CHIHANDE CHAKULINANGULA 1
“Vaze Vali naKutondatonda Yehova Kaveshi Kuzeneka Chuma Chamwaza Numba Chimweko”
CHISONEKA CHAMWAKA WA 2022: “Vaze vali nakutondatonda Yehova kaveshi kuzeneka chuma chamwaza numba chimweko.”—SAMU 34:10.
MWASO 4 “Yehova Ikiye Kafunga Kami”
VYUMA NATUSHIMUTWILA *
Ndavichi amwene ngwenyi ‘kazenekele chuma chamwaza numba chimweko’ namulwola apwile muukalu (Talenu palangalafu 1-3) *
1. Ukalu muka amwene Ndavichi?
NDAVICHI apwile nakuchina mangana ayovole mwono wenyi, mwomwo Saulu mwangana wangolo wavaIsalele afwililile kumujiha. Omu Ndavichi apwile nakusaka vyakulya, engilile munganda yaNove, kaha alombele jimbolo jitanu. (Samwe. 1, 21:1, 3) Kutwala muze, ikiye navatu jenyi vaswamine kuwina wakusendeveka. (Samwe. 1, 22:1) Mwomwo ika Ndavichi apwililile muukalu kana?
2. Uno Saulu alihakile ngachilihi muponde? (Samwele 1, 23:16, 17)
2 Saulu evwililile Ndavichi lwiso mwomwo vatu vamuzangile chikuma, kaha nawa afungulwile jijita jajivulu. Saulu atachikijile nawa ngwenyi kulikanga chenyi chikiko chalingishile Yehova amukane kupwa mwangana wavaIsalele, nakusakula Ndavichi akapwe mwangana. (Tangenu Samwele 1, 23:16, 17.) Hakuwana nge Saulu achipwile lika mwangana wavaIsalele, apwile namaswalale navaka-kumukundwiza vavavulu, ngocho Ndavichi achinyine mangana ayovole mwono wenyi. Uno Saulu ashinganyekele ngwenyi nahase kuhonesa Kalunga kutesamo vyuma ajinyine hali Ndavichi tahi? (Isa. 55:11) Mbimbiliya kayahanjika hachishina kanako, oloze twatachikiza ngwetu chuma apwile nakusaka kulinga Saulu chamuhakile muponde. Mwomwo vatu vaze veji kufumbukilanga Kalunga kavafukilako.
3. Uno Ndavichi alingile ngachilihi omu apwile muukalu?
3 Ndavichi apwile mutu wakulinyisa, kalisakwile ivene kupwa mwangana wavaIsaleleko, oloze Yehova ikiye amusakwile. (Samwe. 1, 16:1, 12, 13) Saulu amwene Ndavichi kupwa muka-kole wenyi. Ndavichi kahanyine mulonga Yehova haukalu ahichilemoko, kaha nawa kayayavalile hakupwa navyakulya vyavindende chipwe hakuswama kuwina wakusendevekako. Oloze chasoloka nge halwola aswamine kuwina wakusendeveka hakiko asonekele namwaso wakwalisa Kalunga muze mwatwama mazu ali muchisoneka chamutwe wachihande, akwamba ngwawo: “Vaze vali nakutondatonda Yehova kaveshi kuzeneka chuma chamwaza numba chimweko.”—Samu 34:10.
4. Vihula muka natukumbulula, kaha mwomwo ika vyapwila vyavilemu?
4 Vangamba jaYehova vavavulu makumbi ano kaveshi navyakulya vyavivulu chipwe kupwa navyuma vyeka vyakulikafwa navyo vyamukuyoyako. * Vali nakumona ukalu chikumanyi omu kwezanga musongo wachihita. Vyuma navipihilako chikuma omu tuli nakupandama ‘kuluyando lwalunene.’ (Mateu 24:21) Shikaho tuwanenu mwakukumbulwila vihula vino viwana: Mujila muka Ndavichi ‘kazenekele chuma chamwaza numba chimweko’? Mwomwo ika twatela kusuuluka navyuma tuli navyo? Mwomwo ika twatela kufwelela ngwetu Yehova mwatuzakama? Kaha tunahase kulizanga ngachilihi havyuma navikasoloka kulutwe?
“KANGWESHI KUKALIKIZA CHUMA NUMBA CHIMWEKO”
5-6. Uno Samu 23:1-6 yatukafwa ngachilihi kutachikiza ovyo alumbunwine Ndavichi hakwamba ngwenyi, vangamba jaKalunga “kaveshi kuzeneka chuma chamwaza numba chimweko”?
5 Uno Ndavichi alumbunwine ika hakwamba ngwenyi vangamba jaYehova “kaveshi kuzeneka chuma chamwaza numba chimweko”? Tunahase kutachikiza mwalumbunukila mazu kana hakukekesa mazu akulifwanako asonekele, aze atwama hali Samu 23. (Tangenu Samu 23:1-6.) Ndavichi aputukile kusoneka samu kana namazu akwamba ngwavo: “Yehova ikiye Kafunga kami. Kangweshi kukalikiza chuma numba chimweko.” Musamu yosena Ndavichi avulukamo vyuma vyavilemu chikuma vize amulingililile Yehova mwomwo yakumwitavila kupwa Kafunga kenyi. Yehova amutwaminyine “mujijila jakwoloka,” nakumukafwa mulwola lwamwaza namulwola lwalukalu. Ndavichi atachikijile ngwenyi Yehova hakumuutamisa “kuulilo wamwila wachimbete” kacheshi nakulumbununa nge keshi kumona ukalu mukuyoya chenyiko. Shimbu jimwe ahombelenga kwijiva nge ali nakutambuka “muchinema chamilima yayinene,” kaha nawa atachikijile ngwenyi apwile navaka-kole. Oloze Ndavichi ‘kevwile woma chuma numba chimweko’ mwomwo apwile naYehova uze apwile Kafunga kenyi.
6 Tunawane jino kukumbulula kuchihula chino chakwamba ngwavo: Mujila muka Ndavichi ‘kazenekele chuma chamwaza numba chimweko’? Tunawane nge apwile navyuma vyavivulu vyakumukafwa atwaleho kupandama kuli Yehova. Kuwahilila chenyi kachapendaminyine hakupwa navikumbako. Ndavichi asuulukile navyuma vize Yehova amuhanyine. Chuma chapwile chachilemu chikuma kuli ikiye shina kumukisula kuli Kalunga nakumukinga.
7. Kweseka naLuka 21:20-24, ukalu muka vamwene vaka-Kulishitu vaze vatwaminenga muYuleya?
7 Mazu ahanjikile Ndavichi asolola nge katwatela kumona vikumba kupwa vyavilemu chikuma mukuyoya chetuko. Tunahase kulivwisa kuwaha kala vikumba tuli navyo oloze kavyatela kupwa vyavilemu chikuma mukuyoya chetuko. Echi chikiko chishina vatachikijile vaka-Kulishitu vamulikulukaji lyamyaka lyakulivanga vaze vatwaminenga muYuleya. (Tangenu Luka 21:20-24.) Yesu avahuhumwine ngwenyi nakukapwa lwola omu nganda yaYelusalema ‘navakayijingilika kumaswalale che ndo.’ Omu vyuma kana vyasolokele, vatelele “kuputuka kuchinyina kujipili.” Kufuma munganda chakingile myono yavo, oloze vasezele vyuma vyavivulu. Kaposhi Kakutalila umwe kunyima ahanjikile ngwenyi: “Vasezele mande avo namembwavo navikumba vyavo vyamujizuvo. Ngocho vatetekezeleko kwitava kulutwe kuhambakana kala chuma chasolokele nge chachilemu mwomwo vafwelelele nge Yehova nahase kuvakinga nakuvakafwa.”
8. Chishina muka chachilemu natulinangula kuvyuma vyasolokele kuli vaka-Kulishitu vamulikulukaji lyamyaka lyakulivanga vaze vatwaminenga muYuleya?
8 Chishina muka chachilemu natulinangula kuvyuma vyasolokele kuli vaka-Kulishitu vamulikulukaji lyamyaka lyakulivanga vaze vatwaminenga muYuleya? Uze Kaposhi Kakutalila twavulukanga ahanjikile nawa ngwenyi: “Kulutwe kunahase kukapwa vyeseko vyakutweseka haluheto; kutala mwalumona kupwa lwalulemu chikuma nyi ulwilo uze navakahana vatu vali kusali yaKalunga ukiko mwalemesa chikuma? Eyo, tunahase kukamona makava hashimbu yakuchina. Kumana twatela kulizanga mangana tukalinge vyosena vize vyasakiwa chiwenya muvalingile vakwetu vaze valahile jimbushi kufuma kuYuta.” *
9. Uno mazu aze kaposetolo Paulu alwezele vaHepeleu anamikolezeza ngachilihi?
9 Twafwelela ngwetu chapwile chachikalu kuli ava vaka-Kulishitu kuseza vyuma vyavo nakuya nakutwama kuchihela chachihya. Vatelele kufwelela ngwavo Yehova mwakavahana vyuma vyakulikafwa navyo. Kwapwile vyuma vyavakafwile vafwelele ngocho. Omu kwasalile myaka yitanu shimbu kanda vaLoma vajingilike Yelusalema, kaposetolo Paulu alwezele vaHepeleu mazu akuvakafwa ngwenyi: “Kutwama chenu chipwenga chakuzeneka kuzanga jimbongo, oku munasuuluka navyuma muli navyo. Mwomwo ikiye nambe ngwenyi: ‘Kangweshi kukakusezako, kangweshi kukakumbilako.’ Ngocho natuhasa kumika chikuma nakwamba ngwetu: ‘Yehova ikiye muka-kungukafwa, kangweshi kwivwa womako. Mutu mwangulinga ikaze?’” (Hepe. 13:5, 6) Twafwelela ngwetu chapwile chachashi kuli vaze vakavangijile mazu aPaulu kusuuluka navikumba vyavindende vapwile navyo kuze kuchihela vayile, mwomwo vatachikijile ngwavo Yehova mwavahana vyuma vyakulikafwa navyo. Mazu aPaulu atukafwa nayetu tufwelele ngwetu Yehova mwatuhana vyuma twasakiwa mukuyoya.
“NATUSUULUKA NAVYUMA KANEVI”
10. Chishina muka alinangwile Paulu?
10 Paulu alwezele Chimoteu mazu akulifwanako nawaze alwezele vaHepeleu, kaha mazu kana anahase kutukafwa nayetu. Asonekele ngwenyi: “Ngocho, omu tuli navyakulya nauvwalo, natusuulukanga navyuma kanevi.” (Chimo. 1, 6:8) Uno echi chalumbununa nge katwatela kulya vyakulya vyamwaza, nakupwa nazuvo yaulangaji chipwe kulandanga uvwalo wauhyako tahi? Omwo keshi mukiko alumbunwine Pauluko. Alumbunwine ngwenyi twatela kusuuluka nakala vyuma tuli navyo. (Fwili. 4:12) Echi chikiko chishina alinangwile Paulu. Luheto lwalulemu twatwama nalwo shina usoko wetu naKalunga keshi kala vikumba natupwa navyoko.—Hamba. 3:17, 18.
Hamyaka 40 vapwile vaIsalele mupambo ‘kavazenekele chuma numba chimweko.’ Kutala natusuuluka navyuma tuli navyo oholyapwa tahi? (Talenu palangalafu 11) *
11. Chishina muka natulinangula kuli Mose omu alwezele vaIsalele vasuuluke navyuma vapwile navyo?
11 Tachikizenu ngwenu vyuma muli nakusaka kupwa navyo keshi vikiko Yehova ali nakusaka mupwenga navyoko. Talenu mazu aze Mose alwezele vaIsalele hanyima yakutwama myaka 40 mupambo. Avalwezele ngwenyi: “Yehova Kalunga kenu namikisula mumilimo yenu yosena. Natachikiza kanawa ungeji wenu munatambuka mupambo kaneyi yayinene. Yehova Kalunga kenu napunga nayenu hamyaka yoseneyi 40, kaha kamwazenekele chuma numba chimweko.” (Lushi. 2:7) Hamyaka yosena yize 40, Yehova ahanyinenga vaIsalele mana mangana valyenga. Uvwalo wavo uze vavwalile kufuma muEjipitu kawapulikileko. (Lushi. 8:3, 4) Numba tuhu vatu vamwe kavasuulukile navyuma kanako, oloze Mose anukishilenga vaIsalele ngwenyi vapwile navyuma vyosena vize vasakiwile. Yehova eji kwivwanga kuwaha kachi nge natusuuluka navyuma tuli navyo. Asaka tusakwililenga havyuma eji kutuhananga numba vipwa vyavindende nakuvimona kupwa wana wakufuma kuli ikiye.
FWELELENU NGWENU YEHOVA MWAMIZAKAMANGA
12. Vyuma muka vyasolola nge Ndavichi afwelelele Yehova keshi mungolo jenyiko?
12 Ndavichi atachikijile ngwenyi Yehova apwa wakushishika, kaha eji kuzakamanga chikuma vaze vamuzanga. Numba tuhu mwono wenyi wapwile muponde halwola asonekele Samu 34, oloze lufwelelo lwamukafwile ashinganyeke ngwenyi “kangelo kaYehova” natungu chilombo “jingulwishi” kuli ikiye. (Samu 34:7, kwinyikila chamwishi) Pamo Ndavichi apwile nakufwanyisa kangelo kaYehova kuliswalale uze natungu chilombo mumusenge nakupwa wakuvanguluka lwola lwosena mangana amone okwo nakwijilila vaka-kole jenyi. Numba tuhu Ndavichi apwile liswalale wangolo, kaha nawa Yehova amushikile kumuhaka hawangana, oloze kapendaminyine hauhashi wenyi wakwasa lilolwa nachikapa chipwe hauhashi wenyi wakuzachisa poko yamukwale mangana afungulule vaka-koleko. (Samwe. 1, 16:13; 24:12) Afwelelele Kalunga nakutachikiza ngwenyi kangelo kaYehova eji ‘kupulululanga vaze vevwa Kalunga woma.’ Twatachikiza ngwetu makumbi ano Yehova keshi kutukinga mujila yakukomwesako. Oloze vaze navafwelela Yehova navakatambula kuyoya chahaya myaka yosena numba nge navafwa oholyapwa.
Haluyando lwalunene, Ngonge wakuMangonge mwakafwila kutulukuka hamembo etu. Oloze twatachikiza ngwetu Yesu navangelo navakatukinga (Talenu palangalafu 13)
13. Omu Ngonge wakuMangonge mwakatulukuka, mwomwo ika natukasolokela kupwa vakuhona kukingiwa, kaha vyuma muka navikatukafwa tukahone kulizuzukila nawoma? (Talenu muvwimbimbi wahelu.)
13 Kumakumbi ali nakwiza kulutwe, natukapwa mucheseko chize nachikasolola numba nge twafwelela ngwetu Yehova mwatukinga chipwe chiku. Omu Ngonge wakuMangonge uze alumbununa kulifutula chavaka-mafuchi mwakalukuka vatu jaKalunga, kuyoya chetu nachikapwa muponde. Twatela kukafwelela ngwetu Yehova mwakatuyovola. Oloze vaka-mafuchi navakatumona kwijiva nge mukoko wakuzeneka kukingiwa. (Ezeke. 38:10-12) Halwola kana katweshi kukapwa navitwa chipwe kutachikiza mwakwashila jitako. Vaka-mafuchi navakamona ngwavo tuvavashi kufungulula. Hakuwana nge vaka-mafuchi kavafwelela Kalungako, ngocho kaveshi kukatachikiza ngwavo vangelo jaYehova navakatukingako, oloze etu natukatachikiza ngocho mwomwo yalufwelelo. Navakalikomokela omu mazavu avaka-jita vamwilu navakatwashila jita.—Kuso. 19:11, 14, 15.
TUPWENU VAKULIZANGA OHOLYAPWA HAVYUMA NAVIKASOLOKA KULUTWE
14. Vyuma muka twatela kulinga oholyapwa mangana tulizange havyuma navikasoloka kulutwe?
14 Vyuma muka twatela kulinga oholyapwa mangana tulizange havyuma navikasoloka kulutwe? Chatete, twatela kutachikiza ngwetu vikumba kavyapwa vyavilemuko kaha nawa likumbi limwe natukaviseza. Twatela nawa kusuuluka navyuma tuli navyo nakuwahilila hakupwa nausoko wakukola naYehova. Nge natutachikiza kanawa Kalunga, kaha natufwelela chikupu ngwetu mwakatukinga omu Ngonge wakuMangonge mwakatulukuka.
15. Vyuma muka vyasolokelele Ndavichi omu apwile kanyike vize vyamukafwile atachikize ngwenyi Yehova mwamukafwanga lika?
15 Tutalenu havyuma vikwavo vyakafwile Ndavichi vize vinahase kutukafwa tulizange havyeseko vinakwiza kulutwe. Ndavichi ambile ngwenyi: “Makilenu mangana mumone ngwenu Yehova apwa wamwaza. Awahilila mutu uze eji kuchinyinanga muli ikiye.” (Samu 34:8) Mazu kana asolola ovyo Ndavichi atachikijilile ngwenyi atela kupendamina hali Yehova amukafwe. Lwola lwosena apendaminyinenga hali Yehova, kaha amukafwilenga. Omu Ndavichi apwile kanyike, ayile nakuzunga naNgolyate lunga wakutaluka wakaFwilishite, kaha amulwezele ngwenyi: “Likumbi lyalelo Yehova mwakuhana mulivoko lyami.” (Samwe. 1, 17:46) Kaha kutwala muze, Ndavichi azachililenga mwangana Saulu uze asakile kumujiha mapapa kakavulu. Oloze “Yehova apwilenga” naNdavichi. (Samwe. 1, 18:12) Hakuwana nge Yehova amukafwilenga muukalu ahichilemo kunyima, ngocho atachikijile ngwenyi mwamukafwa cheka.
16. Mujijila muka tunahase “kumakila” kuwaha chaYehova?
16 Nge natupendamina chikuma hali Yehova oholyapwa, kaha nachitukafwa tufwelele ngwetu mwakatuyovola kulutwe. Chasakiwa kupwa nalufwelelo, nakulisuula kupendamina hali Yehova mangana tulombe mukulwane wetu wamilimo, atuhaneko lwola lwakuya kukukunguluka chachihanda chipwe changalila, chipwe kumulomba tukeheseko makumbi akuzata mangana tupwenganga kukunguluka chosena nakuzata chikuma muwande. Kachi nge mukulwane wamilimo mwakana nakutufumisa milimo, kutala natufwelela ngwetu Yehova keshi kutusezako kaha nawa mwatuhananga vyuma vyakulikafwa navyo tahi? (Hepe. 13:5) Vandumbwetu vavavulu vali mumulimo washimbu yosena vanahase kuhanjika omu Yehova avakafwile halwola vapwile muukalu. Chikupu vene Yehova apwa wakushishika.
17. Uno chisoneka chamwaka wa 2022 chika, kaha mwomwo ika chinapwila chachilemu?
17 Hakuwana nge Yehova ali kusali yetu, ngocho katweshi kwivwa woma havyuma vili nakwiza kulutweko. Kalunga ketu keshi kukatusezako chikalu kaha nge natuhaka Wangana wenyi kulutwe mukuyoya chetu. Hakusaka tupwenga vakulizanga oholyapwa haukalu uli nakwiza kulutwe, nakufwelela ngwetu Yehova keshi kukatusezako, Lizavu Lyakutwaminyina linasakula chisoneka chaSamu 34:10 kupwa chisoneka chamwaka wa 2022, haze hali mazu akwamba ngwavo: “Vaze vali nakutondatonda Yehova kaveshi kuzeneka chuma chamwaza numba chimweko.”
MWASO 38 Mwakujikijisa
^ Chisoneka chamwaka wa 2022 chinafumu hali Samu 34:10. Ngwacho: “Vaze vali nakutondatonda Yehova kaveshi kuzeneka chuma chamwaza numba chimweko.” Vangamba jaYehova vavavulu vakushishika kavatwama navyuma vyakulikafwa navyo mukuyoya vyavivuluko. Kaha mwomwo ika natwambila ngwetu “kaveshi kuzeneka chuma chamwaza numba chimweko”? Uno kutachikiza mwalumbunukila vesi kana chinahase kutukafwa ngachilihi tulizange navyaukalu uli nakwiza kulutwe?
^ Talenu “Vihula Vyakufuma Kuli Vaka-Kutanga” muKaposhi Kakutalila waSeptember 15, 2014.
^ Talenu Kaposhi Kakutalila waMay 1, 1999, lifwo 25, 26.
^ MAZU AKULUMBUNUNA MUVWIMBIMBI: Ndavichi atwalileho lika kusakwilila Yehova havyuma amuhanyinenga nahalwola luze aswaminenga kuwina wakusendeveka omu apwile nakuchina Mwangana Saulu.
^ MAZU AKULUMBUNUNA MUVWIMBIMBI: Omu vaIsalele vafumine muEjipitu, Yehova avahanyine mana mangana valyenga, nakulingisa uvwalo wavo uhone kupulika.