1-3. Ukalu muka unahase kulingisa vangamba jaYehova valile?

 KUTALA munakwanuka lwola mwalilile tahi? Shimbu jimwe tweji kulililanga mwomwo yakuwahilila. Oloze kakavulu tweji kulilanga mwomwo yakulyonyinga kumuchima. Chakutalilaho, tunahase kulila kachi nge tunafwisa mutu twazanga. Ndumbwetu wapwevo Lorilei, wamuUnited States, asonekele ngwenyi: “Shimbu jimwe nge ngunanuka kufwa chamwanami wapwevo, ngwalyonyingilenga chikuma mumuchima kaha kakwapwile chuma chize ngwamwene ngwami nachinguvendejekako. Halwola lwakufwana ngana kangwashinganyekele nge nanguunda muchimako.” *

² Kuli nawa vyuma vikwavo vinahase kutulingisa tulile. Ndumbwetu Hiromi, payiniya wamuJapan, ambile ngwenyi: “Shimbu jimwe ngweji kuhombanga mwomwo vatu ngweji kwambulilanga kavasaka kwivwilila kumujimbu wamwazako. Shimbu jimwe ngweji kulombanga kuli Yehova oku nguli nakulila mangana angukafwe nguwane mutu uze ali nakusaka kutachikiza muchano.”

³ Kutala nayenu mweji kwivwanga nganomu veji kwivwanga ava vandumbwetu tunavuluka tahi? Etu vavavulu mukiko tweji kwivwanga. (Petu. 1, 5:9) Twasaka “kuzachila Yehova nakuwahilila,” oloze shimbu jimwe tweji kumuzachila oku tuli nakulila mwomwo yakufwisa mutu twazanga, chipwe kuhomba, chipwe kupwa muukalu uze nautulingisa tuhone kutwalaho kupwa vakushishika kuli Kalunga. (Samu 6:6; 100:2) Vyuma muka navitukafwa kachi nge tuli nakwivwa ngocho?

4. Vyuma muka natushimutwila muchihande chino?

⁴ Tunahase kulinangula vishina vimwe kuli Yesu. Shimbu jimwe,  kwapwile vyuma vimwe vize vyamulingishile ‘alile nakusotola masoji.’ (Yowa. 11:35; Luka 19:41; 22:44; Hepe. 5:7) Tushimutwilenu havyuma kana nakumona vishina natulinangulako. Natushimutwila nawa havyuma tunahase kulinga kachi nge tuli nakumona ukalu uze nautulingisa tulile.

5. Vyuma muka tunalinangula kuli Yesu kweseka namujimbu vasoneka hali Yowano 11:32-36?

⁵ Mumwaka wa 32 C.E. mungonde yachishika, Lazalu sepa lyaYesu avijile kaha afwile. (Yowa. 11:3, 14) Lazalu apwile navandumbwenyi vavali, Maliya naMalita, kaha Yesu azangile chikuma tanga kana. Ava mapwevo valishonene chikuma hakufwa chandumbwavo Lazalu. Omu alingile Lazalu nafu lyehi, Yesu ayile kuMbetane kuze kwapwile nakutwama Maliya naMalita. Kahomu Malita evwile ngwavo Yesu ali nakwiza, amusesele. Achishinganyekenu chinyengo apwile nacho hakuhanjika ngwenyi: “Ove Mwata, kachi nge wapwanga kuno kachi ndumbwami kafwileko.” (Yowa. 11:21) Kufumaho omu Yesu amwene Maliya navatu veka vali nakulila, naikiye “asotwele masoji.”—Tangenu Yowano 11:32-36.

6. Mwomwo ika Yesu alililile?

⁶ Mwomwo ika Yesu alililile halwola kana? Mukanda waInsight on the Scriptures wahanjika ngwawo: “Kufwa chasepa lyenyi Lazalu nakumona vandumbu jaLazalu vali nakulishona vyamulingishile ‘alishishimune nakusotola masoji.’” * Pamo Yesu apwile nakushinganyeka hakukola evwile sepa lyenyi Lazalu omu apwile nakuviza nomu apwile nakwivwa Lazalu hakushinganyeka ngwenyi himwafwa. Chuma chikwavo chalingishile Yesu alilile shina kumona chinyengo vapwile nacho vaMaliya naMalita hakufwisa ndumbwavo. Kachi nge nayenu mwafwisaho lyehi sepa lyenu chipwe kausoko kenu, kaha twafwelela ngwetu nayenu mwevwile chinyengo. Tutalenu havishina natulinangula kumujimbu kana.

7. Uno kulila chaYesu chatunangula vyuma muka hali Yehova?

 ⁷ Yehova atachikiza kanawa omwo mweji kwivwanga. Yesu ikiye “vene chifwanyisa chou apwa” Ise. (Hepe. 1:3) Omu Yesu alilile, asolwele omu Yehova eji kwivwanga nge tunafwisa mutu twazanga. (Yowa. 14:9) Kachi nge munafwisa mutu mwazanga, fwelelenu ngwenu Yehova natachikiza ushona muli nakwivwa nakumivwila nawa keke. Asaka kumihindula mangana muhone kulyonyinga mumichima.—Samu 34:18; 147:3.

8. Mwomwo ika twatela kufwelela ngwetu Yesu mwakasangula vatu twazanga vaze vafwa?

⁸ Yesu asaka kusangula vatu mwazanga vaze vafwa. Shimbu kanda Yesu alile, afwelelesele Malita ngwenyi: “Ndumbwove mwasanguka.” Malita etavilile mazu ahanjikile Yesu. (Yowa. 11:23-27) Hakuwana nge Malita apwile muka-kulemesa Yehova wakushishika, twafwelela ngwetu atachikijile ngwenyi kunyima kapolofweto Elija naElisha vasangwile vafu. (Vamya. 1, 17:17-24; Vamya. 2, 4:32-37) Kaha nawa pamo evwile mijimbu yavatu vaze Yesu asangwile. (Luka 7:11-15; 8:41, 42, 49-56) Nayenu nawa mwatela kufwelela ngwenu namukamona cheka vatu mwazanga vaze vafwa. Kulila chaYesu omu apwile nakuvendejeka masepa jenyi chasolola nge afwila kusangula vafu.

9. Munahase kukafwa ngachilihi vatu vaze vali nakulishona ngana muze alingile Yesu? Hanenu chakutalilaho.

⁹ Munahase kukafwa vaze vali nakulishona. Yesu kalilile kaha hamwe naMalita naMaliyako, oloze avevwililile omu vapwila nakuhanjika nakuvavendejeka. Nayetu tunahase kulinga mwomumwe kuli vaze vali nakulishona. Ndumbwetu Dan, kalama uze atwama muAustralia, ambile ngwenyi: “Hanyima yakufwisa puwami, ngwasakiwile kungukafwa. Lwola lwosena, vandumbwetu vamalunga namapwevo javo vangwivwilililenga nge nguli nakuhanjika. Vangwechele ngulile, kaha kavalikomokelele omu ngwapwile nakulilako. Kaha nawa vangukafwilenga mujijila jeka jakufwana nge kungukosela minyau, nakungulanjilako vyuma kuvitanda nakunguwahishila vyakulya halwola luze ngwahonenenga kulinga vyuma kana. Kaha nawa valombelelenga hamwe nayami kuswa kumwe. Chikupu vene vapwile masepa vamwenemwene, kaha nawa hivandumbwami vaze ‘vangukafwile mulwola lwavihuli.’”—Vishi. 17:17.

10. Vyuma muka vyasolokele vize vasoneka hali Luka 19:36-40?

¹⁰ HaNyisane 9, 33 C.E., Yesu ayile kuYelusalema. Kahomu apwile nakupandama kwakamwihi nanganda, lizavu lyavatu lyalikungulwile nakwala uvwalo wavo wahelu mujila mangana vasolole ngwavo vanamwitavila kupwa Mwangana wavo. Lwola kana lwapwile lwakuwahilila. (Tangenu Luka 19:36-40.) Pamo tumbaji twenyi valikomokelele vyuma vyasolokele kufuma haze. “Kahomu [Yesu] ahetele kwakamwihi, amwene yize nganda, kaha ayilililile.” Yesu ahanjikile vyuma vyavipi navikasolokela vatu vamunganda yaYelusalema oku ali nakulila.—Luka 19:41-44.

11. Mwomwo ika Yesu apwile nakulililako vatu vamuYelusalema?

¹¹ Yesu evwile kukola kumuchima mwomwo atachikijile ngwenyi numba tuhu vanamutambula mujila yamwaza oloze vaYuleya vavavulu kaveshi kuketavila mujimbu wamwaza waWanganako. Ngocho Yelusalema navakayinongesa, kaha vaYuleya vaze navakayovoka navakavatwala muufunge. (Luka 21:20-24) Chaluvinda, ngana muze ahanjikilile chimweza Yesu, vatu vavavulu vamukanyine. Uno vatu  vavavulu veji kwakulanga ngachilihi kumujimbu waWangana mungalila yenu? Kachi nge vatu vavandende kaha vakiko veji kwitavilanga muvanangule muchano, kaha vyuma muka namulinangula kukulila chaYesu? Tutalenu vishina vikwavo vitatu natulinangulako.

12. Vyuma muka natulinangula kuli Yehova omu Yesu apwile nakulililako vatu vaze ambulilile?

¹² Yehova eji kuzakamanga vatu. Kulila chaYesu chasolola nge Yehova azakama vatu. “Kazanga mutu numba umwe akanongeko, oloze azanga vosena vapihilile nakwalumuka.” (Petu. 2, 3:9) Makumbi ano tweji kusololanga ngwetu twazanga vatu, hakuvambulilanga nakuvakafwa valinangule mujimbu wamwaza waWangana.—Mateu 22:39.

13-14. Uno Yesu evwililile ngachilihi vatu keke, kaha tunahase kusolola ngachilihi muchima kana?

¹³ Yesu azachilenga nangolo mumulimo wakwambulula. Asolwele ngwenyi azanga vatu hakuvanangula hakala lwola. (Luka 19:47, 48) Mwomwo ika alingilililenga ngocho? Mwomwo avevwilililenga keke. Shimbu jimwe, vatu vavavulu vasakilenga Yesu avanangule lika, ngocho ikiye natumbaji twenyi “kavahashile numba kulya vyakulyako.” (Mako 3:20) Kaha nawa lwola lumwe alisuuwile kunangula mutu naufuku. (Yowa. 3:1, 2) Vatu vavavulu vaze vevwilililenga kuli Yesu kavejile nakupwa tumbaji twenyiko. Oloze vosena vevwile unjiho. Makumbi ano tuli nakufwila kukafwa vatu vosena vevwenga mujimbu wamwaza. (Vili. 10:42) Hakusaka tutesemo mulimo kana, twatela kwalumunangako jila yakwambulwilamo.

¹⁴ Lisuulenu kwalumunangako lwola lwakwambulula. Nge katweshi kwalumunangako lwola lwakuzata mulimo wakwambulula, kaha katweshi kuwana vaze vali nakusaka kwivwilila kumujimbu wamwazako. Ndumbwetu Matilda uze apwa payiniya ambile ngwenyi: “Ami nalunga lyami tweji kwambululanga halwola lwakulisezaseza. Nachimene tweji kuyanga nakwambulwila kuvihela vyakusekasanyina. Kaha namusana halwola luze vatu vali nakutambwojoka, tweji kuyanga mumikwakwa nakwambulula kuzachisa kalitemba kakushindumuna. Kaha nachingoloshi tweji kuwananga vatu vavavulu hamembo avo.” Muchishishisa chakwambulula halwola luze tunamono ngwetu lwamwaza kuli etu, twatela  kulisuula kwalumunangako lwola luze natumona ngwetu natuwana vatu vavavulu. Nge natulinga ngocho, kaha Yehova mwevwa kuwaha.

15. Kweseka namazu ahali Luka 22:39-44, vyuma muka vyasolokele haufuku wamakumishilo wakuyoya chaYesu chahano hamavu?

¹⁵ Yesu ayile mumilemba yaNgetesemane nachingoloshi haNyisane 14, 33 C.E. Omu ahetele kuze, alombele kuli Yehova. (Tangenu Luka 22:39-44.) Halwola kana, Yesu, “alembelelelenga . . . oku ali nakuteta chikuma miteto, nakulila masoji.” (Hepe. 5:7) Vyuma muka alombele Yesu haufuku wamakumishilo shimbu kanda afwenga? Alombele Yehova amuhane ngolo mangana atwaleho lika kushishika kuli ikiye nakulinga mwaya muchima wenyi. Yehova evwililile kukulembelela chaMwanenyi kaha atumine kangelo nakwiza nakumuzamikisa.

16. Mwomwo ika Yesu apihililile omu apwile nakulomba mumilemba yaNgetesemane?

¹⁶ Twafwelela ngwetu Yesu alilile omu apwile nakulomba mumilemba yaNgetesemane mwomwo apihilile hakushinganyeka ngwenyi vatu navamumona ngwavo muka-kusaula lijina lyaKalunga. Alilile nawa mwomwo atachikijile ngwenyi atelele kujilika lijina lyaIse nakupwa wakushishika kuli Kalunga. Kachi nge muli nakuhita muukalu uze unahase kumilingisa chipwenga chachikalu kushishika kuli Yehova, kaha vyuma muka namulinangula kukulila chaYesu? Tutalenu vishina vikwavo vitatu.

17. Chishina muka natulinangula hakutachikiza ngwetu Yehova akumbulwile kulomba chaYesu?

¹⁷ Yehova eji kwivwililanga kukulembelela chenu. Yehova evwililile kukulomba chaYesu. Mwomwo ika? Mwomwo chuma chachilemu apwile nakulomba Yesu shina kutwalaho lika kupwa wakushishika kuli Ise nakujilika lijina lyenyi. Nayetu nawa Yehova mwakumbulula kulomba chetu kachi nge natutwalaho lika kupwa vakushishika kuli ikiye nakujilika lijina lyenyi.—Samu 145:18, 19.

18. Mwomwo ika natwambila ngwetu Yesu atachikiza kanawa omwo tweji kwivwanga?

¹⁸ Yesu atachikiza omwo tweji kwivwanga. Kachi nge tuli muukalu uze unatulingisa tupihilile,  nachiwaha kupwa nasepa uze mwatuvendejeka chikumanyi uze ahita muukalu uze unalifwane nauze tuli nakuhitamo nayetu. Yesu ikiye sepa nahase kutukafwa mujila yakufwana ngana. Atachikiza omwo mutu eji kwivwanga nge nahombo kaha nawa ali nakusakiwa kumukafwa. Atachikiza kanawa oho hakumina ngolo jetu, ngocho mwatukafwa “halwola lwakutamo.” (Hepe. 4:15, 16) Ngana muze Yesu etavilile vamukafwe kuli kangelo omu apwile mumilemba yaNgetesemane, nayetu twatela kwitavila Yehova atukafwe. Nahase kutukafwa kuhichila mumikanda yetu, namujivindiyo, namuvihande, chipwe kututambukila kuli kalama chipwe kuli sepa lyetu wakuhya kushipilitu.

19. Namujikiza ngachilihi nge muli muukalu uze naumilingisa chimikaluhwile kupwa vakushishika kuli Kalunga? Hanenu chakutalilaho.

¹⁹ Yehova mwamihana “kuunda chaKalunga.” Uno Yehova mwatujikijisa ngachilihi? Kachi nge natulomba, kaha natupwa “nakuunda chaKalunga chize chahambakana kunangakana chosena.” (Fwili. 4:6, 7) Kuunda chakufuma kuli Yehova cheji kuunjisanga michima yetu nakutukafwa tushinganyeke kanawa. Omu mukiko chapwile kuli ndumbwetu wapwevo Luz. Ambile ngwenyi: “Kakavulu ngweji kwivwanga uli. Ngocho, shimbu jimwe ngweji kushinganyekanga ngwami Yehova kanguzangako. Oloze nge ngunaputuka kushinganyeka ngocho, kaha ngweji kulwezanga Yehova omwo nguli nakwivwa. Kulomba cheji kungukafwanga nguunde muchima.” Nganomu nahanjika ou ndumbwetu, kulomba chinahase kutukafwa tuunde muchima.

20. Vishina muka tunalinangula kukulila chaYesu?

²⁰ Vishina muka tunalinangula kukulila chaYesu? Tunalinangula nge twatela kukafwanga masepa jetu vali nakulishona nakufwelela ngwetu Yehova naYesu navatukafwanga nge tunafwisa mutu twazanga. Tunalinangula nawa tusololenga muchima wakeke hakwambulula nakunangula vatu mwomwo Yehova naYesu Kulishitu veji kusololanga muchima kana. Tunalinangula nawa nge Yehova naMwanenyi vatachikiza omwo tweji kwivwanga, noho hakumina ngolo jetu nakufwila kutukafwa mangana tumike. Shikaho tutwalenuho lika kukavangiza vyuma tunalinangula palanga nomu Yehova mwakatesamo lushiko lwenyi lwamwaza lwakuhunda “masoji osena kumeso [etu].”—Kuso. 21:4.