ACHISHINGANYEKENU muli nakutambuka mujila naufuku. Kaha namwivwa nge mutu anakumikavangiza. Omu namwimana, namwivwa nge nayikiye nemana. Omu namuzangula, namwivwa nge nayikiye anakuzangula. Ngocho namuputuka jino kulaha nakuya kuzuvo yasepa lyenu ali hakamwihi. Omu sepa lyenu mwamisokolwela kuchikolo, namwingila nakwivwa jino kumuchima hwo.

Pamo kamwahita muukalu wakufwana nge ouko, oloze munahase kulizakamina mwomwo yaukalu weka wamukuyoya. Chakutalilaho, kutala munakulipika naukalu umwe oloze munakuhona kuufungulula tahi? Uno munakukilikita nakutondatonda milimo oloze munakuhona kuyiwana tahi? Kutala munalizakamina ngwenu namukaviza kulutwe mwomwo munakushinakajiwa tahi? Nyi kuliko vyuma vyeka vize munalizakamina?

Uno kamweshi kwivwa kuwaha kulwezako sepa lyenu uze nahase kumikafwa hakala ukalu muli nawo tahi? Uno mwatwama nasepa uze mwafwelela tahi? Eyo, Yehova ikiye sepa lyenu. Apwile nawa sepa lyaApalahama, ngana muze vasoneka hali Isaya 41:8-13. Muvesi 10 na 13 Yehova alwezele ngamba yenyi ngwenyi: “Kanda nawivwa womako, mwomwo nguli nayove. Kanda naulizakaminako, mwomwo nguKalunga kove. Nangukujikijisa, nangukukafwa, nangukukwachilila nalivoko lyami lyachilyo lyakwoloka. Mwomwo ami Yehova Kalunga kove nangukukwachililanga nalivoko lyami lyachilyo, yami nguli nakukulweza ngwami, ‘Kanda nawivwa womako, nangukukafwa.’”

Kutala awa mazu kawamisuulwishileko tahi? Achishinganyekenu Yehova anakuhanjika kuli enu. Mazu kana kaweshi nakusolola nge munakutambuka hamwe naYehovako, numba tuhu chapwa chamwaza kulinga ngocho. Nge munakutambuka hamwe naYehova, kaha mwamikwata nalivoko lyenyi lyachilyo kulivoko lyenu lyachimoswe. Oloze Yehova mwamikwata ‘nalivoko lyenyi lyachilyo lyakwoloka kulivoko lyenu lyachilyo,’ kwijiva nge anakumifumisa muukalu waunene. Ngocho mwamilweza ngwenyi: “Kanda nawivwa womako, nangukukafwa.”

Uno mwamona Yehova kupwa nge Chisemi chenu wazangi uze nahase kumikafwa nge muli muukalu tahi? Amizanga chikuma, kaha asaka kumikafwa mutwame kanawa. Nge muli muukalu, tachikizenu ngwenu Yehova asaka kumikinga mwomwo amizakama. Chikupu vene, “alizanga kutukafwa mulwola lwaluyando.”—Samu 46:1.

Vatu vamwe veji kushinganyekanga lika hamilonga valingile kunyima nakulizakamina numba nge Kalunga avakonekela nyi chiku. Nge omu mukiko  mwashinganyeka nayenu, kaha anukenu lunga wakushishika Yopa uze alitavilile ‘shili alingile kuukweze wenyi.’ (Yopa 13:26) Muka-kwimba jisamu Ndavichi ahichile muukalu woumwe, kaha alombele kuli Yehova ngwenyi: “Kanda nawanuka jishili jakuukweze wami namilonga yami yakuzombwojoka jishimbiko.” (Samu 25:7) Hakuwana nge katwakupukako, tuvosena ‘tuvaka-shili, kaha tunahono kuheta haseteko yaupahu waKalunga.’—Loma 3:23.

Mazu atwama hali Isaya 41 vawasonekelele vatu jaKalunga vakunyima. Vatu kana valingile shili, ngocho Yehova avasopesele nakuvatwala muundungo muMbavilone. (Isa. 39:6, 7) Chipwe ngocho, Kalunga apwile nakushinganyeka kulwola luze mwakasokola veshovo navakapihilila nakwalumuka nakukinduluka kuli ikiye. (Isa. 41:8, 9; 49:8) Namakumbi ano, Yehova anakusololanga likoji lyenyi lyalinene kuli vatu vaze valyononona kuli ikiye.—Samu 51:1.

Achitalenu chakutalilaho chaTakuya, * uze asakile kumbila tato yakutala mivwimbimbi yauselesele nakulisokota kuusonyi, oloze chamukaluhwilile. Uno evwilenga ngachilihi nge lwola lumwe nahilukila kuvilinga kana? Ambile ngwenyi: “Ngwalivwilenga kupwa wamokomoko, oloze ngwalombele kuli Yehova angukonekele, kaha angukafwile nakunguzamisa.” Uno Yehova amukafwile ngachilihi? Vakulwane vamuchikungulwilo chenyi vamulwezele avasanyikenga nge muchima wenyi unakusaka kumuzondola. Ambile ngwenyi: “Chapwile chachikalu kuvasanyika, oloze omu ngwahamukile nakuvasanyika, vangukolezezelenga.” Vakulwane valwezele kalama wakujinguluka mangana atambukile Takuya nakumufunga. Kalama wakujinguluka amulwezele ngwenyi: “Kangwalijililile ami yiveneko, oloze vakulwane vakiko vanangutumu kuli ove mangana tukufunge nakukukolezeza.” Takuya ambile ngwenyi: “Ami yami ngunalingi shili, oloze Yehova natumu vakulwane vangukafwe.” Takuya azovolokele nakupwa payiniya washimbu yosena, kaha anakuzachila jino hamutango. Nganomu chapwile kuli ou ndumbwetu, nayenu Kalunga mwamikafwa muukalu wenu.

Vatu vavavulu veji kulizakaminanga nge kaveshi hamilimoko. Vamwe nge vanavafumisa milimo cheji kuvakaluhwilanga kuwana jimbongo jakulikafwa najo. Uno munahase kwivwa ngachilihi nge munakuya nakutonda milimo, kaha kwosena vanakumilweza ngwavo milimo yauchi? Nge chuma kana chinasoloka, vatu vavavulu veji kulivwa kupwa vamokomoko. Uno Yehova nahase kumikafwa ngachilihi? Numba tuhu keshi kumihana milimo hahaze veneko, oloze mwamikafwa nakumyanukisa mazu aMwangana Ndavichi uze ambile ngwenyi: “Ngwapwile ngukanyike, oholyapwa ngunakolo jino, oloze kanda ngumonengaho lyehi muka-kwoloka vanamusuvilila, chipwe kumona vana venyi navalombalomba vyakulyako.” (Samu 37:25, kwinyikila chamwishi) Enga, Yehova eji kumimona kupwa muvavalemu, kaha mwamikwata ‘nalivoko lyenyi lyachilyo lyakwoloka,’ nakumikafwa muwane mwakuyoyela mangana mumuzachilenga.

Sara, uze atwama muColombia amwene omu Yehova amukafwile. Azachilenga hakapani yamuhanyinenga jimbongo jajivulu, oloze yamulilililenga lwola. Asakile kupwanga nalwola lwaluvulu  lwakuzachila Yehova, ngocho alitwaminyine milimo kana nakuputuka upayiniya. Oloze kawanyine washi milimo yize nayimuhana lwola lwaluvuluko. Shikaho, asokolwele chitanda chenyi chakulanjisa visakwola, oloze mukuhita chalwola jimbongo jakumine, kaha asokele chize chitanda. Sara ambile ngwenyi: “Mwahichile myaka yitatu chakuzeneka vyakulinga, oloze Yehova angukafwile.” Alinangwile kulandanga kaha vyuma vyapwile nakusakiwa chikuma mukuyoya, nakuhona kulizakamina vyahamene. (Mateu 6:33, 34) Kutwala muze, mukulwane wamilimo kuze azachilenga amusanyikile nakumuhana milimo yize azachilenga. Oloze ikiye amulwezele ngwenyi nahase kuzata, chikalu kaha mwamuhana lwola lwakuzatanga milimo yakushipilitu. Numba tuhu katambula jimbongo jajivuluko, oloze anakupwanga nalwola lwaluvulu lwakuzata upayiniya. Vyuma kanevi ahichilemo, vyamulingishile ambenga ngwenyi, “Ngunamono omu livoko lyaYehova linangukafwenga.”

Ukalu ukwavo unakuyanjisa vatu shina kulizakamina vyaushinakaji. Vatu vavavulu nge vanakupandama kumyaka yakutambula litayamende, veji kulizakaminanga numba nge navakapwa najimbongo jakulikafwa najo mukuyoya. Veji kulizakaminanga nawa vyakulikangula chavo omu navakapwa tushinakaji. Ndavichi nayikiye pamo alizakaminyine hakulomba Yehova ngwenyi: “Kanda naungumbila omu ngunashinakajako. Kanda naungusuvilila omu ngolo jinangukumuko.”—Samu 71:9, 18.

Vyuma muka navikafwa vangamba jaYehova valivwe kupwa vakukingiwa omu navashinakajiwa? Vatela kuzamisa lika lufwelelo lwavo muli Kalunga nakufwelela ngwavo mwavahananga vyuma vyasakiwa mukuyoya. Nge kunyima vayoyelenga muuhando, kaha nachipwa chamwaza kwashiwisako chiyoyelo chavo. Vatela kumona ngwavo, “kulya visakwola” chapwa chamwaza kuhambakana “kulya nyama yangombe yamaji,” mwomwo echi nachivakafwa valikangule kumujimba. (Vishi. 15:17) Nge mwafwila kwivwisa Yehova kuwaha, kaha mwamizakamanga namulwola lwaushinakaji.

Talenu chakutalilaho chaJosé naRose, vaze vanazatenga mulimo washimbu yosena hamyaka yakuhambakana 65. Hamyaka yayivulu, vanalamenga chisemi chavo hakumbi hakumbi. Kaha nawa José navijinga musongo wakasa. Uno Yehova nakafwenga ava valunga napwevo tahi? Eyo. Ndumbwetu Tony napuwenyi Wendy vamuchikungulwilo chavo vavahanyine kapete kakusavala hazuvo yavo chakuhona kuvafwetesa. Vasakile kuvakundwiza mangana vatwaleho kuzata upayiniya. Kumyaka yakunyima omu Tony apwilenga kushikola, amwenenga vaJosé naRose navaya nakwambulula lwola lwosena. Avazangile mwomwo vapwilenga natwima yakuzata mulimo kana, echi chamukolezezele. Hakumona omu vanazachilanga Yehova mukuyoya chavo chosena, ngocho vafwililile kuvakafwa. Tony napuwenyi Wendy vanakafwe ava vandumbwetu hamyaka 15, kaha oholili vali jino namyaka 80. Ava vandumbwetu vatushinakaji vamona jila vanakuvakafwilamo kupwa wana wakufuma kuli Yehova.

Nayenu nawa Kalunga mwamikafwa ‘nalivoko lyenyi lyachilyo lyakwoloka.’ Kutala nayenu namwolola livoko nakukwata kulivoko lyauze atushika ngwenyi: “Kanda nawivwa womako, nangukukafwa” tahi?