1, 2. Kaposetolo Paulu evwile ngachilihi halikoji lyaKalunga lyalinene lize vamusolwelele?

KAPOSETOLO Paulu ahanjikile ngwenyi: “Likoji [lyaKalunga] lyalinene lize vangusolwelele ami kalyayile mwanganaveneko.” (Tangenu Wavaka-Kolinde 1, 15:9, 10.) Hakuwana nge Paulu ayanjishilenga vaka-Kulishitu, amwene ngwenyi Kalunga keshi kumusolwela kekeko.

² Omu Paulu apwile kwakamwihi nakufwa, asonekelele Chimoteu ngwenyi: “Ngunamusakwilila Kulishitu Yesu Mwata wetu ou anguhanyine ngolo, mwomwo angumwene kupwa nguwakushishika hakunguhana mulimo.” (Chimo. 1, 1:12-14) Uno mulimo muka vamuhanyine? Paulu alwezele vakulwane muchikungulwilo chamuEfwesu vyamulimo kana ngwenyi: “Kangweshi kumona kuyoya chami kupwa chachilemuko, chikalu kungunakumisa jila yami namulimo uze ngwatambwile kuli Mwata Yesu wakuhana kanawa unjiho wamujimbu wamwaza walikoji lyalinene lyaKalunga.”—Vili. 20:24.

3. Paulu vamuhanyine mulimo muka waunene? (Talenu muvwimbimbi wakulivanga.)

 ³ Uno ‘mujimbu muka wamwaza’ ambulwile Paulu uze wasolola likoji lyalinene lyaYehova? Alwezele vaka-Kulishitu vamuEfwesu ngwenyi: “Munevu lyehi chikupu vyauselwa walikoji lyalinene lyaKalunga lize anguhanyine mwomwo yayenu.” (Efwe. 3:1, 2) Paulu vamuhanyine mulimo wakutandakanyisa mujimbu wamwaza kuli vaze kavapwile vaYuleyako mangana navakiko vakapwe hamwe naKulishitu muWangana waKalunga. (Tangenu Wavaka-Efwesu 3:5-8.) Paulu azachile nangolo mumulimo wakwambulula nakusolola hatoma ngwenyi likoji lyaKalunga lyalinene “kalyayile mwanganaveneko,” kahechi chahana chakutalilaho chamwaza kuli vaka-Kulishitu makumbi ano.

4, 5. Mwomwo ika natwambila ngwetu “mujimbu wamwaza waWangana” ukiko nawa “mujimbu wamwaza walikoji lyalinene lyaKalunga”?

⁴ Mumakumbi ano akukuminyina, vatu jaYehova vavahana mulimo wakwambulula “mujimbu wamwaza waWangana . . . hamavu hosena, nakupwa unjiho kuli vaka-mafuchi osena.” (Mateu 24:14) Ou mujimbu veji kwambululanga vauvuluka nawa ngwavo “mujimbu wamwaza walikoji lyalinene lyaKalunga,” mwomwo vyuma vyamwaza vyosena vatushika kukatuhana muWangana waKalunga navikeza kuhichila mulikoji lyaYehova lize asolwele muli Kulishitu. (Efwe. 1:3) Uno nayetu tweji kulondezezanga Paulu hakusolola likoji lyalinene lyaYehova hakwambulula mujimbu wamwaza natwima tahi?—Tangenu Wavaka-Loma 1:14-16.

⁵ Muchihande chinafumuho, twalinangulanga omu Yehova atusolwelele likoji lyenyi lyalinene mujijila jakulisezaseza hakupwa tuvaka-shili. Shikaho twatela kulweza vatu vosena vatachikize omu Yehova avasolwela zangi nomu vanahase kunganyala. Vyuma muka vyamwaza atulingila Kalunga halikoji lyenyi lyalinene vize twatela kulwezako vakwetu?

6, 7. Natutandakanyisa ngachilihi likoji lyalinene lyaKalunga nge natulumbunwina vatu vyandando yakusokola?

⁶ Makumbi ano, vatu vavavulu vanakukana ngwavo kavasemuka nashiliko, ngocho kavamona kulema chandando yakusokolako. Tuyokutuyoku nawa vatu vavavulu vanakumona ngwavo kupwa navilinga vyavipi kachaneha kuwahililako. Vatu vavavulu kavatachikiza mwalumbunukila shili, novyo yatunehela, novyo twatela kulinga mangana tufume muundungo washiliko. Vyuma kana vyeji kuvalumbunukila nge vanavalumbunwinavyo kuli Vinjiho jaYehova. Vaze vamichima yamwaza veji kwivwanga kuwaha hakutachikiza ngwavo Yehova avazanga nakuvasolwela likoji lyenyi lyalinene hakuvatumina Mwanenyi ezenga nakuvafwila mangana avasokole kushili nakukufwa.—Yowa. 1, 4:9, 10.

⁷ Paulu ahanjikile hali MwanaYehova ngwenyi: “Muli ikiye [Yesu] mukiko vanatusokwela nandando yakusokola kuhichila mumanyinga enyi, chikiko vene kutukonekela vilinga vyetu vyakuhenga, kweseka naluheto lwalikoji [lyaYehova] lyalinene.” (Efwe. 1:7) Kalunga atusolwela zangi nalikoji lyenyi lyalinene hakutuhana ndando yakusokola yaKulishitu. Ocho kuwaha kana tweji kwivwanga hakulinangula ngwetu kufwelela mumanyinga aYesu cheji kulingisa Kalunga atukonekela jishili jetu nakupwa nachivezu chitoma. (Hepe. 9:14) Ou chikupu himujimbu wamwaza uze twatela kulwezako vakwetu.

8. Mwomwo ika vatu vaka-shili vasakiwa kulinunga naKalunga?

⁸ Twatwama namulimo wakulweza vatu vatachikize ngwavo vanahase kutunga usepa wamwaza naTengi. Shimbu kanda vatu vafwelele muwana waYesu, Kalunga avamona kupwa vaka-kole jenyi. Kaposetolo Yowano ambile ngwenyi: “Ou mwafwelela Mwana ali nakuyoya chahaya myaka yosena, ou mwalikanga kuli Mwana keshi kukamona kuyoyako, oloze utenu waKalunga naupwa hali ikiye.” (Yowa. 3:36) Oloze ndando yakusokola yaKulishitu yatuwanyisa naKalunga. Paulu ahanjikile ngwenyi: “Halwola lumwe mwahandukile nakupwa vaka-kole jenyi mwomwo mwahakilenga vishinganyeka vyenu kumilimo yize yapwile yakuhuka, kaha namiwanyisa jino namujimba wanyama wayauze mutu kuhichila mukufwa chenyi.”—Kolo. 1:21, 22.

9, 10. (a) Mulimo muka uze Kulishitu ahana vandumbwenyi vawavisa? (b) “Mikoko veka” veji kukafwa ngachilihi vandumbwavo vawavisa?

⁹ Kulishitu ahana vandumbwenyi vawavisa hano hamavu “mulimo wakwambulula kuwanyisa.” Hakulumbununa mulimo kana, Paulu asonekelele vaka-Kulishitu vawavisa vamulikulukaji lyamyaka lyakulivanga ngwenyi: “Vyuma vyosena vyafuma kuli Kalunga uze atuwanyisa naivene kuhichila muli Kulishitu, nakutuhana nawa mulimo wakwambulula kuwanyisa kanechi, chikiko kwamba nge, Kalunga apwile nakuwanyisa kaye naivene kuhichila muli Kulishitu, ikiye kapwile nakuvalavila milonga yavoko, kaha atuhanyine mazu akuneha kuwanyisa. Shikaho etu tunapu tuvaluwa vakwimanyinako Kulishitu, kwijiva nge Kalunga ikiye ali nakumilembelela kuhichila muli etu. Hakupwa tuvaka-kwimanyinako Kulishitu, tweji kumilembelelanga ngwetu: ‘Liwanenu naKalunga.’”—Koli. 2, 5:18-20.

¹⁰ “Mikoko veka” veji kwivwanga kuwaha kukafwa vandumbwavo vawavisa mulimo wakwambulula. (Yowa. 10:16) Hakupwa vatemesa vaKulishitu, vatwama namulimo waunene wakunangula vatu muchano nakuvakafwa vapwenga nausoko wamwaza naYehova. Ou mulimo wakunangula vatu wapwa waulemu mwomwo weji kulingisa mujimbu wamwaza walikoji lyalinene lyaKalunga utandakane chikuma.

11, 12. Mwomwo ika chapwila chamwaza vatu kutachikiza ngwavo vanahase kulomba kuli Yehova?

¹¹ Vatu vavavulu veji kulombanga mangana vevwenga hwo kumuchima, oloze kavafwelela ngwavo Kalunga eji kwivwanga kulomba chavoko. Shikaho twatela kuvakafwa vatachikize ngwavo Yehova apwa “muka-kwivwilila kukulomba.” Muka-kwimba jisamu Ndavichi asonekele ngwenyi: “Ove muka-kwivwilila kukulomba, vatu vakulisezaseza vosena naveza kuli ove. Jishili jami jinangulemenena. Oloze ove weji kutukonekelanga milonga yetu yakuzombwojoka jishimbi.”—Samu 65:2, 3.

¹² Yesu alwezele tumbaji twenyi ngwenyi: “Kachi nge namulomba chuma chimwe mulijina lyami, nanguchilinga.” (Yowa. 14:14) Yesu hano apwile nakulumbununa ngwenyi nahase kutulingila kala vyuma nge natulomba mwaya muchima waYehova. Kaha Yowano atufwelelesele ngwenyi: “Tunafwelela Kalunga ngwetu, vyeshovyo natumulomba kweseka namwaya muchima wenyi, mwatwivwa.” (Yowa. 1, 5:14) Ocho kuwaha kana tweji kwivwanga hakunangula vatu ngwetu kulomba yapwa jila yakuhanjikilamo naYehova nakupandama ‘kulitanda lyenyi lyalikoji  lyalinene.’ (Hepe. 4:16) Nge natuvanangula valombenga mujila yakwoloka, kumutu wakwoloka, nakulomba vyuma vyakwoloka, kaha natuvakafwa vapandame kuli Yehova mangana avavendejeke mulwola lwaukalu.—Samu 4:1; 145:18.

13, 14. (a) Mulimo muka wakulipwila navakazata vawavisa kulutwe? (b) Vyuma muka vawavisa navakalingila vatu?

¹³ Likoji lyalinene lyaYehova nalitwalangaho lika myaka yosena. Paulu avulukile hali vaze 144,000 navakayula naKulishitu muWangana wamwilu ngwenyi: “Kalunga hakupwa muka-kutetela chikuma, kaha nawa mwomwo yazangi yenyi yayinene yize atuzangile, atulingishile kupwa tuvavatonyi hamwe naKulishitu, numba tuhu twapwilenga tuvafu kuvilinga vyetu vyakuhenga, kaha halikoji lyalinene hakiko vene vanamilwilila. Kaha nawa atusangwile hamwe, atutwamishile hamwe muvihela vyamwilu hakulikata naKulishitu Yesu, mangana ngwenyi mututwamino twamyaka yize yili nakwiza, akatusolwele luheto lwakumbwambumuka lwalikoji lyenyi lyalinene hakeke yenyi hakulikata chetu naKulishitu Yesu.”—Efwe. 2:4-7.

¹⁴ Chapundu vene, Yehova natumbikila vyuma vyamwaza vaka-Kulishitu vawavisa vaze navakatwama hamatanda nakuyula hamwe naKulishitu mwilu. (Luka 22:28-30; Fwili. 3:20, 21; Yowa. 1, 3:2) Yehova mwakavasolwela “luheto lwakumbwambumuka lwalikoji lyenyi lyalinene.” Navakapwa “Yelusalema Yayihya,” mwenga waKulishitu. (Kuso. 3:12; 17:14; 21:2, 9, 10) Navakazachila hamwe naYesu ‘hakuka vaka-mafuchi,’ nakuvalingisa valihehwe kushili nakukufwa nakupwa jino vakukupuka.—Tangenu Kusoloka 22:1, 2, 17.

15, 16. Yehova mwakasolola ngachilihi likoji lyenyi lyalinene kuli “mikoko veka”?

¹⁵ Hali Wavaka-Efwesu 2:7 tweji kutangaho ngwavo Kalunga mwakasolola likoji lyenyi lyalinene “mututwamino twamyaka yize yili nakwiza.” Chikupu vene, mukatwamino kakahya kaYehova hano hamavu namukapwa “luheto lwakumbwambumuka lwalikoji lyenyi lyalinene.” (Luka 18:29, 30) Likoji lyalinene lize Yehova mwakasolwela vatu hano hamavu shina kusangula vafu kufuma “muFuka.” (Yopa 14:13-15; Yowa. 5:28, 29) Vatu vakushishika vaze vafwile shimbu kanda Kulishitu afwenga “namikoko veka” vaze vanakufwa mumyaka yino yakukuminyina, navakavasangula mangana vakatwaleho kuzachila Yehova.

¹⁶ Vatu veka nawa vaze vafwile chakuhona kutachikiza Kalunga navakavasangula. Navakavahana lisesa lyakulisakwila vavene kuliluula kuwata waYehova. Yowano asonekele ngwenyi: “Ngwamwene vafu, vamokomoko navava vavalemu, vanemana kulutwe lwalitanda, kaha kwapwile mikanda yize yapwile yakuvungulula. Oloze kwapwile nawa mukanda weka uze wapwile wakuvungulula, ukiko mukanda wakuyoya. Vafu vavasopesele havyuma vize vasonekele mumikanda kweseka navilinga vyavo. Kalungalwiji echele vafu vaze vapwilemo, nakufwa naFuka nawa vyechele vafu vaze vapwilemo, kaha vavasopesele mutu himutu kweseka navilinga vyenyi.” (Kuso. 20:12, 13) Vaze navakasanguka navakavanangula mwakukavangijila jishimbi jamuMbimbiliya. Kaha vatela kukakavangiza jishimbi jajihya jize navakatanga ‘mumikanda yakuvunga’ yize nayikasolola vyuma mwakasaka Kalunga mukaye kakahya. Yehova mwakasolola nawa likoji lyenyi lyalinene hakulumbununa hatoma jindongi kaneji jamumikanda yakuvunga.

17. Vyuma muka twatela kwanuka hakwambulula mujimbu wamwaza?

¹⁷ Omu kukuma chinakupandama, twatela kwambulula chikuma mujimbu wamwaza waWangana. (Mako 13:10) Chapundu vene, mujimbu wamwaza wasolola hatoma likoji lyalinene lyaYehova. Twatela kwanukanga chuma kanechi omu natwazananga mumulimo wakwambulula. Natusolola ngwetu twavumbika Yehova hakulweza vatu ngwetu vyuma atushika Yehova kukatulingila mukaye kakahya vyasolola likoji lyenyi.

18, 19. Tweji kwalisanga ngachilihi Yehova halikoji lyenyi lyalinene?

¹⁸ Omu natwambulilanga vatu twatela kuvalumbunwina ngwetu muchiyulo chaKulishitu natukanganyala kundando yakusoloka yize nayikatulingisa tukakupuke. Mbimbiliya ngwayo: “Vyuma vyakutenga navikiko nawa vakavilingise kupwa vyakulihehwa kuundungo wakuya nakupola, nakwingila mukulihehwa chaupahu chavana vaKalunga.” (Loma 8:21) Vyuma kanevi navikatesamo kuhichila kaha mulikoji lyakulipwila lyaYehova.

¹⁹ Twapwa vakutokwa chikuma kwambulila vatu vyuma vyamwaza atushika Kalunga vize vasoneka hali Kusoloka 21:4, 5 ngwavo: “[Kalunga] mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.” Kaha Yehova uze atwama halitanda ambile ngwenyi: “Tala! Nangulingisa vyuma vyosena kupwa vyavihya.” Ambile nawa ngwenyi: “Soneka, mwomwo mazu awa atela kuwafwelela, kaha amuchano.” Omu tweji kwambulilanga vatu mujimbu wamwaza tweji kwalisanga Yehova halikoji lyenyi lyalinene.