1. Lumbununenu ovyo chapwila chachilemu kutachikiza vyuma vinakusoloka. (Talenu muvwimbimbi wakulivanga.)

TWEJI kwijiva ngachilihi ngwetu kukunguluka kalinwomu chiputuke? Cheyamani eji kuya nakwimana hautenda nakutulweza ngwenyi lwola lunapandama mangana tutwame nakwivwilila kumyaso, nakulizanga kwivwilila kuvihande. Oloze vatu vamwe veji kutwalaho lika kushimutwila navakwavo chakuzeneka kutachikiza ngwavo kukunguluka hinachiputuka. Shikaho tunahase kwamba ngwetu vatu kana kaveshi nakutonako, mwomwo kavatachikijile vyuma vinakusolokako. Chakutalilaho kanechi chinatukafwe tutachikize omu twatela kupwa vakutona havyuma vinakwiza kulutwe. Vyuma mukovyo?

2. Mwomwo ika Yesu alwezelele tumbaji twenyi ‘vatonenga’?

² Omu Yesu Kulishitu apwile nakuhanjika ‘vyachikukulwishi chakatwamino kamyaka yino,’ alwezele tumbaji twenyi ngwenyi: “Vangulukenunga, tonenunga, mwomwo kamwatachikijile oho nalukejila lwola vatongolako.” Ambile nawa ngwenyi: “Tonenunga.” (Mateu 24:3; tangenu  Mako 13:32-37.) Mujimbu waMateu wasolola nawa nge Yesu alwezele vaka-kumukavangiza vatonenga, ambile ngwenyi: “Tonenunga, mwomwo kamwatachikijile likumbi mweza Mwata wenuko. . . . Pwenunga vakulizanga, mwomwo Mwanamutu mweza haola yize kamwashinganyekele ngwenu yikiko mwezako.” Ambile nawa ngwenyi: “Tonenunga, mwomwo kamwatachikijile likumbi chipwe olako.”—Mateu 24:42-44; 25:13.

3. Mwomwo ika twatela kwivwilila kuvyuma atuhuhumuna Yesu?

³ Etu Vinjiho jaYehova twamona mazu ahanjikile Yesu kupwa amalemu. Twatachikiza ngwetu tunakuyoyela ‘mumakumbi akukuminyina’ kaha kalinwomu “luyando lwalunene” luputuke. (Ndanye. 12:4; Mateu 24:21) Makumbi ano mukaye muli vyuma vyavipi vyakufwana nge jijita, ujila, upapwoki, jipindangano mujichachi, jizala, misongo, namindenda. Tunatachikiza ngwetu mujimbu waWangana vanakuwambulula kuvatu jaYehova mukaye kosena. (Mateu 24:7, 11, 12, 14; Luka 21:11) Tunakuvandamina kwiza chaMwata mangana tukamone omu Kalunga mwakatesamo vyuma ajina.—Mako 13:26, 27.

4. (a) Vyuma muka vyatela kutulingisa tukukulule ngwetu Yesu atachikiza jino likumbi nayikeza Alamangetone? (b) Numba tuhu katwatachikiza likumbi nayikeza Alamangetoneko, vyuma muka vyatela kutulingisa tufwelele ngwetu nayikeza?

⁴ Kukunguluka hikukunguluka chatwama nalwola lwakuputuka. Chipwe ngocho, katwatachikiza likumbi nalwola nalukeza luyando lwaluneneko. Omu Yesu apwile hano hamavu ambile ngwenyi: “Kutalisa kulikumbi lize naola yize kakweshi mutu umwe natachikizako, chipwe vangelo vamwilu, chipwe Mwana, shina Tata kaha.” (Mateu 24:36) Kulishitu vamuhana ngolo mwilu jakukalwa naSatana. (Kuso. 19:11-16) Ngocho chakutamo kukukulula ngwetu oholyapwa Yesu natachikiza lwola nayikeza jita yaAlamangetone. Oloze yetu katwatachikizako. Echi chikiko chatela kutulingisa tupwenga vakutona swi nomu nalukeza luyando lwalunene. Yehova ikiye atachikiza kanawa likumbi nalwola kanelu. Anakumona omu luyando lunakupandama, kaha ‘kalweshi kukakotokelako.’ (Tangenu Hambakuke 2:1-3.) Uno twatachikiza ngachilihi?

5. Hanenu chakutalilaho chasolola nge Yehova eji kutesangamo vyuma halwola nashiki.

⁵ Putu vene kushikulu, upolofweto waYehova unatesangamo halwola lwacho. Chakutalilaho chimwe shina chalwola luze asokwele vaIsalele muEjipitu. Omu Mose ahanjikile vyalikumbi lyaNyisane 14, 1513 B.C.E., ambile ngwenyi: “Halikumbi yakumine eyi myaka 430, mayongomena avatu jaYehova vosena valovokele mulifuchi lyaEjipitu.” (Kulo. 12:40-42) Yize “myaka 430” yaputukile omu Yehova alishikile lushiko naApalahama mu 1943 B.C.E. (Ngale. 3:17, 18) Kutwala muze Yehova alwezele Apalahama ngwenyi: “Ijiva chikupu ngwove vaka-tanga yove navakapwanga vamwiza mulifuchi lyeka, kaha navakavakwata undungo nakuvayanjisa hamyaka 400.” (Kupu. 15:13; Vili. 7:6) Yize “myaka 400” yaluyando yaputukile mu 1913 B.C.E. omu Ishimele asekelekele Isaka omu vamusumwine, kaha yakumine omu vaIsalele valovokele muEjipitu mu 1513 B.C.E. (Kupu. 21:8-10; Ngale. 4:22-29) Yehova ahanjikilile  chimweza myaka 400 kunyima vyalwola mwakasokola vatu jenyi.

6. Mwomwo ika twafwelela ngwetu Yehova mwakalwila vatu jenyi?

⁶ Yoshuwa uze nayikiye vayowele muEjipitu, anukishile vaIsalele ngwenyi: “Munatachikiza namichima yenu yosena namyono yenu yosena ngwenu, hamazu osena aze ashikile Yehova Kalunga kenu, kahalihonene lizu numba limweko. Mazu osena anatesamo. Kakwalihonene lizu numba limweko.” (Yoshu. 23:2, 14) Nayetu twatela kufwelela ngwetu Yehova mwakatuyovola chikupu halikumbi lyaluyando lwalunene. Shikaho nge tunakusaka kukayovoka, kaha twatela kutonanga.

7, 8. (a) Mulimo muka vapwilenga nawo vaka-kulama kushikulu, kaha natulinangulaho ika? (b) Hanenu chakutalilaho chasolola ukalu unahase kwiza nge vaka-kulama navasavala tulo.

⁷ Twatela kulinangula kuchakutalilaho chakunyima chize chasolola omu chalema kupwa vakutona. Kushikulu jinganda jajinene jakufwana nge Yelusalema japwilenga najikembwe jajisuku, jize jakingilenga vatu vapwilemo. Kaha nawa vatungilemo tuposhi haze vatwaminenga vaka-kulama. Ufuku namusana hachikolo hapwilenga vaka-kulama. Ava vaka-kulama vapwile namulimo wakulweza vatu nge kuli nakwiza vihwanga nakulukuka nganda. (Isa. 62:6) Vaka-kulama vatelele kutona lika, mwomwo nge vasavalile kachi nganda vayilukukile kuli vaka-kole.—Ezeke. 33:6.

⁸ Josephus kaYuleya uze alinangula vyakushikulu ahanjikile ngwenyi mu 70 C.E., lizavu lyavaka-jita lyavaLoma valukukile Kaposhi umwe uze apwile hakembwe yaYelusalema, mwomwo vaka-kulama vapwile mutulo. Valukukile nganda nakwingila mutembele nakuyocha, echi jino chanehele luyando lwalunene munganda yaYelusalema nakuli vaYuleya vosena.

9. Vyuma muka vize kavatachikiza vatu vamwe makumbi anoko?

⁹ Makumbi ano, mumafuchi amavulu mwatwama ‘vaka-kulama’ vaze veji kutambukanga mumiseto nakukinga lifuchi. Veji kutalatala vitoji vaze vanahase kwingila mulifuchi. Chipwe ngocho ava ‘vaka-kulama’ veji kumonanga kaha ukalu uze vanahase kuneha vatu. Kavatachikiza milimo yaWangana waKalunga uze vatetekela kuli Kulishitu navyuma naukalinga hakusopesa vaka-mafuchi osena. (Isa. 9:6, 7, kwinyikila chamwishi; 56:10; Ndanye. 2:44) Shikaho nge natupwa vakuvanguluka nakutona kushipilitu, kaha natupwa vakulizanga kuvandamina likumbi lyalinene lyakusopesa.—Samu 130:6.

10, 11. (a) Vyuma muka twatela kuzangama navyo, kaha mwomwo ika? (b) Vyuma muka vinamilingisa mwitavile ngwenu Liyavolo ali nakuhungumwisa vatu vahone kumona kutesamo chaupolofweto?

¹⁰ Achishinganyekenu muka-kulama umwe uze atonanga ufuku wosena. Kahomu mwaheta kuvandemba himwalezukila mutulo nakusavala. Nayetu nawa omu tuli nakupandama kukukuma chamyaka yino, chinahase kutukaluhwila kutwalaho lika kutona. Nachipwa chakuhenga nge natuzeya nakusavala tulo, mwomwo chinahase kutuhaka muponde. Tushimutwilenu havyuma vitatu vize vinahase kutulingisa tusavale tulo.

¹¹ Liyavolo anakuhungumwisa vatu vahumbule vyuma vyakushipilitu. Shimbu  kanda Yesu afwenga, ahuhumwine tumbaji twenyi mapapa katatu hali “muka-kuyula kano kaye.” (Yowa. 12:31; 14:30; 16:11) Yesu atachikijile ngwenyi Liyavolo mwakenyeka vishinganyeka vyavatu mangana vakahone kumona omu upolofweto waKalunga naukatesamo. (Zefwa. 1:14) Satana anakwilavisa vishinganyeka vyavatu kuzachisa kwitava chamakuli. Uno nayenu munakumona vyuma kana omu muli nakuyanga nakwambulila vatu tahi? Chapundu vene Liyavolo “nelavisa vishinganyeka vyavaze kavetavako” mangana vahone kumona kukuma chamyaka yino, naunjiho wakusolola nge Kulishitu anakuyula muWangana waKalunga. (Koli. 2, 4:3-6) Kakavulu omu tweji kwambulwilanga vatu veji kuhanjikanga ngwavo, “Ami kangwazangileko.” Veji kuhanjika ngocho mwomwo kavasaka kwivwa vyakunongesa kaye kanoko.

12. Mwomwo ika katwatela kwitavisa Liyavolo atuhungumwiseko?

¹² Kanda kwitavila vatu vamizeyese mangana muhone kupwa vakutonako. Paulu alwezele vakwavo vaka-kwitava ngwenyi: “Enu vavene munatachikiza kanawa ngwenu likumbi lyaYehova nalikeza nge mwiji naufuku.” (Tangenu Wavaka-Tesolonyika 1, 5:1-6.) Yesu atuhuhumuna ngwenyi: “Pwenunga mwalizanga lyehi, mwomwo haola yize kamwashinganyekeleko, hakiko vene mweza Mwanamutu.” (Luka 12:39, 40) Kalinwaha Satana ahungumwise vatu vavavulu vafwelele ngwavo muno mukaye muli “kuunda namukingo,” kaha vyuma vyosena vili kanawa. Nyi ngachili yetu? Likumbi lyakusopesa kalyeshi ‘kukatukasumuna nge mwijiko’ chikalu kaha natutonanga “nakulama uhashi wetu wakushinganyeka kanawa.” Evi vikiko vyatela kutulingisa tutangenga Mazu aKalunga nakushinganyeka havyuma anakutulweza Yehova.

13. Mwomwo ika vyuma vyamuno mukaye vinakuhungumwishila vatu, kaha natulihendako ngachilihi?

¹³ Vyuma vyamuno mukaye vinakulingisa vatu vasavale tulo. Vatu vavavulu vanandupukila mumilimo yakumujimba nakuvalingisa jino vahone kusaka “vyuma vyakushipilitu.” (Mateu 5:3) Vengila mukutonda luheto lwamuno mukaye luze lwapwa “kufwila  chamujimba, nakufwila chameso.” (Yowa. 1, 2:16) Kuhema nakulihizumuna chinakulingisa vatu ‘vazange chikuma viseke,’ kaha mwaka himwaka viseke kana vinakuvulilako lika. (Chimo. 2, 3:4) Evi vikiko vyalingishile kaposetolo Paulu alweze vaka-Kulishitu ngwenyi kavatela ‘kushinganyekelanga chimweza mwakulingila vyuma wafwila mujimbako,’ chize cheji kunehanga kuzeya kushipilitu.—Loma 13:11-14.

14. Mazu muka akutuhuhumuna vasoneka hali Luka 21:34, 35?

¹⁴ Muchishishisa chakundupukila muvyuma vyamukaye, twatela kwitavila shipilitu yaKalunga yitutwaminyine mwomwo yinatukafwe tutachikize vyuma vinakwiza kulutwe. ^[1] (Koli. 1, 2:12) Twatela kwanuka ngwetu, nge natuliweza chikuma muvyuma vyamulifuchi, kaha nachitulingisa tunongoke kushipilitu. (Tangenu Luka 21:34, 35.) Numba tuhu vatu vanahase kututoleka, oloze katwatela kuzeya nakuhona kutonako. (Petu. 2, 3:3-7) Twatela kukungulukanga hamwe navandumbwetu vaka-Kulishitu kuchikungulwilo mangana shipilitu yaKalunga yitujikijise.

15. Vyuma muka vyasolokele kuli Petulu, naYakova naYowano, kaha natulinangulako ika?

¹⁵ Kuhona kukupuka chinahase kutulingisa tusavale tulo kushipilitu. Yesu atachikijile ngwenyi kuhona kukupuka cheji kulingisanga vatu vazeye kumujimba. Tuchishimutwilenu havyuma vyasolokele haufuku afwile Yesu. Apendaminyine hali Ise mangana amukafwe apwenga lika wakulonga. Yesu alwezele Petulu, naYakova, naYowano ‘vatwaleho lika kutona’ omu ayile nakulomba. Oloze vakiko kavashinganyekele chikuma haukalu wapwile nakwizako, ngocho vazeyele kumujimba kaha vasavalile. Numba tuhu naYesu azeyele kumujimba, oloze kasavalileko, atwalileho lika nakulomba kuli Ise. Omu mukiko vatelele kulinga navaze tumbaji apwile navo.—Mako 14:32-41.

16. Kweseka naLuka 21:36, Yesu atulweza tupwenga ngachilihi ‘vakuvanguluka’?

¹⁶ ‘Kuvanguluka’ kushipilitu kachalumbununa kaha kulinga vyuma vyamwazako. Shimbu kanda likumbi kaneli, Yesu alwezele ava tumbaji valombenga nakulembelela Yehova. (Tangenu Luka 21:36.) Nayetu twatela kupwa vakuvanguluka nakulomba mangana tutwaleho lika kupwa vakutona kushipilitu.—Petu. 1, 4:7, kwinyikila chamwishi.

17. Vyuma muka twatela kulinga numba tusolole ngwetu tunapu vakuvanguluka havyuma vinakwiza kulutwe?

¹⁷ Hakuwana nge Yesu ambile ngwenyi kukuma nachikeza ‘haola yize katwashinganyekele ngwetu mwezako,’ ngocho twatela kupwa vakutona kushipilitu keshi kufwila vyuma vyakumujimba vyamukaye kano kaSatanako. (Mateu 24:44) Mbimbiliya yatulweza vyuma vyamwaza vize Kalunga naMwanenyi vanatuwahishila kutuhana kulutwe nge natupwa lika vakutona. Twatela kuhaka mangana kuvyuma vyakushipilitu, nausoko wetu naYehova nakuvyuma vyaWangana. Twatela kutachikiza lwola tunakuyoyelamo nakutesamo chaupolofweto mangana chitukafwe kupwa vakutona lika. (Kuso. 22:20) Enga twatela kupwa vakuvanguluka numba tukayoye.