CHIHANDE CHAKULINANGULA 4
Yehova Eji Kutukafwanga Tulinge Chilika chaKwanuka Kufwa chaMwata
“Lingenunga lika ngocho mungwanukilengaho ami.”—LUKA 22:19.
MWASO 19 Kulya chaMwata chaChingoloshi
VYUMA NATUSHIMUTWILA a
1-2. Mwomwo ika tweji kupwilanga kuKwanuka Kufwa chaMwata mwaka himwaka?
KAFWE myaka 2,000 kunyima, Yesu ahanyine kuyoya chenyi hali etu mangana tukayoye haya myaka. Haufuku wakukokela kukufwa chenyi, alwezele vaka-kumukavangiza vanukenga zangi avasolwelelele hakulinganga chilika chachashi kuzachisa mbolo navinyo.—Koli. 1, 11:23-26.
2 Tweji kukavangizanga elu lushimbi lwaYesu mwomwo twamuzanga chikuma. (Yowa. 14:15) Mwaka himwaka mungonde yaKwanuka Kufwa chaMwata, tweji kusololanga kusakwilila chetu havyuma atulingila, hakuwanangako lwola lwakulomba nakushinganyeka omwo kufwa chenyi changanyalisa vatu. Tweji kwazananga nawa chikuma mumulimo wakwambulula mangana tusanyike vatu vavavulu tupwenga navo kuchilika kanechi chakulipwila. Chachinenenyi, katwasaka chuma numba chimwe chituhonese kupwa kuchilika chaKwanuka Kufwa chaMwatako.
3. Vyuma muka natushimutwila muchihande chino?
3 Muchihande chino, natushimutwila omwo vatu jaYehova vanakilikitanga mangana valinge chilika chaKwanuka Kufwa chaMwata. Natushimutwila (1) omwo vanalinginga chilika kana kweseka namuze achilingile Yesu, (2) omwo vanasanyikanga vakwavo vapwenga kuKwanuka Kufwa chaMwata, kaha (3) nomwo vanapunga kuchilika kana chamokomoko naukalu.
KULINGA CHILIKA NGANA MUZE ACHILINGILE YESU
4. Muchano muka tweji kulinangulanga haKwanuka Kufwa chaMwata mwaka himwaka, kaha mwomwo ika twatela kuumwena kupwa waulemu chikuma? (Luka 22:19, 20)
4 Mwaka himwaka haKwanuka Kufwa chaMwata, tweji kwivwililanga kuchihande chaMbimbiliya chize cheji kukumbululanga vihula vyavivulu. Tweji kutachikizanga ovyo vatu vasakiwila ndando yakusokola, novyo kufwa chamutu umwe chalingisa vatu vavavulu vavakonekele. Veji kutwanukisanga ovyo mbolo navinyo vyemanyinako, navatu vatela kulyako. (Tangenu Luka 22:19, 20.) Tweji kushinganyekanga nawa havyuma vyamwaza vatalilila vaze navakatwama hano hamavu. (Isa. 35:5, 6; 65:17, 21-23) Twatela kumona muchano kanou kupwa waulemu chikuma. Vatu vavavulu kavatachikiza muchano kanako, kaha nawa kavatachikiza kulema chawana ahanyine Yesuko. Kavalinga nawa chilika chakwanuka kufwa chenyi ngana muze achilingile iveneko. Mwomwo ika?
5. Uno vatu vaputukile kulinga ngachilihi Kwanuka Kufwa chaYesu hanyima yakufwa chavaposetolo vavavulu?
5 Nakushimbula chiku kufuma haze vafwile vaposetolo jaYesu, muchikungulwilo mwaputukile kwingila vaka-Kulishitu vamakuli. (Mateu 13:24-27, 37-39) Vahanjikilenga ‘vyuma vyakuhingama mangana vakoke tumbaji vavakavangize.’ (Vili. 20:29, 30) ‘Chuma chimwe chakuhingama’ vanangwilenga ava vaka-Kulishitu vamakuli shina chakwamba ngwavo, Yesu kahanyine mujimba wenyi “kamwe kaha kunahu mangana ambate jishili javatu vavavulu” ngana muze yahanjika Mbimbiliyako, oloze ngwavo wana ahanyine vatela kuuhananga mapapa kakavulu. (Hepe. 9:27, 28) Makumbi ano kuli vatu vavavulu vamwaza michima vaze vafwelela kunangula kanechi chamakuli. Veji kulikungulwilanga mujichachi chalumingo hichalumingo chipwe hakumbi hakumbi, kuchilika vavuluka ngwavo “Misa.” b Mumauka akwitava eka nawa kavavula kwanuka kufwa chaYesuko, kaha vatu javo vavavulu kavatachikiza kanawa kulema chawana ahanyine Yesuko. Vamwe vanahase kulihulisa ngwavo, ‘Kutala kufwa chaYesu chinahase kulingisa vangukonekele jishili jami tahi?’ Mwomwo ika veji kulihulishilanga chihula kana? Vamwe vavahungumwisa kuli vaze vashinganyeka ngwavo kufwa chaYesu kacheshi kuhasa kulingisa vatu vavakonekele jishili javoko. Uno vaka-kukavangiza Yesu vamuchano vanakafwe ngachilihi vatu hachihande kanechi?
6. Unjiho muka vawanyine vaka-kulinangula Mbimbiliya mu 1872?
6 Kusongo yalikulukaji lyamyaka lyakusokesa 19, lizavu lyavaka-kulinangula Mbimbiliya lize vatetekelelenga kuli Charles Taze Russell, vaputukile kulinangula chikuma Visoneka. Vatondele kutachikiza kulema chawana ahanyine Yesu nomwo chilika chakwanuka kufwa chenyi vatela kuchilinga. Kuheta mu 1872, vawanyine jino unjiho wamuVisoneka wakusolola nge chikupu vene Yesu ahanyine ndando yakusokola vatu vosena. Kavasakile vyuma valinangwile vikumine kuli vakiko kahako. Oloze vambulililengako vatu kuzachisa mikanda, namapapilo amijimbu najimangazini. Hahaze vene, vaputukile kulinganga chilika chaKwanuka Kufwa chaMwata kamwe mumwaka, ngana muze valingilenga vaka-Kulishitu vakulivanga.
7. Uno tuli nakunganyala ngachilihi kuvyuma vahehwojwele Vaka-Kulinangula Mbimbiliya vakulivanga?
7 Makumbi ano, tweji kunganyalanga kuvyuma vahehwojwele ava vaka-Kulishitu vamichima yamwaza vakunyima. Mujila muka? Yehova eji kutukafwanga mangana twivwishise kanawa wana ahanyine Yesu nomwo unahase kunganyalisa vatu. (Yowa. 1, 2:1, 2) Twalinangula nawa ngwetu muMbimbiliya vavulukamo lutalililo luvali lwavatu vaze veji kwivwisanga Kalunga kuwaha. Vamwe navakayoya chakuzeneka kufwa mwilu, kaha vavavulu navakayoya haya myaka hano hamavu. Tweji kupandamanga chikuma kuli Yehova hakushinganyeka omwo atuzanga nomwo tweji kunganyalanga mutu himutu kuwana ahanyine Yesu. (Petu. 1, 3:18; Yowa. 1, 4:9) Ngana mwavandumbwetu vakushishika vakunyima, nayetu tweji kusanyikanga vatu mangana tupwenga navo hamwe kuchilika chaKwanuka Kufwa chaMwata, ngana muze achilingile Yesu.
KUSANYIKA VATU KUCHILIKA CHAKWANUKA KUFWA CHAMWATA
Vyuma muka munahase kulinga mangana muzate chikuma mulimo wakusanyika vatu kuKwanuka Kufwa chaMwata? (Talenu palangalafu 8-10) e
8. Vyuma muka vanalinginga vatu jaYehova mangana vasanyike vatu kuchilika chaKwanuka Kufwa chaMwata? (Talenu muvwimbimbi.)
8 Vatu jaYehova vanasanyikanga vatu kuchilika chaKwanuka Kufwa chaMwata hamyaka yayivulu. Mumwaka wa 1881, vandumbwetu vamuUnited States vavalwezele valikungulwile muzuvo yandumbwetu muAllegheny, Pennsylvania, mangana valinge echi chilika chakulipwila. Kutwala muze, chikungulwilo hichikungulwilo chalingilenga chilika chaKwanuka Kufwa chaMwata hauka wacho. Kuheta muMarch 1940, vaka-kwambulula vavalwezele vasanyikengako vatu vamujingalila javo vaze vapwilenga vakuwahilila. Kaha mu 1960, Mbetele yaputukile kutuminanga vikungulwilo mapapilo akusanyika vatu. Kufuma vene haze, tunapangilanga vatu mapapilo amavulu chikuma akuvasanyika kuKwanuka Kufwa chaMwata. Mwomwo ika tweji kuzachilanga nangolo mangana tusanyike vatu kuchilika?
9-10. Veya veji kunganyalanga kukukilikita chetu hakusanyika vatu kuKwanuka Kufwa chaMwata? (Yowano 3:16)
9 Chuma chimwe cheji kutulingisanga tusanyike vatu kuKwanuka Kufwa chaMwata shina twasaka vaze navapwako halwola lwatete vatachikize chuma chize Yehova naYesu vatulingila. (Tangenu Yowano 3:16.) Twafwila ngwetu, vyuma navamona nakwivwa hachilika kana navivakunyula vafwile kulinangula vyavivulu nakupwa vangamba jaYehova. Oloze kuli vatu veka veji kunganyalanga kuchilika kana.
10 Tweji kusanyikanga nawa vatu vaze vazachililenga Yehova oloze vazeya. Tweji kulinganga ngocho mangana vanuke ngwavo Kalunga hanga avazangila. Vatu vavavulu tweji kusanyikanga veji kwizanga, kaha tweji kuwahililanga hakuvamona. Kupwa kuchilika chaKwanuka Kufwa chaMwata cheji kuvanukisanga omwo valivwishilenga kuwaha kuzachila Yehova kunyima. Tutalenu havyuma vyasolokele kuli Monica. c Aputukile cheka kupwa muka-kwambulula watwima mulwola lwamusongo waCOVID-19, kaha nawa vamusanyikile kuchilika chaKwanuka Kufwa chaMwata. Hanyima yakupwa kuchilika chamu 2021, ambile ngwenyi: “Chilika chaKwanuka Kufwa chaMwata chauno mwaka chinapu chakulipwila chikuma kuli ami. Ngunatwame myaka 20, oloze uno mwaka hakiko ngunazate jino mulimo wakwambulula nakusanyika vatu kuchilika chaKwanuka Kufwa chaMwata. Ngwazatanga mulimo kana natwima mwomwo ngwasakwilila Yehova naYesu hachuma vangulingila.” (Samu 103:1-4) Numba tuhu vatu natusanyika navetava chipwe navakana, oloze tweji kuzatanga nangolo tusanyike vakwetu kuchilika chaKwanuka Kufwa chaMwata hakutachikiza ngwetu Yehova eji kuwahililanga hakukilikita chetu.
11. Uno Yehova natukisula ngachilihi hakuzata chetu nangolo tusanyike vatu kuKwanuka Kufwa chaMwata? (Hangai 2:7)
11 Yehova natukisula mwamunene chikuma mwomwo yakukilikita chetu mangana tusanyike vatu kuKwanuka Kufwa chaMwata. Chakutalilaho, mu 2021, numba tuhu vyuma vyakaluhwile mwomwo yamusongo waCOVID-19, oloze kuvula chavatu vapwile kuchilika chaKwanuka Kufwa chaMwata vahetele ku 21,367,603. Kanda lyehi tuhetesengaho totala kana. Kaha kuvula chaVinjiho jaYehova mukaye kosena nachingilamo kafwe mapapa kavali nachimbwa. Chipwe ngocho, chuma chachilemu kuli Yehova keshi kuvula chavatu veji kupwangako kahako, oloze vatu vavene vakiko vapwa vavalemu. (Luka 15:7; Chimo. 1, 2:3, 4) Twatela kufwelela ngwetu, omu natusanyika vatu, Yehova mwatukafwa tuwane vatu vamwaza michima.—Tangenu Hangai 2:7.
KULINGA CHILIKA CHAKWANUKA KUFWA CHAMWATA CHAMOKOMOKO NAUKALU
Yehova mwatukisulanga hakukilikita chetu mangana tupwenga kuKwanuka Kufwa chaMwata (Talenu palangalafu 12) f
12. Vyuma muka vinahase kutulingisa chitukaluhwile kulinga chilika chaKwanuka Kufwa chaMwata? (Talenu muvwimbimbi.)
12 Yesu apolofwetele ngwenyi, muno mumakumbi akukuminyina natumonanga ukalu wakulisezaseza. Ukalu kana shina kutufumbukila mutanga, nakutuyanjisa, najijita, namisongo yachihita naukalu weka. (Mateu 10:36; Mako 13:9; Luka 21:10, 11) Lwola lumwe, ukalu kana weji kulingisanga chitukaluhwile kulinga chilika chakwanuka kufwa chaYesu. Uno vyuma muka vanalinginga vandumbwetu mangana vahonese ukalu kana, kaha Yehova navakafwenga ngachilihi?
13. Uno Yehova akiswile ngachilihi Artem hakuhamuka chenyi namuchima wenyi wakufwila kulinga chilika chaKwanuka Kufwa chaMwata mukamenga?
13 Kutukasa mutumenga. Vandumbwetu vaze vakasa mwomwo yavyuma vafwelela veji kuzatanga noho hakumina ngolo javo mangana valinge chilika chakwanuka kufwa chaYesu. Tutalenu hachakutalilaho chaArtem. Mungonde yaKwanuka Kufwa chaMwata chamu 2020, vamuhakile mukapete kakamenga kakandende kakuta vatu vawana chipwe vatanu. Oloze chamokomoko nakumukasa, ahashile kuwana vyakuzachisa kupwa vifwanyisa, kaha nawa alizangile kuhanjika chihande chaKwanuka Kufwa chaMwata mangana anganyale. Oloze vakwavo apwile navo mukapete vapwilenga vaka-kunwa makanya nakuhanjika mazu akasautu. Chuma muka alingile? Avalombele vahole nakwecha kunwa makanya haola yimwe. Ava vakwavo vafunge vetavilile kulitwamina kunwa makanya nakuhanjika mazu akasautu halwola lwaKwanuka Kufwa chaMwata. Artem ambile ngwenyi, “Ngwahamukile kuvalweza vyachilika chaKwanuka Kufwa chaMwata.” Numba tuhu hakavanga kavasakile kwivwa vyachilika kanako, oloze omu vamwene nakwivwa ndumbwetu Artem mwalinga chilika kana, vamuhulishile jino avalweze vyavivulu.
14. Vyuma muka twalingile mangana tulinge chilika chaKwanuka Kufwa chaMwata chamokomoko namusongo wachihita waCOVID-19?
14 Musongo wachihita waCOVID-19. Omu wepukile musongo kana, vatu jaYehova kavahashile kulikungulwila hamwe valinge chilika chaKwanuka Kufwa chaMwatako. Oloze echi kachavahonesele kupwa nachilika kanako. d Vikungulwilo vize vyatwama mujingalila muze mwatwama Internet, vyalingile chilika kana kuzachisa makina oku vali nakulimona. Nyi ngachilihi makombakaji avandumbwetu vaze kavatwama naInternetko? Mumafuchi amwe, valongesele vyuma mangana chihande chaKwanuka Kufwa chaMwata vachihanjike hachisaji chamivwimbimbi chipwe hachisaji chahapeho. Kaha nawa mitango yakopele echi chihande mumalimi akuzomboka 500 mangana vaze vatwama kujingalila jakwakusuku vapwenga nachilika kana. Kaha kwapwilenga vandumbwetu vaze vatwalililenga vandumbwavo vihande kanevi vyakukopa.
15. Vyuma muka munalinangula kumujimbu waSusan?
15 Kutufumbukila mutanga. Chuma chachinene cheji kusakanga kuhonesa vamwe kupwa kuchilika chaKwanuka Kufwa chaMwata shina kuvafumbukila mutanga. Tutalenu hachakutalilaho chaSusan uze apwile nakulinangula Mbimbiliya. Halikumbi lyaKwanuka Kufwa chaMwata chamu 2021, Susan alwezele muka-kumunangula Mbimbiliya ngwenyi keshi kuhasa kupwa kuchilika kanako mwomwo yakumufumbukila mutanga. Muka-kumunangula atangile Luka 22:44. Kaha amulumbunwinyine ngwenyi nge tuli nakumona ukalu, twatela kulondezeza Yesu hakulombanga kuli Yehova nakumufwelela chikuma. Lichako, Susan awahishile vifwanyisa nakutala vindiyo yaKukekesa Chisoneka chaLikumbi naChimene ha jw.org/lue. Kuheta chingoloshi, ayile mukapete kenyi nakwivwilila kuchihande chaKwanuka Kufwa chaMwata hashinga. Kufumaho, asonekelele mukanda muka-kumunangula Mbimbiliya ngwenyi: “Zau wangukolezezanga chikuma. Kaha ngwazatanga nangolo jami josena mangana ngupwenga kuchilika chaKwanuka Kufwa chaMwata, ngocho Yehova angukafwanga. Ngunawahilila chikuma, kaha nawa ngwamusakwilila.” Kutala mwafwelela ngwenu Yehova mwamikafwa nge muli nakumona ukalu wakufwana ngana tahi?
16. Mwomwo ika twafwelela ngwetu Yehova mwatukisulanga hakukilikita chetu tupwenganga kuKwanuka Kufwa chaMwata? (Wavaka-Loma 8:31, 32)
16 Yehova eji kwivwanga kuwaha chikuma hakukilikita chetu mangana tulinge chilika chakwanuka kufwa chaYesu. Twatela kufwelela ngwetu mwatukisula kachi nge natusolola kusakwilila chetu havyuma atulingila. (Tangenu Wavaka-Loma 8:31, 32.) Shikaho, tufwilenu kukapwa kuchilika chaKwanuka Kufwa chaMwata chauno mwaka, nakulihakako tuzate chikuma milimo yakushipilitu mungonde yaKwanuka Kufwa chaMwata.
MWASO 18 Kusakwilila Ndando Yakusokola
a LyaChivali, ha 4 April, 2023, mayevuyevu avatu mukaye navakalinga chilika chaKwanuka Kufwa chaKulishitu. Vatu vavavulu navakapwako halwola lwatete. Kaha nawa Vinjiho vamwe vaze vazeya, vaze vanahononga kupwako hamyaka yayivulu navakapwako. Vamwe navakahonesa ukalu waunene hakusaka kupwa kuchilika kana. Chamokomoko naukalu namukamona, oloze tachikizenu ngwenu Yehova mwakawahilila hakumona munazate nangolo mupwenga kuchilika kana.
b Vatu kana vafwelela ngwavo mbolo navinyo veji kuzachisanga hachilika kana vyeji kwalumukanga nakupwa mujimba uvene namanyinga avene aKulishitu. Vafwelela ngwavo mujimba waYesu namanyinga enyi veji kuvihananga cheka kupwa wana hosena oho navazanyina muchilika kana.
c Majina amwe vanawalumuna.
d Yenunga nawa ha jw.org mutale haze vanavuluka ngwavo, “2021 Memorial Commemoration.”
e MAZU AKULUMBUNUNA MUVWIMBIMBI: Kufuma vene mu 1960, mapapilo akusanyika vatu kuKwanuka Kufwa chaMwata anawahilangako lika, kaha oholyapwa kuli akupulita nawawa ahamakina.
f MAZU AKULUMBUNUNA MUVWIMBIMBI: Chimweso—Muvwimbimbi wakusolola vandumbwetu vali nakulinga chilika chaKwanuka Kufwa chaMwata mulwola lwajita.
