1, 2. Mwomwo ika twatela kushimutwila mwakuvendejekela vaze vanafwisa? (Talenu muvwimbimbi wakulivanga.)

NDUMBWETU Susi ambile ngwenyi: “Omu afwile mwanetu, twalishonenenga chikuma hatukweji vavavulu.” Ndumbwetu weka nawa ambile ngwenyi kufwisa puwenyi chamulingishile avize kumujimba. Tuvosena tweji kumonanga ukalu kana. Vandumbwetu vavavulu vaze vafwisa kavashinganyekele ngwavo navakafwisa vatu vazanga shimbu kanda Alamangetoneko. Numba nge yenu munafwisa chipwe munejiva ndumbwenu weka uze nafwisa, munahase kulihulisa ngwenu, ‘Uno vaze vanafwisa vanahase kuvavendejeka ngachilihi?’

² Pamo mwevwaho lyehi vatu navahanjika ngwavo ushona weji kukumanga mukuhita chalwola. Uno echi chili nakulumbununa nge kuhita chalwola chikiko nachikumisa ushona wamutu tahi? Ndumbwetu umwe watuliwe ambile ngwenyi, “Ngunalinangula nge vyuma mwalinga mutu mukuhita chalwola vikiko navimuvendejeka nakukumisa ushona.” Chakutalilaho, nge mutu ali nambandu, chasakiwa kuyizakama kanawa numba  yikanguke. Shikaho, naushona nawa weji kukumanga nge natuzata nangolo. Vyuma muka navikafwa vaze vafwisa mangana vechenga kulishona?

3, 4. Tunatachikiza ngachilihi ngwetu Yehova atachikiza ngwenyi vaze vanafwisa vasakiwa kuvavendejeka?

³ Setu wamwilu Yehova ikiye muka-kutuvendejeka wamunene. (Tangenu Wavaka-Kolinde 2, 1:3, 4.) Yehova Kalunga wakeke alweza vatu jenyi ngwenyi: “Ami yami nguli nakumivendejeka.”—Isa. 51:12; Samu 119:50, 52, 76.

⁴ Yehova nayikiye evwile ushona hakufwisa vangamba jenyi azanga vakufwana nge Apalahama, Isaka, Yakova, Mose, naMwangana Ndavichi. (Kula. 12:6-8; Mateu 22:31, 32; Vili. 13:22) Mazu aKalunga atulweza ngwawo Yehova afwila kukasangula vatu kana. (Yopa 14:14, 15) Vatu kana navakapwa namijimba yakulikangula, kaha navakawahilila. Kaha nawa Mwanenyi uze “evwililenga kuwaha chikuma” afwile mujila yayipi. (Vishi. 8:22, 30) Ngocho Yehova evwile kukola chikuma hakufwisa Mwanenyi.—Yowa. 5:20; 10:17.

5, 6. Yehova nahase kutuvendejeka ngachilihi?

⁵ Twafwelela chikupu ngwetu, Yehova mwatukafwanga. Shikaho nge tunafwisa, twatela kumulweza ukalu wetu wosena kuhichila mukulomba. Tweji kwivwanga kuwaha hakutachikiza ngwetu Yehova eji kumonanga kulishona chetu nakutuvendejeka halwola lwakutamo. Uno eji kutuvendejekanga ngachilihi?

⁶ Jila yimwe Kalunga eji kutukafwilangamo shina kuhichila “[mu]kuvendejeka chashipilitu yajila.” (Vili. 9:31) Chikupu vene, shipilitu yajila yaKalunga yeji kutuvendejekanga. Yesu ashikile ngwenyi, Ise wamwilu mwahana “shipilitu yajila kuli vaze navamulombayo.” (Luka 11:13) Susi uze twavulukanga lyehi ambile ngwenyi: “Twalombelenga mapapa kakavulu kuli Yehova mangana atuvendejeke. Ngocho kuunda chaKalunga chakingilenga michima yetu navishinganyeka vyetu.”—Tangenu Wavaka-Fwilipi 4:6, 7.

7, 8. Twatachikiza ngachilihi ngwetu Yesu mwatuvendejekanga?

⁷ Muchima waYehova wakutetela vausolwele kuli Mwanenyi Yesu muvyuma alingilenga navize ahanjikilenga omu apwile hano hamavu. (Yowa. 5:19) Yesu vamutumine mangana avendejeke “vaze vali nakulyonyinga mumichima” “[na]vosena vaze vali nakulishona.” (Isa. 61:1, 2; Luka 4:17-21) Ngocho Yesu vamutachikijile kupwa muka-kutetela vaze vapwile nakuyanda nakufwila kuvakafwa.—Hepe. 2:17.

⁸ Omu Yesu apwile kanyike, afwishile vausoko namasepa. Chasoloka nge ise wakumulela Yosefwe afwile halwola Yesu apwile achili mukweze. * Achishinganyekenu owo ushona evwile hakufwisa ise nakumona omu vasongo jenyi nanaye vapwile nakulishona, okunyi ikiye achili kanyike.

9. Yesu asolwele ngachilihi muchima wakeke omu afwile Lazalu?

⁹ Omu Yesu aputukile kuzata mulimo wenyi, evwililenga vatu keke nakuvakafwa. Achishinganyekenu vyuma alingile omu  afwile sepa lyenyi Lazalu. Numba tuhu atachikijile ngwenyi mwamusangula, oloze alishonene nganomu valishonene vandumbwenyi vaMaliya naMalita. Evwile ushona chikuma ngocho alilile.—Yowa. 11:33-36.

10. Mwomwo ika twatela kufwelela ngwetu Yesu mwatuvendejekanga makumbi ano?

¹⁰ Uno muchima waYesu wakeke nautukafwa ngachilihi makumi ano? Visoneka vyatulweza ngwavyo, “Yesu Kulishitu apwa youmwe nazau, nalelo, nahaya myaka yosena.” (Hepe. 13:8) Hakuwana nge ou “Twamina Wamunene wakuyoya” atachikiza omu tweji kwivwanga nge tunafwisa, ‘ngocho nahase kukafwangako vaze vali nakumona vyeseko.’ (Vili. 3:15; Hepe. 2:10, 18) Shikaho, twatela kufwelela ngwetu Kulishitu mwatwalaho kwivwilanga keke vaze vali nakulishona nakuvavendejeka “halwola lwakutamo.”—Tangenu WavaHepeleu 4:15, 16.

11. Visoneka muka vize vyeji kumivendejekanga?

¹¹ Mujimbu wakulishona chaYesu hakufwa chaLazalu himujimbu umwe hamijimbu yayivulu yakutuvendejeka yize yatwama muMazu aKalunga. Shikaho, “vyuma vyosena vize vasonekele hakavanga vavisonekelele kutunangula etu, mangana kuhichila mukukakachila chetu namukuvendejeka chamuVisoneka tuhase kupwa nalutalililo.” (Loma 15:4) Kachi nge munafwisa, kaha visoneka vili mwishi vinahase kumivendejeka nayenu.

• “Yehova ali hakamwihi navaze vali nakulyonyinga mumuchima. Kaha eji kulwilanga vaze vanahombo.”—Samu 34:18, 19.

• “Omu ngwalizakaminyine chikuma, ove [Yehova] wanguvendejekele nakunguunjisa muchima.”—Samu 94:19.

• “Mwata wetu Yesu Kulishitu naKalunga Setu ou atuzangile nakutuhana kuvendejeka chahaya myaka yosena nalutalililo lwamwaza kuhichila mulikoji lyalinene, vavendejeke michima yenu nakumijikijisa.”—Teso. 2, 2:16, 17. *

12. Jila yimwe muka yayilemu tunahase kuvendejekelamo vakwetu?

¹² Vaze vanafwisa vanahase kuwana nawa kuvendejeka muchikungulwilo chavaka-Kulishitu. (Tangenu Wavaka-Tesolonyika 1, 5:11.) Uno munahase kujikijisa ngachilihi vaze vanahombo mumuchima nakuvavendejeka? (Vishi. 17:22) Ijivenu ngwenu kwatwama “lwola lwakuhola kulu, nalwola lwakuhanjika.” (Kwambu. 3:7) Tuliwe umwe walijina lyaDalene ambile ngwenyi: “Vaze vanafwisa vatela kutufula vyuma vanakushinganyeka nomu vanakwivwa. Shikaho, chuma mwatela kulinga shina kuvevwilila nge vali nakuhanjika, chakuhona kuvakwata kulizu.” Junia uze afwishile yayenyi ambile ngwenyi: “Numba tuhu kamweshi kutachikiza kanawa ushona ali nakwivwa uze nafwisako, oloze chuma chachilemu shina kwivwilila vyuma mwamilweza mangana mwivwishise omu ali nakwivwa.”

13. Vyuma muka twatela kutachikiza hali vaze vali nakulishona?

¹³ Tachikizenu nawa ngwenu vatu kaveshi kulishona mujila yoyimweko. Shimbu jimwe mutu yivene yikiye eji kutachikizanga omu ali nakwivwa, kaha chinahase kumukaluhwila kuhanjika vyuma vili kumuchima wenyi. Mazu aKalunga amba ngwawo: “Muchima watachikiza kulyonyinga chawo, kaha mutu weka keshi kuhasa kwazana mukuwahilila chawoko.” (Vishi. 14:10) Numba nge mutu mwamilweza omu ali nakwivwa, oloze kamweshi kuhasa kwivwishisa vyuma vyosena mwahanjikako.

14. Mazu akuvendejeka vaze vanafwisa tunahase kuwawana kulihi?

 ¹⁴ Lwola lumwe chapwa chachikalu kutachikiza mazu twatela kuhanjika kuli mutu uze ali nakulishona. Chipwe ngocho, Mbimbiliya yahanjika ngwayo, “lilimi lyamuka-mangana lyeji kuhindulanga.” (Vishi. 12:18) Vatu vavavulu vanawane mazu akuvendejeka vakwavo hakutanga mbuloshuwa yaNge Mutu Wazanga Nafu. * Oloze shimbu jimwe chuma munahase kulinga shina kulila “navaze vali nakulila.” (Loma 12:15) Gaby uze afwishile lunga lyenyi ambile ngwenyi: “Shimbu jimwe ngweji kulilanga mangana ngusolole vyuma vili mutulo yami. Shikaho, nge masepa jami navalila nayami, kaha ngweji kwivwanga kumuchima hwo. Echi cheji kungulingisanga ngwivwenga ngwami navakwetu vali nakwivwa ushona nguli nakwivwa.”

15. Vyuma muka twatela kulinga nge chinatukaluhwila kuvendejeka mutu meso nameso? (Talenu nawa lipwata lyakwamba ngwavo “ Mazu aKuvendejeka.”)

¹⁵ Nge cheji kumikaluhwilanga kuvendejeka mutu meso nameso, kaha munahase kumusonekela mukanda wakumuvendejeka chipwe kumutumina mujimbu hashinga. Munahase kumusonekela mazu akuvendejeka amuchisoneka, chipwe kuhanjika vyuma vyamwaza alingilenga uze nafu, chipwe vyuma vyeka vize mwalivwishilenga nenyi kuwaha. Junia ambile ngwenyi: “Nge mutu mwangusonekela mazu akunguvendejeka chipwe kungusanyika ngukashikame nenyi cheji kunguvendejekanga chikuma. Vyuma kana vyeji kungulingisanga ngumone ngwami vakwetu vanguzanga nakunguzakama.”

16. Jila muka yamwaza yakuvendejekelamo vakwetu?

 ¹⁶ Tachikizenu ngwenu kulombelangako vandumbwetu vaze vanafwisa nakulomba navo hamwe cheji kuvakafwanga chikuma. Oloze chinahase kupwa chachikalu kulomba navo halwola vanafwisa. Chipwe ngocho, kulomba chenu chakufuma kumuchima chinahase kuvavendejeka chikuma, numba tuhu namulomba oku muli nakushikwoka. Dalene ambile ngwenyi: “Shimbu jimwe nge vandumbwami vamapwevo vaneza nakunguvendejeka, ngweji kuvalwezanga valombe. Hakuputuka cheji kuvakaluhwilanga, oloze kutwala muze veji kutusukanga nakulomba jino kanawa chakufuma kumuchima. Zangi yavo, nalufwelelo lwavo, namuchima wavo wakeke, vyeji kujikijisanga lufwelelo lwami.”

17-19. Mwomwo ika twatela kutwalaho lika kuvendejekanga vaze vanafwisa?

¹⁷ Vatu vamwe vanahase kulishona halwola lwalusuku, veka nduma. Shikaho, kamwatela kutambukila vaze vanafwisa nakuvavendejeka halwola luze kunasoloka ukalu kahako, oloze nahamakumbi eka nawa nge vatu vosena vanalimwange lyehi. Mbimbiliya yamba ngwayo: “Sepa wamwenemwene eji kuzanganga sepa lyenyi shimbu yosena, kaha napu nge hindumbwenyi uze mwamukafwa mulwola lwavihuli.” (Vishi. 17:17) Vaka-Kulishitu vatela kuvendejekanga vakwavo palanga nomu ushona nauvakuma.—Tangenu Wavaka-Tesolonyika 1, 3:7.

¹⁸ Mwatela kutachikiza ngwenu vaze vanafwisa shimbu jimwe veji kwanukanga vausoko wavo vaze vafwa hakwivwilila kumyaso yize vembilenga, chipwe hakumona jifwato, namilimo vazachilenga, navyuma vyeka vyangana. Mutu uze nafwisa muka-mahyenyi cheji kumukaluhwilanga hakavanga kulinga vyuma uka wenyi vyakufwana nge, kuya kukukunguluka chachihanda nakuKwanuka Kufwa chaMwata. Ndumbwetu umwe walunga ambile ngwenyi: “Ngwashinganyekele ngwami kwanuka likumbi lyawenga wetu hanyima yakufwa chapuwami nachikangukaluhwila chikuma. Oloze omu likumbi kana lyahetele vandumbwami vamwe vanguwahishilile kachilika kakandende kuze ngwakapwile hamwe namasepa jami.”

¹⁹ Tachikizenu ngwenu vaze vanafwisa vasaka kuvavendejeka lwola lwosena keshi halwola lumwe lwakulipwila kahako. Junia ambile ngwenyi: “Kunguvendejeka hakala lwola cheji kungukafwanga chikuma kuhambakana kunguvendejeka kaha halwola lwakulipwila. Kungukafwa mujila kaneyi cheji kungunganyalisanga.” Chikupu vene, kukafwa mutu mujila kaneyi chinahase kumuvendejeka, numba tuhu katweshi kuhasa kukumisa chinyengo chenyi chosenako. (Yowa. 1, 3:18) Ndumbwetu Gaby ambile ngwenyi: “Ngweji kusakwililanga Yehova hakunguhana vakulwane vazangi vaze vejilenga nakunguvendejeka omu ngwapwile muukalu. Vanangukafwe ngumone omu anguzanga Yehova.”

20. Jishiko jaYehova jatuvendejeka ngachilihi?

²⁰ Ocho kuwaha kana hakutachikiza ngwetu Yehova Kalunga muka-kuvendejeka mwakafumisako kulishona haya myaka yosena omu “vosena vaze vali muvimbumbe navakevwa lizu [lyaKulishitu] nakulovokamo”! (Yowa. 5:28, 29) “Mwata Wakulitulaho Yehova mwakafumisako kufwa haya myaka yosena, mwakahunda masoji kumeso avatu vosena.” (Isa. 25:8, kwinyikila chamwishi) Shikaho halwola kana, muchishishisa chakulila “navaze vali nakulila,” natukawahilila “navaze vanawahilila.”—Loma 12:15.