1. Vyuma muka vatela kusakula vakweze, kaha mwomwo ika kavatela kulizakaminako? (Talenu muvwimbimbi wakulivanga.)

VAKWEZE vatachikiza ngwavo mutu hakusaka kuya ungeji, atela kushinganyekela chimweza okwo ali nakuya. Hakuwana nge kuyoya chapwa nge kuya ungeji, shikaho mutu atela kushinganyeka vyuma mwakalinga mukuyoya chenyi shimbu achili mukweze. Chipwe ngocho, kushinganyeka vyakulinga mukuyoya kachapwa chachashiko. Chakutalilaho, kanyike wapwevo Heather ambile ngwenyi: “Kushinganyeka vyakulinga mukuyoya chapwa chachikalu, mwomwo vyuma nausakula kulinga navikwata hakuyoya chove chosena.” Oloze mwatela kumika nakufwelela muli Yehova mwomwo amba ngwenyi: “Kanda naulizakaminako, mwomwo nguKalunga kove. Nangukujikijisa, nangukukafwa.”—Isa. 41:10.

2. Mwatachikiza ngachilihi ngwenu Yehova asaka musakule vyuma vize navikamilingisa mukawahilile kulutwe?

² Yehova amilweza musakule kanawa vyuma namukalinga kulutwe. (Kwambu. 12:1; Mateu 6:20) Vyuma atenga vize mweji kumonanga, nakwivwa, nakulya vyasolola nge asaka muwahililenga. Achishinganyekenu nawa hajila yamwaza eji kutuzakaminangamo nakutunangula. Yehova ahanjikile hali vaze veji kukananga mazu enyi ngwenyi: “Mwafwililile vyuma vize vyangwivwishilenga kupihya. . . . Talenu!  Vangamba jami navakawahililanga, oloze enu namukevwanga sonyi. Talenu! Vangamba jami navakatwanga jingunda hakwivwa kuwaha mumichima yavo.” (Isa. 65:12-14) Yehova eji kwivwanga kuwaha nge vatu jenyi navasakula vyuma vyamwaza mukuyoya chavo.—Vishi. 27:11.

3. Yehova asaka mulinge vyuma muka?

³ Yehova asaka musakule vyuma muka? Atengele vatu mangana vawahililenga hakumutachikiza nakumuzachila mukashishi. (Samu 128:1; Mateu 5:3) Vatu valihandununa natunyama vaze veji kulyanga kaha nakunwa nakusema. Kalunga asaka muwahilile hakusakula vyuma vyeka vyakulinga mukuyoya, kuhambakana vize vyeji kusuulwisanga tunyama. Tengi yenu apwa “Kalunga wazangi,” “Kalunga . . . wakuwahilila,” uze atengele vatu “muchifwanyisa chenyi.” (Koli. 2, 13:11; Chimo. 1, 1:11; Kupu. 1:27) Nge namulondezeza Kalunga, kaha namuwahilila. Twafwelela mwetavila mazu atwama hali Vilinga 20:35 aze amba ngwawo: “Kuhana cheji kunehanga kuwahilila chikuma kuhambakana kutambula.” Omu mukiko chapwa kuyoya. Shikaho, Yehova asaka musakule kanawa vyuma vyakulinga vize navisolola nge mwazanga vakwenu nakuzanga nawa Kalunga.—Tangenu Mateu 22:36-39.

4, 5. Vyuma muka vyalingishile Yesu awahilile?

⁴ Enu vakweze, Yesu Kulishitu amisela chakutalilaho chakukupuka. Omu apwile kanyike, alivwishilenga kuwaha kuhema navakwavo. Mazu aKalunga amba ngwawo, kwatwama “lwola lwakuseha . . . nalwola lwakukina.” (Kwambu. 3:4) Yesu apandaminenga kuli Yehova hakulinangula Visoneka. Omu apwile namyaka yakusemuka 12, vaka-kunangula mutembele valikomokelele chikuma “hakunangakana chenyi nomu akumbulwilenga vihula.”—Luka 2:42, 46, 47.

⁵ Yesu apwilenga wakuwahilila nomu apwile mukulwane. Vyuma muka vyamulingishile awahilile? Chuma chimwe shina atachikijile ngwenyi Kalunga asakile ngwenyi avilike “mujimbu wamwaza kuli vaka-kuhutwa . . . nakutonesa tupuputa.” (Luka 4:18) Chikupu vene, kulinga vyuma amulwezele Kalunga chalingishile Yesu awahilile. Mukanda waSamu 40:8 wamba ngwawo: “Ove Kalunga kami, ngwasaka kulinga mwaya muchima wove.” Yesu evwilenga kuwaha kunangula vatu vatachikize Ise wamwilu. (Tangenu Luka 10:21.) Kaha likumbi limwe omu Yesu akumishile kunangula pwevo umwe vyakulemesa chamuchano, alwezele tumbaji twenyi ngwenyi: “Kulya chami shina kulinga mwaya muchima wayauze angutumine nakukumisa mulimo wenyi.” (Yowa. 4:31-34) Kuzanga Kalunga navatu chevwishilenga Yesu kuwaha. Nayenu nawa munahase kuwahilila nge namulinga ngocho.

6. Mwomwo ika chapwila chamwaza kushimutwila vyuma munakufwila kulinga navaka-Kulishitu vakuhya?

⁶ Vaka-Kulishitu vavavulu vaze vaputukile kuzata upayiniya shimbu vapwile vakweze vapwa vakuwahilila. Shikaho, munahase kushimutwila navatu kana nge munakufwila kuzata upayiniya. Mbimbiliya yamba ngwayo: “Kachi nge vatu kavatwamine pungako, vyuma vanajinyi kulinga vyeji kukuminamo, oloze vyuma vyeji kutesangamo nge vaka-kulweza mangana vanavulu.” (Vishi. 15:22) Vaka-Kulishitu kana navamikafwa mutachikize nge kuzata upayiniya nachiminganyalisa mukuyoya chenu chosena. Omu Yesu apwile mwilu vamunangwilenga kuli Ise, kaha atwalileho kulinangula nomu apwile hano hamavu. Chakutalilaho, ejivile kuwaha chatwama hakunangula vatu mujimbu wamwaza nakuvaheta hamichima, nakuwaha chatwama hakulama kulonga chetu nge tuli muvyeseko. (Tangenu Isaya 50:4; Hepe. 5:8; 12:2) Ngocho tushimutwilenu hamilimo yashimbu yosena yize munahase kuzata mangana mupwenga vakuwahilila.

7. Mwomwo ika vakweze vavavulu veji kulivwishilanga kuwaha mulimo wakunangula vatu vapwenga tumbaji?

⁷ Yesu ambile ngwenyi: “Yenunga mukanangule vatu . . . vakapwe tumbaji.” (Mateu 28:19, 20) Nge namusakula kuzata mulimo wakunangula vatu vapwenga tumbaji, kaha  namusakula mulimo wamwaza uze nautohwesa Kalunga. Kupwa nauhashi hakuzata mulimo kana chasakiwa lwola, nganomu chapwa nahakuzata milimo yeka yamukuyoya. Timothy uze aputukile kuzata upayiniya omu apwile namyaka 19 ambile ngwenyi: “Ngwazanga kuzachila Yehova mumulimo washimbu yosena mwomwo yikiko jila ngweji kusolwelangamo ngwami ngwamuzanga. Hakavanga kangwapwile navilongesa vyaMbimbiliyako, oloze omu ngwanungulukilile kungalila yeka, ngwapwile jino navilongesa vyavivulu mukakweji umwe kaha. Mutu umwe ngwalinangwilenga nenyi aputukile kwiza nakukunguluka kuZuvo yaWangana. Omu ngwakumishile Shikola Yakulinangula Mbimbiliya yaVandumbwetu vaMalunga vaVajike, * vangutumine kungalila yeka kuze jino nguli nakutwaminyina vilongesa viwana. Ngwazanga kunangula vatu nakumona omu shipilitu yajila yili nakwalumuna vilinga vyavo.”—Teso. 1, 2:19.

8. Vakweze vamwe vanazatenga ngachilihi mulimo wakunangula vatu vapwenga tumbaji?

⁸ Vakweze vamwe vanalinangula malimi eka. Chakutalilaho, Jacob wakuUnited States asonekele ngwenyi: “Omu ngwapwile namyaka 7, vakwetu vaka-shikola vavavulu vahanjikilenga lilimi lyaVietnamese. Ngwasakilenga kuvanangula vyaYehova, shikaho ngwashinganyekele kulinangula lilimi lyavo. Chuma changukafwilenga chikuma shina kutanga Kaposhi Kakutalila mumalimi osena avali, muChingeleshi namuVietnamese. Kaha nawa ngwatungile masepa muchikungulwilo chize chazachishilenga lilimi lyaVietnamese. Omu ngwahetele myaka 18 ngwaputukile kuzata upayiniya. Kufumaho, ngwayile kuShikola Yakulinangula Mbimbiliya yaVandumbwetu vaMalunga vaVajike. Shikola kana yinangukafwe chikuma muchikungulwilo ngwatwama chize chazachisa lilimi lyaVietnamese mwomwo ngwapwa ngukalama uka wami. Vatu vavavulu vaze vahanjika lilimi kana valikomokela hakumona ngunalinangula lilimi lyavo. Veji kungusanyikanga kujizuvo javo, kaha shimbu jajivulu ngweji kulinangulanga navo Mbimbiliya. Vavavulu vanazovoloka nakuvambapachisa.”—Esekesenuko Vilinga 2:7, 8.

9. Mulimo wakunangula vatu vapwenga tumbaji naumikafwa ngachilihi?

⁹ Mulimo wakunangula vatu vapwenga tumbaji naumikafwa mutachikize mwakuzachila kanawa milimo, namwakushimutwila navatu, namwakupwila vakumika, nakuhanjika mukuzangama. (Vishi. 21:5; Chimo. 2, 2:24, kwinyikila chamwishi) Mulimo kana naumikafwa chikumanyi mupwenga vakuwahilila mwomwo naumilingisa mutachikize kanawa Visoneka vize hazama vyuma mwafwelela. Namulinangula nawa kuzachila hamwe naYehova.—Koli. 1, 3:9.

10. Namulivwisa ngachilihi kuwaha kwambulula numba tuhu vatu mungalila yenu kavasaka kuvambulilako?

¹⁰ Munahase kulivwisa kuwaha kuzata mulimo wakwambulula numba tuhu vatu mungalila yenu kavasaka kuvambulilako. Mulimo wakunangula vatu vapwenga tumbaji kawapwa wamutu umwe kahako. Chikungulwilo chosena cheji kutondatondanga vatu vamwaza michima. Numba tuhu ndumbwetu umwe kaha yikiye mwanangula mutu apwenga kambaji, oloze vatu vosena muchikungulwilo valikafwilenga kutonda, ngocho vosena navawahilila hakuzovoloka chamutu kana. Chakutalilaho, Brandon azachile upayiniya hamyaka 9 mungalila muze vatu kavetavililenga mujimbuko. Ambile ngwenyi: “Ngwasaka kwambulula mujimbu wamwaza mwomwo chikiko asaka Yehova ngwenyi tulingenga. Shikaho, ngwaputukile kuzata upayiniya omu ngwakumishile shikola. Ngweji kwivwanga kuwaha kukolezeza vakweze muchikungulwilo nakumona omu vali nakuzovoloka kushipilitu. Omu ngwafumine kuShikola Yakulinangula Mbimbiliya yaVandumbwetu vaMalunga vaVajike, vangutumine kuya nakuzachila kungalila yeka. Numba tuhu mungalila kana ami kangwanangwile mutu nakumuhetesa kulumbapachisoko, oloze vandumbwami vamwe vananangula vatu nakuvahetesa kulumbapachiso. Ngwapwa nguwakuwahilila mwomwo ngwasakwile kuzata chikuma mulimo wakunangula vatu vapwenga tumbaji.”—Kwambu. 11:6.

11. Mulimo muka vanalivwisanga kuwaha vakweze vavavulu?

¹¹ Tunahase kuzachila Yehova mujijila jakulisezaseza. Chakutalilaho, vakweze vavavulu vanalisuula kuzata mulimo wakutungatunga. Makumbi ano kuli nakusakiwa kutunga jiZuvo jaWangana jajivulu. Shikaho kuzata mulimo kana nachitohwesa Kalunga nakumilingisa muwahilile. Ngana mwamilimo yeka yamuliuka, vaze veji kuzatanga mulimo wakutungatunga veji kwivwanga kuwaha kulikata navandumbwavo. Mulimo kana nauminangula nawa mutachikize mwakulikingila kujiponde, namwakuzachila milimo naunyongochima, namwakuzachila kanawa navaze vali nakutwaminyina.

12. Uno mulimo waupayiniya unahase kulingisa ngachilihi mutu azate milimo yeka?

¹² Ndumbwetu Kevin ambile ngwenyi: “Kufuma vene kuunyike wami, ngwazangilenga kuzachila Yehova mumulimo washimbu yosena. Kahomu ngwahetele myaka 19, ngwaputukile kuzata upayiniya. Kaha nawa ngwengilile milimo kuli ndumbwami uze apwile muka-kutungatunga, mangana nguwaneko jimbongo jakulikafwa najo. Ngwalinangwile mulimo wakusoka nakwambila jizuvo, nakuhaka jinjanena namapito. Kufumaho, ngwazachile myaka yivali mumulimo wakutunga jiZuvo jaWangana najavandumbwetu jize japuzukile napeho yanyamanganda. Kahomu ngwevwile ngwavo mulifuchi lyaSouth Africa muli mulimo wakutunga jiZuvo jaWangana, ngocho ngwalisonekesele kaha vangusanyikile. Tweji kutunganga jiZuvo jaWangana muvyalumingo vyavindende kaha. Vandumbwetu ngweji kuzatanga navo vapwa nge vausoko wami. Tweji kulilanga hamwe nakutangila hamwe Mbimbiliya nakuzachila hamwe. Ngweji kulivwisanga nawa kuwaha kuzachila hamwe navandumbwami mulimo wakwambulula chalumingo hichalumingo. Vyuma ngwasakwile kulinga omu ngwapwile ngukanyike vinangulingisa nguwahilile chikuma mukuyoya chami.”

13. Vyuma muka vyeji kwivwisanga kuwaha vakweze vaze vazachila haMbetele?

 ¹³ Vakweze veka nawa vaze vasakwile kuzachila Yehova mumulimo washimbu yosena vanakuzachila jino haMbetele. Kuzachila haMbetele chapwa chamwaza mwomwo kala mulimo namuzata wapwa waYehova. Vaka-Mbetele veji kukafwanga ndungo wakushishika kuwahisa kulya chakushipilitu. Dustin uze azachila haMbetele ambile ngwenyi: “Omu ngwapwile namyaka 9, ngwafwililile kuzata mulimo washimbu yosena, kahomu ngwakumishile shikola ngwaputukile kuzata upayiniya. Omu mwahichile mwaka umwe nachimbwa vangusanyikile kuMbetele kuze ngwalinangwile kuzachisa likina lyakupulitisa mikanda. Kufumaho vangunungulwilile kujikopyuta. Ngweji kulivwisanga kuwaha kuzachila haMbetele, mwomwo ngweji kwivwanga washi vyakuzovoloka chamulimo wetu wamukaye kosena. Ngweji kuwahililanga nawa mwomwo milimo tweji kuzatanga yeji kutukafwanga tupandame chikuma kuli Yehova.”

14. Namuliwahisa ngachilihi mangana muzate mulimo washimbu yosena?

¹⁴ Namuliwahisa ngachilihi mangana muzate mulimo washimbu yosena? Chuma chachinene nachimikafwa mufukile shina kupwa navilinga vyamwaza. Shikaho, mwatela kulinangula Mazu aKalunga nakuhunananaho nakushinganyeka hajijila jakusolwelamo lufwelelo lwenu hakukunguluka. Nge muchili kushikola, kaha linangulenu mwakushimutwilila navakwenu mujimbu wamwaza. Linangulenu nawa mwakuzakamina vatu hakuvahulisa vihula mukuzangama nakwivwilila omu navakumbulula. Munahase nawa kulisuula kuzata milimo yakufwana nge kuwahisa Zuvo yenu yaWangana. Yehova eji kwivwanga kuwaha kuzachisa vatu vakulinyisa vakulisuula. (Tangenu Samu 110:3; Vili. 6:1-3) Kaposetolo Paulu alwezele Chimoteu ayenga nenyi mumulimo waumishonali mwomwo ‘vamusangejekelenga kuli vandumbwenyi.’—Vili. 16:1-5.

15. Vyuma muka navimikafwa muwane mwakuyoyela?

¹⁵ Vaze vazata mulimo washimbu yosena nawa vasakiwa kuwana mwakuyoyela. (Vili. 18:2, 3) Pamo munahase kulinangula mulimo uze naukamikafwa mukazate kanawa upayiniya mungalila yenu. Munahase kushimutwila nakalama wakujinguluka chipwe vapayiniya veka vamungalila yenu vamilweze milimo vatela kuzata vapayiniya mangana vawane mwakuyoyela. Mbimbiliya nawa yahanjika ngwayo: “Vyeshovyo musaka kulinga vikunjike kuli Yehova, kaha vyuma unajinyi navifukila.”—Vishi. 16:3; 20:18.

16. Uno kuzachila Yehova muukweze nachimikafwa ngachilihi mukatemo kuzata milimo yeka kulutwe?

¹⁶ Tachikizenu ngwenu Yehova asaka ‘mulinjilile kukuyoya chamwenemwene’ mangana mukawahilile kulutwe. (Tangenu WaChimoteu 1, 6:18, 19.) Nge namuzata mulimo washimbu yosena, kaha namulitachikiza navandumbwetu veka vaze vali nakuzata mulimo kana, nakumikafwa muzovoloke. Vaka-Kulishitu vavavulu vawana nge kuzachila Yehova mumulimo washimbu yosena muukweze chinavakafwe vapwenga naulo wakuwahilila. Kaha nawa vaze vazachilenga upayiniya shimbu kanda vengile muulo, vavavulu vanatwalililaho kuzata mulimo kana navaka-mahyavo.—Loma 16:3, 4.

17, 18. Mwomwo ika vyuma namusakula kulinga vyatela kufuma kwishi yamuchima wenu?

¹⁷ Vyuma namusakula kulinga vyatela kufuma kwishi yamuchima. Samu 20:4 yavuluka hali Yehova ngwayo: “Akuhane vyuma wafwila muchima wove, afukise vyuma vyosena unajinyi.” Shikaho, shinganyekenu vyuma mwatela kulinga mukuyoya chenu. Kekesenu vyuma ali nakulinga Yehova oholyapwa nomu munahase kukundwiza mulimo wenyi. Kaha sakulenu kulinga vyuma vize navimwivwisa kuwaha.

¹⁸ Kuzachila chikuma Yehova nachimilingisa mupwenga vakuwahilila mwomwo yapwa jila yamwaza yakuvumbikilamo Kalunga. Eyo, mwatela ‘kwivwila kuwaha Yehova, kaha mwamihana vyuma wafwila muchima wenu.’—Samu 37:4.