1-3. (a) Uno Samu 147 vayisonekele halwola muka? (b) Vyuma muka natulinangula hakutanga Samu 147?

NGE mutu nazate kanawa mulimo vamuhananga, chipwe nasolola vilinga vyamwaza, kaha veji kumwalisanga kuvakwavo. Kachi nge vatu veji kuvalisanga, kutala kacheshi kupwa chakutamo kwalisa Yehova Kalunga havyuma eji kulingangako tahi? Twatela kumwalisa hangolo jenyi, jize asolola muvyuma atenga, chipwe hazangi yenyi yize atusolwela hakutuma Mwanenyi kupwa ndando yakusokola.

² Muka-kusoneka Samu 147 alishile Yehova. Kaha nawa akolezezele navakwavo valise Kalunga.—Tangenu Samu 147:1, 12.

³ Katwatachikiza owo asonekele eyi Samuko, oloze chasoloka nge mutu kana ayoyelele halwola Yehova asokwele vaIsalele muufunge muMbavilone nakuvakindulwisa kuYelusalema. (Samu 147:2) Kukindulwisa vatu jaKalunga kulifuchi lyavo nakulemesa Kalunga wamuchano pamo chikiko chalingishile ou muka-kusoneka eyi Samu alise Yehova. Oloze asonekele nawa vyuma vikwavo vize vyamulingishile alise Yehova. Vyuma muka vene evi? Kaha vyuma muka vyeji kumilingisanga  nayenu mulikuwe ngwenu “Haleluya” mukuyoya chenu?—Samu 147:1, kwinyikila chamwishi.

4. Uno vaIsalele vevwile ngachilihi omu mwangana Kuluse avafumishile muufunge, kaha mwomwo ika?

⁴ Achishinganyekenu omu vaIsalele vevwilenga hakutwama muufunge muMbavilone. Vaze vavakwachile ufunge vavalwezele ngwavo: “Twimbilenuko mwaso umwe wakuZeyone.” Yelusalema yapwile chihela chize chavalingishilenga vawahilile nakwalisa Yehova, oloze halwola kana vayinongesele. (Samu 137:1-3, 6) Ngocho vaYuleya kavasakile kwimbako. Mwomwo michima yavo yalyonyingilenga kaha vasakiwile kuvavendejeka. Chipwe ngocho, Kalunga ateselemo upolofweto wenyi kuhichila muli Kuluse mwangana wavaPeleja. Kuluse afungulwile Mbavilone nakulikuwa ngwenyi: “Yehova . . . nangulweze ngumutungile zuvo kuYelusalema . . . [Kaha] mutu himutu hali enu vatu jenyi, Yehova Kalunga kenyi apwenga naikiye, kaha ayenga kuYelusalema.” (Miji. 2, 36:23) Mazu kana atela evwishile kuwaha chikuma vaIsalele vaze vapwile muMbavilone.

5. Vyuma muka ahanjikile muka-kwimba jisamu hangolo jaYehova jakuhindula?

⁵ Yehova kavendejekele kaha vaIsalele mwalizavuko, oloze namutu himutu. Omu mukiko ali nakulinga namakumbi ano. Muka-kwimba jisamu asonekele hali Kalunga ngwenyi: “Eji kuhindulanga vaze vali nakulyonyinga mumichima. Eji kukasanga hajimbandu javo.” (Samu 147:3) Chapundu vene, Yehova eji kuzakamanga vaze vali nakumona ukalu numba upwa wakumujimba chipwe wamuvishinganyeka. Makumbi ano, Yehova eji kutuvendejekanga nakutuunjisa muvishinganyeka vyetu. (Samu 34:18; Isa. 57:15) Eji kutuhananga mangana nangolo tumike mukala ukalu natumona.—Yako. 1:5.

6. Tunahase kunganyala ngachilihi kumazu atwama hali Samu 147:4? (Talenu muvwimbimbi wakulivanga.)

⁶ Muka-kwimba jisamu ahanjikile nawa havyuma vyamwilu ngwenyi, Yehova “eji kulavanga vatanganyika” nakuvavuluka “vosena halijina halijina.” (Samu 147:4) Mwomwo ika alumwinyine chihande nakuputuka kuhanjika havyuma vyamwilu? Achishinganyekenu hachumechi: Muka-kwimba jisamu amwenenga vatanganyika nameso enyi, oloze katachikijile kuvula chavoko. Hakavanga vatu kavejivile ngwavo vatanganyika vapwa vavavuluko, oloze makumbi ano vanawane nge vatanganyika vapwa vavavulu chikuma. Vamwe vashinganyeka ngwavo mumulalaji umwe kaha mwatwama vatanganyika vavavulu chikuma. Oloze kwatwama milalaji yayivulu muutangatanga. Shikaho etu katwatachikiza kuvula chavatanganyikako. Oloze Tengi avaluka majina vosena. Echi chinakulumbununa nge tanganyika hitanganyika apwa wamulemu kuli Yehova. (Koli. 1, 15:41) Uno echi chalumbununa nge navatu avatachikiza tahi? Kalunga atachikiza oku atwama tanganyika hitanganyika, ngocho ejiva nawa mutu himutu. Eji kutachikizanga okwo ali, nomu ali nakwivwa navyuma ali nakusaka.

7, 8. (a) Omu Yehova eji kuyovolanga vatu jenyi muvyeseko, vyuma muka eji kutachikizanga? (b) Lumbununenu omu Yehova eji kukafwanga vatu vakuhona kukupuka.

⁷ Yehova amizanga kaha nawa akwechi ngolo jakumikafwa nge muli muukalu, mwomwo atwama nakeke. (Tangenu Samu 147:5.) Pamo munahase kushinganyeka ngwenu ukalu wenu unamitohwela. Oloze Kalunga atachikiza hakumina ngolo jenu ngwenyi ‘mwapwa lukungu kaha.’ (Samu 103:14) Hakuwana nge katwakupukako, ngocho tweji kulimbenjanga  havyuma vyovimwe mapapa kakavulu. Tweji kwivwanga kupihya nge tunalusuka nakuhanjika mazu amapi, chipwe nge chinakutukaluhwila kumbila tato yayipi chipwe muchima walwiso. Yehova keshi kulimbenjako, oloze eji kutwivwishisanga nge tunalimbenje.—Isa. 40:28.

⁸ Pamo Yehova amikafwaho lyehi muukalu mwapwile nawo. (Isa. 41:10, 13) Talenu chakutalilaho chaKyoko, ndumbwetu wapwevo uze apwa payiniya uze ahombele omu vamulwezele akazachile kuchihela cheka. Uno Yehova amukafwile ngachilihi? Kuze kungalila ayile akawanyine vatu vamichima yamwaza vaze vamukafwile chikuma. Ndumbwetu Kyoko evwile nge Yehova apwile nakumulweza ngwenyi: “Ngwakuzanga, mwomwo wapwa umwanami kaha walihana kuli ami. Ngunakusaka ulivwise kuwaha kuyoya hakupwa uChinjiho chami.” Uno Yehova nalisolola ngachilihi kuli yenu ngwenyi “kunangakana chenyi chajindama chikuma”?

9, 10. Yehova eji kutukafwanga chikuma muvyuma muka? Hanenu chakutalilaho.

⁹ Shimbu jimwe mweji kusakiwanga vyuma vyamukuyoya. Munahase kulizakamina ngwenu kamweshi navyakulya vyakutamoko. Oloze Yehova ikiye atengele vula yize yeji kusokesanga jimbuto, jize veji kulyanga navana vamakololo. (Tangenu Samu 147:8, 9.) Kachi nge Yehova eji kulisanga makololo, kahanyi mwatela kufwelela ngwenu mwamihana vyuma vyasakiwa mukuyoya chenu.—Samu 37:25.

¹⁰ Chuma chachilemu chikuma eji kutuhananga Yehova shina vyuma vyakushipilitu, vize vyeji kunehanga “kuunda chaKalunga chize chahambakana kunangakana chosena.” (Fwili. 4:6, 7) Achitalenu chakutalilaho chaMutsuo napuwenyi vaze vamwene ngolo jaYehova omu peho yanyamanganda yahuhwile muJapan mu 2011. Vayovokele hakunyina helu lyazuvo yavo. Oloze vatokesele vikumba vyavo vyosena. Ufuku wosena vapwile mukapete kazuvo yavo muze mwatuchile chikuma. Omu kwachele, vatondele vyuma vyakuvavendejeka kushipilitu. Vawanyineko kaha mukanda waYearbook of Jehovah’s Witnesses wamu 2006. Hahaze vene vatangile chihande chize chahanjikile hamundenda waunene chikuma uze wasolokele mu 2004 muSumatra. Mutsuo napuwenyi valilile hakutanga mujimbu kana. Vamwene ngwavo Kalunga avazakamine hakuvakolezeza kushipilitu halwola lwakutamo. Yehova nawa avahanyine vyuma vyakulikafwa navyo mukuyoya kuhichila muli vandumbwavo muchikungulwilo. Oloze chuma chachinene chavajikijishile chikuma shina, kuvatambukila kuli vandumbwetu vamwe vakwimanyinako liuka lyaYehova. Mutsuo ambile ngwenyi: “Ngwevwile ngwami Yehova apwile nayetu mutu himutu nakutuzakama. Chuma kana chatuvendejekele chikupu!” Kalunga eji kutukafwanga chikumanyi kushipilitu, oloze eji kutuhananga nawa vyuma vyasakiwa mukuyoya chetu.

11. Vyuma muka vatela kulinga vaze vafwila kunganyala kungolo jaKalunga jakuyovola?

¹¹ Yehova “eji kukatulanga vatu vavavwovu.” (Samu 147:6a) Uno tunahase kunganyala ngachilihi kumuchima wenyi wakufwila kutukafwa? Twatela kupwa nausepa wamwaza nayikiye. Ngocho twatela kufwila kupwa vakuvova numba tupwenga masepa jenyi. (Zefwa. 2:3) Vatu vavavwovu vatalilila kulutwe omu Kalunga mwakolola vyuma nakukumisa  ukalu wavo. Vatu kana Yehova eji kuvevwilanga kuwaha.

12, 13. (a) Twatela kulihenda kuvyuma muka hakusaka Kalunga atukafwe? (b) Vatu muka eji kwivwilanga kuwaha Yehova?

¹² Kalunga nawa “eji kumbilanga vaka-kuhuka hamavu.” (Samu 147:6b) Mazu kana akwivwisa woma. Shikaho nge tunakusaka tunganyale kuzangi yaKalunga nakulihenda kuutenu wenyi, twatela kuhunganga vyuma ahunga. (Samu 97:10) Chakutalilaho, twatela kuhunga ujila. Echi chasakiwa kulihenda kuvyuma vyosena vize vinahase kutuzondola tulinge ujila, vyakufwana nge kutala chipwe kutanga vyavatu vali uselesele. (Samu 119:37; Mateu 5:28) Chinahase kutukaluhwila kulihenda kuvyuma kana, oloze kutachikiza ngwetu Yehova mwatukisula nachitulingisa tuzate nangolo.

¹³ Twatela kupendamina hali Yehova atukafwe tufungulule ukalu kana. Kutala Kalunga mwevwa kuwaha nge natufwila kulikinga kuhichila ‘mungolo jakavalu’ kulumbununa kupendamina hali vatu vatukafwe tahi? Nduma. Kaha nawa katwatela kupendamina ‘hamahinji amutu angolo’ nakusolola nge tunahase kulilwila etu vavene chipwe kutulwila kuvatuko. (Samu 147:10) Oloze twatela kulembelela Yehova atukafwe. Yehova keshi kuzeya kwivwilila kukulomba chetuko numba tuhu natumulomba mapapa kakavulu. “Eji kwivwilanga kuwaha vaze vamwivwa woma, vaze veji kufwelelanga muzangi yenyi yakwilila.” (Samu 147:11) Ngocho twatela kufwelela ngwetu mwapwanga nayetu hamwe nakutukafwa tuhonese ukalu wetu, mwomwo atwama nazangi yakwilila.

14. Vyuma muka vyajikijishile muka-kwimba jisamu?

¹⁴ Yehova atufwelelesa ngwenyi mwatukafwanga nge tuli muukalu. Muka-kwimba jisamu ashinganyekele omu Yehova akafwile vaIsalele vakinduluke kuYelusalema, kaha embile ngwenyi: “Eji kulingisanga tupachiso twanganda yove tupwenga twakukola. Eji kukisulanga vana vove vali muli ove. Eji kunehanga kuunda mungalila yove.” (Samu 147:13, 14) Kutachikiza ngwenyi Kalunga mwazamisa vikolo vyanganda nakukinga vatu jenyi, chajikijishile muka-kwimba jisamu.

15-17. (a) Shimbu jimwe tweji kwivwanga ngachilihi nge tuli muukalu, kaha Yehova eji kuzachisanga ngachilihi Mazu enyi nakutukafwa? (b) Hanenu chakutalilaho chakusolola omu ‘mazu aKalunga eji kulahanga washiwashi.’

¹⁵ Shimbu jimwe munahase kupwa muukalu uze naumilingisa mulizakamine chikuma. Oloze Yehova mwamihana mangana akumikafwa mumike. Muka-kwimba jisamu ahanjikile ngwenyi, Kalunga “eji kuhananga mavu lushimbi. Mazu enyi eji kulahanga washiwashi.” Kaha nawa ahanjikile ngwenyi, Yehova ‘eji kufwikanga hamavu hosena nameya akulikonda, nakusanda meya akulikonda, nakuholola malolwa avula.’ Kufumaho ahulishile ngwenyi: “Iya nahase kumika kuchishika chenyi?” Ahanjikile nawa ngwenyi, Yehova “eji kutumanga mazu enyi, kaha malolwa avula hinawayengunuka.” (Samu 147:15-18) Shikaho Kalunga ketu wamangana kaha nawa wangolo, uze eji kutumanga vula yamalolwa nakukondesa meya, mwamikafwa mukala ukalu namuhitamo.

¹⁶ Makumbi ano Yehova eji kututwaminyinanga kuzachisa Mazu enyi Mbimbiliya. “Mazu enyi eji kulahanga washiwashi,” kulumbununa nge eji kutukafwanga halwola lwakutamo. Achishinganyekenu omu munanganyala hakutanga Mbimbiliya, namikanda yakuli “ndungo wakushishika wakuzangama,” nahakutala jivindiyo jaha JW Broadcasting, nahakuyanga hakeyala ya jw.org, nahakuhanjikanga natulama muchikungulwilo nahakulikata  navandumbwenu. (Mateu 24:45) Chikupu vene munamono ngwenu Yehova ali nakutukafwa washiwashi.

¹⁷ Simone namono ngolo jaMazu aKalunga mukuyoya chenyi. Alimwenenga kupwa wamavokovoko nakushinganyeka ngwenyi Kalunga keshi kumwivwila kuwahako. Chipwe ngocho, alombelenga shimbu yosena kuli Yehova mangana amukafwe halwola ahombele. Kaha nawa atwalileho kupwanga nachilongesa chaMbimbiliya chahauka. Simone ambile ngwenyi, “Yehova nangujikijisanga nakungutwaminyina lwola lwosena.” Echi chinamukafwe amonenga vyuma mujila yamwaza.

18. Mwomwo ika namwambila ngwenu Kalunga amivwila kuwaha, kaha vyuma muka vyamilingisa mulikuwe ngwenu “Mwalisenunga Ya”?

¹⁸ Muka-kwimba jisamu atachikijile ngwenyi Kalunga asakwile vaIsalele kupwa vatu jenyi. Vakiko kaha ahanyine “mazu enyi” ‘najindongi jenyi namazu enyi akuyula.’ (Tangenu Samu 147:19, 20.) Makumbi ano, yetu kaha twatokwa kutuvulukila halijina lyaKalunga. Kutachikiza Yehova nakukavangiza Mazu enyi mukuyoya chetu chatukafwa tupwenga nausoko wamwaza nayikiye. Ngana mwamuka-kusoneka Samu 147, kutala nayenu muli navyuma vyakumilingisa mulikuwe ngwenu “Mwalisenunga Ya,” nakukafwako veka valingenga mwomumwe tahi?