwa Kalunga ketu, kaha nawa (3) mwatukafwanga. Nayetu tuli nakusakiwa  kutufwelelesa * mujila kana, mwomwo tuli nakuhita muvyeseko ngana muze chapwile kuli Yoshiko. Kaha nawa tuli nakumona ukalu mwomwo yavyuma vyavipi vinakusoloka muno mukaye. Chakutalilaho, etu vamwe vali nakutuyanjisa kuli vaka-fulumende. Tushimutwilenu jino vyuma vitatu atufwelelesa Yehova.

4. (a) Chuma muka chatete atufwelelesa Yehova chize natushimutwila? (Talenu nawa kwinyikila chamwishi.) (b) Mujila muka Yehova eji kutuzakaminangamo? (c) Uno mazu aKalunga akumifwelelesa eji kumilingisanga mwivwenga ngachilihi?

⁴ Chatete, Yehova atufwelelesa ngwenyi: “Kanda nawivwa womako, mwomwo nguli nayove.” * Jila eji kutuzakaminangamo Yehova yikiko yasolola nge chikupu vene ali nayetu. Talenu jila eji kusolwelangamo zangi yenyi hali etu. Yehova ambile ngwenyi: “Ngwakumwene kupwa uwamulemu, kaha ngwakuvumbikile nakukuzanga.” (Isa. 43:4) Hakuwana nge Yehova apwa wakushishika kuli etu, ngocho kakweshi chuma nachimulingisa ahone kuzanga vangamba jenyi vaze veji kumuzachilangako. (Isa. 54:10) Zangi yenyi nausepa uze atunga nayetu vyeji kutukafwanga tupwenga vakumika. Yehova mwatukinganga lika ngana muze akingile sepa lyenyi Apalama (Apalahama). Yehova ambile kuli Apalama ngwenyi: “Kanda nawivwa womako. Ami ngunapu ngukepwe kuli ove.”—Kupu. 15:1.

5-6. (a) Twatachikiza ngachilihi ngwetu Yehova asaka kutukafwa nge tuli muvyeseko? (b) Chuma muka tunalinangula kuli Yoshiko?

⁵ Chikupu vene, twatachikiza ngwetu Yehova asaka kutukafwa nge tuli muvyeseko. Atufwelelesa ngwenyi: “Omu nauhita mumeya, nangupwa nayove, omu nauhita mutulwiji, meya kaweshi kukujimikako. Omu nautambuka hakakahya, kaweshi kuwemako, milangi yakakahya kayeshi kukuvaulako.” (Isa. 43:2) Uno mazu kana alumbununa ika?

⁶ Numba tuhu Yehova katufwelelesa ngwenyi mwafumisako ukalu uli nakutuyanjisako, oloze keshi kwechelela ukalu wakufwana nge “tulwiji” utujimike chipwe vyeseko vyakufwana nge “milangi” vitwenyekeko. Atufwelelesa ngwenyi mwapwanga nayetu nakutukafwa  ‘tuhite’ muukalu kana. Yehova nahase kutukafwa ngachilihi? Mwatukafwa tuhone kulizakamina chikuma nakutukafwa tulame kulonga chetu numba vene nge tunatachikiza ngwetu vali nakusaka kutujiha. (Isa. 41:13) Omu mukiko chapwile nakuli ndumbwetu Yoshiko uze tunavuluka kumaputukilo. Mwanenyi wapwevo ambile ngwenyi: “Twalikomokelele chikuma hakumona mama kalizakaminyineko. Twamwene chikupu ngwetu Yehova ikiye amukafwile aunde muchima. Mama atwalileho lika kulwezako vanase navakwavo vaveji vyuma ashika Yehova, swi nomu afwile.” Chuma muka tunalinangula kuli Yoshiko? Nge natufwelela mazu atushika Kalunga akwamba ngwenyi “nangupwa nayove,” kaha nayetu natumika mukala vyeseko natumona.

7-8. (a) Chuma muka chamuchivali atufwelelesa Yehova chize natushimutwila, kaha chalumbununa ika? (b) Mwomwo ika Yehova alwezelele vaYuleya ngwenyi: ‘Kanda namulizakaminako’? (c) Mazu muka ahali Isaya 46:3, 4 aze akafwile vatu jaKalunga vahone kulizakamina?

⁷ Chamuchivali, Yehova atufwelelesa ngwenyi: “Kanda naulizakaminako, mwomwo nguKalunga kove.” Uno ou mukuku unakuhanjika hakulizakamina walumbununa ika? Lizu lyachiHepeleu valumuna ngwavo ‘kulizakamina’ lyalumbununa “kutwama muchiwomawoma mwomwo yakushinganyeka ngwetu kuli chuma chimwe chinahase kutulukuka,” chipwe “kutalatala ngana muze eji kulinganga mutu nge ali nakwivwa woma wachuma chimwe.”

⁸ Mwomwo ika Yehova alwezelele vaYuleya vaze vapwile hakamwihi nakuya muufunge muMbavilone vahone ‘kulizakamina’? Mwomwo atachikijile ngwenyi vatu vamunganda kana navakevwa woma. Woma wavyuma muka? Kusongo yamyaka 70 yize vaYuleya vapwile muufunge, nganda yaMbavilone vayilukukile kumaswalale vangolo vavaMeto-Peleja. Yehova azachishile maswalale kana mangana asokole vatu jenyi muundungo muMbavilone. (Isa. 41:2-4) Omu vaka-Mbavilone navatu vakumafuchi eka vamwene ngwavo vaka-kole javo vali nakupandama, vaputukile kulikolezeza mwavomwavo ngwavo: ‘Jikizenu.’ Kaha nawa vatungile tulunga vatuponya vavavulu ngwavo mangana vavakinge. (Isa. 41:5-7) Halwola kana, Yehova akolezezele vaYuleya vapwile muufunge ngwenyi: “Ove Isalele, [kaweshi ngana mwavaka-kole joveko] ove unapu ungamba yami . . . Kanda naulizakaminako, mwomwo nguKalunga kove.” (Isa. 41:8-10) Nyingililenu ngwenu Yehova avafwelelesele namazu akwamba ngwenyi: “NguKalunga kove.” Yehova ahanjikile mazu kana mangana akolezezele vangamba jenyi vakushishika ngwenyi kavavulyamineko, oloze apwile lika Kalunga kavo, kaha nawa vakiko vapwile lika vatu jenyi. Avalwezele ngwenyi: ‘Nangumimbata nakumiyovola.’ Chikupu vene, mazu kana akolezezele vaYuleya vaze vapwile muufunge.—Tangenu Isaya 46:3, 4.

9-10. Mwomwo ika katwatela kulizakaminako? Hanenu chakutalilaho.

⁹ Makumbi ano vatu vanalizakamina chikuma, mwomwo vyuma vili nakupihilako chikuma muno mukaye. Nayetu tuli nakumona ukalu mwomwo yavyuma kana. Chipwe ngocho, vyuma kana kavyatela kutwivwisa womako. Yehova atulweza ngwenyi: “NguKalunga kove.” Mwomwo ika mazu kana anahase kutukafwa tuhone kulizakamina?

¹⁰ Achishinganyekenu hachakutalilaho chino. Vakweze vavali vaToka naMbunji vali nakuya ungeji nawato. Kahomu vali nakuya hinavaheta hachihela haze hali muta chikuma uze nauputuka kuhungumuna wato. Vatu vosena muwato navalizakamina chikuma, oloze muka-kuvuwa wato himwavalweza ngwenyi: “Likwachililenu kaha, kalinwomu tufume hamuta kana.” Oloze Toka himwaputuka kulizakamina chikuma. Uze muka-kuvuwa wato mwahanjika cheka ngwenyi: “Kanda kulizakaminako. Ngufwelelenu kaha.” Toka hakwivwa mazu kana himwanyengesa mutwe nakwamba  ngwenyi, “Makulyenyi, natuvomba muta unatoho chikuma.” Hanyima yakuhanjika mazu kana mwamona sepa lyenyi Mbunji kalizakaminyineko. Kaha himwamuhulisa ngwenyi: “Elunga, yove kaweshi nakusoloka kulizakaminako, mwomwo ika?” Mbunji mwamwesa kukanwa nakwamba ngwenyi: “Ou ali nakuvuwa wato ngwamutachikiza chikuma, mwomwo apwa tata.” Kufumaho Mbunji himwamba cheka ngwenyi: “Vandamina ngukulweze kanawa omwo apwa tata. Ngwafwelela nge wamutachikiza kanawa apwa nomwo eji kuvuwanga wato, kaha nayove kaweshi kulizakaminako.”

11. Vyuma muka tunalinangula kuchakutalilaho chavakweze vavali?

¹¹ Vyuma muka tunalinangula kuchakutalilaho kana? Ngana muze ahonene kulizakamina Mbunji, nayetu katweshi kulizakaminako mwomwo Setu wamwilu Yehova twamutachikiza kanawa. Twatachikiza chikupu ngwetu mwatukafwa mukala ukalu natumona mumakumbi ano akukuminyina. (Isa. 35:4) Kufwelela Yehova nachitukafwa tuhone kulizakamina numba tuhu vatu vavavulu mukaye vali nakutwama muchiwomawoma. (Isa. 30:15) Kaha nawa ngana muze Mbunji alwezeleko sepa lyenyi, nayetu twatela kulwezako vakwetu vyuma vyatulingisa tufwelele chikuma Kalunga. Kuvalweza vyuma kana nachivakafwa vafwelele ngwavo Yehova mwavakafwa numba tuhu navamona ukalu.

12. (a) Chuma muka chamuchitatu atufwelelesa Yehova chize natushimutwila? (b) Uno hanjikiso yakwamba ngwavo “livoko” lyaYehova yalumbununa ika?

¹² Tushimutwilenu hachuma chamuchitatu atufwelelesa Yehova chize asonekele Isaya. Yehova ambile ngwenyi: “Nangukujikijisa, nangukukafwa.” Isaya ahanjikilile chimweza hajila yize mwakazachisa Yehova yakujikijishilamo vatu jenyi. Asonekele ngwenyi: “Yehova mwakeza nangolo, kaha livoko lyenyi nalikayula.” (Isa. 40:10) Kakavulu Mbimbiliya yazachisa lizu “livoko” mujila yachifwanyisa kulumbununa ngolo. Shikaho mazu akwamba ngwavo “livoko [lyaYehova] nalikayula” alumbununa nge Yehova apwa Mwangana wangolo. Yehova  azachishile ngolo jenyi jakulipwila hakukafwa nakukinga vangamba jenyi vakushikulu, kaha achili lika nakukolezeza nakukinga vaze vali nakumufwelela makumbi ano.—Lushi. 1:30, 31; Isa. 43:10.

13. (a) Lwola muka Yehova eji kufwilanga chikuma kutesamo lushiko lwenyi lwakutujikijisa? (b) Lushiko muka luze lweji kutujikijisanga chikuma nakutuhana lutalililo?

¹³ Yehova eji kufwilanga kutesamo lushiko lwenyi lwakwamba ngwenyi, “nangukujikijisa,” chikumanyi nge vaka-kole vali nakutuyanjisa. Makumbi ano, kuvihela vimwe vaka-kole jetu vali nakufwila kuhonesa mulimo wetu wakwambulula chipwe vene kusoka liuka lyetu. Chipwe ngocho, katwatela kulizakamina chikuma havyuma kanako. Vyuma atufwelelesa Yehova vyeji kutujikijisanga nakutuhana lutalililo. Atushika ngwenyi: “Vyeshovyo vitwa navakafula mangana vakakuzungise, kavyeshi kukafukilako.” (Isa. 54:17) Mazu kana eji kutwanukisanga vishina vitatu vyavilemu chikuma.

14. Mwomwo ika katwatela kulikomokelako hakumona vaka-kole jaKalunga vali nakutufumbukila?

¹⁴ Chatete, hakuwana nge twapwa tuvaka-kukavangiza Kulishitu, ngocho twatachikiza ngwetu vatu navatuhunganga. (Mateu 10:22) Yesu ahanjikilile chimweza ngwenyi tumbaji twenyi navakavayanjisa chikuma hamakumbi akukuminyina. (Mateu 24:9; Yowa. 15:20) Chamuchivali, upolofweto waIsaya watulweza nawa ngwawo, vaka-kole jetu navakazachisa vitwa vyakulisezaseza mangana vakatuzungise. Vitwa kana shina makuli, nakutuvangijikila nakutuyanjisa mujila yayipi. (Mateu 5:11) Yehova keshi kukanyisa vaka-kole jetu kuzachisa vitwa kana hakutuzungisako. (Efwe. 6:12; Kuso. 12:17) Chipwe ngocho katwatela kwivwa womako. Mwomwo ika?

15-16. (a) Chishina muka chamuchitatu twatela kwanuka, kaha chisoneka chaIsaya 25:4, 5 chakundwiza ngachilihi mazu kana? (b) Uno mukanda waIsaya 41:11, 12 walumbununa ngachilihi ukalu navakamona vatu vaze veji kutuzungisanga?

¹⁵ Tushimutwilenu hachishina chamuchitatu chize twatela kwanuka. Yehova ambile ngwenyi “vyeshovyo vitwa” navakazachisa mangana vakamizungise “kavyeshi kukafukilako.” Ngana muze mbango yeji kutukinganga kuvula yamishilinjinji, naYehova nawa eji  kutukinganga ‘kuvikenya vaze navatwivwila matoto.’ (Tangenu Isaya 25:4, 5.) Chikupu vene, vaka-kole jetu kaveshi kuhasa kutulemekako.—Isa. 65:17.

¹⁶ Yehova eji kutujikijisanga nawa hakutulweza hatoma vyuma navikasoloka kuli vaze ‘navatukwachila matoto.’ (Tangenu Isaya 41:11, 12.) Numba tuhu vaka-kole jetu navatuzungisa nangolo javo josena, oloze kaveshi kutufungululako mwomwo vosena vaze veji kufumbukilanga vatu jaKalunga “navakavalingisa kupwa vamokomoko nakuvanongesa.”

17-18. (a) Uno kutanga Mbimbiliya nachitukafwa ngachilihi tufwelele chikuma Kalunga? Hanenu chakutalilaho. (b) Uno kushinganyeka hachisoneka chamwaka wa 2019 nachitukafwa ngachilihi?

¹⁷ Kutachikiza kanawa Yehova cheji kutukafwanga tumufwelele chikuma. Shikaho kutanga Mbimbiliya nakushinganyeka havyuma natutanga nachitukafwa tutachikize kanawa Kalunga. MuMbimbiliya mwatwama mijimbu yize yasolola omu Yehova akingilenga vatu jenyi kushikulu. Mijimbu kana yatukafwa tufwelele chikupu ngwetu nayetu mwatuzakama.

¹⁸ Achishinganyekenu hachakutalilaho chamwaza chize azachishile Isaya hakusaka kulumbununa omu Yehova eji kutukingilangamo. Isaya afwanyishile Yehova kukafunga, kaha vangamba jenyi kumikoko. Ahanjikile kutalisa kuli Yehova ngwenyi, “Mwakakungulula vana vamikoko nalivoko lyenyi, kaha mwakavambachila hatulo yenyi.” (Isa. 40:11) Kutachikiza ngwetu tuli mumavoko aYehova nachitukafwa tulivwe kupwa vakukingiwa nakuhona kulizakamina. Hakusaka tutwaleho lika kupwa vakuunda chamokomoko naukalu natumona, ndungo wakushishika wakuzangama nasakula chisoneka chaIsaya 41:10 chakwamba ngwavo “Kanda naulizakaminako, mwomwo nguKalunga kove” kupwa chisoneka chamwaka wa 2019. Shikaho twatela kushinganyekanga hamazu atwama hachisoneka kana mwomwo nawatukafwa tupwenga vakumika omu natulitalasana naukalu uli nakwiza kulutwe.