1, 2. Mwomwo ika vihutu navapwilangako lika mukaye kano?

MAKUMBI ano chiyoyelo chinakaluhwa. Vakweze vanakuchiwana kupwa chachikalu kuwana milimo. Ngocho vavavulu vanakuhaka kuyoya chavo muponde hakuya kumafuchi eka nakutonda mwakuyoyela. Uhutu unalisale chikuma namumafuchi muze mwatwama jimbongo naluheto. Kaha vatu vakuhutwa vali nakuhutwilako lika, vapichi nawa vali nakupichilako lika. Kweseka nakuhehwojola chakalinwaha, chinakusoloka nge luheto lwavapichi vavandende kaha luneseka hamwe nalwavatu vosena mukaye. Numba tuhu katweshi kwijiva kuvula chavatu vanakuyandako, oloze tuvosena twatachikiza ngwetu vatu vavavulu vali muuhutu, kaha veka vali naluheto lwaluvulu luze vanahase kukazachisa vana navazukulu javo. Yesu ahanjikile hachuma kana ngwenyi: “Enu namupwanga navaka-kuhutwa shimbu yosena.” (Mako 14:7) Mwomwo ika vaka-kuhutwa vanavulila chikuma kuhambakana vapichi?

² Yesu atachikijile ngwenyi uhutu nautwalangaho lika swi nomu naukeza Wangana waKalunga. Vaka-mapolitiki, nakwitava chamakuli, navaka-kufwila luheto chipwe “vaka-kusekasana” vaze vavuluka hali Kusoloka 18:3, vosena vemanyinako kaye kaSatana. Numba tuhu vatu jaKalunga valihenda kuvihande vyamapolitiki nakukwitava chamakuli, oloze vavavulu kavalihenda kukusekasana chize chatwama muno mukaye kaSatanako.

3. Vihula muka natushimutwila?

 ³ Etu vaka-Kulishitu twatela kulikekesanga tumone omu twamwenamo kusekasana chamukaye kano hakulihulisa vihula vino: ‘Nanguzachisa ngachilihi luheto lwami ngusolole ngwami ngwashishika kuli Kalunga? Nangukehesako ngachilihi kwazana mukusekasana chamuno mukaye? Vyakutalilaho muka vyasolola nge vaka-Kulishitu vamuchano vapendamina hali Kalunga namuchima wosena mukaye kano kakapi?’

4, 5. (a) Uno kaselwa wamuchifwanyisa chaYesu apwile muukalu muka? (b) Yesu alwezele vaka-kumukavangiza kulinga ika?

⁴ Tangenu Luka 16:1-9. Chifwanyisa chakaselwa wakuhona kwoloka chize ahanjikile Yesu chapwa chachilemu. Omu vamukeshalile ngwavo ali nakwenyeka vikumba, “alingile vyuma vyamangana” mangana ‘akwate masepa’ vaze navakamukafwa omu nayikakuma milimo yenyi. * Hano Yesu kapwile nakulweza tumbaji twenyi vawanenga vyuma vyakulikafwa navyo mukaye kano mujila yayipiko. Avulukile vaka-kulinga vilinga kana ngwenyi “vana vamukatwamino kamyaka yino,” oloze chifwanyisa ahanjikile chatunangula chishina chachilemu.

⁵ Yesu atachikijile ngwenyi ngana mwauze kaselwa apwile muukalu, navaka-kumukavangiza vavavulu navakasakiwa kuwana mwakuyoyela mukaye kano kakapi. Shikaho avalwezele ngwenyi: “Kwatenu masepa kuzachisa luheto lwakuzeneka kwoloka, mangana omu nalukakuma, [Yehova naYesu] vakahase kumitambula mumautwamo ahaya myaka yosena.” Vyuma muka natulinangula kumazu aYesu?

6. Twatachikiza ngachilihi ngwetu Kalunga kajinyine ngwenyi vatu vafwilenga luhetoko?

⁶ Yesu kalumbunwine ovyo avulukilile luheto ngwenyi ‘lwakuzeneka kwolokako.’ Chipwe ngocho, Mbimbiliya yasolola hatoma nge Kalunga kajinyine ngwenyi vatu vafwilenga luhetoko. Yehova ahanyine Alama naEve vyuma vyosena vasakiwile omu vapwile muEtene. (Kupu. 2:15, 16) Mukuhita chalwola, omu vaka-Kulishitu vawavisa vavatwaminyinyine nashipilitu yajila mulikulukaji lyamyaka lyakulivanga, “kakwapwile mutu umwe amwene chuma chimwe chakuvikumba vyenyi ngwenyi chenyiko, oloze vazanyinenga vyuma vyavo vyosena.” (Vili. 4:32) Kapolofweto Isaya nawa ahanjikile havyuma navikasoloka halwola vatu vosena navakapwa navyuma vyakulisala. (Isa. 25:6-9; 65:21, 22) Oloze mumyaka yino vaka-kukavangiza Yesu vatela kulinga ‘vyuma mumangana’ numba vawane vyakulikafwa navyo kuzachisa “luheto lwakuzeneka kwoloka” lwamukaye kano, oku nawa vali nakuzachila Kalunga nakumwivwisa kuwaha.

7. Mazu muka akutuhuhumuna atwama hali Luka 16:10-13?

⁷ Tangenu Luka 16:10-13. Kaselwa avulukile Yesu atungile masepa mangana akanganyalileho. Oloze Yesu kalwezele vaka-kumukavangiza vatunge masepa mwilu mwomwo yakusaka kunganyalilahoko. Jivesi jakavangizaho jasolola nge tunahase kuzachisa “luheto lwakuzeneka kwoloka” hakusaka kusolola kushishika kuli Kalunga. Yesu ahanjikile ngwenyi jila natuzachishilamo luheto twatwama nalwo nayisolola nge twapwa “vakushishika” chipwe nduma. Mujila muka?

8, 9. Hanenu chakutalilaho chavatu vaze vanakuzachisa kanawa luheto lwavo lwakuzeneka kwoloka.

⁸ Jila yamwaza yakuzachishilamo luheto lwetu shina kukundwizako kumulimo wakwambulula wamukaye kosena uze avulukile Yesu ngwenyi  naukapwako. (Mateu 24:14) Kulinga ngocho nachitusolola kupwa tuvakushishika. Kanyike umwe wapwevo muIndia apwile nakachikasha muze ahakilenga tujimbongo twachichele muchishishisa chakulanda vyuma vasaka kuhemesa vanyike. Omu chize chikasha chazalile, ahanyine jize jimbongo kuchikungulwilo mangana vajizachise kumulimo wakwambulula. Ndumbwetu umwe walunga muIndia atwama nawande wavyelu. Hakuwana nge vandumbwetu haofesi yakwalumwina mikanda mulilimi lyaMalayalam veji kulandanga vyelu, ngocho eji kuvatwalilanga vyelu vyavivulu hakutachikiza ngwenyi echi nachivakafwa chikuma kuhambakana kuvahana jimbongo. Kulinga ngocho chapwa kulinga vyuma mwamangana. Vandumbwetu muGreece nawa veji kukundwizanga maji amilive, nakeju navyakulya vyeka kuMbetele yamulifuchi lyavo.

⁹ Ndumbwetu walunga wakuSri Lanka uze jino atwama kulifuchi lyeka asuula limbo lyenyi mangana valizachise kupwa chihela chakukungulukila chachikungulwilo, nachachihanda kaha nawa hakiko veji kutwamanga vandumbwetu vazata mulimo washimbu yosena. Ou ndumbwetu alisuula kuhana limbo lize atelanga kuwanyinaho jimbongo, oloze hikutokwa chachinene kuli vandumbwenyi vaze kavatwama najimbongo jajivuluko. Mumafuchi muze vakanyisa mulimo wetu, vandumbwetu veji kusuulanga jizuvo javo vajizachise kupwa jiZuvo jaWangana. Echi cheji kukafwanga vapayiniya navandumbwetu veka vaze kavatwama najimbongo jajivuluko vawane kwakukungulukila chakuhona kufweta.

10. Nganyo muka tweji kuwananga nge natulisuula kuhana luheto lwetu?

¹⁰ Vyakutalilaho tunashimutwila vinasolola nge vatu jaKalunga vapwa vakushishika “muvyuma vyavindende,” kweseka najila veji kuzachishilangamo luheto lwavo luze kalwalema ngana mwaluheto lwakushipilituko. (Luka 16:10) Uno ava masepa jaYehova veji kwivwanga ngachilihi hakulisuulula kuhana luheto lwavo? Vatachikiza ngwavo muchima wakuhana weji kukafwanga mutu awane “luheto lwamuchano.” (Luka 16:11) Ndumbwetu wapwevo uze eji kukundwizanga chikuma kumulimo waWangana ambile ngwenyi: “Kulisuula kuhana luheto lwami chinangukafwe ngupwenga navilinga vyamwaza. Ngunachiwane nge, omu ngunakulisuula kuhana luheto lwami chinakungukafwa nawa ngusolwelenga vakwetu vilinga vyamwaza. Makumbi ano ngweji kukonekelanga vakwetu nakuvatalilila chikoki, kaha nawa ngweji kwitavilanga nge vatu navanguhuhumuna.” Vatu vavavulu vanachiwane nge kuhanako vakwavo cheji kuvakafwanga vafukile kushipilitu.—Samu 112:5; Vishi. 22:9.

11. (a) Uno kulisuula kuhana chasolola ngachilihi “mangana”? (b) Vyuma muka vinakukafwa vatu jaYehova mangana vateseke hamwe? (Talenu muvwimbimbi wakulivanga.)

¹¹ Kuzachisa luheto lwetu mangana tutandakanyise milimo yaWangana chapwa nawa hikulinga ‘vyuma mwamangana’ mujila yeka. Echi cheji kutulingisanga tukafwe vakwetu. Kuli vandumbwetu vamwe vaze vatwama naluheto, oloze kavahasa kuzata mulimo washimbu yosena chipwe kuya nakuzachila kumafuchi ekako. Chipwe ngocho, veji kusuulukanga hakutachikiza ngwavo jimbongo veji kukundwizanga jeji kukafwanga vandumbwavo vaze vazata mulimo kana. (Vishi. 19:17) Mawana tweji kuhananga eji kukafwanga mulimo wakutunga mikanda nakukundwiza  mulimo wakwambulula mumafuchi muze vatu vazanga vyuma vyakushipilitu oloze kavatwama najimbongo jajivuluko. Chakutalilaho, hamyaka yayivulu mumafuchi akufwana nge Congo, naMadagascar, naRwanda, vandumbwetu valisuwilenga kulanda jiMbimbiliya jize japwilenga jandando yayinene chikuma, muchishishisa chakulanda vyakulya. Shikaho, liuka lyaYehova lyeji kuzachisanga mawana veji kuhananga vandumbwetu kumulimo wakwalumuna jiMbimbiliya. Echi chinakafwe vaka-kwambulula vosena vapwenga najiMbimbiliya hamwe kaha navilongesa vyavo, mangana ‘vosena vateseke hamwe.’ (Tangenu Wavaka-Kolinde 2, 8:13-15.) Ngocho, vaze veji kuhananga navaze veji kutambulanga, vosena navapwa masepa jaYehova.

12. Apalahama asolwele ngachilihi lufwelelo muli Kalunga?

¹² Nge natutonda “luheto lwamuchano” nakuhona kundupukila mukusekasana, kaha natupwa masepa jaYehova. Omu mukiko chapwile nakuli Apalahama lunga walufwelelo. Alisuwile kuseza nganda yauhando yaUle nakuya nakutwama mujimbalaka hakusaka kutunga usepa naYehova. (Hepe. 11:8-10) Kafwililile luheto lwamukayeko mwomwo afwelelele ngwenyi Kalunga ikiye Muka-kuhana luheto lwamuchano. (Kupu. 14:22, 23) Yesu alwezele mukweze umwe waluheto alondezeze lufwelelo kanelu hakumulweza ngwenyi: “Kachi nge uli nakusaka kupwa uwakukupuka, yako ukalanjise vyuma vyove nakuhana jimbongo kuli vaka-kuhutwa, kaha naukapwa naluheto mwilu. Kufumaho twaya upwenga umuka-kungukavangiza.” (Mateu 19:21) Uze lunga kapwile nalufwelelo ngana luze apwile nalwo Apalahamako, oloze kuli vatu veka vanasololanga lufwelelo lwakukola muli Kalunga.

13. (a) Paulu alwezele Chimoteu mazu muka? (b) Natuhasa kukavangiza ngachilihi mazu aPaulu makumbi ano?

¹³ Chimoteu apwile nalufwelelo. Paulu avulukile Chimoteu ngwenyi “liswalale wamwenemwene waKulishitu Yesu.” Kaha amulwezele ngwenyi: “Kakweshi mutu ali nakuzata mulimo wauswalale mwalingisa mumilimo yakusekasanako. Keshi kulinga ngochoko mangana evwise kuwaha uze amusonekesele uswalale.” (Chimo. 2, 2:3, 4) Vaka-kukavangiza Yesu makumbi ano veji kukilikitanga kweseka noho hakumina ngolo javo mangana vakavangize mazu aPaulu. Havatu kana hatwama navaka-kwambulula vaze vazata mulimo washimbu yosena vakuhambakana hamiliyoni yimwe. Veji kukilikitanga mangana vahonese muchima wakufwila luheto hakwanuka mazu akwamba ngwavo: ‘Ou mwalevana napu ndungo kuli ou mwamulevanyisa.’ (Vishi. 22:7) Satana asaka tuzachise lwola lwetu lwosena nangolo jetu tufwile luheto lwamuno mukaye. Vyuma vimwe tweji kusakulanga vinahase kutwingisa mumikuli. Chakutalilaho, vatu veji kutambulanga jiloni mangana vatunge jizuvo, nakufweta kumashikola, nakulanda jiminyau, nakulinga vifupawenga vyakukomwesa. Echi cheji kuvasezanga mumikuli yayinene. Oloze etu tweji kusololanga mangana hakwashiwisa chiyoyelo chetu nakuhona kwingila mumikuli nakukehesako vyakulandalanda. Kulinga ngocho cheji kutukafwanga tuzachile Kalunga mukulihehwa.—Chimo. 1, 6:10.

14. Muchima muka twatela kupwa nawo? Hanenu chakutalilaho.

¹⁴ Kwashiwisa chiyoyelo chetu chasakiwa kulitomena vyakulinga. Valunga napwevo vamwe vapwile nakapani yayinene. Oloze kuzanga chikuma mulimo washimbu yosena chavalingishile valanjise kapani yavo, nalonji navikumba vyeka mangana vazate cheka mulimo kana. Kaha valisuuwile kuzata mulimo wakutunga chikota chetu kuWarwick muNew York. Vapwile nakutokwa chakuzachila haMbetele hamwe namwanavo nalunga lyenyi. Kaha havyalumingo vimwe ou ndumbwetu napwevo lyenyi vazachilenga hamwe navisemi jenyi muWarwick mumulimo wakutunga chikota chetu. Ndumbwetu wapwevo uze apwa payiniya muColorado, U.S.A., awanyine milimo  kunyambaulu, yize azachilenga kaha hamakumbi amandende muchalumingo. Vakulwane vamilimo vasuulukile najila azachililengamo, ngocho vamulwezele jino azatenga hamakumbi amavulu mangana vamuhakileko jimbongo. Oloze akanyine hakutachikiza ngwenyi milimo kana nayimulila lwola lwakuzata muwande. Evi hivyakutalilaho vyavindende kaha vyakusolola omu vali nakulisuula vangamba jaYehova. Kupwa namuchima kanou wakufwila kuhaka milimo yaWangana kulutwe nachisolola nge twamona usepa wetu naKalunga naluheto lwakushipilitu kupwa vyavilemu kuhambakana luheto lwamuno mukaye.

15. Luheto muka lweji kusuulwisanga chikuma?

¹⁵ Nge mutu ali naluheto kachalumbununa chikupu ngwavo Kalunga namukisulako. Oloze Yehova eji kukisulanga vaze vatwama “navilinga vyamwenemwene vyavivulu.” (Tangenu WaChimoteu 1, 6:17-19.) Chakutalilaho, mu 1993 Lucia * afumine muItaly nakuya kuAlbania kuze kwapwile nakusakiwa vaka-kwambulula. Kapwile navyuma vyakulikafwa navyoko, oloze afwelelele kaha muli Yehova. Alinangwile lilimi lyakuAlbania, kaha nakafwe vatu vakuzomboka 60 valihane kuli Kalunga. Numba tuhu etu vangamba jaKalunga vavavulu katweshi kwambulwila mujingalila muze vatu veji kwitavilanga muchano lwola lwosenako, oloze twatela kutachikiza ngwetu kukilikita chetu hakukafwa vatu vatachikize muchano hichuma chamwaza chize twatela kumona kupwa chachilemu.—Mateu 6:20.

16. (a) Vyuma muka navikasoloka kukusekasana chamuno mukaye? (b) Twatela kumona ngachilihi luheto, hakuwana nge twatachikiza vyuma navikasoloka kulutwe?

¹⁶ Hali Luka 16:9 Yesu ambile ngwenyi: “Omu nalukakuma [luheto lwakuzeneka kwoloka],” kambile ngwenyi ‘nge nalukakumako.’ Makumbi ano jinyambaulu jili nakuholoka kaha jimbongo jinakaluhwa kujiwana, oloze ukalu kana naukatohwelako chikuma kulutwe. Chikupu vene, kaye kaSatana muze mwatwama vilinga vyamapolitiki, nakwitava chamakuli nakusekasana nakakakuma. Kapolofweto Ezekele naZefwanyiya vahanjikile chimweza ngwavo ulu napalata, vyuma vize vanazachisanga vaka-kusekasana hamyaka yayivulu kavyeshi kukapwa nanganyoko. (Ezeke. 7:19; Zefwa. 1:18) Namwivwa ngachilihi nge munakilikitanga nangolo jenu josena mukuyoya chenu nakutondatonda luheto lwamuchano, kaha namuwana jino nge luheto kana “lwakuzeneka kwoloka”? Tunafwelela namwivwa nge muze nahase kwivwa mutu uze nazatenga nangolo josena mukuyoya chenyi mangana awane jimbongo jajivulu, oloze jino mwawana nge jimbongo nakilikichilanga jamalengeso kaha. (Vishi. 18:11) Eyo luheto kana nalukakuma chikupu, shikaho luzachisenu hakutunga usepa naYehova naYesu. Kala vyuma natulinga mangana tutandakanyise Wangana waYehova vyeji kutuhetesanga luheto kushipilitu.

17, 18. Vyuma muka navakalivwisa kuwaha vaze vatunga usepa naKalunga?

¹⁷ Omu Wangana waKalunga naukaputuka kuyula hano hamavu, kakweshi kukapwa jizuvo jakufwetela, najiloniko, kaha vyakulya nawa navikalisala. Kakweshi kukapwa nawa vipatelako. Masepa jaYehova navakalivwisa kuwaha vyuma vyamwaza hano hamavu. Ulu napalata navikalisala, kaha kaveshi kukavilanjisako. Vyuma vyakutungisa jizuvo navikalisala. Vakwetu navakatukafwanga chawana kaha, keshi mangana tuvafweteko. Mukaye kakahya natukalilanga hamwe vyakulya vyosena navikasoka hamavu.

¹⁸ Elu hiluheto navakapwa nalwo vaze vatunga usepa naYehova naYesu. Vangamba jaYehova hamavu navakawahilila chikuma hakwivwa mazu aYesu akwamba ngwenyi: “Twayenu, enu vanakisula kuli Tata, swanenu Wangana vamiwahishila kufuma kukwala chihela chakaye.”—Mateu 25:34.