1-2. (a) Uno tweji kwivwanga ngachilihi hakushinganyeka hakuyoya chaYesu namulimo azachile? (b) Vyuma muka natushimutwila muchihande chino?

 NGE tunafwisa mutu twazanga, mutu kana tweji kumushinganyekanga chikuma. Tweji kwivwanga kukola kumuchima hakwanuka vyuma vyasolokanga hamakumbi akukokela kukufwa chenyi chikumanyi nge avizanga misongo yayinene. Oloze mukuhita chalwola tweji kuputukanga kwivwa kuwaha nge tunanuka vyuma atunangwile chipwe vize alingile chipwe vize ahanjikile mangana atukolezeze chipwe kutusehesa.

² Chochimwe nawa, tweji kwivwanga ushona nge tuli nakutanga mijimbu yakuyanda chaYesu nakufwa chenyi. Mungonde yaKwanuka Kufwa chaMwata, tweji kushinganyekanga hakulema chandando yakusokola yize ahanyine. (Koli. 1, 11:24, 25) Tweji kwivwanga nawa kuwaha hakushinganyeka havyuma vyosena ahanjikilenga Yesu navize alingilenga omu apwile hano hamavu, nahavyuma ali nakulinga oholyapwa navize mwakatulingila kulutwe. Kushinganyeka havyuma kana nahazangi atusolwela nachitukunyula tusolole kusakwilila chetu mujijila jakulisezaseza, nganomu natumona muchihande chino.

3. Vyuma muka vyatulingisa tusakwilile Yesu handando yakusokola?

³ Kushinganyeka hakuyoya chaYesu nakufwa chenyi cheji kutukunyulanga tumusakwilile. Omu azachilenga mulimo wenyi hano hamavu, anangwile vatu vyuma vyamwaza vize Wangana waKalunga naukaneha. Twamona vyuma kanevi anangwile kupwa vyavilemu. Twasakwilila hakutuhana ndando yakusokola, mwomwo  yikiko yeji kutukafwanga tupwenga nausepa wakukola naYehova naYesu. Kaha nawa vaze vafwelela Yesu vatalilila kukayoya haya myaka. (Yowa. 5:28, 29; Loma 6:23) Jikisu kana japwa jawana wakanyombo, kaha katweshi kuhasa kufweta Kalunga naKulishitu havyuma vatulingilako. (Loma 5:8, 20, 21) Oloze tunahase kusolola kusakwilila chetu. Mujila muka?

4. Vyuma muka alingile Maliya Mangatala vize vyasolola nge asakwililile Yesu havyuma amulingilile? (Talenu muvwimbimbi.)

⁴ Achishinganyekenu hachakutalilaho chaMaliya Mangatala pwevo wakaYuleya. Ou pwevo ayanjile chikuma mwomwo vandemone 7 vaze apwile navo vamuyanjishilenga. Pamo ashinganyekelenga ngwenyi kakweshi mutu nahase kumukafwako. Ou pwevo evwile kuwaha chikuma nakusakwilila Yesu hakumufumisa vaze vandemone. Muchima wenyi wakusakwilila wamulingishile akavangize Yesu nakuzachisa lwola lwenyi nangolo jenyi navikumba vyenyi mangana akundwize mulimo wakwambulula. (Luka 8:1-3) Numba tuhu Maliya asakwililile chikuma Yesu havyuma amulingililile, oloze halwola kana katachikijile vyuma mwakamulingila kulutweko. Katachikijile ngwenyi Yesu mwakafwila vatu, “mangana ngwenyi weshowo mwamufwelela” akalivwise kuwaha kuyoya haya myakako. (Yowa. 3:16) Chipwe ngocho, Maliya asolwele muchima wakusakwilila hakupwa wakushishika kuli Yesu. Omu Yesu apwile nakulyonyinga hachitondo chakuyanjishila, Maliya emanyine kwakamwihi mwomwo azakamine Yesu nakuzakama nawa vakwavo. (Yowa. 19:25) Omu afwile Yesu, Maliya namapwevo veka vavali valanjile vyuma vyalivumba lyamwaza mangana vakwite mujimba waYesu shimbu kanda vamufunde. (Mako 16:1, 2) Yehova akiswile Maliya mwomwo yakupwa wakushishika kuli Yesu. Omu Yesu asangukile aliwanyine naMaliya kaha ashimutwilile nenyi. Oloze tumbaji vavavulu kavapwile nakutokwa kanako.—Yowa. 20:11-18.

5. Tunahase kusolola ngachilihi ngwetu twasakwilila Yehova naYesu havyuma vyosena vize vatulingila?

⁵ Nayetu tunahase kusakwilila Yehova naYesu havyuma vatulingila, hakuzachisa lwola lwetu  nangolo jetu najimbongo jetu mangana tukundwize mulimo waWangana. Chakutalilaho, tunahase kulisuula kuzata mulimo wakutungatunga nawakuwahisa jizuvo jakulemesela Kalunga.

6. Mwomwo ika tunahase kuhanjikila ngwetu ndando yakusokola yapwa wana kuli mutu himutu?

⁶ Nge natushinganyekanga omwo Yehova naYesu vatuzanga, kaha nachitukunyula nayetu tuzange vakwetu. (Yowa. 1, 4:10, 19) Tweji kuvazanganga chikuma nge natushinganyeka ngwetu Yesu atufwililile tuvosena mutu himutu. Kaposetolo Paulu atachikijile chuma kana nakusolola muchima wakusakwilila omu asonekelele vaka-Ngalesha ngwenyi: “MwanaKalunga . . . anguzangile ami nakulyecha ivene hali ami.” (Ngale. 2:20) Yehova amikoka kuhichila mundando yakusokola mangana muhase kupwa mumasepa jenyi. (Yowa. 6:44) Tunafwelela ngwetu mweji kwivwanga kuwaha hakutachikiza ngwenu Yehova amwene chuma chimwe chamwaza muli enu nakuhana ndando yakusokola mangana mupwenga mumasepa jenyi. Kaha nawa zangi yenu yakuzanga Yehova naYesu yinatohwelako chikuma. Tuvosena mutu himutu twatela kulihulisa ngwetu, ‘Uno zangi kana yatela kungukunyula ngulinge ika?’

7. Ngana muze tunamono hamuvwimbimbi, tuvosena tunahase kusolola ngachilihi ngwetu twazanga Yehova naYesu? (Wavaka-Kolinde 2, 5:14, 15; 6:1, 2)

⁷ Kuzanga Kalunga naKulishitu cheji kutukunyulanga tuzange vakwetu. (Tangenu Wavaka-Kolinde 2, 5:14, 15; 6:1, 2.) Jila yimwe tweji kusolwelangamo zangi kana shina hakuzata natwima mumulimo wakwambulula. Tweji kushimutwilanga nakala mutu natuwana. Katwatala vatu kumeso mwomwo yachikova chavo chipwe mwomwo yalilimi lyavoko, kaha nawa tweji kushimutwilanga nakala mutu, numba atwama naluheto chipwe chihutu, chipwe atanga chikuma chipwe chiku. Kulinga ngocho nachisolola nge tuli nakulinga mwaya muchima waYehova “uze  ajina ngwenyi vatu vosena vavalwile, ngwenyi, vapwenga nachinyingi chakwoloka chakutachikiza muchano.”—Chimo. 1, 2:4.

8. Tunahase kusolola ngachilihi ngwetu twazanga vandumbwetu vosena?

⁸ Tweji kusololanga nawa ngwetu twazanga Kalunga naKulishitu hakuzanga vandumbwetu vosena. (Yowa. 1, 4:21) Tweji kusololanga muchima wakuvazakama nakuvakafwa nge vali muukalu. Tweji kuvavendejekanga nge vanafwisa nakuvatambukila nge vanaviji. Kaha nawa tweji kuzatanga nangolo tuvakolezeze. (Koli. 2, 1:3-7; Teso. 1, 5:11, 14) Tweji kuvalombelangako lika mwomwo twatachikiza ngwetu “kulembelela chamuka-kwoloka chatwama nangolo.”—Yako. 5:16.

9. Jila muka yikwavo tunahase kusolwelamo ngwetu twazanga vandumbwetu vosena?

⁹ Tweji kusololanga nawa ngwetu twazanga vandumbwetu vosena hakuzata nangolo mangana tutwame navo mukuunda. Tweji kukilikitanga mangana tulondezeze muchima waYehova wakukonekela. Yehova asuwile Mwanenyi kwiza nakutufwila, ngocho nayetu twatela kukonekelelanga vandumbwetu nge vanatulingi mwamupi. Katweshi nakusaka kupwa ngana mwauze ndungo wakuhuka vavuluka muchishimo chaYesuko. Numba tuhu kaka yenyi amukonekelele hamukuli waunene uze apwile nawo, oloze ikiye kakonekelele mukwavo ndungo uze apwile namukuli wenyi waundendeko. (Mateu 18:23-35) Kachi nge mwalikokojwesanga nandumbwenu muchikungulwilo, kaha mwatela chatete kulivwasana shimbu kanda muyenga kuchilika chaKwanuka Kufwa chaMwata. (Mateu 5:23, 24) Nge namulinga ngocho, kaha namusolola ngwenu mwazanga chikuma Yehova naYesu.

10-11. Uno vakulwane muchikungulwilo navahasa kusolola ngachilihi ngwavo vazanga Yehova naYesu? (WaPetulu 1, 5:1, 2)

¹⁰ Uno vakulwane muchikungulwilo navahasa kusolola ngachilihi ngwavo vazanga Yehova naYesu? Jila yayilemu vanahase kulingilamo ngocho shina kuzakama mikoko jaYesu. (Tangenu WaPetulu 1, 5:1, 2.) Yesu alumbunwine chishina kana hatoma kuli kaposetolo Petulu. Hakuwana nge Petulu akanyine Yesu mapapa katatu, ngocho apwile nakutondatonda jijila jakusolwelamo ngwenyi azangile Yesu. Omu Yesu asangukile, ahulishile Petulu ngwenyi: “Ove Shimona mwanaYowano, kutala wanguzanga tahi?” Twafwelela ngwetu Petulu asakile kulingako vyuma vimwe mangana asolole ngwenyi azanga Mwata wenyi. Yesu ambile kuli Petulu ngwenyi: “Funganga mikoko jami vavandende.” (Yowa. 21:15-17) Petulu asolwele ngwenyi azanga Yesu hakuzakama kanawa mikoko jaMwata mukuyoya chenyi chosena.

¹¹ Enu vakulwane muchikungulwilo, vyuma muka mwatela kulinga mungonde yaKwanuka Kufwa chaMwata vize navisolola nge mazu ahanjikile Yesu kuli Petulu apwa amalemu kuli enu? Munahase kusolola ngwenu mwazanga chikuma Yehova naYesu hakuyanga mumulimo waufunga nakuzata nangolo mukafwe vaze vazeya vakinduluke cheka kuli Yehova. (Ezeke. 34:11, 12) Munahase nawa kukolezeza vilongesa vyaMbimbiliya navatu vakuwahilila vaze veji kwizanga kuchilika chaKwanuka Kufwa chaMwata. Twasaka vatu kana vamone ngwavo twavazanga mwomwo twafwelela ngwetu likumbi limwe navakiko nawa navakapwa vaka-kukavangiza Yesu.

12. Mwomwo ika kushinganyeka hamazu aYesu ahanjikile haufuku wamakumishilo shimbu kanda afwenga, cheji kutulingisanga tupwenga vakumika? (Yowano 16:32, 33)

¹² Haufuku wamakumishilo shimbu kanda afwenga, Yesu alwezele tumbaji twenyi ngwenyi: “Muno mukaye namumona luyando, oloze likolezezenu! Ami ngunafungulula lyehi kaye.” (Tangenu Yowano 16:32, 33.) Chuma muka chakafwile Yesu omike nakutwalaho lika kupwa wakushishika palanga nakukufwa omu vamufumbukilile kuli vaka-kole? Apendaminyine hali  Yehova. Yesu alombele Yehova alame tumbaji twenyi mwomwo atachikijile ngwenyi navakiko navakamona vyeseko vyovimwe. (Yowa. 17:11) Mwomwo ika chuma kana cheji kutulingisanga tupwenga vakumika? Mwomwo twatachikiza ngwetu Yehova apwa wangolo chikuma kuhambakana vaka-kole jetu. (Yowa. 1, 4:4) Yehova eji kumonanga vyuma vyosena. Twakunyuka ngwetu nge natupendamina hali ikiye, kaha mwatukafwa tuhone kwivwa woma nakupwa vakumika.

13. Uno Yosefwe wakuAlimateya asolwele ngachilihi muchima wakuhamuka?

¹³ Achishinganyekenu hachakutalilaho chaYosefwe wakuAlimateya. Apwile mutu wamulemu chikuma muYuleya. Apwile muka-Sunendeline, yize yapwile zango yakulitulaho yakusopa milonga yamuYuleya. Chipwe ngocho, halwola Yesu azachilenga mulimo wenyi hano hamavu, Yosefwe kapwile wakuhamukako. Yowano ambile ngwenyi Yosefwe apwilenga “kambaji kaYesu oloze kalisolwele hatoma[ko] hakwivwa woma vaYuleya.” (Yowa. 19:38) Numba tuhu Yosefwe azangile mujimbu waWangana, oloze kalisolwele kuli vakwavo ngwenyi afwelelele Yesuko. Pamo evwilenga woma ngwenyi vatu kaveshi kumuvumbika chekako nge navatachikiza ngwavo apwile kambaji kaYesu. Oloze Mbimbiliya yatulweza ngwayo, omu alingile Yesu hanafu lyehi, Yosefwe “ahamukile nakuya kuli Pilatu nakulomba mujimba waYesu.” (Mako 15:42, 43) Aha jino Yosefwe kaliswekele cheka kupwa kambaji kaYesuko.

14. Vyuma muka mwatela kulinga nge muli nakwivwa woma vatu?

¹⁴ Kutala mweji kwivwanga woma vatu ngana muze chapwile kuli Yosefwe tahi? Kutala shimbu jimwe mweji kwivwanga sonyi kulweza vakwenu vaka-shikola chipwe vaka-milimo ngwenu mwapwa muVinjiho jaYehova tahi? Kutala muli nakulangisa kupwa vaka-kwambulula chipwe kumimbapachisa mwomwo yakushinganyeka havyuma navashinganyeka vakwenu hali enu tahi? Kamwatela kwechelela vyuma kana vimihonese kulinga vyuma vize mwatachikiza ngwenu vyakwolokako. Lombenunga Yehova namuchima wenu wosena. Mulwezenu amihane muchima wakuhamuka mangana mulinge mwaya muchima wenyi. Omu namumona mujila Yehova ali nakukumbulwilamo kulomba chenu, namupwa vakumika chikuma nakuhamuka.—Isa. 41:10, 13.

15. Omu Yesu asolokele kuli tumbaji twenyi, kuwahilila chavo chavalingishile valinge vyuma muka? (Luka 24:52, 53)

¹⁵ Omu Yesu afwile, tumbaji vahombele chikuma. Achishinganyekenu nge yenu mwapwile muukalu kana. Ava tumbaji vafwishile sepa lyavo uze vazangile chikuma. Kaha nawa vashinganyekele ngwavo kaveshi cheka nalutalililoko.  (Luka 24:17-21) Chipwe ngocho, omu Yesu asolokele kuli vakiko, avakafwile vatachikize mulimo apwile nawo wakutesamo upolofweto wamuMbimbiliya. Avahanyine nawa mulimo waulemu. (Luka 24:26, 27, 45-48) Omu mwahichile makumbi 40 kufuma haze Yesu asangukile, ayile mwilu. Kaha tumbaji twenyi kavapwile cheka vakuhombako, oloze vapwile jino vakuwahilila. Kutachikiza ngwavo Mwata wavo ali jino wamutonyi, kaha nawa mwavakafwa vatesemo mulimo wavo wauhya, chavalingishile vapwenga vakuwahilila. Kuwahilila chavo chavalingishile vatwaleho lika kwalisa Yehova chakuzeneka kulitwamina.—Tangenu Luka 24:52, 53; Vili. 5:42.

16. Uno tunahase kulondezeza ngachilihi tumbaji twaYesu?

¹⁶ Uno tunahase kulondezeza ngachilihi tumbaji twaYesu? Tunahase kulivwisa kuwaha kulemesa Yehova mumwaka wosena, keshi mungonde yaKwanuka Kufwa chaMwata kahako. Echi chasakiwa kuhaka Wangana waKalunga kulutwe mukuyoya chetu. Chakutalilaho, vamwe vanalumunangako makumbi akuzata milimo yavo mangana vazate mulimo wakwambulula, nakupwanga kukukunguluka nakulemesa Kalunga mwatanga. Kaha nawa, veka hakusaka vavazachise chikuma muchikungulwilo chipwe kuya nakuzachila kuze kuli nakusakiwa vaka-kwambulula Wangana, vanalitwamina kutonda luheto, luze vatu vamwe vamona kupwa lwalulemu. Hakuwana nge twasakiwa kupwa vakumika mangana tutwaleho lika kuzachila Yehova, ngocho atushika ngwenyi mwatukisula nge natuhaka Wangana wenyi kulutwe mukuyoya chetu.—Vishi. 10:22; Mateu 6:32, 33.

17. Vyuma muka munalitomena kulinga mungonde yino yaKwanuka Kufwa chaMwata? (Talenu muvwimbimbi.)

¹⁷ Tuli nakutalilila kukapwa kuchilika chaKwanuka Kufwa chaMwata, chize nachikapwako lyaChivali ha 4 April. Chipwe ngocho, kamwatela kuvandamina likumbi kana numba mushinganyeke hakuyoya chaYesu, nahakufwa chenyi, nahazangi yize ikiye naYehova vatusolwelako. Oloze shinganyekenunga havyuma kana mungonde yosena yaKwanuka Kufwa chaMwata. Chakutalilaho, munahase kunoneka lwola lwakutanga nakushinganyeka havyuma vasoneka hachati yakwamba ngwavo “Chalumingo Chamakumishilo chaYesu Hamavu,” yize yatwama muVihande Vyakuhakilako B12 muMbimbiliya yaKaye Kakahya. Omu namutanga mujimbu wakuyoya chaYesu, talenu vyuma navimilingisa mupwenga namuchima wakusakwilila, nazangi, nakupwa vakuhamuka nakuwahilila. Kufumaho, shinganyekenu hajijila munahase kusolwelamo kusakwilila chenu. Yesu mwamona vyuma vyosena namulinga kupwa vyavilemu mangana mumwanuke mungonde yakwanuka kufwa chenyi.—Kuso. 2:19.