CHIHANDE CHAKULINANGULA 4
Vishina Natulinangula Kuchilika Alingile Mwangana Wetu
“Eyi yinemanyinako mujimba wami. . . . Elu lunemanyinako ‘manyinga ami alushiko.’”—MATEU 26:26-28.
MWASO 16 Alisenu Yehova Mwomwo yaMwanenyi Wakuwavisa
VYUMA NATUSHIMUTWILA *
1-2. (a) Uno Yesu azachile ngachilihi mulimo wenyi, kaha atusela chakutalilaho muka hakulinga chilika chakwanuka kufwa chenyi? (b) Vilinga muka vyaYesu vize natushimutwila?
KUTALA munahase kulumbununa vyuma vyeji kusolokanga hachilika chaKwanuka Kufwa chaMwata chize cheji kupwangako mwaka himwaka tahi? Chakuzeneka kukakasana, etu vavavulu tunahase kwanuka vyuma vyeji kusolokanga kuchilika kana. Mwomwo ika? Mwomwo kachapwa chachikalu kuchilingako. Chipwe ngocho, chilika kana chapwa chachilemu chikuma. Shikaho tunahase kulihulisa ngwetu, ‘Mwomwo ika chilika kana chapwila chachashi?’
2 Omu Yesu azachilenga mulimo wenyi wakwambulula hano hamavu, anangwilenga vatu muchano mujila yayashi, yize vevwishishilenga kanawa. (Mateu 7:28, 29) Chochimwe nawa, Yesu atusela chakutalilaho chachashi twatela kukavangiza hakulinga chilika chakwanuka * kufwa chenyi. Tushimutwilenu jino hachilika kanechi nahavyuma vimwe vize ahanjikile Yesu navize alingile. Kulinga ngocho nachitukafwa tutachikize chikupu ngwetu Yesu apwa wakulinyisa, wakumika kaha nawa wazangi. Kaha natulinangula nawa omwo tunahase kumulondezezelamo.
YESU APWA WAKULINYISA
Mbolo navinyo vyapwa vifwanyisa vize vyeji kutwanukisanga nge Yesu ahanyine kuyoya chenyi mangana atusokole, nakutwanukisa nawa nge ali nakuyula mwilu (Talenu palangalafu 3-5)
3. Nganomu vasoneka hali Mateu 26:26-28, uno chilika chize alingile Yesu chapwile ngachilihi chachashi, kaha yize mbolo navinyo vyemanyinyineko ika?
3 Yesu alingile chilika chaKwanuka Kufwa chenyi hamwe navaposetolo jenyi vakushishika 11. Ambachile vyakulya Mateu 26:26-28.) Azachishile kaha mbolo yakuhona chimbalwila navinyo vize vapwile navyo halwola kana. Yesu alwezele vaposetolo jenyi ngwenyi, yize mbolo navinyo vyapwile vifwanyisa vize vyemanyinyineko mujimba namanyinga enyi, vize mwahana kupwa wana wakuvasokola. Vaposetolo pamo kavalikomokeleleko hakumona Yesu mwalinga chilika kana mujila yayashi. Mwomwo ika?
vize vazachishile haPaseka nakuvizachisa hachilika chakwanuka kufwa chenyi. (Tangenu4. Uno mazu aze Yesu alwezele Malita atukafwa ngachilihi twivwishise ovyo Yesu alingilile chilika chenyi mujila yayashi?
4 Tuchitalenu havyuma vyasolokele kuli Yesu mutukweji vakulivanga mumwaka wamuchitatu wamulimo wenyi wakwambulula. Halwola kana Yesu ayile nakumenekela masepa jenyi vaLazalu, naMalita naMaliya. Omu ahetele aputukile kuvanangula. Malita naikiye kwapwile, oloze ahungukilile kukuwahishila Yesu vyakulya vyavivulu. Omu Yesu amumwene, amuhuhumwine nakumukafwa atachikize ngwenyi ikiye kapwile nakusakiwa vyakulya vyavivuluko. (Luka 10:40-42) Mukuhita chalwola omu Yesu apwile kwakamwihi nakumujiha, alingile chilika chakwanuka kufwa chenyi mujila yayashi. Echi chasolola nge akavangijile mazu aze alwezele Malita. Uno chuma kana chasolola nge Yesu apwile mutu wangachilihi?
5. Uno jila alingilililemo Yesu chilika chenyi yasolola vyuma muka hali ikiye, kaha jila kana yalitombola ngachilihi namazu ahali Wavaka-Fwilipi 2:5-8?
5 Yesu apwilenga wakulinyisa muvyuma vyosena. Kahechi chikiko chamulingishile apwenga wakulinyisa namuvyuma alingile haufuku wamakumishilo akuyoya chenyi hamavu. (Mateu 11:29) Yesu atachikijile ngwenyi apwile hakamwihi nakuhana wana waulemu chikuma uze kanda vahanengaho lyehi mukuyoya chavatu, kaha nawa Yehova mwakamusangula nakumuhana chihela chakulipwila mwilu. Chipwe ngocho, Yesu kasakile kulivumbika ivene hakulinga chilika chakwanuka kufwa chenyi mujila yakulipwila mangana ngwenyi vaka-kumukavangiza vakanukenga kufwa chenyi mujila kanako. Oloze alwezele tumbaji twenyi vamwanukenga hakulinga chilika chakwanuka kufwa chenyi kamwe kaha mumwaka, kaha nawa mujila yayashi. (Yowa. 13:15; Koli. 1, 11:23-25) Jila alingilililemo chilika chenyi yasolola nge kapwile wakulivwimbako. Chikupu vene, tweji kwivwanga kuwaha chikuma hakutachikiza ngwetu Mwangana wetu wamwilu apwa wakulinyisa.—Tangenu Wavaka-Fwilipi 2:5-8.
6. Nge tuli muvyeseko tunahase kupwa ngachilihi vakulinyisa ngana muze apwile Yesu?
Fwili. 2:3, 4) Tushinganyekenu cheka havyuma vyasolokele haufuku wamakumishilo wakuyoya chaYesu hano hamavu. Numba tuhu Yesu atachikijile ngwenyi navamujiha mujila yayipi, oloze azakamine chikuma vaposetolo jenyi vakushishika, mwomwo atachikijile ngwenyi navalishona chikuma omu mwafwa. Shikaho haufuka kanou aputukile kuvanangula, nakuvakolezeza, nakuvafwelelesa. (Yowa. 14:25-31) Chikupu vene, Yesu azakamine vakwavo kuhambakana ivene. Shikaho twatela kufwila kulondezeza chakutalilaho chenyi.
6 Natuhasa kupwa ngachilihi vakulinyisa ngana mwaYesu? Tunahase kulinga ngocho hakuhakanga kulutwe vyuma vasaka vakwetu. (YESU APWA WAKUMIKA
7. Yesu asolwele ngachilihi nge apwile wakumika omu alingile hanakumisa lyehi kulinga chilika chaKulya chaMwata chaChingoloshi?
7 Omu Yesu alingile hanakumisa lyehi kulinga chilika chaKulya chaMwata chaChingoloshi, alingile vyuma vize vyamusolwele nge apwile wakumika. Mujila muka? Yesu alingile mwayile muchima waIse numba tuhu atachikijile ngwenyi kulinga chuma kana nachilingisa vamujihe mujila yayipi. (Mateu 26:65, 66; Luka 22:41, 42) Yesu alamine lika kulonga chenyi mangana avumbike lijina lyaYehova, nakuhakwila wata waKalunga nakulingisa nawa vatu vaze navapihilila nakwalumuka vahase kupwa nakuyoya chahaya myaka yosena. Haufuku woumwe, Yesu akafwile vaka-kumukavangiza vapwenga vakulizanga hakulitalasana naukalu wapwile nakwiza kulutwe.
8. (a) Vyuma muka Yesu alwezele vaposetolo jenyi vakushishika? (b) Omu mwahichile myaka kufuma hakufwa chaYesu, tumbaji twenyi vomikile ngachilihi hakulondezeza Mwata wavo?
8 Yesu asolwele nawa nge apwile wakumika hakuhona kulizakamina chikuma haukalu wenyi. Kaha nawa alingile ngocho hakuzakama vaposetolo jenyi vakushishika. Chilika chize alingile hanyima yakuhanga Yuta chanukishile tumbaji twenyi vaze vejile nakupwa Koli. 1, 10:16, 17) Hakusaka kukafwa vaka-kumukavangiza vapwenga lika vakushishika nakukahasa kuya mwilu, Yesu avalwezele vyuma vize ikiye naIse vasakile vakiko valinge. (Yowa. 15:12-15) Alwezele vaposetolo jenyi ngwenyi kulutwe navakamona vyeseko. Shikaho avakafwile valondezeze chakutalilaho chenyi nakuvalweza ngwenyi “likolezezenu!” (Yowa. 16:1-4a, 33) Omu mwahichile myaka, tumbaji twaYesu vapwile vakulisuula nakupwa vakumika hakulondezeza Yesu. Numba tuhu vavayanjishilenga hakulinga ngocho, oloze vatwalileho lika kulikolezeza navakwavo chamokomoko navyeseko vize vamwenenga.—Hepe. 10:33, 34.
vaka-kumukavangiza vakuwavisa vatachikize nganyo nayikafuma hamanyinga aYesu, nomu nawa navakapwa mulushiko lwaluhya. (9. Tunahase kupwa ngachilihi vakumika ngana mwaYesu?
9 Makumbi ano, tweji kupwanga vakumika hakulondezeza Yesu. Chakutalilaho, twatela kupwa vakumika numba tukafwe vandumbwetu vaze vali nakuyanjisa mwomwo yalufwelelo lwavo. Lwola lumwe vandumbwetu vanahase kuvakasa mutumenga mwomwo yakuvavangijikila. Kachi nge ukalu kana unasoloka, kaha twatela kukilikita nangolo mangana tuvakafwe nakuvahakwila. (Fwili. 1:14; Hepe. 13:19) Jila yikwavo tunahase kusolola ngwetu twapwa vakumika shina hakutwalaho lika kwambulula “nakumika.” (Vili. 14:3) Ngana mwaYesu nayetu tuli nakutwalaho lika kwambulula mujimbu waWangana chamokomoko nakutuyanjisa chipwe kutufumbukila. Chipwe ngocho, shimbu jimwe tunahase kwivwa woma. Jino vyuma muka twatela kulinga?
10. Vyuma muka twatela kulinga nge likumbi lyaKwanuka Kufwa chaMwata linapandama, kaha mwomwo ika?
10 Tweji kupwanga vakumika kachi nge natushinganyekanga halutalililo twatwama nalwo mwomwo yandando yakusokola yaKulishitu. (Yowa. 3:16; Efwe. 1:7) Nge kunasale vyalumingo vyavindende nakuheta halikumbi lyaKwanuka Kufwa chaMwata, kaha twatela kulingako vyuma vimwe mangana tusolole ngwetu twasakwilila ndando yakusokola. Twatela kutanga mijimbu yize yahanjika handando yakusokola, twatela nawa kutanga Mbimbiliya chaKwanuka Kufwa chaMwata nakushinganyeka havyuma vyasolokele kuli Yesu. Kahomu natukapwa kuchilika chaKulya chaMwata chaChingoloshi, natukevwishisa jino kanawa kulema chavifwanyisa veji kuzachisanga novyo vyemanyinako. Nge natusakwililanga Yehova naYesu havyuma vatulingila, nakutachikiza omwo vyuma kana vyatunganyalisa hamwe navakwetu, kaha nachitukafwa tupwenga nalutalililo lwakukola nakutwalaho lika kumika palanga nakusongo.—Hepe. 12:3.
11-12. Vyuma muka tunalinangula hali Yesu?
11 Kweseka navyuma tunashimutwila, tunalinangula nge Kulya chaMwata chaChingoloshi kachatunangula kaha kulema chandando yakusokolako, oloze chatunangula nawa vilinga vyamwaza atwama navyo Yesu vyakufwana nge kulinyisa nakumika. Tweji kuwahililanga hakutachikiza ngwetu Yesu uze apwa Kapilishitu Wakulitulaho mwilu, kaha nawa muka-kutulembelelako achili lika nakutwalaho kusolola vilinga kanevi. (Hepe. 7:24, 25) Shikaho hakusaka tusololenga kusakwilila chetu, twatela kupwanga kuchilika chakwanuka kufwa chaYesu ngana muze ashikile. (Luka 22:19, 20) Chilika kana cheji kupwangako halikumbi lize lyalitombola nalikumbi lyaNyisane 14 lize lyapwa likumbi lyalilemu mumwaka.
12 Vifwanyisa vyavyashi vize Yesu alwezele vaka-kumukavangiza vazachisenga hachilika chaKulya chaMwata chaChingoloshi vyatunangula nawa chuma chikwavo chachilemu chize chamulingishile ezenga nakutufwila. Omu apwile hano hamavu, vatu vamutachikijilile hachuma kanechi asolwelenga. Chuma muka vene echi?
YESU ATWAMA NAZANGI
13. Uno mukanda waYowano 15:9 naWaYowano 1, 4:8-10 walumbununa ngachilihi zangi asolola Yehova naYesu, kaha veya vanganyala kuzangi kana?
13 Yesu asolwelenga zangi atwama nayo Yehova muvyuma vyosena alingilenga. (Tangenu Yowano 15:9; WaYowano 1, 4:8-10.) Chuma chachinene alingile shina kulisuula mangana atufwile. Numba tupwa vakuwavisa chipwe “mikoko veka,” tuvosena tweji kunganyalanga kuzangi atusolwela Yehova naMwanenyi kuhichila muwana wakufwika hajishili jetu. (Yowa. 10:16; Yowa. 1, 2:2) Vifwanyisa vize Yesu azachishile hachilika chaKwanuka Kufwa chenyi, vyasolola nge azanga tumbaji twenyi nakuvazakama. Mujila muka?
Yesu alingile chilika chaKwanuka Kufwa chenyi mujila yayashi yize yinalingisanga vatu vachilinge hamyaka yayivulu, kaha nawa kukala chihela vali (Talenu palangalafu 14-16) *
14. Mujila muka Yesu asolwelelemo zangi tumbaji twenyi?
14 Yesu asolwelele zangi vaka-kumukavangiza vawavisa hakuvalweza valingenga chilika chakumwanukilaho mujila yayashi. Mukuhita chalwola, ava tumbaji vakuwavisa valingilenga chilika kana mwaka himwaka nahalwola vapwilenga muukalu wakulisezaseza nomu vapwilenga mukamenga. (Kuso. 2:10) Kutala chapwile chachashi kwononoka lushimbi avahanyine Yesu tahi? Eyo.
15-16. Vandumbwetu vamwe vanahasenga ngachilihi kulinga chilika chaKulya chaMwata chaChingoloshi namulwola lwalukalu?
15 Kufuma halwola kana swi nakulelo lino, vaka-Kulishitu vamuchano vanakavangizanga jila azachishile Yesu hakulinga chilika chakwanuka kufwa chenyi. Lwola lumwe vanalinginga ngocho oku vali muukalu. Chakutalilaho, omu ndumbwetu Harold King apwile mukamenga kauka wenyi muChina, alingile chilika kana. Azachishile uhashi wenyi hakulava makumbi kuchina likumbi lyachilika nalimuhita. Vyuma apwile navyo vikiko azachishile kupwa vifwanyisa hakulinga chilika kana mukusweka. Omu lwahetele lwola lwachilika, aputukile kwimba myaso uka wenyi nakulomba, nakuhanjika chihande chaMbimbiliya.
16 Tutalenu nawa hachakutalilaho chikwavo. HaJita yaKaye yamuchivali, vandumbwetu vamapwevo vaze vapwile muchilombo chakulamina vafunge vahakile kuyoya chavo muponde hakulinga chilika chaKulya chaMwata chaChingoloshi. Chuma chavakafwile kulinga echi chilika mukusweka shina mwomwo chilika
kana chapwa chachashi. Vahanjikile ngwavo: “Tuvosena twemanyine mumuseta, kaha mukachi mwapwile chitwamo haze hapwile vifwanyisa. Hachitwamo kana twafwikileho lihina litoma. Twamunyikile kandulu, mwomwo twashinganyekele ngwetu nge natumunyika manongo, kaha vatu navatumona. . . . Twalwezele Yehova ngwetu natutwalaho lika kuhakwila lijina lyenyi lyajila.” Chikupu vene vandumbwetu vasolwele lufwelelo lwakukola. Echi chasolola nge Yesu atuzanga hakutulweza tulingenga chilika chakumwanukilaho mujila yayashi, numba vene nge tuli muukalu.17. Vihula muka twatela kulihulisa?
17 Omu tuli nakupandama kuKwanuka Kufwa chaMwata, twatela kulihulisa vihula vino: ‘Uno nanguhasa kulondezeza ngachilihi Yesu hakusolola zangi? Kutala ngweji kushinganyekanga chikuma havyuma vasaka vandumbwami kuhambakana vize ngwasaka ami tahi? Uno ngwasaka kaha vakwetu vangulingilenga vyuma vyamwaza nyi ngweji kushinganyekanga haukalu wavo?’ Tutwalenuho kulondezeza Yesu ‘hakuzakamanga vakwetu.’—Petu. 1, 3:8.
SHINGANYEKENUNGA HAVISHINA KANA
18-19. (a) Vyuma muka navakanuka vatu omu chilika chaKwanuka Kufwa chaMwata nachikakuma? (b) Vyuma muka muli nakufwila kulinga?
18 Chilika chaKwanuka Kufwa chaKulishitu kalinwomu chikume. Omu Yesu “mwakeza” haluyando lwalunene, mwakakungulula vasalaho vaze “asakula” nakuya navo mwilu. Aha hakiko natukalitwamina kulinga chilika chaKwanuka Kufwa chaMwata.—Koli. 1, 11:26; Mateu 24:31.
19 Tachikizenu ngwenu numba tuhu katweshi kukalinganga chilika chaKwanuka Kufwa chaMwatako, oloze tunafwelela chikupu ngwetu vatu jaYehova navakanukanga lika omwo Yesu asolwele zangi, nakulinyisa, nakumika. Halwola kana, vaze vayilenga kuchilika kana navakalwezangako vakwavo vaze navakapwa navo halwola kana nganyo yachilika kana. Oloze hakusaka tunganyale kuchilika kana oholyapwa, twatela kulondezeza Yesu hakupwa vakulinyisa, nakumika nazangi. Kupwa navilinga kana nachitukafwa tufwelele chikupu ngwetu Yehova mwakatufweta.—Petu. 2, 1:10, 11.
MWASO 13 Kulishitu Ikiye Chakutalilaho Chetu
^ par. 5 Kalinwomu tupwenga nachilika chaKulya chaMwata chaChingoloshi mangana tukanuke kufwa chaYesu Kulishitu. Chilika kana cheji kutunangulanga vilinga vyamwaza atwama navyo Yesu vyakufwana nge kulinyisa, nakumika nazangi. Muchihande chino natushimutwila havyuma navitukafwa tupwenga navilinga vyamwaza ngana vize atwama navyo Yesu.
^ par. 2 LIZU VANALUMBUNUNA: Lizu kwanuka vanazachisa hano lyalumbununa kulinga vyuma vimwe vyakulipwila mangana tusolole ngwetu twavumbika chilika chimwe chipwe mutu.
^ par. 56 MAZU AKULUMBUNUNA MIVWIMBIMBI: Vali nakulinga chimweso chakusolola omwo vandumbwetu vakushishika vamulikulukaji lyamyaka lyakulivanga valingilenga chilika chaKwanuka Kufwa chaMwata; Kusongo yaji 1800; Vali muchilombo chakulamina vafunge muchiyulo chavaka-Nazi; Vali muzuvo yawangana muSouth America halwola lwanonga.