CHIHANDE CHAKULINANGULA 4
MWASO 30 Tata, Kalunga Kami, Sepa Lyami
Yehova Amizanga Chikuma
“Yehova atwama nazangi chikuma.”—YAKO. 5:11.
CHISHINA
Zangi yaYehova nayitupandamisa kuli ikiye nakutulingisa tulivwe kupwa vakukingiwa nakutuzakama nakutuhizumuna.
1. Nge munakushinganyeka hali Yehova vyuma muka vyeji kwizanga muvishinganyeka vyenu?
KUTALA mwesekaho lyehi kushinganyeka omwo Yehova apwa tahi? Vyuma muka mweji kushinganyekanga kachi nge muli nakuhanjika naikiye kuhichila mukulomba? Numba tuhu katwamona Yehovako, oloze Mbimbiliya yamulumbununa mujijila jajivulu jakulisezaseza. MuMbimbiliya Yehova vamuvuluka ngwavo, “apwa likumbi, apwa kepwe” kaha nawa ngwavo “apwa kakahya kakunongesa.” (Samu 84:11; Hepe. 12:29) Ezekele avulukile solokeso yaYehova muchakumwenesa vamumwenesele ngwenyi apwa nge lilolwa lyasafwila, nachikungo chakuvyakuma nge palata, nakumunyika nge kongolo. (Ezeke. 1:26-28) Nge tunevu jivulukiso kaneji jaYehova, cheji kutulingisanga tumwivwe woma chikuma chipwe kulikomokela havilinga vyenyi.
2. Mwomwo ika vatu vamwe chinahase kuvakaluhwila kupandama kuli Yehova?
2 Hakuwana nge katwamona Yehovako, ngocho chinahase kutukaluhwila kufwelela ngwetu atuzanga. Vamwe vashinganyeka ngwavo Yehova kavazangako, mwomwo yavyuma vyavipi vahichilemo kunyima. Pamo mwomwo yakuhona kupwa nachisemi walunga wakuvazangako. Yehova atachikiza omwo tweji kwivwanga, nomwo chinahase kutukaluhwila kupandama kuli ikiye. Shikaho, hakusaka mangana atukafwe, atulweza vilinga vyenyi vyamwaza kuhichila muMazu enyi.
3. Mwomwo ika twatela kushimutwila hazangi yaYehova?
3 Zangi hivulukiso yamwaza yasolola omwo apwa Yehova. (Yowa. 1, 4:8) Chikupu vene zangi yamulumbununa omwo apwa. Shikaho eji kulinganga vyuma vyosena muzangi. Zangi yaKalunga yapwa yamwaza chikuma kaha nawa yatwama nangolo, mwomwo eji kuyisolwelanga navatu vaze kavamuzangako. (Mateu 5:44, 45) Muchihande chino, natushimutwila chikuma hali Yehova nahazangi. Nge natutwalaho lika kulinangula chikuma hali Kalunga nachitukafwa tumuzange chikuma.
YEHOVA ATUZANGA CHIKUMA
4. Uno mweji kwivwanga ngachilihi hakumisolwela zangi kuli Yehova? (Talenu nawa muvwimbimbi.)
4 “Yehova atwama nazangi chikuma.” (Yako. 5:11) MuMbimbiliya Yehova alifwanyisa kuchisemi wapwevo wakeke. (Isa. 66:12, 13) Achishinganyekenu hali chisemi wapwevo uze eji kuzakamanga mwanenyi wamundende muzangi. Eji kumuhakanga hamambuli nakuhema nenyi, nakuhanjika nenyi nalizu lyalivwovu lyakumusuulwisa. Kachi nge ali nakulila chipwe nge anakwivwa kukola eji kumuzakamanga nakumuhana vyuma ali nakusakiwa. Shikaho nayetu nawa nge tunalizakamina, tweji kupendaminanga hali Yehova mangana atusolwele zangi. Muka-kwimba jisamu asonekele ngwenyi: “Omu ngwalizakaminyine chikuma, Ove wanguvendejekele nakunguunjisa muchima.”—Samu 94:19.
“Nangukamivendejeka nge omu pwevo eji kuvendejekanga mwanenyi” (Talenu palangalafu 4)
5. Uno kumizanga kuli Yehova nachiminganyalisa ngachilihi?
5 Yehova apwa wakushishika. (Samu 103:8) Eji kutuzanganga lika numba nge tunalingi vyuma vyakuhenga. Numba tuhu vaIsalele vevwishilenga Yehova kupihya mapapa kakavulu, oloze ikiye atwalilileho lika kusolwela zangi vaze vapihililile nakwalumuka. Ambile ngwenyi: “Ngwakumwene kupwa uwamulemu, kaha ngwakuvumbikile nakukuzanga.” (Isa. 43:4, 5) Yehova achili lika neyi zangi, ngocho lwola lwosena twatela kupendaminanga hali ikiye. Numba nge tunalingi shili yayinene, Yehova keshi kutusezako. Shikaho, kachi nge natupihilila nakwalumuka nakukinduluka kuli Yehova, kaha mwatwalaho lika kutuzanga. Atufwelelesa ngwenyi, ‘mwatukonekela namuchima wosena.’ (Isa. 55:7) Mbimbiliya yavuluka kukonekela kana ngwayo, “lwola lwakuhizumuna . . . [lwa]kufuma kuli Yehova ivene.”—Vili. 3:19.
6. Uno chisoneka cha Zekaliya 2:8 chatunangula ika hali Yehova?
6 Tangenu Zekaliya 2:8. Hakuwana nge Yehova atuzanga ngocho eji kutachikizanga washi omwo tuli nakwivwa nakufwila kutukinga. Eji kwivwanga kupihya kachi nge vanatulingi mwamupi. Echi chinahase kutulingisanga tulombe ngwetu: “Ngukinge nge katutu kahaliso lyove.” (Samu 17:8) Liso lyeji kwivwanga washi kukola, kaha lyapwa hichihanda chimwe chamujimba chize chapwa chachilemu chikuma. Yehova hakutufwanyisa kukatutu kaliso lyenyi, chapwile kwijiva nge ali nakuhanjika ngwenyi, ‘Weshowo mwamilinga mwamupi enu vatu jami, kaha ali nakulinga mwamupi chuma chize chapwa chachilemu kuli ami.’
7. Mwomwo ika twatela kufwelela chikuma ngwetu Yehova atuzanga?
7 Yehova asaka tukunyuke ngwetu atuzanga mutu himutu. Chipwe ngocho atachikiza ngwenyi, mwomwo yavyuma twahichilemo kunyima tunahase kuhuhwasana numba nge atuzanga chipwe chiku. Pamo tunahase kumona ukalu uze unahase kutulingisa tuhone kufwelela ngwetu Yehova atuzanga. Chuma muka nachitukafwa tufwelele chikuma Yehova? Chuma nachitukafwa shina kutachikiza omwo Yehova asolwele zangi yenyi kuli Yesu, nakuli vawavisa, nakuli yetu tuvosena.
OMWO YEHOVA EJI KUSOLWELANGAMO ZANGI
8. Mwomwo ika Yesu akunyukile ngwenyi Ise amuzanga?
8 Yehova naYesu vanapunga hamwe vavali hamyka yayivulu chikuma kuhambakana kala mutu. Kaha hamyaka yosena yize vanapunga hamwe mwilu, vatungile usoko wakukola nakulizanga chikuma. Shikaho hali Mateu 17:5, Yehova ahanjikile kutalisa kuli Yesu ngwenyi, ‘Ou ikiye ngwevwila kuwaha.’ Yehova asakile tutachikize ngwenyi azanga chikuma Yesu, kaha amuvuluka ngwenyi: “Mwanami, ou ngwazanga.” Yehova asuulukile chikuma navilinga apwile navyo Yesu, chikumanyi omu alisuwile kuhana kuyoya chenyi. (Efwe. 1:7) Chikupu vene Yesu atachikijile ngwenyi Ise amuzanga chikuma. Ahanjikilenga mapapa kakavulu namuchima wakukunyuka ngwenyi Ise amuzanga.—Yowa. 3:35; 10:17; 17:24.
9. Mazu muka aze asolola nge Yehova azanga chikuma vawavisa? Lumbununenu. (Wavaka-Loma 5:5)
9 Yehova asolola nawa ngwenyi azanga vawavisa. (Tangenu Wavaka-Loma 5:5.) Talenu lizu lyakwamba ngwavo “vanayihingunwina.” Mukanda umwe wahanjika haMbimbiliya walumbununa lizu kana ngwavo “kwiza hali yetu nge kumbwambumuka chameya amwanakalwiji.” Chikupu vene, echi hichakutalilaho chamwaza chalumbununa zangi yayinene chikuma atwama nayo Yehova hali vawavisa. Shikaho, vawavisa vatachikiza ngwavo, ‘vavazanga kuli Kalunga.’ (Yuta 1) Kaposetolo Yowano ahanjikile omwo ikiye navakwavo vawavisa vapwile nakwivwa hakusoneka ngwenyi: “Talenu omu yatohwa zangi atusolwela Setu, hakutulingisa vatuvuluke ngwavo tuvana vaKalunga.” (Yowa. 1, 3:1) Uno Yehova azanga kaha vawavisa tahi? Nduma, Yehova asolola ngwenyi atuzanga tuvosena.
10. Uno Yehova asolola ngachilihi ngwenyi amizanga chikuma?
10 Jila muka yayinene yize Yehova asolwelamo vatu zangi yenyi? Hakuvahana ndando yakusokola, yize kanda vasololengaho lyehi kukala mutu. (Yowa. 3:16; Loma 5:8) Yehova asuwile Mwanenyi azanga afwile vatu vosena mangana vatukonekele jishili jetu nakutulingisa tupwenga tumasepa jenyi. (Yowa. 1, 4:10) Nge natushinganyekanga handando ahanyine Yehova naYesu kaha natutachikiza ngwetu vatuzanga chikuma etu tuvosena. (Ngale. 2:20) Yehova kahanyine eyi ndando yakusokola mwomwo yachiyulo chenyi chakwolokako, oloze alingile ngocho mwomwo yazangi. Yehova asolola zangi yenyi hakulisuula kutuhana Mwanenyi Yesu uze azanga chikuma. Etavishile Mwanenyi atuyanjile nakutufwila.
11. Vyuma muka tweji kulinangulanga hali Yelemiya 31:3?
11 Nganomu tunashimutwila lyehi, Yehova eji kutulwezanga hatoma ngwenyi atuzanga chikuma. (Tangenu Yelemiya 31:3.) Yehova atupandamisa kuli ikiye mwomwo atuzanga. (Esekesenuko Lushimbi lwamuchivali 7:7, 8.) Kakweshi chuma chipwe mutu numba umwe uze mwatuhandula kuzanga yaKalungako. (Loma 8:38, 39) Uno eyi zangi yeji kumilingisanga mwivwenga ngachilihi? Tangenu Samu 23, mangana mumone omwo zangi yaYehova namuchima wenyi wakuzakama vatu vyakafwile Ndavichi, nomwo vinahase kutukafwa nayetu.
UNO ZANGI YAYEHOVA YEJI KUMILINGISANGA MWIVWENGA NGACHILIHI?
12. Uno munahase kulumbununa ngachilihi mukavatu mazu atwama hali Samu 23?
12 Tangenu Samu 23:1-6. Mukanda waSamu 23 wapwa himwaso wahanjika hazangi yaYehova namuchima wenyi wakuzakama vatu. Ndavichi uze asonekele eyi samu alumbununa usepa wakukola apwile nawo naYehova Kafunga kenyi. Ndavichi alivwile kupwa wakukingiwa mwomwo yakwitavila Yehova amutwaminyine nakupendamina chikuma hali ikiye. Ndavichi atachikijile nawa ngwenyi zangi yaYehova yakwilila nayipwanga nayikiye mukuyoya chenyi chosena. Vyuma muka vyamulingishile apwenga nalufwelelo kana?
13. Mwomwo ika Ndavichi afwelelele chikupu ngwenyi Yehova mwamuzakama?
13 “Kangweshi kukalikiza chuma numba chimweko.” Ndavichi akunyukile chikupu ngwenyi Yehova apwile nakumuzakama, mwomwo amuhanyinenga lika vyuma vyosena apwile nakusakiwa. Ndavichi nawa alivwishile kuwaha usepa wenyi naYehova nahakumwivwila uselewa. Echi chamulingishile akunyuke ngwenyi, Yehova mwatwalaho lika kumuzakama, chamokomoko navyuma navikamusolokela kulutwe. Ndavichi afwelele chikuma zangi yaYehova kuhambakana kala vyuma vize vyamulingishile alizakamine. Kulinga ngocho, chamulingishile apwenga wakuwahilila nakusuuluka.—Samu 16:11.
14. Uno Yehova eji kutuzakamanga ngachilihi?
14 Yehova eji kutuzakamanga chikumanyi nge vyuma vyavipi vinatusolokela mukuyoya chetu. Claire, a uze nazachilanga haMbetele hamyaka yakuzomboka 20, alizakaminyinenga chikuma omu tanga yenyi yamwenenga ukalu kuswa kumwe. Ise avijile musongo wakalepa, songo yenyi wapwevo nawa vamufumishile muchikungulwilo, kaha tanga yenyi kayapwile cheka najimbongo jakusekasana, zuvo yavo nawa yalyenyekele. Uno Yehova avazakamine ngachilihi muzangi? Claire ambile ngwenyi: “Yehova akafwile tanga yami mangana vapwenga navyuma vyakulikafwa navyo vize vapwilenga nakusakiwa hakumbi hakumbi. Vyuma natuhanenga Yehova mapapa kakavulu vyavivulu kuhambakana navize tuli nakusakiwa. Ngweji kwanukanga lika halwola luze ngwamwene zangi yaYehova kaha kangweshi kukavulyama zangi kanako. Vyuma ngwahichilemo vyangukafwile ngutwaleho lika kuzachila Yehova namulwola lwaukalu.”
15. Vyuma muka vyahizumwine Ndavichi? (Talenu nawa muvwimbimbi.)
15 “Eji kunguhizumunanga.” Shimbu jimwe Ndavichi alizakaminyinenga mwomwo yaukalu wauvulu navyeseko apwile nakuhitamo. (Samu 18:4-6) Chipwe ngocho, Yehova uze atwama nazangi kaha nawa muka-kuzakama amuhizumwinenga. Yehova atwalilenga ou sepa lyenyi wakuhomba “kuulilo wamwila wachimbete” “[na]kuvihela vyameya amavulu vyakunokela.” Echi chalingishile Ndavichi akwate cheka ngolo nakutwalaho lika kuzachila Yehova.—Samu 18:28-32.
Nahalwola Ndavichi ahombele, Yehova amusolwelelele zangi, nakumuzakama nakumuhizumuna (Talenu palangalafu 15)
16. Uno zangi yaYehova yeji kumihizumunanga ngachilihi?
16 Namakumbi ano nawa omu tuli nakumona vyeseko namaukalu eka mukuyoya “katwanongele ndolokotoko mwomwo yazangi yaYehova yakwilila.” (Lungu. 3:22; Kolo. 1:11) Ivwenu vyuma ahichilemo ndumbwetu Rachel. Ou ndumbwetu ahombele chikuma omu lunga lyenyi amusezele nakuseza nawa Yehova mulwola lwamusongo wachihita waCOVID-19. Vyuma muka Yehova amulingililile? Ambile ngwenyi: “Yehova angukafwile ngumone ngwami anguzanga. Anguhanyine masepa vaze vashikaminenga nayami, nakungunehela vyakulya, nakungutumina mijimbu navisoneka, nakungusehesa, nakungukafwa ngwanukenga lika ngwami Yehova apwile nakunguzakama. Ngweji kusakwililanga Yehova hakunguhana tanga kaneyi yayinene ngana yazangi.”
17. Mwomwo ika Ndavichi kevwililile “woma chuma numba chimweko”?
17 “Kangweshi kwivwa woma chuma numba chimweko.” Ndavichi avulilenga kupwa muponde mukuyoya chenyi, kaha nawa apwilenga navaka-kole vavavulu vangolo. Chipwe ngocho, zangi yaYehova yamulingishile alivwe kupwa wakukingiwa nakuhona kwivwa woma. Ndavichi atachikijile ngwenyi Yehova apwilenga naikiye muukalu wosena uze apwilenga nawo, kaha chuma kana chamukolezezele. Echi chamulingishile embenga ngwenyi: “[Yehova] angupululwile kuvyuma vyosena vyangwivwishilenga woma.” (Samu 34:4) Numba tuhu Ndavichi evwilenga woma, oloze akwachilenga ngolo mwomwo yazangi yaYehova.
18. Uno kutachikiza ngwenu Yehova amizanga nachimikolezeza ngachilihi kachi nge muli muukalu wakumivwisa woma?
18 Uno zangi yaYehova nayitujikijisa ngachilihi kachi nge tunalizakamina chikuma? Susi uze apwa payiniya alumbunwine omwo ikiye nalunga lyenyi vevwile omu mwanavo walunga alijihile. Ambile ngwenyi: “Ukalu wakwiza mukukasumuna unahase kukukumisa ngolo nakukuhombesa chikuma. Oloze zangi yaYehova yinatukafwe tulivwe kupwa vakukingiwa nakuhona kwivwa woma.” Rachel uze twavulukanga hakavanga ahanjikile ngwenyi: “Likumbi limwe naufuku omu ngwevwile kupihya chikuma kumuchima, nomu ngwalizakaminyine nakwivwa woma, ngwalombele kuli Yehova nalizu lyakutambakana. Hahaze vene, Yehova anguvendejekele nakuunjisa muchima wami, ngana muze chisemi wapwevo eji kulinganga kuli mwanenyi wakemba, ngocho ngwayile mutulo. Kangweshi kukavulyama lwola kanako.” Ndumbwetu Tasos uze apwa mukulwane muchikungulwilo atwamine myaka yiwana mukamenga muze vamukashile mwomwo yakukana kwingila uswalale. Uno Yehova amusolwelelele ngachilihi zangi nakumuzakama? Ambile ngwenyi: “Yehova anguhanyine vyuma vyavivulu kuhambakana navize ngwasakiwile. Echi changukafwile ngukunyuke ngwami ngwatela kumufwelela. Kaha nawa Yehova angulingishile ngupwenga nguwakuwahilila kuhichila mushipilitu yenyi, chamokomoko nakupwa mukamenga. Echi changukafwile ngumone ngwami nge nangumuzachila chikuma, kaha nangunganyala kukuwaha chenyi. Shikaho ngwaputukile kuzata upayiniya washimbu yosena omu ngwapwile mukamenga.”
PANDAMENU KULI KALUNGA KENU WAZANGI
19. (a) Uno kutachikiza ngwetu Kalunga atuzanga nachitukafwa ngachilihi kutalisa kuvyuma natumulweza mukulomba? (b) Jila muka yize yalumbununa omwo apwa Yehova yize yinamihete kumuchima? (Talenu lipwata lyakwamba ngwavo “ Mazu Aze Nawatukafwa Twivwenga Ngwetu Yehova Atuzanga.”)
19 Vyakuliwana navyo tunashimutwila vyosena vyasolola nge Yehova “Kalunga wazangi” ali nayetu. (Koli. 2, 13:11) Atuzanga mutu himutu. Twakunyuka chikupu ngwenyi ‘mwatusolwelanga zangi yakwilila.’ (Samu 32:10) Shikaho, nge natushinganyekanga omwo natusolwela zangi yenyi, kaha natumona ngwetu atuzakama chikupu nakupandama nawa chikuma kuli ikiye. Tunahase kumulomba namuchima wetu wosena nakumulweza ngwetu tuli nakusakiwa zangi yenyi. Twatela kumulweza ukalu wetu wosena, mwomwo twafwelela ngwetu mwatwivwishisa kaha nawa afwila kutukafwa.—Samu 145:18, 19.
20. Uno zangi yaYehova yatupandamisa ngachilihi kuli ikiye?
20 Ngana muze tweji kupandamanga kukakahya nge kunatutu, mukiko nawa tweji kupandamanga kuzangi yaYehova. Atuzanga chikuma kaha nawa eji kutuzakamanga. Shikaho suulukenunga hakutachikiza ngwenu Yehova amizanga. Tuvosena twitavilenu zangi yenyi hakuhanjika ngwetu: “Yehova ngwamuzanga.”—Samu 116:1.
NAMUKUMBULULA NGWENU NGACHILIHI?
-
Munahase kulumbununa ngachilihi zangi yaYehova?
-
Mwomwo ika mwatela kukunyukila ngwenu Yehova amizanga chikuma?
-
Zangi yaYehova yeji kumilingisanga mwivwenga ngachilihi?
MWASO 108 Zangi yaKalunga Yakwilila
a Majina amwe vanawalumuna.