1-2. Ukalu muka veji kumonanga vangamba jaYehova vakushishika?

 UKALU unahase kulingisa chiyoyelo chetu chalumuke mukukemwina chaliso. Chakutalilaho, ndumbwetu wakushishika Luis a vamuwanyine namusongo wakasa yakulipwila yize vatu kavavula kuvizako. Ndotolo amulwezele ngwenyi mwayoya hatukweji vavandende kaha. Monika nalunga lyenyi vazachilenga chikuma milimo yakushipilitu. Kaha likumbi limwe, Monika atachikijile ngwenyi lunga lyenyi uze apwile mukulwane muchikungulwilo apwilenga nakulinga shili mukusweka hamyaka yayivulu. Ndumbwetu wapwevo Olivia, uze apwa mujike afumine hembo lyenyi mwomwo yapeho yanyamanganda yize apwile nakwiza. Omu akindulukile, awanyine zuvo yenyi vanayenyeka kunyamanganda. Kuyoya chavava vandumbwetu chalumukile mukukemwina chaliso. Kutala nayenu mwamonaho lyehi ukalu kana tahi? Kutala mwamonaho lyehi ukalu wakulinga namumutwe ngo tahi?

² Etu vangamba jaYehova vakushishika tweji kumonanga ukalu namisongo yize veji kumonanga vatu vosena. Shimbu jimwe nawa veji kutuyanjisanga nakutufumbukila kuvatu vaze vahunga vatu jaKalunga. Numba tuhu Yehova kahonesa ukalu kana kutusolokelako, oloze atushika ngwenyi mwatukafwa. (Isa. 41:10) Nahase kutukafwa tutwaleho lika kupwa vakuwahilila, nakusakula kanawa vyakulinga, nakupwa vakushishika numba tuhu tuli nakumona ukalu. Muchihande chino, natukekesa hajijila jiwana jize Yehova eji kutukafwilangamo halwola tuli nakumona ukalu wakulinga nahameso wi. Natushimutwila nawa havyuma twatela kulinga mangana tunganyale kuvyuma vize Yehova eji kutuhananga.

 YEHOVA MWAMIKINGANGA

3. Vyuma muka vinahase kutukaluhwila kulinga kachi nge tunakumona ukalu?

³ Ukalu. Nge tuli nakumona ukalu kaha chinahase kutukaluhwila kushinganyeka kanawa nakusakula kanawa vyakulinga. Mwomwo ika? Mwomwo tunahase kwivwa kupihya chikuma kumuchima. Tunahase kulizakamina chikuma. Ukalu kana unahase kutulingisa twivwenga nge tunajimbala, katwejivile namwakulingilako. Ivwenu omwo vandumbwetu vamapwevo vavali twavulukanga hakavanga vevwile omu vapwile muukalu. Olivia ambile ngwenyi: “Omu peho yanyamanganda yashiwile zuvo yami, ngwevwile nge ngunajimbala, kaha nawa ngwalizakaminyine chikuma.” Monika ahanjikile kutalisa kuli lunga lyenyi uze amusezele ngwenyi: “Ngwevwile nge ngunapaye. Echi changuhombesele nakwivwa kukola chikuma kumuchima. Kangwazachilenga cheka milimo nangolo ngana muze ngwalingilenga hakavangako. Vyuma vize ngwamwene ngwami kavyeshi kusolokako, vyangusolokelele.” Uno Yehova ashika kutukafwa ngachilihi, kachi nge tunalizakamina chikuma?

4. Kweseka nachisoneka chaWavaka-Fwilipi 4:​6, 7, Yehova atushika vyuma muka?

⁴ Vyuma eji kulinganga Yehova. Yehova atushika ngwenyi mwatuhana chuma chize Mbimbiliya yavuluka ngwayo, “Kuunda chaKalunga.” (Tangenu Wavaka-Fwilipi 4:​6, 7.) Echi chapwa kuunda chamumuchima namuvishinganyeka chize cheji kwizanga mwomwo yakupwa nausoko wamwaza naYehova. Kuunda kana chahambakana “kunangakana chosena,” kaha nawa chapwa chamwaza chikuma. Uno mwevwaho lyehi kuunda chamwenemwene hanyima yakulomba chikuma kuli Yehova tahi? Kuunda kana chapwa “kuunda chaKalunga.”

5. Uno kuunda chaKalunga cheji kukinganga ngachilihi vishinganyeka namichima yetu?

⁵ Chisoneka chochimwe chamba nawa ngwacho kuunda chaKalunga “nachikinga michima yenu navishinganyeka vyenu.” Lizu lyamulilimi lyakulivanga valumuna ngwavo ‘kukinga,’ valizachishilenga kutalisa kumaswalale vaze vakingilenga nganda nakuyilama kanawa kuchina kuyilukuka kuli vaka-kole javo. Vatu vamunganda yize vakingilenga vasavalilenga tulo mukuunda, mwomwo vatachikijile ngwavo maswalale vali nakulama kuchikolo changanda. Chochimwe nawa, nge kuunda chaKalunga nachikinga michima yetu, kaha natupwa vakuunda hakutachikiza ngwetu tuvakukingiwa. (Samu 4:8) Ngana muze chapwile kuli Hana, nayetu tunahase kuunda muchima numba nge ukalu wetu kaweshi kukuma hahaze veneko. (Samwe. 1, 1:​16-18) Kakavulu tweji kushinganyekanga kanawa nakusakula kanawa vyakulinga kachi nge tunaundu muchima.

6. Vyuma muka mwatela kulinga numba munganyale kukuunda chaKalunga? (Talenu nawa muvwimbimbi.)

⁶ Vyuma twatela kulinga. Nge muli muukalu,  lwezenu Yehova amikinge. Mujila muka? Lombenu lika swi nomu namwivwa kuunda chaKalunga mumichima yenu. (Luka 11:9; Teso. 1, 5:17) Luis uze twavulukanga hakavanga alumbunwine omu ikiye napuwenyi vapwile muukalu vahashile kumika numba tuhu Luis vamulwezele ngwavo kunasale kaha tukweji vavandende nakufwa. Ambile ngwenyi: “Halwola lwakufwana ngana, chapwa chachikalu kusakula vyakulinga kutalisa kukulikangula chetu nakuvyuma vyeka. Chipwe ngocho, kulomba chatukafwile chikuma nakutulingisa tupwenga vakuunda halwola kanelu.” Luis napuwenyi vambile ngwavo valombelenga chikuma kuli Yehova mapapa kakavulu mangana vapwenga vakuunda muvishinganyeka namumuchima, nakusakula kanawa vyakulinga. Kaha vamwene ngwavo chikupu vene Yehova avakafwile. Shikaho, nge muli nakumona ukalu, lombenunga naluzema kuli Yehova mangana amihane kuunda chize nachikinga michima yenu navishinganyeka vyenu.—Loma 12:12.

YEHOVA MWAMIZAMISA

7. Uno tunahase kwivwa ngachilihi nge tuli nakumona ukalu?

⁷ Ukalu. Nge tuli nakumona ukalu, vishinganyeka vyetu, nomwo tweji kwivwanga navyuma natulinga kavyeshi kupwa nganomu vyeji kupwangako. Tunahase kwivwa kwijiva nge vali nakutupekumuna noku noku kupeho yayinene. Ana uze twavulukanga hakavanga ahanjikile ngwenyi, ahombele chikuma omu lunga lyenyi Luis afwile. Ambile ngwenyi: “Omu ngwaputukilenga kulivwa kupwa wamokomoko, ngwahombelenga chikuma. Kaha nawa ngwapihilililenga chikuma hakushinganyeka ngwami lunga lyami nafu vene.” Halwola lweka nawa Ana evwilenga uli nakwivwa kumuchima kupihya mwomwo yakusakula kulinga vyuma kutalisa kumilimo yize Luis azachilenga kanawa. Shimbu jimwe evwilenga kwijiva nge ali hakalungalwiji haze hali nyamanganda. Uno Yehova eji kutukafwanga ngachilihi nge tunaputuka kwivwa ngocho?

8. Ngana muze vasoneka hali Isaya 33:​6, Yehova atufwelelesa ika?

⁸ Vyuma eji kulinganga Yehova. Atufwelelesa ngwenyi mwatuzamisanga. (Tangenu Isaya 33:6.) Nge hakalungalwiji hali peho yanyamanganda, wato weji kutengatenga noku noku. Hakusaka mangana wato uzame hameya chipwe kuhona kutengatenga, kwishi yamato amavulu kwatwama vyuma vyakuwazamikisa. Echi cheji kukafwanga mato kana ahone kutengatenga, nakulingisa vatu valimo vapwenga vakukingiwa nakuunda michima. Chipwe ngocho, vyuma vize vyeji kuzamisanga wato vyeji kuzatanga kanawa nge wato vali nakuuzaula. Chochimwe nawa, Yehova mwatuzamisa nge natutwalaho lika kupwa vakushishika omu tuli nakuhita muukalu.

9. Uno vinoma vyetu vyakutukafwa kuhehwojola navitukafwa ngachilihi nge tuli nakumona ukalu? (Talenu nawa muvwimbimbi.)

 ⁹ Vyuma twatela kulinga. Nge muli nakumona ukalu waunene, kaha zatenu nangolo mulingenga vyuma vyakushipilitu. Numba tuhu oholyapwa kamweshi kuhasa kuzata ngana muze mwalingilengako, oloze tachikizenu ngwenu Yehova mwamizamisa. (Esekesenuko Luka 21:​1-4.) Mwatela nawa kunonekanga lwola lwakupwanga nachilongesa chauka nakushinganyekanga havyuma munalinangula. Mwomwo ika? Yehova natuhane vyuma vyamuVisoneka vize vinahase kutuzamisa kuhichila muliuka lyenyi. Hakusaka muwane vyuma munakusakiwa zachisenu vinoma vili mulilimi lyenu vyakufwana nge JW Library^® naWatch Tower Publications Index, naChinoma Chakukafwa Vinjiho jaYehova Kuhehwojola. Monika, uze twavulukanga hakavanga ambile ngwenyi, nge nahombo kaha ayilenga muvinoma nakuhehwojola awanemo vyuma navimukafwa. Chakutalilaho ahehwojwele lizu “matoto.” Halwola lukwavo nawa ahehwojwele halizu “kuseza” chipwe “kushishika.” Kaha atangilenga vihande kana palanga nomu evwilenga kumuchima hwo. Ambile ngwenyi: “Hakavanga omu ngwaputukilenga kuhehwojola ngwalizakaminyinenga chikuma, oloze omu ngwatwalililengaho kutanga ngwamwene ngwami Yehova apwile nakungupakata mukasamba. Omu ngwapwile nakutanga ngwamwene ngwami Yehova atachikijile omwo ngwapwile nakwivwa kaha nawa apwilenga nakungukafwa.” Shikaho, kukafwa chakufuma kuli Yehova chinahase kumikafwa muzame palanga nomu namuheta kuchihanda chimwe chakalwiji chakuhona makimba.—Samu 119:​143, 144.

YEHOVA MWATUKWACHILILA

10. Tunahase kwivwa ngachilihi nge ukalu unatusolokela?

¹⁰ Ukalu. Nge tuli muukalu, shimbu jimwe tweji kuhombanga nakuzeya. Tunahase kulivwa ngana mwamuka-kulaha uze alahilenga chikuma oloze himwalivulumuna nakuputuka kumbilikita. Shikaho chinahase kutukaluhwila kuzata milimo yize twahashilenga kuzata hakavanga, chipwe kuhona kulivwisa kuwaha kulinga vyuma vize twalivwishilenga kuwaha hakavanga. Ngana mwaElija, nayetu tunahase kulivwa ngwetu katweshi nangolo jakuhindukako. Oloze tuli nakusaka kaha kusavala. (Vamya. 1, 19:​5-7) Yehova ashika kutulingila ika kachi nge tunazeye?

11. Jila muka yikwavo yize Yehova eji kutukafwilangamo? (Samu 94:18)

¹¹ Vyuma eji kulinganga Yehova. Atushika kutukwachilila. (Tangenu Samu 94:18.) Ngana  muze muka-kulaha uze nalivulumuna asakiwa kumukwachilila mangana atambuke, nayetu twasakiwa kutukafwa kuli Yehova mangana tutwaleho lika kuzata mulimo wenyi. Halwola natupwa muukalu, Yehova atufwelelesa ngwenyi: “Ami Yehova Kalunga kove nangukukwachililanga nalivoko lyami lyachilyo, yami nguli nakukulweza ngwami, ‘Kanda nawivwa womako, nangukukafwa.’” (Isa. 41:13) Mwangana Ndavichi vamukafwile mujila kaneyi. Omu Ndavichi apwile nakumona ukalu nakumufumbukila kuli vaka-kole jenyi, alwezele Yehova ngwenyi: “Livoko lyove lyachilyo lyeji kungujikijisanga.” (Samu 18:35) Uno Yehova eji kutukafwanga ngachilihi?

12. Uno Yehova nahase kuzachisa veya mangana vatukafwe nge tunahombo?

¹² Kakavulu Yehova eji kutukafwanga kuhichila muli vakwetu. Chakutalilaho, omu lwola lumwe Ndavichi ahombele sepa lyenyi Yonatane amutambukilile nakumukolezeza. (Samwe. 1, 23:​16, 17) Chochimwe nawa, Yehova asakwile Elisha mangana akafwe Elija. (Vamya. 1, 19:​16, 21; Vamya. 2, 2:2) Namakumbi ano, Yehova nahase kuzachisa vausoko, chipwe masepa chipwe vakulwane muchikungulwilo mangana vatukafwe. Chipwe ngocho, nge katwazangamineko tunahase kulisosolola kuli vakwetu nge vanatwivwisa kupihya. Tweji kufwilanga kupwa kwaukawetu. Kachapwa chakuhenga kwivwa ngochoko. Vyuma muka twatela kulinga mangana Yehova atukafwe?

13. Chuma muka twatela kulinga mangana tunganyale kujila eji kutukafwilangamo Yehova? (Talenu nawa muvwimbimbi.)

¹³ Vyuma twatela kulinga. Fungululenu cheseko chakusaka kulisosolola kuli vakwenu. Nge natulisosolola kuli vakwetu kaha tunahase kuputuka kushinganyeka hali yetu vavavene nahaukalu tuli nakuhitamo. Kushinganyeka mujila kana chinahase kutulingisa tuhone kusakula kanawa vyakulinga. (Vishi. 18:1) Chipwe ngocho, tuvosena twasakiwa kupwa kwaukawetu chikumanyi nge ukalu waunene unatusolokela. Oloze nge natupwanga kwaukawetu halwola lwalusuku nachisolola nge tuli nakukana kutukafwa kuvatu vaze Yehova ali nakuzachisa. Shikaho, chamokomoko naukalu uze muli nawo, itavilenunga vausoko wenu namasepa jenu navakulwane muchikungulwilo vamikafwe. Vamonenunga kupwa hivatu vaze Yehova ali nakuzachisa mangana vamikafwe.—Vishi. 17:17; Isa. 32:​1, 2.

YEHOVA MWAMIVENDEJEKA

14. Ukalu muka wakutwivwisa woma uze unahase kutusolokela?

¹⁴ Ukalu. Shimbu jimwe tunahase kuhita muukalu uze unahase kutulingisa tulizakamine  chikuma. Vangamba jaKalunga vakushishika vavuluka muMbimbiliya, vahanjika omwo valizakaminyinenga nakwivwa woma mwomwo yavaka-kole javo naukalu weka wamukuyoya. (Samu 18:4; 55:​1, 5) Chochimwe nawa, nayetu vanahase kutufumbukila kushikola chipwe kumilimo chipwe kuli vausoko wetu chipwe kufulumende. Tunahase nawa kwivwa woma wakufwa mwomwo yamisongo yakutekeleka. Halwola lwakufwana ngana, tunahase kwivwa namuvifuwa keke kwijiva nge tuvana vavandende. Uno Yehova nahase kutukafwa ngachilihi mulwola lwakufwana ngana?

15. Uno mukanda waSamu 94:19 watufwelelesa vyuma muka?

¹⁵ Vyuma eji kulinganga Yehova. Eji kutuvendejekanga nakutuunjisa muchima. (Tangenu Samu 94:19.) Eyi samu yinahase kutulingisa tushinganyeke hali kanyike kapwevo uze ali nakwivwa woma, nakuhona kusavala mwomwo yamikalateta. Tunahase kushinganyeka tuli nakumona ise ali nakulaha mangana amumbate nakumupakata, palanga nomu mwaya mutulo. Numba tuhu mikalateta nayitwalaho lika, oloze mwalivwa kupwa wakukingiwa mwomwo yakumuvendejeka kuli ise hakumupakata. Nge tuli nakuhita muvyeseko vize navitwivwisa woma, twasakiwa kutupakata kuli Setu wamwilu mujila yachifwanyisa palanga nomu woma nautukuma. Uno Yehova nahase kutuvendejeka ngachilihi?

16. Vyuma muka twatela kulinga mangana tunganyale kukuvendejeka chaYehova? (Talenu nawa muvwimbimbi.)

¹⁶ Vyuma twatela kulinga. Lombenu kuli Yehova lwola lwosena nakutanganga Mazu enyi. (Samu 77:​1, 12-14) Kaha chuma chatete mwatela kulinga nge munalizakamina chikuma shina kulweza Yehova amikafwe. Mulwezenu vyuma vinakumivwisa woma navize munalizakamina. Yehova mwahanjika nayenu nakumivendejeka kuhichila muVisoneka. (Samu 119:28) Munahase kuwana ngwenu mijimbu yimwe yamuMbimbiliya yinahase kumivendejeka kachi nge munalizakamina. Chakutalilaho, mumukanda waYopa naSamu, naVishimo nawaMateu kapetulu 6, namuwanamo mazu akumivendejeka. Shikaho, omu namulombanga nakutanganga Mazu enyi nachimivendejeka chikuma.

17. Uno twakunyuka havyuma muka?

¹⁷ Chikupu vene tunahase kukunyuka ngwetu Yehova mwapwanga nayetu mulwola lwalukalu. Katweshi ukawetuko. (Samu 23:4; 94:14) Yehova ashika ngwenyi mwatukinganga, nakutuzamisa, nakutukwachilila nakutuvendejeka. Chisoneka chaIsaya 26:3 chahanjika kutalisa kuli Yehova ngwacho: “Naukinganga vatu vaze vapendamina hali ove. Nauvalingisa vatwamenga lika mukuunda, mwomwo vakufwelela.” Shikaho fwelelenunga Yehova nakunganyala kujijila eji kuzachisanga mangana amikafwe. Nge namulinga ngocho, kaha namukwata ngolo namulwola lwaukalu.