Ivwilenunga “Vatu Vosena” Keke
OMU Yesu apwile nakunangula tumbaji twenyi mwakwambulwila mujimbu wamwaza, avalwezele nawa ngwenyi shimbu jimwe vatu navakananga kwivwilila mujimbu waWangana. (Luka 10:3, 5, 6) Omu mukiko chili namakumbi ano. Nge tuli muwande tweji kuwananga vatu vavakalu michima vaze nawa vatwama nahanjikiso yayipi. Chikupu vene, vyuma kana vinahase kutufutwisa kumuchima nakuhona kwivwila keke vatu vaze tweji kwambulilanga.
Mutu uze atwama namuchima wakeke eji kutachikizanga ukalu veji kuhitangamo vakwavo nakufwila kuvakafwa. Shikaho nge katweshi kwivwilanga keke vatu vaze tweji kwambulilangako, kaha twima yetu yakwambulula yinahase kuzeya. Kwivwilanga vakwetu keke, chinafwane kwijiva nge tuli nakusambiza hajiko mangana hakwate milangi. Chochimwe nawa kupwa namuchima kana nachitukafwa tupwenga natwima hakwambulula.—Teso. 1, 5:19.
Uno natuhasa kupwa ngachilihi namuchima wakeke numba tuhu chapwa chachikalu kulinga ngocho? Tuchitalenu omu tunahase kulondezeza Yehova, naYesu naPaulu hamuchima wavo wakeke.
LONDEZEZENUNGA YEHOVA HAKWIVWILA VATU KEKE
Hamyaka yayivulu vatu vanasaulanga chikuma lijina lyaYehova. Oloze ikiye eji “kusolwelanga likoji vaka-kuhona kusakwilila navaka-kuhuka.” (Luka 6:35) Likoji kana eji kulisololanga hakutalilila vatu chikoki. Yehova ajina ngwenyi “vatu vosena vavalwile.” (Chimo. 1, 2:3, 4) Numba tuhu Kalunga ahunga vilinga vyakuhuka, oloze amona vatu kupwa vavalemu, kaha kasaka mutu numba umwe akanongeko. —Petu. 2, 3:9.
Yehova atachikiza ngwenyi Satana nelavisa vishinganyeka vyavatu vaze kavetavako. (Koli. 2, 4:3, 4) Vatu vavavulu veji kukananga kwitavila muchano mwomwo yakuvanangula vyuma vyamakuli kufuma vene kuukemba wavo. Ngocho Yehova afwila kukafwa vatu kana. Mujila muka?
Chakutalilaho achishinganyekenu omu Yehova evwile havilinga vyapwile munganda yaNyineve. Numba tuhu mwapwile vilinga vyavipi oloze ahulishile Yona ngwenyi: “Kahami nguzeneke kwivwila keke nganda yayinene yaNyineve yize yili navatu vakuhambakana 120,000 vaze kavatachikiza kuhandununa vyuma vyamwaza navyevi vyavipiko nyi?” (Yona 4:11) Yehova amwene ngwenyi vaka-Nyineve kavatachikijile Kalungako ngocho atumine Yona mangana ayenga nakuvambulila mujimbu wakuvahuhumuna.
Nayetu twamona vatu kupwa vavalemu nganomu avamona Yehova. Shikaho tweji kumulondezezanga hakukilikita nangolo mangana tukafwe vatu vaze tuli nakwambulila, numba tuhu hakavanga navakana kuvambulila.
LONDEZEZENUNGA YESU HAKWIVWILA VATU KEKE
Yesu nawa evwililenga vatu keke ngana mwaIse. Mbimbiliya yamba ngwayo: “Omu amwene mayongomena avatu, avevwilile keke, mwomwo vayanjile nakulimwanga nge mikoko vakuzeneka kafunga.” (Mateu 9:36) Yesu atachikijile kanawa ukalu vapwile nakuhitamo, mwomwo vatwamina javo vamukwitava vavayanjishilenga nakuvanangula vyuma vyamakuli. Numba tuhu Yesu atachikijile ngwenyi vatu vavavulu kaveshi kumwivwililako oloze atwalileho lika “kuvanangula vyuma vyavivulu.”—Mako 4:1-9.
Kamwatela kwivwanga kupihyako nge mutu munawane halwola lwatete mwakana kumivwilila
Vyuma vyeji kwalumukanga mukuyoya, shikaho navatu vaze kavazanga kuvambulilako vanahase kwalumuna muchima
Kachi nge vatu navakana kwivwilila kumujimbu wamwaza natuvambulila, kaha twatela kufwila kutachikiza kanawa ovyo vanakanyina. Vatu vamwe veji kukananga vyuma yahanjika Mbimbiliya mwomwo yavilinga vyavipi vyavatu vamwe vaze valivuluka kupwa vaka-Kulishitu. Veka nawa pamo mwomwo yakuvanangula vyuma vyamakuli hali Vinjiho. Vakwavo nawa veji kukananga mwomwo yakuvafumbukila kuli vakwavo muchitungilo chipwe kuli vaka-tanga yavo.
Vatu vamwe veji kukananga kwivwilila kumujimbu tweji kuvambulilanga mwomwo yaukalu uze weji kuvahombesanga. Kamishonali umwe walijina lyaKim ambile ngwenyi: “Mungalila yimwe tweji kwambulilanga, vatu vavavulu vanajimbalisa vikumba vyavo mwomwo yajijita. Echi chinavalingisa vahone kupwa nalutalililo lwavyuma navikasoloka kulutwe. Kaha nawa chinavahombesa nakuhona kufwelela kala mutu. Kakavulu mungalila kana tweji kuwananga vatu vaze veji kukananga mujimbu wetu. Ngunakwanuka likumbi limwe vangulukukile omu ngwapwile mumulimo wamuwande.”
Vyuma muka vyakafwile Kim atwaleho lika kupwa namuchima wakeke chamokomoko naukalu ahichilemo? Ambile ngwenyi: “Kakavulu nge vanangwivwisa kupihya, ngweji kushinganyekanga hamazu ahali Vishimo 19:11 akwamba ngwawo: ‘Kunangakana chamutu cheji kuunjisanga matoto enyi.’ Kushinganyeka haukalu veji kumonanga vatu vamungalila tweji kwambulilanga cheji kungukafwanga nguvevwile keke. Mungalila kana tweji kuwanangamo navatu vamwaza michima, kahechi cheji kutukafwanga tuhase kukindulukilako.”
Shikaho twatela kulihulisa ngwetu, ‘Kachi nge yami vapwanga nakwambulila mujimbu waWangana, kutala kachi ngunawitavila tahi?’ Chakutalilaho, natulinga ngachilihi nge tunevu vyuma vyamakuli hali Vinjiho jaYehova? Halwola lwangana nayetu tunahase kukana kutwambulila nakusakiwa jino kutwivwila keke. Kushinganyekanga hamazu aYesu akwamba ngwavo vyosena namusaka vakwenu vamilingile nayenu nawa valingilenuvyo, nachitukafwa twivwile vakwetu keke numba tuhu chapwa chachikalu kulinga ngocho.—Mateu 7:12.
LONDEZEZENUNGA PAULU HAKWIVWILA VATU KEKE
Kaposetolo Paulu evwililile keke navatu vaze vamuyanjishilenga. Mwomwo ika? Mwomwo naikiye mukiko apwilenga hakavanga. Ambile ngwenyi: “Kunyima ngwapwilenga ngumuka-kusaula, ngumuka-kuyanjisa, ngumuka-kasautu. Chipwe ngocho, vangutetelele mwomwo ngwavilingilenga chakuhona kutachikiza, chakuhona lufwelelo.” (Chimo. 1, 1:13) Paulu atachikijile ngwenyi Yehova naYesu vamwivwililile keke. Ngocho evwishishilenga vatu vaze vasakilenga kumuhonesa kwambulula mwomwo mukiko apwile naikiye hakavanga.
Shimbu jimwe Paulu ambulililenga vatu vaze vafwelelelenga vyuma vyamakuli. Uno evwilenga ngachilihi? Mukanda waVilinga 17:16 wamba ngwawo omu Paulu apwile muAtene “afutukile mushipilitu yenyi hakumona nganda kana yinazale namakombelo.” Chipwe ngocho, Paulu avambulilile hakuvangila kuhanjika hamakombelo aze valemeselenga. (Vili. 17:22, 23) Ambulililenga vatu vakumiyachi yakulisezaseza mangana ‘numba chipwa tuhu ngachilihi, ahase kulwilako vamwe.’—Koli. 1, 9:20-23.
Nayetu tunahase kulondezeza Paulu hakutachikiza vyuma vyamakuli vize vafwelela vatu nakufwila kuvambulila “mujimbu wamwaza wavyuma vyamwenemwene” mujila yakuzangama. (Isa. 52:7) Ndumbwetu Dorothy ambile ngwenyi: “Vatu vavavulu mungalila yetu veji kuvanangulanga ngwavo Kalunga apwa wamukalu muchima, kaha asaka kuwanyina vatu milonga. Ngweji kuvangilanga kusangejeka vatu kana hakufwelela ngwavo Kalunga kwatwama. Kufumaho ngweji kuvalwezanga jino vilinga vyamwaza vyaYehova navyuma atushika kukatulingila kulutwe.”
“FUNGULULENUNGA UPI HAKULINGANGA MWAMWAZA”
Omu tuli nakupandama kusongo ‘yamakumbi akukuminyina,’ twatela kutachikiza ngwetu vatu “navayanga nakupihilako lika.” (Chimo. 2, 3:1, 13) Oloze vilinga vyavipi vyavatu kana kavyatela kutuhonesa kuvevwila keke chipwe kuzachila Kalunga nakuwahililako. Yehova nahase kutuhana ngolo mangana tutwaleho kufungululanga “upi hakulinganga mwamwaza.” (Loma 12:21) Jessica uze apwa payiniya ambile ngwenyi: “Kakavulu ngweji kuwananga vatu vaze kavapwa vakulinyisako kaha nawa veji kutumonanga ulumbi nakumona mujimbu tweji kwambululanga kupwa wamokomoko. Echi chinahase kwivwisa mutu kupihya kumuchima. Shikaho nge ngunaputuka kushimutwila namutu, ngweji kulombanga kuli Yehova mangana angukafwe ngumone mutu kana nganomu amumona ikiye. Echi cheji kungukafwanga nguhone kukwata matoto nakufwila jino kumukafwa.”
Tweji kutondatondanga vaze vasaka kukayoya haya myaka yosena
Kupwa namuchima wakutalilila chikoki, chinahase kukafwa vatu vetavile kuvakafwa kushipilitu
Twatela nawa kutachikiza kanawa mwakukolezezela vandumbwetu. Jessica ambile ngwenyi: “Nge nguli nakuzata nandumbwami uze vanevwisa kupihya kumuchima, kaha kangwasaka kushimutwila hachihande kanako. Oloze ngweji kuputukanga kuhanjika havyuma vyamwaza tweji kulivwisanga kuwaha muwande numba tuhu vatu navatufutwisanga kumuchima.”
Yehova atachikiza kanawa ukalu tweji kumonanga hakuzata mulimo wakwambulula. Ngocho eji kwivwanga kuwaha hakutumona tuli nakulondezeza muchima wenyi wakeke. (Luka 6:36) Twatela kutachikiza nawa ngwetu Yehova keshi kwivwilanga lika vatu keke nakuvatalililanga chikoki haya myakako. Oloze atachikiza lwola lwakutamo luze mwakafumisako katwamino kamyaka yino. Twatela kutwalaho kuzata mulimo wakwambulula mukapachapacha. (Chimo. 2, 4:2) Shikaho tutwalenuho lika kuzata natwima mulimo vatuhana nakwivwila “vatu vosena” keke.
