Harvey asemukile navasongo jenyi vatatu vamalunga. Tanga yavo yalinangwile muchano muji 1930 mumbaka yaMidland Junction, mulifuchi lyaAustralia, halwola kwapwile uhutu. Harvey azangilenga Yehova, ngocho vamumbapachishile omu apwile namyaka yakusemuka 14. Kaha alinangwile kwitavilanga kala mulimo navamuhana muchikungulwilo. Hakuwana nge apwile kanyike, likumbi limwe akanyine kutanga jipalangalafu jaKaposhi Kakutalila hakukunguluka, mwomwo yakushinganyeka ngwenyi katelemoko. Oloze ndumbwetu umwe amulwezele ngwenyi: “Nge mutu umwe muliuka lyaYehova mwakuhana mulimo, kaha namono ngwenyi unatemo.”—Koli. 2, 3:5.

Ami namama, nayayami wapwevo, twalinangwilile muchano muEngland. Hakavanga tata akanyinenga kulinangula muchano. Oloze mukuhita chamyaka, aputukile jino kulinangula. Vangumbapachishile omu ngwapwile namyaka 9, numba tuhu tata kasuulukileko. Ngwalitomenene kukazata mulimo waupayiniya nawaumishonali. Oloze tata kazangile nguzate upayiniyako, ngwenyi kuvanga ngunahetesa myaka 21. Ami kangwasakile kuvandamina halwola  lwalusuku nganako. Ngocho omu ngwapwile namyaka yakusemuka 16, tata angwitavishile nguyenga nakutwama nayayami wapwevo, uze apwilenga kuAustralia. Kahomu ngwapwile namyaka 18, ngwaputukile jino kuzata upayiniya.

Omu ngwapwile muAustralia ngwaliwanyine naHarvey. Tuvosena twafwililile kuzachila Yehova mumulimo waumishonali. Kuheta mu 1951 twalimbachile. Omu twazachile upayiniya hamyaka yivali, vatutumine jino mumulimo wakujinguluka. Ngalila vatuhanyine kuzachila yapwile yayinene chikuma, ngocho twatambukilenga jitunda jajisuku naminyau.

Mu 1954, vatusanyikile kushikola yaNgileyate yakusokesa 25. Twamwene jino ngwetu kalinwomu tuzate mulimo waumishonali twafwilililile. Twahetele munganda yaNew York nambopolo, kaha twaputukile kulinangula vyuma vyakujiminyina vyamuMbimbiliya. Kushikola kana vatunangwilenga nawa nalilimi lyaSpanish. Echi chakaluhwililile chikuma lunga lyami mwomwo lilimi lyenyi lyapwile lyalilemu.

Omu twaputukile kulinangula vaka-kunangula vavilikile ngwavo, vosena vaze vanakusaka kuya nakuzachila kuJapan vatela kulisonekesa mangana valinangule lilimi lyaJapanese. Oloze etu twashinganyekele ngwetu, liuka lyaYehova lyatela kutusakwila kwakuya. Nakushimbula chiku, ndumbwetu Albert Schroeder, uze apwile muka-kunangula amwene ngwenyi katwalisonekeseleko. Kaha atulwezele ngwenyi: “Mwatela kushinganyekaho kanawa hachuma kana.” Omu twahonene kulisonekesa, ou ndumbwetu ejile cheka nakutulweza ngwenyi: “Ami navakwetu vaka-kuminangula tunamisonekesa lyehi. Shikaho putukenu jino kulinangula lilimi kana.” Lilimi lyaJapanese lyapwile lyalyashi kulinangula kuli lunga lyami, kuhambakana lyaSpanish.

Twayile kuJapan mu 1955. Mulifuchi kana mwapwile kaha vaka-kwambulula 500. Lunga lyami Harvey apwile namyaka 26, ami ngwapwile namyaka 24. Vatutumine kuzachila munganda yaKobe, muze twazachililile myaka yiwana. Kufumaho, twevwile kuwaha omu vatutumine cheka mumulimo wakujinguluka kaha twazachililile kwakamwihi nanganda yaNagoya. Twalivwishilenga kuwaha kuzachila hamwe navandumbwetu, kaha nawa twazangilenga vyakulya vyakuchihela kana. Ngalila nawa yapwile yamwaza. Nakushimbula chiku, Yehova atuhanyine mulimo weka.

Hanyima yakuzata myaka yitatu mumulimo wakujinguluka, mutango waJapan watulwezele tuyenga nakuzachila kulifuchi lyaTaiwan kuze kwapwilenga  vatu vaze vahanjikilenga lilimi lyaAmis. Vandumbwetu vakungalila kana vaputukile kusosoloka kulufwelelo. Ngocho vasakiwile ndumbwetu uze atachikiza kanawa lilimi lyaJapanese mangana avakafwe. * Hakuwana nge twazangile kuzachila muJapan, ngocho chatukaluhwilile kwitavila kuya nakuzachila kuTaiwan. Oloze lunga lyami alinangwile kwitavila kaha mulimo mwamuhana Yehova, shikaho twayile.

Twahetele muTaiwan muNovember 1962. MuTaiwan mwapwile vaka-kwambulula 2,271 kaha vavavulu vahanjikilenga lilimi lyaAmis. Oloze twasakiwile kuvangila kulinangula lilimi lyaChinese. Twapwile namukanda umwe wamulilimi lyaChinese namuka-kutunangula uze katachikijile Chingeleshiko.

Omu twahetele muTaiwan, lunga lyami Harvey vamutongwele kupwa muka-kutwaminyina mutango. Hakuwana nge mutango wapwile waundende, ngocho lunga lyami azachilenga chalumingo chimwe muofesi yenyi, kaha vyalumingo vitatu mukakweji, azachilenga hamwe navandumbwetu vahanjika lilimi lyaAmis. Lwola lumwe azachilenga mwakalama wangalila. Kaha nawa ahanjikilenga navihande hakukunguluka chachihanda. Nge lunga lyami ahanjikilenga vihande mulilimi lyaJapanese, kachi vandumbwetu vevwilengako. Oloze fulumende yetavishile mauka akwitava azachisenga kaha lilimi lyaChinese. Shikaho apwile nakulisumasuma kuhanjika vihande mulilimi lyaChinese kaha ndumbwetu weka apwile nakwalumuna mulilimi lyaAmis.

Lifuchi lyaTaiwan lyapwile muchiyulo chamaswalale. Ngocho vandumbwetu vatelelele kutambula lisesa numba tupwenga nakukunguluka chachinene. Kutambula lisesa chapwilenga chachikalu chikuma, kaha nawa tupokola valangishilenga kutwitavisa. Nge tupokola kavatuhanyine lisesa muchalumingo chakukungulukako, kaha lunga lyami ayilenga kuofesi yavo nakuvatwaminyina swi noho navakatwitavishila. Echi chalingishilenga vatwitavise washi, mwomwo tupokola vevwilenga sonyi kuvavandamina kuli litunduke.

Havyalumingo twazachilenga navandumbwetu, twatambukilenga jitunda jajipili nakuzauka tulwiji haola yamuundu chipwe kuzombwesaho. Ngunakwanuka pili yatete ngwakandukile. Omu twakumishile kulyaula, twanyinyine sacha nalwola lwa 5:30, kaha twakasulukilile kungalila yakwakusuku. Twazaukile kalwiji, nakuputuka jino kukanduka pili yayinene chikuma. Pili kana yapwile yakulunduka chikuma.

Likumbi kana nachimene, lunga lyami azachililile hamwe navandumbwetu muwande, kaha ami ngwazachile uka wami mungalila muze mwapwilenga vatu vahanjikilenga lilimi lyaJapanese. Kuheta nalwola lwa 13 koloko, ngwafwile chizava, mwomwo ngwazachile nazala likumbi lyosena lyamuundu. Kufumaho ngwaliwanyine nalunga lyami, oku naliseze lyehi navaze vandumbwetu. Atambasanyine jimangazini namaulu atusumbi atatu amavisu. Angulwezele mwakuwalila hakutuulamo muteta nakuputuka kukwekwenya. Numba tuhu chapwile chachikalu kulya liulu lyauvisu, oloze ngwalile. Ami ngwalile avali mangana ngukwateko ngolo, mwomwo nge ngwalezumukile, kachi lunga lyami kahashile kunguvelekako.

Omu twapwile kukukunguluka chachihanda, kwasolokele chuma chakulipwila. Twapwile nakutwama  hembo lyandumbwetu kwakamwihi naZuvo yaWangana. Vatu vahanjika lilimi lyaAmis vamona kusana kupwa chachilemu. Ngocho pwevo lyakalama wakujinguluka atuwahishilile meya akusana. Hakuwana nge lunga lyami Harvey apwile chikuma namilimo, angulwezele ngulivange kusana. Atuwahishilile mbekete yimwe yameya azuma, kaha yikwavo nawa yameya atuta, nalilonga lyakusanyina. Meya kana awahakile haweluka kwakulitalasana naZuvo yaWangana kuze vapwile nakuzachila vandumbwetu vamalunga. Kaha ngwamulombele lihina mangana ngutanjike ngulijikinyineho, oloze ikiye angunehelelele lipapilo lyahwanyanya. Ngwasakile kuya nakusanyina kusenge yazuvo, oloze kwapwile vapato vaundele. Shikaho ngwevwile woma ngwami navanguchomona. Ngwashinganyekele ngwami: ‘Chinasoloka nge vandumbwami vamalunga vali namilimo yavo. Nge kangweshi kusanako, kaha nanguvahukanyisa. Ngocho ngunahase tuhu kusana.’ Kaha ngwasanyine.

Lunga lyami amwene ngwenyi, vandumbwetu vahanjika lilimi lyaAmis kavapwile nakuzovoloka kushipilituko, mwomwo vavavulu kavatachikijile kutangako. Kaha nawa kavapwile namikanda yamulilimi lyavoko. Hakuwana nge halwola kana lilimi lyaAmis vaputukile kulisoneka, ngocho chapwile chakutamo kunangula vandumbwetu mwakutangila lilimi lyavo. Numba tuhu mulimo kana wapwile waukalu, oloze wakafwile vandumbwetu valinangule hali Yehova mulilimi lyavo. Mikanda yamulilimi lyaAmis vaputukile kuyisoneka kusongo yaji 1960, kaha kuheta mu 1968, vaputukile kulovola Kaposhi Kakutalila mulilimi kana.

Oloze fulumende yakanyishile mikanda yize kayapwile mulilimi lyaChineseko. Echi chalingishile Kaposhi Kakutalila wamulilimi lyaAmis vamusoneke mujijila yakulisezaseza. Chakutalilaho, kafwe hamwaka umwe nachimbwa, twazachishilenga mangazini yize yapwile namazu mumalimi avali, lilimi lyaChinese nalilimi lyaAmis. Vatu vaze vasakilenga kutachikiza vyuma tunakulinga, vamwenenga kwijiva nge tuli nakunangula kaha vatu lilimi lyaChinese. Kufuma vene haze, liuka lyaYehova linalovolanga mikanda mulilimi lyaAmis mangana likafwe vatu valinangule muchano wamuMbimbiliya.—Vili. 10:34, 35.

Muji 1960 namuji 1970, vandumbwetu vavavulu vaze vahanjika lilimi lyaAmis, kavakavangijilenga  jindongi jaKalunga jakwolokako. Hakuwana nge kavevwishishile jindongi jamuMbimbiliyako, ngocho vamwe valingilenga ujila, nakupwa vitakwa, nakunwa makanya, navitumbo vyakupendesa. Twatambukililenga vikungulwilo vyavivulu, mangana lunga lyami akafwe vandumbwetu vatachikize omwo Yehova amona vyuma kana. Haungeji umwe, hakiko hatusolokelele ukalu uze ngwavulukanga kumaputukilo achihande chino.

Vandumbwetu vamwe vakulinyisa valumwineko vilinga vyavo. Oloze vavavulu kavalingile ngochoko. Ngocho vaka-kwambulula muTaiwan vaputukile kukehelako, kufuma ha 2,450 kuheta ha 900 mumyaka 20. Chuma kana chatuhombesele chikuma. Chipwe ngocho twatachikijile ngwetu Yehova keshi kuhasa kukisula liuka lyavatu vavilinga vyavipiko. (Koli. 2, 7:1) Kutwala muze, vandumbwetu vaputukile kuzachila Yehova mujila yitoma. Kaha oholyapwa jino muTaiwan muli vaka-kwambulula vakuhambakana 11,000.

Kufuma vene muji 1980, vandumbwetu vamuvikungulwilo vyazachisa lilimi lyaAmis vazovolokelenga chikuma. Echi chalingishile lunga lyami ahake mangana kukukafwa vikungulwilo vyazachisa lilimi lyaChinese. Lunga lyami akafwile malunga javandumbwetu vamapwevo vavavulu mangana vapwenga Vinjiho jaYehova. Likumbi limwe awahililile chikuma omu amwene lunga lyandumbwetu umwe mwalomba kuli Yehova halwola lwatete. Nayami nawa ngunalivwisanga kuwaha kukafwa vatu vamwaza michima vapandame kuli Yehova. Kaha nawa ngwalivwishilenga kuwaha kuzachila hamutango waTaiwan hamwe kaha navana vachilongesa chami vavali.

Oholyapwa jino ngwapwa ngutuliwe. Twatwamine muulo kafwe myaka 59. Kaha lunga lyami afwile namusongo wakasa haJanuary 1, 2010. Azachile mulimo washimbu yosena kafwe hamyaka 60. Nguchili lika nakwanuka lunga lyami. Ngwalivwishilenga kuwaha kuzachila hamwe nenyi mumafuchi avali. Twalinangwile kuhanjika malimi avali amakalu akuAsia, kaha lunga lyami alinangwile namwakuwasonekela.

Omu mwahichile myaka yiwana, Lizavu lyaKutwaminyina lyangulwezele ngukinduluke kuAustralia, mwomwo yaushinakaji. Hakavanga ngwasakile kukana. Oloze lunga lyami angunangwile kwitavilanga kala mulimo navanguhana muliuka lyaYehova, ngocho ngwetavililile kuya. Kutwala muze ngwamwene jino nganyo yakwitavila kuya kuAustralia.

Makumbi ano ngwazachila hamutango waAustralasia. Kaha nawa ngweji kulivwisanga kuwaha kupwa hamwe navandumbwami muchikungulwilo kusongo yachalumingo. Nge kuneza vangeji vaze vahanjika lilimi lyaJapanese chipwe lyaChinese, ami yami ngweji kuvahichisangamo vatale chihela. Nguli nakutalilila kulikumbi lize Yehova mwakasangula lunga lyami, uze alinangwile kwitavila kala mulimo amuhanyinenga.—Yowa. 5:28, 29.