CHIHANDE CHAKULINANGULA 3
Namuhasa Kulama Ngachilihi Muchima Wenu?
“Lamanga muchima wove kuhambakana vyuma vyosena weji kulamanga.”—VISHI. 4:23.
MWASO 36 Tulamenunga Michima Yetu
VYUMA NATUSHIMUTWILA *
1-3. (a) Mwomwo ika Yehova azangilile Solomone, kaha Solomone vamukiswile ngachilihi? (b) Vihula muka natukumbulula muchihande chino?
SOLOMONE vamutongwele kupwa mwangana wavaIsalele omu apwile kanyike. Omu aputukile kuyula, Yehova ahanjikile kuli ikiye muchilota ngwenyi: “Ngulombe vyeshovyo musaka ngwove ngukuhane.” Solomone akumbulwile ngwenyi: “Ngukanyike, kaha nawa kangweshi nachinyingiko. . . . Ngocho nguhane ami ngamba yove muchima wakwononoka mangana nguyule vatu jove.” (Vamya. 1, 3:5-10) Solomone hakuvuluka “muchima wakwononoka,” asolwele chikupu nge apwile wakulinyisa. Evi vikiko vyalingishile Yehova amuzange chikuma. (Samwe. 2, 12:24) Chikupu vene, Kalunga asuulukile hakwivwa ou mwangana wakanyike mwalomba vyuma kana, ngocho amuhanyine “muchima wamangana, wakunangakana.”—Vamya. 1, 3:12.
2 Halwola Solomone apwile wakushishika, Kalunga amukiswilenga mwamunene. Amuhanyine mulimo wakulipwila wakutunga tembele yize “[vavulukililenga] lijina lyaYehova Kalunga kaIsalele.” (Vamya. 1, 8:20) Solomone ayile fuma mwomwo yamangana aze amuhanyine Kalunga. Kaha nawa vyuma vize ahanjikile omu vamuhwiminyinyine kuli Kalunga vavisoneka mumikanda yitatu yamuMbimbiliya. Mukanda umwe hamikanda kana shina waVishimo.
3 Lizu muchima valivuluka kafwe mapapa 48 mumukanda waVishimo. Chakutalilaho, hali Vishimo 4:23 vasonekaho ngwavo: “Lamanga muchima wove kuhambakana vyuma vyosena weji kulamanga.” Uno ou “muchima” vavuluka muvesi kana watalisa kuchuma muka? Chihula kana natuchikumbulula muchihande chino. Natukumbulula nawa vihula vino vivali: Uno Satana nahase kupihisa ngachilihi muchima wetu? Kaha vyuma muka twatela kulinga mangana tuulame? Twatela kutachikiza muvakumbulwila vihula kana mwomwo echi nachitukafwa tupwenga lika vakushishika kuli Kalunga.
MAZU AKWAMBA NGWAVO “MUCHIMA WOVE” ALUMBUNUNA IKA?
4-5. (a) Uno lizu “muchima” vazachisa hali Vishimo 4:23 lyalumbununa ika? (b) Uno kulama kanawa mujimba wetu nachitukafwa ngachilihi tutachikize mwakulamina muchima wetu?
4 Lizu “muchima” vavuluka hali Vishimo 4:23 lyalumbununa mutu wamukachi chipwe mutu wamutulo. Lyatalisa nawa kuvishinganyeka vyetu, nomwo tweji kwivwanga, navyuma twafwila kulinga. Mujila yikwavo lyalumbununa omwo twapwa mukachi keshi nge omwo tweji kusolokanga kuwelukako.
5 Tukekesenu tumone omwo kulama kanawa mujimba wetu nachitukafwa tutachikize mwakulamina muchima wetu. Chatete, hakusaka tupwenga vakulikangula kumujimba, twatela kulya vyakulya vyakutunga mujimba nakulinyukanga lwola lwosena. Chochimwe nawa, hakusaka tuzame kushipilitu, twatela kulya vyakulya vyakushipilitu nakufwelela nawa Yehova lwola lwosena. Tunahase kusolola ngwetu twafwelela Yehova hakuzachisanga vyuma natulinangula nakulwezako nawa vakwetu vyuma twafwelela. (Loma 10:8-10; Yako. 2:26) Chamuchivali, solokeso yetu yinahase kutulingisa tushinganyeke ngwetu tunalikangula kumujimba kumana mukachi tuli nakuviza. Chochimwe nawa, kupwa nakulya chakushipilitu chachivulu, chinahase kutulingisa tumone ngwetu tuli nalufwelelo lwakukola, okunyi pamo tuli navilinga vyavipi. (Koli. 1, 10:12; Yako. 1:14, 15) Twatela kutachikiza ngwetu Satana asaka kupihisa vishinganyeka vyetu. Uno nahase kulinga ngachilihi ngocho? Kaha tunahase kulikinga ngachilihi?
SATANA AFWILA KUPIHISA MUCHIMA WETU
6. Satana asaka tulinge vyuma muka, kaha afwila kuvitesamo ngachilihi?
6 Satana asaka tupwenga ngana muze apwa ikiye. Asaka nayetu tulikange kujindongi jaYehova nakufwila kulinganyalisa kaha etu vavene. Hakuwana nge Satana keshi kuhasa kutushinyinyika tuhanjike chipwe kulinga vyuma vize asaka ikiyeko, ngocho eji kufwilanga kuzachisa jijila jakulisezaseza mangana atuhungumwise. Chakutalilaho, tuli nakuyoyela mukaye muze munazale navatu vavilinga ngana vize atwama navyo ikiye. (Yowa. 1, 5:19) Numba tuhu twatachikiza ngwetu kulikata navatu vavapi chinahase ‘kwenyeka’ chipwe ‘kupihisa’ vishinganyeka navilinga vyetu, oloze Satana asaka tulikate navatu kana. (Koli. 1, 15:33; kwinyikila chamwishi) Muheto kana ukiko azachishile nakuli Mwangana Solomone. Solomone ambachile mapwevo vavavulu vaze valemeselenga tulunga vamakuli, kaha mukuhita chalwola “vamuhungumwishile” nakwalumuna “muchima wenyi chikoki chikoki” mangana aseze Yehova.—Vamya. 1, 11:3; kwinyikila chamwishi.
Uno munahase kufungulula ngachilihi Satana kuchina mwapihisa vishinganyeka vyenu? (Talenu palangalafu 7) *
7. Vyuma vyeka muka eji kuzachisanga Satana mangana ahungumwise vatu, kaha mwomwo ika twatela kupwa vakuvanguluka?
7 Satana eji kuzachisanga jivindiyo navisaji vyamivwimbimbi mangana ahungumwise vatu. Atachikiza ngwenyi kuzachisa mijimbu chinahase kutukunyula mwomwo cheji kutulingisanga tushinganyeke havyuma vimwe nakufwila kuvilinga. Yesu azachishilenga mijimbu hakunangula vatu. Chakutalilaho, azachishile chishimo chakaSamaliya nachamwana wakujimbala uze akenyekele vikumba vyenyi. (Mateu 13:34; Luka 10:29-37; 15:11-32) Chipwe ngocho, vatu vaze vanenyeka vishinganyeka kuli Satana, vanahase kuzachisa mijimbu yavyuma vimwe mangana yituhungumwise. Shikaho twatela kusakulanga kanawa mijimbu natwivwililanga. Shimbu jimwe jivindiyo navisaji vyamivwimbimbi vinahase kutunangula vyuma vize navisoloka nge kavyeshi kwenyeka vishinganyeka vyetuko. Oloze twatela kupwa vakuvanguluka. Chakutalilaho, nge tuli nakusakula vyakulihizumuna, kaha natusakula kutala vindiyo, twatela kulihulisa ngwetu, ‘Uno eyi vindiyo yili nakungunangula nge chapwa chakutamo kukavangiza mwaya kufwila chamujimba tahi?’ (Ngale. 5:19-21; Efwe. 2:1-3) Vyuma muka mwatela kulinga nge munamono ngwenu vindiyo muli nakutala yili nakukundwiza vandemone? Mwatela kulihenda kutala vindiyo kana ngana muze namufwila kulikinga kumusongo waupi.
8. Visemi vanahase kukafwa ngachilihi vana vavo valame michima yavo?
8 Enu visemi, tachikizenu ngwetu mwatwama namulimo wakukinga vana venu kuchina Satana mwapihisa michima yavo. Twafwelela chikupu ngwetu mwasaka kukinga vana vene kumisongo. Chakutalilaho, mwafwila kulama membo enu kupwa aunyoji, nakumbila vyuma vyosena vize vinahase kuneha misongo kuli yenu Vishi. 1:8; Efwe. 6:1, 4) Shikaho kamwatela kwivwa woma kulweza vana venu vyuma vatela kulinga kweseka najindongi jamuMbimbiliyako. Mwatela kuvalweza vyuma vatela kutala navize kavatela kutalako, nakuvalumbunwina nawa ovyo munalingila ngocho. (Mateu 5:37) Nge vana venu vanaputuka kukola, vakafwenu vatachikize mwakusakwila vyuma vyakwoloka nevi vyakuhenga kweseka najindongi jaYehova. (Hepe. 5:14) Tachikizenu nawa ngwenu vana venu navalinangula vyavivulu kuvyuma mweji kuhanjikanga navize mweji kulinganga enu visemi javo.—Lushi. 6:6, 7; Loma 2:21.
chipwe kuvana venu. Chochimwe nawa, mwatela kukinga vana venu kuchina navatalanga jivindiyo, nakwazana mukuhema chahamakina chipwe chahaInternet vize vyakundwiza vilinga vyaSatana, mwomwo vyuma kana vinahase kwenyeka vishinganyeka vyavo. Yehova amihana mulimo wakuzakama vana venu kushipilitu. (9. Satana eji kulingisanga vatu vashinganyeke vyuma muka, kaha mwomwo ika vishinganyeka kana vyapwila vyakuhenga?
9 Satana asaka nawa kwenyeka vishinganyeka vyetu hakutulingisa tupendamine hamangana autu muchishishisa chakupendamina hali Yehova. (Kolo. 2:8) Chakutalilaho, Satana eji kulingisanga vatu vashinganyeke ngwavo kupwa naluheto chikiko chachilemu chikuma mukuyoya. Vatu vaze vakwechi vishinganyeka kana vanahase kupwa naluheto chipwe chiku. Numba vapwa naluheto chipwe chiku, vatu kana veji kupwanga muponde. Uno ponde muka? Hakuwana nge veji kufwilanga kupwa najimbongo jajivulu, ngocho cheji kuvalingisa jino vahone kuzakama kuyoya chavo, navausoko wavo, nausoko wavo naKalunga, mwomwo yakusaka kaha kutesamo vyuma vali nakufwila. (Chimo. 1, 6:10) Oloze yetu twapwa vakutokwa chikuma mwomwo Setu wamwilu eji kutukafwanga tumone jimbongo mujila yamwaza.—Kwambu. 7:12; Luka 12:15.
NATUHASA KULAMA NGACHILIHI MUCHIMA WETU?
Like watchmen and gatekeepers of old, stay alert and act so that corrupting influences do not enter into your heart (See paragraphs 10-11) *
10-11. (a) Vyuma muka twatela kulinga mangana tulame muchima wetu? (b) Mulimo muka vazachilenga vaka-kulama kushikulu, kaha chivezu chetu cheji kuzatanga ngachilihi ngana mwamuka-kulama?
10 Nge tunamono vyuma vyavipi, kaha twatela kulihendako. Kulinga ngocho nachitukafwa tulame muchima wetu. Lizu valumuna ngwavo “lamanga” hali Vishimo 4:23 lyeji kutwanukisanga mulimo azachilenga muka-kulama. Kushikulu, vaka-kulama vemanyinenga hajikembwe janganda nakwimba luneta kachi nge vaka-kole vali nakusaka kuvalukuka. Kushinganyeka hachakutalilaho kana nachitukafwa tutachikize vyuma twatela kulinga mangana Satana ahone kwenyeka vishinganyeka vyetu.
11 Kushikulu, vaka-kulama vaze vemanyinenga hajikembwe vazachilililenga hamwe navaka-kulama kuvikolo. (Samwe. 2, 18:24-26) Vosena vapwilenga namulimo wakukinga nganda nakusoka kuvikolo kachi nge kuli nakwiza muka-kole. (Nehe. 7:1-3) Chivezu * chize vanangula naMbimbiliya cheji kuzatanga ngana mwamuka-kulama, kaha cheji kutuhuhumunanga kachi nge Satana ali nakusaka kwenyeka vishinganyeka vyetu. Shikaho kachi nge chivezu chetu chili nakutulweza ngwacho evi vyuma vyavipi, kaha twatela kwivwilila nakusoka kuchikolo mujila yachifwanyisa.
12-13. Cheseko muka tunahase kupwamo, oloze vyuma muka twatela kulinga?
12 Tutalenu hachakutalilaho chize nachitukafwa tumone omwo tunahase kulihenda kuvishinganyeka vyaSatana. Yehova atunangula ngwenyi “ujila, namajilo osena, kanda vavivulukila muli [etuko].” (Efwe. 5:3) Jino vyuma muka natulinga kachi nge vakwetu vaka-milimo chipwe kushikola navaputuka kuhanjika chihande chaujila? Tuvosena twatachikiza ngwetu twatela “[kukana] vilinga vyakuhona kumwivwa Kalunga woma, namuchima wakufwila vyuma vyahakaye.” (Chitu. 2:12) Halwola lwangana chivezu chetu chize cheji kuzatanga ngana mwamuka-kulama chinahase kutuhuhumuna. (Loma 2:15) Kutala natuchivwilila tahi? Muchishishisa chakwivwilila chivezu chetu, tunahase jino kulinga vyuma navatulweza vakwetu chipwe kutala mivwimbimbi yize navatulwekesa. Oloze kachatela kupwa ngochoko, twatela kusoka vikolo vyachifwanyisa kulumbununa nge twatela kwalumuna chihande tuli nakushimutwila chipwe kuvaseza.
13 Twatela kupwa vakumika numba tuhone kulinga vyuma vyavipi vize navatulweza vakwetu. Twatachikiza chikupu ngwetu Yehova eji kumonanga kukilikita chetu, shikaho mwatuhana ngolo namangana vize navitukafwa tuhonese vishinganyeka vyavipi. (Miji. 2, 16:9; Isa. 40:29; Yako. 1:5) Jino vyuma muka navitukafwa tutwaleho lika kulamanga muchima wetu?
PWENUNGA VAKUTONA
14-15. (a) Twatela kusokolola michima yetu hakulinga ika, kaha tunahase kulinga ngachilihi ngocho? (b) Kweseka namukanda waVishimo 4:20-22, tunahase kunganyala ngachilihi hakutanga Mbimbiliya? (Talenu nawa lipwata lyakwamba ngwavo “Mwakushinganyekela haVyuma Natutanga.”)
14 Hakusaka tulame muchima wetu, katwatela kaha kukana kulinga vyuma vyavipiko oloze twatela nawa kwitavila kulinga vyuma vyamwaza. Achishinganyekenu cheka hachakutalilaho changanda yize yili mukembwe. Muka-kulama kuchikolo asokelenga vikolo vyanganda kuchina vaka-kole navengila, kaha nawa lwola lukwavo asokolwelenga vikolo kana mangana vatu vahase kuneha vyakulya navyuma vyeka munganda. Nge vikolo kana vavisokelenga lwola lwosena, kachi vatu vamunganda vafwilenga zala. Chochimwe nayetu, twatela kusokololanga vikolo vyetu vyachifwanyisa hakwitavilanga vishinganyeka vyaKalunga vitutwaminyine lwola lwosena.
15 Hakuwana nge Mbimbiliya yafuma kuli Yehova, shikaho nge natuyitanganga lwola lwosena, kaha natumonanga vyuma nganomu avimona ikiye nakulinga vyuma vize asaka. Tunahase kunganyala ngachilihi omu natutanganga Mbimbiliya? Kulomba nachitukafwa tunganyale. Ndumbwetu umwe wapwevo ambile ngwenyi: “Shimbu kanda nguputuke kutanga Mbimbiliya, ngweji kulombanga kuli Yehova mangana angukafwe ‘ngumone kanawa vishina vyavilemu’ vize vyatwama muMazu enyi.” (Samu 119:18) Nayetu twatela kushinganyekanga havyuma natutanga. Nge natulombanga, nakutanganga Mbimbiliya, nakushinganyekanga havyuma natutanga, kaha Mazu aKalunga nawapwa ‘mumuchima wetu’ nakutulingisa tuwazange chikuma.—Tangenu Vishimo 4:20-22; Samu 119:97.
16. Uno vatu vavavulu vananganyala ngachilihi kupolongalamu ya JW Broadcasting?
16 Jila yikwavo tunahase kwitavila Kalunga atutwaminyine shina kutalanga vyuma vili ha JW Broadcasting®. Valunga napwevo vamwe vambile ngwavo: “Tunamono omu Yehova nakumbulula kulomba chetu kuhichila mujipolongalamu ja JW Broadcasting jakakweji hikakweji. Jipolongalamu kana jeji kutuvendejekanga nakutukolezeza chikuma nge tunahombo. Kaha nawa twazanga kwivwilila kumyaso yize yeji kupwanga hapolongalamu kana. Twavula kuyivwilila chikuma nge tuli nakuteleka, chipwe nge tuli nakulya chipwe nge tuli nakulinga vyuma vyeka.” Chikupu vene, jipolongalamu kana jeji kutukafwanga tulame michima yetu. Jeji kutunangulanga tumone vyuma nganomu avimona Yehova nakutukafwa nawa tuhonese vishinganyeka vyaSatana.
17-18. (a) Kweseka namazu ahali Vamyangana 1, 8:61, uno kukavangiza vyuma anakutunangula Yehova nachitukafwa ngachilihi? (b) Vyuma muka tunalinangula kuli Mwangana Hezekiya? (c) Vyuma muka twatela kulomba kuli Yehova, kweseka namazu alombele Ndavichi hali Samu 139:23, 24?
17 Lufwelelo lwetu lweji kuzamanga chikuma kachi nge tunamono nganyo yatwama hakulinga Yako. 1:2, 3) Tweji kwivwisanga nawa Yehova kuwaha, ngocho eji kutuvulukanga kupwa tuvana venyi, kaha echi cheji kutulingisanga tufwile kumwivwisa lika kuwaha. (Vishi. 27:11) Vyeseko vyosena vize tweji kumonanga vyeji kutukafwanga tusolole ngwetu tuli kuzachila Setu namuchima wetu wosena. (Samu 119:113) Kaha nawa tweji kusololanga ngwetu twazanga Yehova namuchima wetu wosena nakufwila kwononoka jishimbi jenyi nakulinga mwaya muchima wenyi.—Tangenu Vamyangana 1, 8:61.
vyuma vyamwaza. (18 Hakuwana nge katwakupukako, ngocho tunahase kulimbenja. Kachi nge tunalimbenje, kaha twatela kushinganyeka havyuma alingile Mwangana Hezekiya. Ou Mwangana naikiye alimbenjelenga. Oloze apihililile nakwalumuka nakutwalaho lika kuzachila Yehova ‘namuchima wenyi wosena.’ (Isa. 38:3-6; Miji. 2, 29:1, 2; 32:25, 26) Shikaho nayetu tufwilenu kufungulula Satana kuchina mwapihisa vishinganyeka vyetu. Twatela kulomba Yehova atuhane “muchima wakwononoka.” (Vamya. 1, 3:9; tangenu Samu 139:23, 24.) Tunahase kupwa lika vakushishika kuli Yehova kachi nge natulama muchima wetu.
MWASO 54 “Eyi Yikiko Jila”
^ par. 5 Kutala natupwa lika vakushishika kuli Yehova tahi nyi natwechelela Satana atuhungumwise mangana tulitwamine kuzachila Kalunga? Kukumbulula chihula kana chapendamina hajila tweji kulaminangamo muchima wetu, keshi hakuvula chavyeseko natumonako. Uno lizu “muchima” lyalumbununa ika? Uno Satana nahase kupihisa ngachilihi muchima wetu? Kaha tunahase kuulama ngachilihi? Evi vihula navavikumbulula muchihande chino.
^ par. 11 LIZU VANALUMBUNUNA: Yehova atuhana uhashi wakukekesa vishinganyeka, navilinga vyetu nakumona numba nge vyuma tuli nakulinga vyakwoloka nyi chiku. Mbimbiliya yavuluka uhashi kana ngwayo chivezu. (Loma 2:15; 9:1) Nganomu vavuluka muMbimbiliya, chivezu chize vanangula naMbimbiliya cheji kuzachisanga jindongi jaYehova nakutukafwa tumone numba nge vyuma tuli nakushinganyeka, nakuhanjika chipwe kulinga vinapu vyamwaza nyi vyavipi.
^ par. 56 MAZU AKULUMBUNUNA MUVWIMBIMBI: Ndumbwetu wakumbapachisa ali nakutala mivwimbimbi haTV, kaha hinaheza mivwimbimbi yauvumbi. Shikaho ali nakushinganyeka vyuma atela kulinga.
^ par. 58 MAZU AKULUMBUNUNA MUVWIMBIMBI: Muka-kulama wakushikulu namono vaka-kole haweluka wanganda. Kaha mwatambakana vaka-kulama kuvikolo, vaze vaka-kulama kuvikolo navaputuka kusoka vikolo vyanganda nakuhakako tupachiso chakuzeneka kulangisa.