1. Uno vatu makumbi ano veji kusololanga ngachilihi ngwavo kavazanga vakwavoko?

MBIMBILIYA yahanjikilile chimweza ngwayo, hamakumbi akukuminyina vatu kaveshi ‘kukazanganga vakwavoko.’ (Chimo. 2, 3:1, 3) Mazu kana ali nakutesamo makumbi ano. Chakutalilaho, visemi vamwe valilukulula nakuhona kulihanjikisanga. Ngocho chalingisa vana vashinganyeke ngwavo kavavazangako. Lwola lumwe, navatu vaze vali mutanga yoyimwe kavalizanga chikumako. Chakutalilaho, muka-kukafwa jitanga umwe ambile ngwenyi, vatu mujitanga kavavula kulihanjikisako mwomwo yakuhungukila kujikopyuta, najishinga namakina eka. Numba tuhu vatu kana vatwama muzuvo yoyimwe, oloze kavalitachikiza kanawako.

2-3. (a) Kweseka naWavaka-Loma 12:10, veya twatela kuzanganga chikuma? (b) Vyuma muka natushimutwila muchihande chino?

² Katwazanga shipilitu yakaye yakuhona zangi yitwalumuneko. (Loma 12:2) Oloze twatela kuzanganga chikuma vandumbwetu muchikungulwilo, ngana muze twazanga vausoko wetu. (Tangenu Wavaka-Loma 12:10.) Uno zangi kana yapwa ngachilihi? Yapwa zangi yize yeji kulingisanga vatu mutanga valikate chikuma. Eyi yikiko zangi twatela kusolwelanga navandumbwetu muchikungulwilo, vaze vapwa vausoko wetu vakushipilitu. Kachi nge natuzanganga chikuma vandumbwetu, kaha nachitukafwa tuzachilenga hamwe Yehova nakuwahilila.—Mika 2:12.

³ Tushimutwilenu havyuma tunahase kulinangula kuvyakutalilaho vyamuMbimbiliya, vize navitukafwa tuzangenga chikuma vakwetu.

4. Uno mukanda WaYakova 5:11, watukafwa ngachilihi tutachikize ngwetu Yehova atuzanga?

⁴ Mbimbiliya yatulweza vilinga vyaYehova vyamwaza. Chakutalilaho, yamba ngwayo “Kalunga ikiye zangi.” (Yowa. 1, 4:8) Kutachikiza ngwetu Yehova ikiye zangi, cheji kutupandamisanga kuli ikiye. Kaha nawa Mbimbiliya yamba ngwayo Yehova “atwama nazangi chikuma.” (Tangenu WaYakova 5:11.) Mazu kana asolola nge Yehova atuzanga chikupu.

5. Uno Yehova eji kusololanga ngachilihi muchima wakutetela, kaha tunahase kumulondezeza ngachilihi?

⁵ Hali WaYakova 5:11 vavulukaho nawa ngwavo Yehova apwa muka-kutetela. (Kulo. 34:6) Eji kututetelanga hakutukonekela jishili jetu. (Samu 51:1) MuMbimbiliya, lizu kutetela kalyalumbununa kaha kukonekela mutuko, oloze lyalumbununa nawa kumwivwila keke nakumukafwa nge ali nakumona ukalu. Yehova amba ngwenyi atwama namuchima wakutetela chikuma, kuhambakana muze chisemi wapwevo eji kutetelanga mwanenyi. (Isa. 49:15) Nge tuli muukalu, Yehova eji kutwivwilanga keke nakutukafwa. (Samu 37:39; Koli. 1, 10:13) Nayetu twatela kutetelanga vandumbwetu hakuvakonekelanga nakuhona kuvalaminanga koko. (Efwe. 4:32) Jila yikwavo yayilemu yakusolwelamo ngwetu twatetela vandumbwetu shina kuvakafwa nge vali nakumona ukalu. Nge zangi nayitulingisa tutetelenga vakwetu, kaha natusolola ngwetu tuli nakulondezeza Yehova uze atwama nazangi yayinene.—Efwe. 5:1.

6. Uno Yonatane naNdavichi valisolwelelele ngachilihi zangi?

⁶ MuMbimbiliya mwatwama mijimbu yavatu vakuhona kukupuka vaze vasolwelenga zangi chikuma. Chakutalilaho chimwe shina chaYonatane naNdavichi. Mbimbiliya ngwayo: “Yonatane alikwachile usepa naNdavichi, kaha amuzangile chikuma nganomu alizangile ivene.” (Samwe. 1, 18:1) Ndavichi  vamuwavishile mangana aswane Mwangana Saulu. Echi chalingishile Saulu ahunge chikuma Ndavichi nakusaka kumujiha. Oloze Yonatane, mwana Saulu kakundwijile ise mangana vajihe Ndavichiko. Yonatane naNdavichi valishikile ngwavo navatwalaho kupwa vasepa namutu nakulikafwanga.—Samwe. 1, 20:42.

7. Chuma muka chatelelele kuhonesa Yonatane kulikata usepa naNdavichi?

⁷ Yonatane naNdavichi valisolwelelele zangi yakulipwila numba tuhu kwapwile vyuma vize vyatelelele kuvahonesa kupwa vasepa namutu. Chakutalilaho, Yonatane azombokele Ndavichi namyaka 30 yakusemuka. Echi kachi chalingishile Yonatane ashinganyeke ngwenyi keshi kuhasa kulikata usepa nakanyike wamundendeko. Oloze kashinganyekele ngochoko, avumbikilenga chikuma Ndavichi.

8. Chuma muka chalingishile Yonatane apwenga sepa lyaNdavichi wamwenemwene?

⁸ Hakuwana nge Yonatane apwile mwanamwangana Saulu, ikiye atelelele kuswana halitanda lyaise. Ngocho kachi evwililile Ndavichi lwiso. (Samwe. 1, 20:31) Oloze Yonatane apwile wakulinyisa, kaha nawa wakushishika kuli Yehova. Shikaho akundwijile vishinganyeka vyaYehova vyakusakula Ndavichi kupwa mwangana. Kaha nawa apwile wakushishika kuli Ndavichi numba tuhu kulinga ngocho chalingishile Saulu apihilile.—Samwe. 1, 20:32-34.

9. Uno Yonatane evwililenga Ndavichi lwiso tahi? Lumbununenu.

⁹ Yonatane azangile chikuma Ndavichi, ngocho kamwivwililile lwisoko. Yonatane apwile kuluwa muka-kwasa jita, kaha nawa liswalale wangolo. Ikiye naise Saulu vavatachikijile kupwa “vaka-jimbushi kuhambakana vangonga,” kaha nawa “vaka-ngolo kuhambakana vandumba.” (Samwe. 2, 1:22, 23) Echi chatelelele kulingisa Yonatane alitukwojole hauhashi apwile nawo. Oloze kapwile namuchima wakulipecha chipwe walwisoko. Yonatane azangile Ndavichi mwomwo apwile wakumika, nakupendamina hali Yehova. Omu Ndavichi ajihile Ngolyate, hakiko Yonatane aputukile kumuzanga chikuma. Uno tunahase kusolola ngachilihi zangi kana kuli vandumbwetu?

10. Uno kulizanga chikuma navakwetu nazangi yakufuma kumuchima chalumbununa ika?

¹⁰ Mbimbiliya yatulweza “tulizangenga chikuma navakwetu nazangi yakufuma kumuchima.” (Petu. 1, 1:22) Yehova atuhana chakutalilaho. Atuzanga chikuma. Shikaho nge natupwa vakushishika kuli ikiye, kaha mwatwalaho kutuzanga. (Loma 8:38, 39) Lizu lyachiHelase valumuna ngwavo “chikuma” lyalumbununa nawa “kutanduula,” chuma chipwe “kulikanya.” Shikaho lwola lumwe twatela kulikanyanga, chipwe ngwetu kuzata nangolo mangana tusolwele vandumbwetu zangi. Numba nge vanatulingi mwamupi kuli vakwetu, twatela ‘kuliulanga tutenga twavo muzangi, nakufwilanga kulama kulinunga chetu hamwe mushipilitu, chize cheji kutununganga hamwe mukuunda.’ (Efwe. 4:1-3) Nge natuzata nangolo mangana tutwamenga “mukuunda,” kaha nachitukafwa tuliulenga tutenga twavandumbwetu. Kaha nawa natuvamonanga nganomu avamona Yehova.—Samwe. 1, 16:7; Samu 130:3.

11. Mwomwo ika chinahase kupwa chachikalu lwola lumwe kuzanga chikuma vakwetu?

¹¹ Kuzanga chikuma vandumbwetu kachapwa chachashi lwola lwosenako, chikumanyi nge tunatachikiza tutenga twavo.  Pamo ou ukiko ukalu vamwenenga navaka-Kulishitu vamwe vakulivanga. Chakutalilaho, chasoloka nge Yuwochiya naSunduke valivwishilenga kuwaha ‘kukilikichila hamwe naPaulu mumujimbu wamwaza.’ Oloze kutwala muze, kwapwile chuma chize chavalingishile vahone kulivwasana. Ngocho Paulu avalembelelele mangana “vapwenganga navishinganyeka vyovimwe muli Mwata.”—Fwili. 4:2, 3.

12. Chuma muka nachitukafwa tuzangenga chikuma vandumbwetu?

¹² Chuma muka nachitukafwa tuzangenga chikuma vandumbwetu makumbi ano? Kachi nge natutachikizanga kanawa vandumbwetu, kaha nachipwa chachashi kuliulanga tutenga twavo, nakuvazanga chikuma. Tunahase kulikata navo usepa chamokomoko namyaka yavo yakusemuka, chipwe chisemwa chavo. Anukenu ngwenu numba tuhu Yonatane azombokele Ndavichi namyaka 30 yakusemuka, oloze alikachile nenyi usepa wakukola. Kutala namwitavila kulikata usepa nandumbwenu wakanyike chipwe wamukulwane tahi? Nge namulinga ngocho, kaha namusolola ngwenu ‘mwazanga vandumbwenu vosena.’—Petu. 1, 2:17.

13. Chuma muka chinahase kutulingisa tuhone kulipandamanga navatu vosena muchikungulwilo?

¹³ Uno kuzanga chikuma vandumbwetu chalumbununa nge vosena natuvazanganga mwomumwe tahi? Nduma. Kacheshi kuhasa kupwa ngochoko. Kachapwa chakuhenga kulipandama kuvatu vamwe kuhambakana vakwavoko. Tweji kulipandamanga navatu vaze vasaka vyuma vize twasaka etu. Numba tuhu Yesu avulukilenga vaposetolo vosena ngwenyi “masepa” jenyi, oloze azangile chikuma Yowano. (Yowa. 13:23; 15:15; 20:2) Chipwe ngocho, Yesu kamwenenga Yowano kupwa wamulemu kuhambakana vakwavoko. Chakutalilaho, omu Yowano nandumbwenyi Yakova vamulombele vihela vyavilemu muWangana waKalunga, Yesu avakumbulwile ngwenyi: “Kutwama kulivoko lyami lyachilyo chipwe kuchimoswe keshi yami ngweji kuchihanangako.”  (Mako 10:35-40) Nayetu nawa twatela kulondezeza Yesu, hakuhona kumonanga masepa jetu kupwa vavalemu kuhambakana vandumbwetu veka. (Yako. 2:3, 4) Echi nachitukafwa tuhone kuneha kahandwa muchikungulwilo.—Yuta 17-19.

14. Kweseka naWavaka-Fwilipi 2:3, chuma muka nachitukafwa tuhone kupwa nashipilitu yakulipecha?

¹⁴ Kulisolwelanga chikuma zangi navandumbwetu nachitukafwa tuhone kupwa nashipilitu yakulipecha. Anukenu ngwenu Yonatane kapwile namuchima wakulipecha naNdavichi, chipwe kumwivwila lwiso hakumusakula apwenga mwanganako. Tuvosena tunahase kulondezeza Yonatane. Katwatela kwivwilanga vakwetu lwiso mwomwo yauhashi wavoko, oloze twatela ‘kulinyisa nakumona vakwetu ngwetu vatuhambakana etu.’ (Tangenu Wavaka-Fwilipi 2:3.) Anukenu ngwenu, mutu himutu nahase kulinga vyuma vize navinganyalisa chikungulwilo. Nge natupwanga tuvakulinyisa, kaha natumonanga vilinga vyamwaza vyavandumbwetu, nakuvalondezeza.—Koli. 1, 12:21-25.

15. Chuma muka munalinangula kumujimbu waTanya navana venyi?

¹⁵ Omu tweji kumonanga ukalu mukuyoya chetu, Yehova eji kutusolwelanga zangi, nakutukafwa kuhichila muli vandumbwetu. Ivwenu vyuma vyasolokele kutanga yimwe muUnited States hanyima yakukunguluka likumbi lyamuchivali lyaKukunguluka chaMafuchi Amavulu, chamu 2019 chakwamba ngwavo, “Zangi Kayakumako.” Tanya, chisemi wavana vatatu ambile ngwenyi: “Omu twapwile nakukinduluka kuHotela, minyau yimwe yapipukile mujila, kaha yejile nakuveta muminyau yetu. Numba tuhu naumwe wauchi alemanyine,  oloze omu twalovokele muminyau twapwile nakulichikimina. Ndumbwetu umwe uze apwile nakufuma naikiye kukukunguluka, atusanyikile tuyenga muminyau yenyi. Kwapwile nawa vandumbwetu veka vaze vemanyine. Vapwile vandumbwetu vatanu vaze vafumine kuSweden. Ami namwanami wapwevo vatupakachile mukasamba kuli vandumbwetu vamapwevo. Kahechi chatuvendejekele chikuma. Ngwavalwezele ngwami enu vandumbwami kanda namulizakaminako, natupwa kaha kanawa. Chipwe ngocho, ava vandumbwetu kavatusezeleko swi nomu vejile vaka-chipatela. Kaha nawa vatuhanyine vyuma vyakulikafwa navyo. Yehova atusolwelelele zangi halwola kanelu twapwile muukalu. Vyuma twahichilemo vyatulingishile tuzange chikuma vandumbwetu, nakuzanga chikuma Yehova nakumusakwililanga.” Kutala muli nakwanuka omu ndumbwenu amisolwelelele chikuma zangi halwola mwapwile muukalu tahi?

16. Mwomwo ika twatela kulizanga chikuma navakwetu?

¹⁶ Tutalenu nganyo yeji kufumanga hakulizanga chikuma navakwetu. Tweji kuvendejekanga vandumbwetu kachi nge vali muukalu. Tweji kukafwanga vandumbwetu mangana tuzachile hamwe Yehova mukulinunga. Tweji kusololanga hatoma ngwetu twapwa tutumbaji twaYesu. Kahechi cheji kulingisanga vatu vamwaza michima vaputuke kuzachila Yehova. Chachinenenyi, tweji kwalisanga Yehova, “Setu muka-kutetela, kaha nawa Kalunga muka-kuvendejeka chosena.” (Koli. 2, 1:3) Shikaho tuvosena tutwalenuho kulizanganga chikuma navandumbwetu.