Uno Mwatachikiza Tahi?
Litemba muka azachishile chilolo wakaEchopa omu Fwilipu ayile kuli ikiye?
LIZU lyamulilimi lyakulivanga valumuna ngwavo “litemba” muMbimbiliya yaKaye Kakahya lyatalisa kukala litemba. (Vili. 8:28, 29, 38) Chipwe ngocho, chasoloka nge uze chilolo wakaEchopa apwile nakutambukila mulitemba lyalinene kuhambakana litemba lyalindende lyavaka-kwasa jita, chipwe lize lyavaka-kulaha. Achishinganyekenu havyuma vimwe vyatulingisa tuhanjike ngocho.
Ou lunga wakaEchopa apwile chilolo uze atambukile ungeji wausuku. “Apwile nachihela chachinene muchiyulo chamwangana wapwevo Kandese wavaEchopa, kaha apwile nawa muka-kulama luheto lwosena lwamwangana.” (Vili. 8:27) Echopa yakushikulu yapwile lifuchi lize vali nakuvuluka makumbi ano ngwavo Sudan, nakusulo yalifuchi lize vali nakuvuluka makumbi ano ngwavo Ejipitu. Numba tuhu ou lunga pamo kazachishile litemba lyolimwe haungeji wosenako, oloze pamo apwile naviteli vyavivulu vyakuzachisa haungeji wenyi wausuku. Hamatemba aze vazachishilenga kumbata vatu mulikulukaji lyamyaka lyakulivanga, hapwile namatemba aze azachishilenga tufumbo vawana. Mukanda umwe uze wahanjika hamukanda wamuMbimbiliya waVilinga wamba ngwawo: “Matemba kana akafwilenga vatu vambate viteli vyavivulu nakulivwisa kuwaha ungeji wavo, kaha nawa chavakafwilenga vatambuke ungeji wausuku.”—Acts—An Exegetical Commentary.
Lunga wakaEchopa apwile nakutanga omu Fwilipu apandamine kuli ikiye. Mbimbiliya yatulweza ngwayo, “Fwilipu alahilile kusali yalitemba, kaha apwile nakumwivwa ali nakutangila helu mukanda wakapolofweto Isaya.” (Vili. 8:30) Matemba akutambuka nawo haungeji kavawatungile mangana atambukenga washiwashiko. Hakuwana nge awa matemba atambukilenga chindende chindende, ngocho chakafwile chilolo wakaEchopa atange kanawa, nakukafwa nawa Fwilipu awane lize litemba numba tuhu apwile nakutambuka hamavu.
Lunga wakaEchopa “alembelelele Fwilipu anyine mulitemba atwame nenyi.” (Vili. 8:31) Muka-kutambukisa litemba lyavaka-kulaha eji kwimananga. Oloze litemba lyakutambuka nalyo lyapwile nachihela chakutwama, kahechi chikiko chalingishile ou chilolo alweze Fwilipu atwame.
Kweseka namijimbu vahwima yamumukanda waVilinga kapetulu 8 namijimbu yakushikulu yiliko, mikanda yetu yakalinwomu yinakusololanga chilolo wakaEchopa ali mulitemba lyalinene keshi mulitemba lyalindende lyavaka-kwasa jita chipwe lyavaka-kulahako.