LYACHITATU nachimene haJanuary 24, 2018 vavilikile mujimbu wakulipwila kutanga yaMbetele yamuUnited States namuCanada. Vavalwezele ngwavo: Ndumbwetu Kenneth Cook, Jr., naliweze hamukana waLizavu lyaKutwaminyina lyaVinjiho jaYehova.

Ndumbwetu Cook asemukile nakukolela musouth-central Pennsylvania, U.S.A. Alinangwile muchano kuli mukwavo muka-shikola omu apwile kwakamwihi nakukumisa shikola. Kaha vamumbapachishile haJune 7, 1980. Aputukile kuzata upayiniya washimbu yosena haSeptember 1, 1982. Omu azachile upayiniya hamyaka yivali, vamusanyikile akazachile haMbetele muWallkill, New York. Ngocho haOctober 12, 1984 aputukile kuzachila haMbetele.

Hamyaka 25, Ndumbwetu Cook nazatenga milimo yakulisezaseza. Nazachilanga kulipatimende lyatala vyaKupulita mikanda nakulipatimende lyatala haMbetele yosena. Kuheta mu 1996, ambachile Jamie, kaha vosena vaputukile kuzachila hamwe haMbetele muWallkill. Jino muDecember 2009, Ndumbwetu Cook napuwenyi vavalwezele vakazachile kuWatchtower Educational Center kuPatterson, New York, kuze Ndumbu Cook akazachililenga kuLipatimende lyaKusoneka naKukumbulula Mikanda. Vakindulukile cheka nakuzachila kuWallkill hatukweji vavandende, jino kuheta muApril 2016 vavanungulwilile cheka kuBrooklyn, New York. Mwahichile kaha tukweji 5, kaha vanungulukilile kuchikota chamuWarwick, New York. Jino kuheta muJanuary 2017, Ndumbwetu Cook vamutongwele kupwa muka-kukafwa muKomiti Yakusoneka Mikanda yaLizavu Lyakutwaminyina.