CHIHANDE CHAKULINANGULA 4
Ovyo Tweji Kuyilanga kuChilika chaKwanuka Kufwa chaMwata
“Lingenunga lika ngocho mungwanukilengaho ami.”—LUKA 22:19.
MWASO 20 Watuhanyine Mwanove Wakulipwila
VYUMA NATUSHIMUTWILA *
1-2. (a) Likumbi muka tweji kwanukanga chikuma vatu twazanga vaze vafwa? (b) Chuma muka alingile Yesu haufuku wamakumishilo shimbu kanda afwenga?
TWEJI kwanukanga lika vatu twazanga vaze vafwa numba tuhu hanahichi myaka kufuma halwola luze vafwile. Tweji kuvanukanga chikumanyi nge tunahete hamakumbi aze vafwile.
2 Mwaka himwaka, tweji kupwanga hamukana wavatu vavavulu mukaye kosena vaze veji kulikungululanga mangana vanuke kufwa chamutu twazanga chikuma, Yesu Kulishitu. (Petu. 1, 1:8) Tweji kulikungululanga mangana twanuke mutu uze ahanyine kuyoya chenyi kupwa ndando yakutusokola kushili nakukufwa. (Mateu 20:28) Shikaho, Yesu asakile vaka-kumukavangiza vanukenga kufwa chenyi. Haufuku wamakumishilo shimbu kanda afwenga, aputukile kulya chachingoloshi chakulipwila nakuhana lushimbi ngwenyi: “Lingenunga lika ngocho mungwanukilengaho ami.”—Luka 22:19.
3. Vyuma muka natushimutwila muchihande chino?
3 Havatu vavavulu vaze veji kupwanga kuchilika chaKwanuka Kufwa chaMwata, vavandende kaha vakiko vatwama nalutalililo lwakukayoyela mwilu. Oloze vavavulu vatwama nalutalililo lwakukayoyela hano hamavu. Muchihande chino, natushimutwila ovyo mazavu osena avali eji kufwilanga kupwa kuchilika chaKwanuka Kufwa chaMwata mwaka himwaka. Natushimutwila nawa omwo tweji kunganyalanga hakupwa kuchilika kana. Tuvangilenu kushimutwila ovyo vawavisa veji kupwilanga kuchilika kana.
OVYO VAWAVISA VEJI KUPWILANGA KUCHILIKA KANA
4. Mwomwo ika vawavisa veji kulilanga mbolo nakunwa vinyo hachilika chaKwanuka Kufwa chaMwata?
4 Mwaka himwaka, vaka-Kulishitu vawavisa vaze veji kupwanga kuchilika chaKwanuka Kufwa chaMwata veji kulyanga mbolo nakunwa vinyo. Mwomwo ika chapwila chakutamo kuli vakiko kulya mbolo nakunwa vinyo? Hakusaka tukumbulule chihula kana, shinganyekenu vyuma vyasolokele haufuku wamakumishilo shimbu kanda Yesu afwenga. Hanyima yaPaseka, Yesu aputukile chilika chize vavuluka jino ngwavo Kulya chaMwata chaChingoloshi. Ahanyine mbolo navinyo kuli vaposetolo jenyi vakushishika 11, nakuvalweza ngwenyi, lyenu nakunwa. Yesu avashikile jishiko jivali, lushiko lwaluhya nalushiko lwaWangana. * (Luka 22:19, 20, 28-30) Jishiko kana jalingishile vaze vaposetolo navatu veka vavandende vakapwe vamyangana navapilishitu mwilu. (Kuso. 5:10; 14:1) Vasalaho vawavisa * vaze vatwama mujishiko kaneji jivali vakiko kaha vatela kulya nakunwa kumbolo navinyo hachilika chaKwanuka Kufwa chaMwata.
5. Chuma muka vatachikiza vawavisa halutalililo lwavo lwakukayoyela mwilu?
5 Talenu chuma chikwavo chalingisa vawavisa vatalililenga kupwa kuchilika chaKwanuka Kufwa chaMwata. Kupwa kuchilika kana cheji kuvalingisa vashinganyeke halutalililo lwavo lwakukayoyela mwilu. Yehova avahana lutalililo lwakulipwila lwakukayoyela mwilu, chakuzeneka kufwa nakupola, nakukayula hamwe naYesu Kulishitu hamwe kaha navakwavo vawavisa vaze vasanguka lyehi nakukamona Yehova Kalunga. (Koli. 1, 15:51-53; Yowa. 1, 3:2) Vawavisa vatachikiza chikupu ngwavo, Yehova avasanyika mangana vakayoyele mwilu. Hakusaka vakavetavise kuya mwilu, vatela kupwa lika vakushishika palanga nakukufwa chavo. (Chimo. 2, 4:7, 8) Vawavisa veji kwivwanga kuwaha kushinganyeka halutalililo lwavo lwakukayoyela mwilu. (Chitu. 2:13) Nyi ngachilihi “mikoko veka”? (Yowa. 10:16) Mwomwo ika veji kupwilanga kuchilika chaKwanuka Kufwa chaMwata?
MWOMWO IKA MIKOKO VEKA VEJI KUPWILANGA KUCHILIKA KANA?
6. Mwomwo ika mikoko veka veji kupwilanga kuchilika chaKwanuka Kufwa chaMwata mwaka himwaka?
6 Mikoko veka veji kuwahililanga kupwa kuchilika kana numba tuhu kavalya kuvifwanyisako. Mu 1938, mukiko vaputukile kusanyika vaze vatwama nalutalililo lwakukayoyela hano hamavu kuchilika chaKwanuka Kufwa chaMwata. Kaposhi Kakutalila waMarch 1, 1938 ambile ngwenyi: “Nachipwa chamwaza namikoko veka kupwa kuchilika chaKwanuka Kufwa chaMwata mangana vamone vyuma vyeji kusolokanga. . . . Nakupwa vakuwahilila kupwa kuchilika kana.” Ngana muze vaze veji kusanyikanga kuchilika chawenga veji kuwahililanga, namikoko veka veji kuwahililanga hakupwa kuchilika chaKwanuka Kufwa chaMwata.
7. Mwomwo ika mikoko veka veji kutalililanga kupwa kuchihande chaKwanuka Kufwa chaMwata?
7 Namikoko veka veji kushinganyekanga halutalililo lwavo hakupwa kuchilika kana. Veji kutalililanga kupwa kuchihande chaKwanuka Kufwa chaMwata chize cheji kushindakanyanga havyuma vize Kulishitu navaze 144,000 navakayula naYesu navakalingila vatu vakushishika muChiyulo chaMyaka Likombakaji. Vaze navakayula mwilu navakapwa namulimo wakwalumuna mavu kupwa palachise nakukafwa vatu vakapwe vakukupuka hakuvatwaminyina kuli Mwangana wavo Yesu Kulishitu. Chapwa chamwaza mayevuyevu avatu vaze veji kupwanga kuchilika chaKwanuka Kufwa chaMwata kushinganyeka omu naukatesamo upolofweto wamuMbimbiliya kulutwe wakufwana nge uze vasoneka hali Isaya 35:5, 6; 65:21-23; naKusoloka 21:3, 4. Kushinganyeka vali hamwe navausoko wavo mukaye kakahya, cheji kuzamisanga lutalililo lwavo nakuvalingisa vatwaleho lika kuzachila Yehova.—Mateu 24:13; Ngale. 6:9.
8. Chuma muka chikwavo cheji kulingisanga mikoko veka vapwenga kuchilika chaKwanuka Kufwa chaMwata?
8 Tushimutwilenu chuma chikwavo cheji kulingisanga mikoko veka vapwenga kuchilika chaKwanuka Kufwa chaMwata. Vafwila kukundwiza vawavisa nakusolola nawa ngwavo vavazanga. Mazu aKalunga ahanjikililile chimweza ngwawo, vawavisa navaze vatwama nalutalililo lwakukayoyela hana hamavu navakazachilanga hamwe. Mujila muka? Tushimutwilenu havyakutalilaho vimwe.
9. Uno upolofweto wahali Zekaliya 8:23 wasolola vyuma muka kutalisa kuli mikoko veka omwo veji kwivwanga hali vaze vawavisa?
9 Tangenu Zekaliya 8:23. Upolofweto kana walumbununa kanawa omwo mikoko veka veji kwivwanga hali vandumbwavo vamalunga namapwevo vawavisa. Lizu ‘kaYuleya’ nalizu lyakwamba ngwavo “nayove” atalisa kuli vasalaho vawavisa. (Loma 2:28, 29) Kaha “malunga likumi vakumalimi avaka-mafuchi osena” vemanyinako mikoko veka. Kaha veji kukwata kuchikuto kulumbununa, veji kuzachilanga hamwe navawavisa nakulinunga hamwe mukulemesa chamuchano. Ngocho, mikoko veka veji kusolola kulinunga hamwe navawavisa hakupwa kuchilika chaKwanuka Kufwa chaMwata.
10. Vyuma muka nalingi Yehova hakutesamo upolofweto watwama hali Ezeke. 37:15-19, 24, 25?
10 Tangenu Ezekele 37:15-19, 24, 25. Yehova natesamo ou upolofweto, hakuneha hamwe vawavisa namikoko veka mangana vazachile hamwe mukulinunga. Upolofweto kana wavuluka vitondo vivali. Vaze vatwama nalutalililo lwakuyoyela mwilu vapwa nge chitondo “chaYuta” (kumuyachi kuze kwafuminenga vamyangana javaIsalele), kaha vaze vatwama nalutalililo lwakukayoyela hano hamavu vapwa nge chitondo “chaEfwalime.” * Yehova mwakanunga awa mazavu osena avali nakupwa jino “chitondo chimwe.” Echi chalumbununa nge veji kuzachilanga hamwe mukulinunga muchiyulo chaMwangana wavo Kulishitu Yesu. Mwaka himwaka vawavisa namikoko veka veji kupwanga kuchilika chaKwanuka Kufwa chaMwata hakupwa “utanga umwe” mwishi “yakafunga umwe.”—Yowa. 10:16.
11. Uno “mikoko” vavuluka hali Mateu 25:31-36, 40 veji kukafwanga ngachilihi vandumbu jaKulishitu?
11 Tangenu Mateu 25:31-36, 40. “Mikoko” vanavuluka muli echi chifwanyisa vemanyinako vaka-kwoloka vamumakumbi akukuminyina vaze vatwama nalutalililo lwakukayoyela hano hamavu, kulumbununa mikoko veka. Ava mikoko veji kukundwizanga vawavisa vaze vachili hano hamavu hakutesamo mulimo wakwambulula mujimbu wamwaza mukaye kosena nakunangula vatu vapwenga tumbaji.—Mateu 24:14; 28:19, 20.
12-13. Jijila jeka muka jize mikoko veka veji kukafwilangamo vandumbu jaKulishitu?
12 Mwaka himwaka muvyalumingo vyakukokela kuchilika chaKwanuka Kufwa chaMwata, mikoko veka veji kukundwizanga vandumbu jaKulishitu hakwazana mumulimo wakusanyika vatu vakeze kuchilika chaKwanuka Kufwa chaMwata. (Talenu lipwata lyakwamba ngwavo “ Shinganyekelenu Chimweza Vyuma Namukalinga muNgonde yaKwanuka Kufwa chaMwata”) Veji kulongesanga nawa kanawa vyuma, mangana chilika chaKwanuka Kufwa chaMwata chikatambuke kanawa muvikungulwilo mukaye kosena, numba tuhu muvikungulwilo vyavivulu kamwatwama vaka-kulya nakunwa kuvifwanyisako. Mikoko veka veji kuwahililanga kukafwa vandumbu jaKulishitu mujijila kana. Ava mikoko vatachikiza ngwavo, Yesu eji kumonanga vyuma veji kulingilanga vandumbwenyi vawavisa kwijiva nge vali nakuvilingila ikiye.—Mateu 25:37-40.
13 Vyuma muka vikwavo vyeji kutulingisanga tupwenga kuchilika chaKwanuka Kufwa chaMwata chamokomoko nalutalililo twatwama nalwo?
OVYO TUVOSENA TWEJI KUYILANGA KUCHILIKA CHAKWANUKA KUFWA CHAMWATA
14. Mujila muka Yehova naYesu vatusolwela zangi yayinene?
14 Tweji kusakwililanga Yehova naYesu hazangi vatusolwela. Numba tuhu Yehova atusolwela zangi yenyi mujijila jakulisezaseza, oloze kuli jila yimwe yize yapwa yayilemu chikuma. Kalunga ketu asolwele zangi yenyi yayinene hakututumina Mwanenyi uze azanga chikuma kwiza nakutuyanjila nakutufwila. (Yowa. 3:16) Twatachikiza nawa ngwetu Yesu asolwele zangi yenyi yayinene hakulisuula kwiza nakutufwila. (Yowa. 15:13) Chikupu vene katweshi kuhasa kufweta Yehova naYesu hazangi vatusolwelako. Oloze tunahase kusolola kusakwilila chetu kweseka najila tweji kutwaminangamo hakumbi hakumbi. (Kolo. 3:15) Tweji kupwanga kuchilika chaKwanuka Kufwa chaMwata mangana twanuke zangi vatusolwela nakusolola nawa ngwetu twavazanga.
15. Mwomwo ika vawavisa namikoko veka vamona ndando yakusokola kupwa wana waulemu chikuma?
15 Twamona ndando yakusokola kupwa yayilemu chikuma. (Mateu 20:28) Vawavisa vamona ndando yakusokola kupwa yayilemu mwomwo yeji kuzamisanga lutalililo lwavo. Hakuwana nge vafwelela mundando yakusokola, ngocho Yehova avavulukila kwoloka nakuvetavila kupwa vana venyi. (Loma 5:1; 8:15-17, 23) Namikoko veka navakiko vasakwilila ndando yakusokola. Mwomwo yakufwelela mundando yakusokola yaKulishitu vapwa vatoma kumeso aKalunga nakumuzachila milimo yajila, kaha nawa vatalilila ‘kukayovoka muluyando lwalunene.’ (Kuso. 7:13-15) Jila yimwe vawavisa namikoko veka veji kusololanga kusakwilila chavo mundando yakusokola shina kupwanga kuchilika chaKwanuka Kufwa chaMwata mwaka himwaka.
16. Chuma muka chikwavo tweji kupwilanga kuchilika chaKwanuka Kufwa chaMwata?
16 Chuma chikwavo chatulingisa tupwenganga kuchilika chaKwanuka Kufwa chaMwata shina twasaka kwononoka Yesu. Chamokomoko nalutalililo twatwama nalwo tuvosena mutu himutu, tweji kwanukanga lushimbi luze ahakileko Yesu haufuku aputukile chilika chaKwanuka Kufwa chenyi lwakwamba ngwavo: “Lingenunga lika ngocho mungwanukilengaho ami.”—Koli. 1, 11:23, 24.
OMWO TWEJI KUNGANYALANGA TUVOSENA HAKUPWA KUCHILIKA CHAKWANUKA KUFWA CHAMWATA
17. Uno chilika chaKwanuka Kufwa chaMwata cheji kutukafwanga ngachilihi tupandame kuli Yehova?
17 Tweji kupandamanga kuli Yehova. (Yako. 4:8) Ngana muze tunalinangula, kupwa kuchilika chaKwanuka Kufwa chaMwata, cheji kutukafwa tushinganyeke halutalililo atuhana Yehova nakushinganyeka hazangi yenyi yayinene atusolwela. (Yele. 29:11; Yowa. 1, 4:8-10) Nge natushinganyeka havyuma twatalilila kulutwe, nomu Kalunga atusolwela zangi yenyi yakwilila, kaha natumuzanga chikuma nakuzamisa usepa wetu naikiye.—Loma 8:38, 39.
18. Uno kushinganyeka hamijimbu yahanjika hali Yesu, cheji kutukafwanga tulinge ika?
18 Tweji kulondezezanga Yesu. (Petu. 1, 2:21) Makumbi akupandama kwakamwihi naKwanuka Kufwa chaYesu, tweji kutanganga mijimbu yamuMbimbiliya yize yahanjika hachalumingo chamakumishilo mukuyoya chaYesu hano hamavu nakufwa chenyi nahakusanguka chenyi. Kaha nachingoloshi halikumbi lyaKwanuka Kufwa chaMwata, chihande chaMbimbiliya cheji kutwanukisanga omwo Yesu atuzanga. (Efwe. 5:2; Yowa. 1, 3:16) Kahomu tweji kutanganga mijimbu yaYesu yahanjika hakulisuula chenyi, nakushinganyekanga hamijimbu kana, cheji kutukunyulanga mangana ‘tutambukenga ngana muze atambukilenga ikiye.’—Yowa. 1, 2:6.
19. Uno tunahase kutwalaho ngachilihi kutwama muzangi yaKalunga?
19 Cheji kutukafwanga tutwamenga lika muzangi yaKalunga. (Yuta 20, 21) Hakusaka kutwama lika muzangi yaKalunga, twatela kumwononoka, nakujilika lijina lyenyi nakumwivwisanga lika kuwaha. (Vishi. 27:11; Mateu 6:9; Yowa. 1, 5:3) Kupwanga kuchilika chaKwanuka Kufwa chaMwata cheji kutukunyulanga tuyoye mujila yize nayisolola nge tuli nakulweza Yehova ngwetu, ‘Ngwasaka kutwama muzangi yove haya myaka yosena.’
20. Vyuma muka vyatela kutulingisa tupwenganga kuchilika chaKwanuka Kufwa chaMwata?
20 Numba tukwechi lutalililo lwakukayoyela mwilu haya myaka yosena numba hano hamavu, tuvosena twatela kupwanga kuchilika chaKwanuka Kufwa chaMwata. Kupwa kuchilika chaKwanuka Kufwa chaMwata mwaka himwaka, cheji kutukafwanga twanuke kufwa chamutu uze twazanga Yesu Kulishitu. Chachinenenyi tweji kwanukanga zangi yayinene atusolwela Yehova hakutuhana Mwanenyi kupwa ndando yakutusokola. Uno mwaka chilika chaKwanuka Kufwa chaMwata nachikapwako lyaChitanu April 15, 2022. Kupwa kuKwanuka Kufwa chaYesu nachisolola nge twazanga Yehova naMwanenyi. Ngocho halikumbi kana kakwatela kupwa vyuma vyeka vize vyatela kututangula tuhone kupwa kuchilika kanako.
MWASO 16 Alisenu Yehova Mwomwo yaMwanenyi Wakuwavisa
^ Numba tupwa nalutalililo lwakukayoyela mwilu chipwe mupalachise hano hamavu, oloze tuvosena tweji kutalililanga kupwa kuchilika chaKwanuka Kufwa chaMwata mwaka himwaka. Chihande chino nachishimutwila haVisoneka vyatulingisa tupwenga kuchilika kana nomwo tunahase kunganyala hakupwako.
^ Nge muli nakusaka kutachikiza vyavivulu halushiko lwaluhya nalushiko lwaWangana, kaha talenu chihande chakwamba ngwavo “Namupwanga ‘muWangana waVapilishitu’” muKaposhi Kakutalila waOctober 15, 2014, mafwo 15-17.
^ MAZU VANALUMBUNUNA: Mazu vasalaho vawavisa atalisa kuli vaka-Kulishitu vawavisa vaze vachili hano hamavu.
^ Nge muli nakusaka kulinangula vyavivulu katalisa kuupolofweto wavitondo vivali watwama mumukanda waEzekele kapetulu 37, kaha talenu mukanda waKukindulwisa Kulemesa chaMuchano mafwo 129-135 pala 3-17.
