1, 2. (a) Mwomwo ika chapwila chachilemu kupwa kusali yaYehova? (b) Vyuma muka natushimutwila muchihande chino?

YEHOVA apwa Kalunga wangolo, nakeke, namangana kaha nawa wazangi. Shikaho chapwa chakutamo kulinjilila kuli ikiye. Kutala katwasaka kupwa kusali yaYehovako tahi? (Samu 96:4-6) Chaluvinda, vaka-kulemesa Kalunga vamwe vahonenenga kufungulula vyeseko, kahechi chavalingishile jino vahone kupwa kusali yaYehova.

² Muchihande chino, natushimutwila vyakutalilaho vyavatu vaze vashinganyekele ngwavo vapwile kusali yaYehova okunyi vapwile navilinga vize vyamwivwishilenga kupihya kumuchima. Muvyakutalilaho kana mwatwama vishina vyavilemu vize navitukafwa tutwaleho kupwa vakushishika kuli Yehova.

3. Mwomwo ika Yehova ahuhumwinyine Kena, kaha mazu muka ahanjikile?

³ Tuchishimutwilenu chakutalilaho chaKena. Kena kalemeselenga Kalunga wekako shina Yehova kaha. Chipwe ngocho, Kalunga kamwivwililile uselewako mwomwo apwile navishinganyeka vyavipi mumuchima wenyi. (Yowa. 1, 3:12) Yehova ahuhumwine Kena  ngwenyi: “Kachi nge naulinga mwamwaza, uno kaveshi kukwivwila uselewako numba? Oloze nge kaweshi kulinga mwamwazako, shili yili nakukuvembelela kuchikolo, kaha yili nakufwila kukufungulula. Kutala muhasa kuyihonesa tahi?” (Kupu. 4:6, 7) Chili kwijiva nge Yehova apwile nakuhanjika ngwenyi: “Kachi nge naupihilila nakwalumuka nakupwa kusali yami, kaha nayami nangupwa kusali yove.”

4. Uno Kena etavililile vyuma amuhuhumwine Yehova tahi?

⁴ Nge Kena alumwine vishinganyeka vyenyi, kachi Yehova amwivwililile cheka uselewa. Oloze Kena kevwililile vyuma vamuhuhumwineko. Vishinganyeka vyavipi vikiko vyamulingishile alinge vyuma vyavipi. (Yako. 1:14, 15) Omu Kena apwile mukweze, pamo kashinganyekele ngwenyi mwakalikanga kuli Yehovako. Oloze mukuhita chalwola, alikangile kuli Kalunga nakujiha songo yenyi.

5. Vishinganyeka muka vize vinahase kutuhonesa kupwa kusali yaYehova?

⁵ Ngana mwaKena, navaka-Kulishitu vamwe makumbi ano veji kulinganga vyuma vyavipi, okunyi vali nakushinganyeka ngwavo vali nakuzachila Yehova. (Yuta 11) Chakutalilaho, mutu nahase kupwa navishinganyeka vyakufwila kulinga ujila, nakupwa nalushiushiu chipwe kulamina vandumbwenyi koko. (Yowa. 1, 2:15-17; 3:15) Vishinganyeka kana vinahase kuzondola mutu alinge shili. Kaha nawa mutu nahase kupwa natwima mumulimo wakwambulula chipwe kupwanga kukukunguluka lwola lwosena. Vatu kaveshi kutachikiza vishinganyeka navilinga vyetuko oloze Yehova eji kumonanga vyuma vyosena ngocho nahase kutachikiza numba nge tuli kusali yenyi chipwe chiku.—Tangenu Yelemiya 17:9, 10.

6. Uno Yehova eji kukafwanga ngachilihi vaze vasaka kupwa kusali yenyi mangana ‘vahonese’ vishinganyeka vyavipi?

⁶ Chipwe ngocho, Yehova eji kututalililanga chikoki. Kachi nge mutu naputuka kusosoloka kuli Kalunga, Yehova eji kwambanga ngwenyi: ‘Kinduluka kuli ami, kaha ami nawa nangukinduluka kuli ove.’ (Mala. 3:7) Yehova afwila kutukafwa tutwaleho kuhunganga vyuma vyavipi. (Isa. 55:7) Shikaho kupwa kusali yenyi, nachitukafwa ‘tuhonese’ vishinganyeka vyavipi.—Kupu. 4:7.

7. Vyuma muka alingile Solomone numba ajimbalise usoko wenyi naYehova?

⁷ Tunahase nawa kulinangula vyavivulu kuli Mwangana Solomone. Omu Solomone apwile mukweze, apendaminyinenga hali Yehova mangana amutwaminyine. Kalunga amuhanyine mangana nakumuhana mulimo wakutunga tembele yamwaza chikuma muYelusalema. Chaluvinda Solomone ajimbalishile usoko wenyi naYehova. (Vamya. 1, 3:12; 11:1, 2) Kalunga ahanyine lushimbi lwakukanyisa vamyangana vavaHepeleu ‘kulivulishila mapwevo, kuchina muchima naupyapumuka.’ (Lushi. 17:17) Oloze Solomone alikangile, ngocho ambachile mapwevo 700 natulumbu twamasano 300. (Vamya. 1, 11:3) Mapwevo vaze ambachile vapwile vaka-mafuchi eka vaze valemeselenga tulunga vamakuli. Solomone ahokwele lushimbi lwaKalunga lwakumukanyisa kumbata mapwevo vakumafuchi eka.—Lushi. 7:3, 4.

8. Vyuma muka vyavipi alingilenga Solomone?

⁸ Solomone aputukile kusosoloka kuli Yehova chikoki chikoki, kaha kutwala muze chamulingishile jino avulumune mulonga waunene. Atungilile Ashatolete kalunga wapwevo lijiko lyakulumbila. Atungilile nawa lijiko likwavo Kemoshe kalunga wamakuli. Ngocho aputukile kulemesa tulunga vamakuli vaze valemeselenga mapwevo jenyi. Awa majiko akulumbila awatungilile kupili yize yapwilile kwakamwihi naYelusalema kuze atungilile tembele yaYehova.  (Vamya. 1, 11:5-8; Vamya. 2, 23:13) Pamo Solomone ashinganyekelenga ngwenyi Yehova mwatwalaho kumwivwila uselewa chikalu kaha nge mwamuhananga mawana hatembele.

9. Uno kulikanga chaSolomone chanehele ukalu muka?

⁹ Yehova keshi kuvulyama milonga yetuko. Mbimbiliya ngwayo: “Yehova apihililile naSolomone mwomwo muchima wenyi wapyapumukile nakuseza Yehova . . . uze alisolwele kuli ikiye mapapa kavali, nakumuhuhumuna ngwenyi kanda akakavangiza tulunga vekako. Oloze ikiye kononokele vyuma amulwezele Yehovako.” Kuhona kwononoka chalingishile Solomone vahone kumwivwila uselewa kuli Yehova. Kaha nawa vana vaSolomone kavayulilenga vaIsalele vosenako kaha nawa vamwenenga makava chikuma.—Vamya. 1, 11:9-13.

10. Vyuma muka vinahase kwenyeka usoko wetu naYehova?

¹⁰ Ngana muze chapwile kuli Solomone, kulikata navatu vaze kavatachikiza jindongi jaYehova nakuhona kujimona kupwa jajilemu chinahase kutuzeyesa kushipilitu. Vamwe pamo vanahase kulikata nachikungulwilo olozenyi vapwa vakuzeya kushipilitu. Kaha veka vanahase kupwa vausoko, navakwetu muchitungilo, navakwetu mutwazachila navakwetu vaka-shikola vaze kavalemesa Yehovako. Kala mweshomwo chili, kulikata navatu vaze kavamona jindongi jaYehova kupwa jajilemuko, vanahase kwenyeka usoko wetu naKalunga.

11. Vyuma muka navitukafwa tusakule kanawa masepa?

¹¹ Tangenu Wavaka-Kolinde 1, 15:33. Vatu vavavulu vatwama navilinga vyamwaza. Kaha nawa vatu vaze kavalemesa Yehovako kavalinga vyuma vyavipi lwola lwosenako. Kachi nge omu mukiko vapwa navatu vaze mwalijilila navo, kutala mwatela kushinganyeka ngwenu chili tuhu kanawa kulikata navo tahi? Mwatela kulihulisa ngwenu, ‘Uno kulikata navatu kana nachizamisa usoko wami naYehova nyi kuwenyeka? Uno vyuma muka vyavilemu vafwila vatu kana? Chakutalilaho, kutala vasaka kaha kuhanjika hauvwalo uze vanasungumuka, najimbongo, namakina amahya, navyakulihizumuna, navyuma vyeka vyangana tahi? Kutala vasaka kuyongola vakwavo chipwe kuseseka chakasautu tahi? Yesu ambile ngwenyi: “Kanwa keji kuhanjikanga vyuma vinavulu mumuchima.” (Mateu 12:34) Nge munamono ngwenu vatu mweji kulikatanga navo vanahase kwenyeka usoko wenu naYehova, kaha mwatela kukehesako kulikata navo chipwe vene kulitwamina kulikata navo.—Vishi. 13:20.

12. (a) Vyuma muka Yehova alwezele vaIsalele omu vafumine muEjipitu? (b) Vyuma muka valingile vaIsalele omu Kalunga avalwezele ngwenyi vapwenga vakushishika kuli ikiye?

¹² Tunahase nawa kulinangula kuvyuma vyasolokele kuli vaIsalele hanyima yakuvasokola  kufuma muEjipitu. Omu valikungulwile kupili yaShinai, Yehova alisolwele kuli vakiko mujila yakukomwesa. Vamwene livwi lilava chikuma, kaha nawa vevwile mikalateta namiveso, nachivumo chaluneta chakutezuka chikuma. (Kulo. 19:16-19) Vyuma vyasolokele vyasolwele nge Yehova apwile nakulweza vaIsalele ngwenyi apwa ‘Kalunga uze asaka vatu valihane kuli ikiye namichima yavo yosena.’ Avafwelelesele ngwenyi mwapwa wakushishika kuli vaze vamuzanga nakulama jishimbi jenyi. (Tangenu Kulovoka 20:1-6.) Chapwile kwijiva nge apwile nakulweza vaIsalele ngwenyi, “kachi nge namupwa kusali yami, nayami nangupwa kusali yenu.” Nge Yehova Kalunga ahanjikanga mazu kana kuli enu, kachi munalingi ika? Nayenu kachi namulinga ngana muze valingile vaIsalele, vaze “vakumbulwile nalizu limwe ngwavo: ‘Mazu osena nahanjika Yehova natuwalinganga.’” (Kulo. 24:3) Oloze nakushimbula chiku, vaIsalele vengilile mucheseko.

13. Vyuma muka vyalingishile vaIsalele vapwenga mucheseko?

¹³ VaIsalele vevwile woma omu vamwene livwi lilava chikuma namiveso navyuma vyeka vyakukomwesa vize asolwele Kalunga. Ngocho valwezele Mose ayenga kupili yaShinai mangana akavahanjikileko kuli Yehova, kaha ayile. (Kulo. 20:18-21) Oloze Mose kejile washi kufuma kupili kuze ayileko. Echi chalingishile vaIsalele vaputuke kulizakamina hali twamina yavo uze vafwelelele chikuma. Chasoloka nge lufwelelo lwavaIsalele lwapendaminyinenga hali Mose. Ngocho valizakaminyine chikuma, kaha valwezele Alone ngwavo: “Tutengele kalunga uze mwatutwaminyina, mwomwo katwatachikijile vyuma vinasoloka kuli Mose, lunga uze atulowele mulifuchi lyaEjipituko.”—Kulo. 32:1, 2.

14. Vishinganyeka muka vyakuhenga vapwile navyo vaIsalele, kaha Yehova evwile ngachilihi?

¹⁴ VaIsalele vatachikijile ngwavo Yehova ahunga vaka-kulemesa makombelo. (Kulo. 20:3-5) Oloze nakushimbula chiku, vaputukile kulemesa likombelo lyamwanangombe waulu. Chaluvinda vaIsalele vashinganyekele ngwavo vapwile lika kusali yaYehova numba tuhu valikangile kuli ikiye. Chakutalilaho, Alone ambile ngwenyi vapwile ‘nakulingila Yehova chiwanyino.’ Uno Yehova evwile ngachilihi? Evwile kupihya, kaha alwezele Mose ngwenyi vatu jenyi ‘valingile vyuma vyavipi nakuseuka mujila yize avalwezele kutambuka.’ Yehova akwachile “utenu” ngocho ashinganyekele kunongesa muyachi wosena wavaIsalele.—Kulo. 32:5-10.

15, 16. Uno Mose naAlone vasolwele ngachilihi nge vapwile kusali yaYehova? (Talenu muvwimbimbi wakulivanga.)

¹⁵ Yehova alumwine vishinganyeka vyenyi ngocho kanongesele vaIsaleleko. Muchima waYehova wakeke wakafwile vaIsalele vatwaleho lika kupwa kusali yenyi. (Kulo. 32:14) Omu Mose amwene vatu vali nakulinga vilinga vyavipi vyakufwana nge kutambakana nakwimba myaso nakukinyina likombelo, apihililile chikuma nakuchika uze mwanangombe chikichiki. Kufumaho atambakanyine ngwenyi: “Weshowo ali kusali yaYehova ezenga kuno kuli ami.” Kaha “vaLevi vosena valikungulwilile kuli ikiye.”—Kulo. 32:17-20, 26.

¹⁶ Numba tuhu Alone ikiye atungile lize likombelo, oloze apihililile nakwalumuka nakulipanjika cheka navakwavo vaLevi vaze vapwile kusali yaYehova. Ava vatu vakushishika vasolwele hatoma nge kavapwile kusali yavaze valikangileko. Chuma valingile chapwile chamangana chikuma mwomwo halikumbi kana vatu vavavulu vaze valemesele lize likombelo vafwile. Oloze Yehova afwelelesele vaze vapwile kusali yenyi ngwenyi mwakavakisula.—Kulo. 32:27-29.

17. Vyuma muka natulinangula kumazu ahanjikile Paulu hachihande chamwanangombe waulu?

¹⁷ Kaposetolo Paulu nawa ashinganyekelenga hachihande chamwanangombe waulu, kaha  ahuhumwine vandumbwenyi ngwenyi: ‘Vyumevi vyapwile vyakutalilaho kuli etu, mangana tuzeneke . . . kupwa tuvaka-kulemesa makombeloko, nge muze vapwile vakwetu vamwe. Vyakutalilaho kana vavisonekelele kutuhuhumuna etu, etu vene tuli nakuyoyela kukukuma chakatwamino kamyaka yino. Ngocho ou nashinganyeka ngwenyi nemana azangame kuchina mwalimbuka.’ (Koli. 1, 10:6, 7, 11, 12) Mazu asonekele Paulu asolola nge navaka-kulemesa Kalunga vamuchano vanahase kwingila muvilinga vyavipi. Vanahase kushinganyeka ngwavo vachili lika nausoko wamwaza naYehova. Oloze twatela kutachikiza ngwetu kusaka kaha kupwa sepa lyaYehova chipwe kushinganyeka ngwetu twapwa tuvakushishika kuli ikiye keshi ukiko unjiho wakusolola nge Yehova natwivwila kuwahako.—Koli. 1, 10:1-5.

18. Vyuma muka vinahase kutusosolola kuli Yehova, kahechi chinahase kuneha ukalu muka?

¹⁸ Ngana muze vaIsalele vahonene kuvandamina Mose omu ayile kuShinai, navaka-Kulishitu vanahase kulizakamina nakushinganyeka ngwavo likumbi lyaYehova lyakusopesa nakupwako chakaye kakahya vili nakulangisa. Lwola lumwe tunahase kushinganyeka ngwetu jishiko kana kajeshi kutesamo washiko chipwe vene ngwetu kajeshi kukatesamoko. Shikaho nge katweshi kulikekesanga etu vaveneko, kaha tunahase kuputuka kuhaka kulutwe vyuma yafwila michima yetu nakuhona kulinga mwaya muchima waYehova. Mukuhita chalwola tunahase kuputuka kusosoloka kuli Yehova, kaha kutwala muze natukalinga jino mulonga washili waunene uze katwashinganyekele ngwetu tunahase kulinga halwola twapwile tuvakujikiza kushipilituko.

19. Chishina muka chachilemu chize katwatela kuvulyamako, kaha mwomwo ika?

¹⁹ Lwola lwosena twatela kwanukanga ngwetu Yehova asaka tumwononokenga namichima yetu yosena. (Kulo. 20:5) Shikaho nge katweshi kulinga mwaya muchima wenyiko, kaha natuputuka kulinga mwaya muchima waSatana nakutulingisa jino twingile muukalu waunene. Evi vikiko Paulu atuhuhumwina ngwenyi: “Enu kamwatela kunwanga mulupasa lwaYehova namulupasa lwavandemoneko. Enu kamwatela kulyanga ‘kumesa yaYehova’ nakumesa yavandemoneko.”—Koli. 1, 10:21.

20. Yehova nahase kutukafwa ngachilihi nge tunalimbenje?

²⁰ Vyakutalilaho vyamuMbimbiliya vyaKena, naSolomone navaIsalele vaze vapwile kuPili yaShinai vinahase kutunangula chishina chochimwe. Yehova ahanyine vatu kana lwola lwakutela ‘kupihilila nakwalumuka, nakukinduluka kuli Kalunga.’ (Vili. 3:19) Echi chasolola nge eji kutalililanga vatu chikoki vaze veji kulimbenjanga. Chakutalilaho, Yehova akonekelele Alone. Namakumbi ano, Yehova eji kutuhuhumunanga kuhichila mumijimbu vasoneka muMbimbiliya, namikanda yahanjika haMbimbiliya, chipwe kuhichila muli vandumbwetu vakuhya kushipilitu. Nge natwivwililanga vyuma mwatuhuhumuna, kaha mwatwivwila keke.

21. Vyuma muka twatela kulinga nge tuli mucheseko chakusaka kutulingisa tuhone kupwa vakushishika kuli Yehova?

²¹ Likoji lyalinene lyaYehova lyeji kutunganyalisanga. (Koli. 2, 6:1) Lyeji kutukafwanga “tukane vilinga vyakuhona kumwivwa Kalunga woma, namuchima wakufwila vyuma vyahakaye.” (Tangenu WaChituse 2:11-14.) Oloze omu tuli nakuyoyela “mukatwamino kamyaka yino,” natumonanga vyeseko vize vinahase kutulingisa tuhone kuzachila Kalunga namuchima wetu wosena. Shikaho tutwalenuho lika kupwa kusali yaYehova mwomwo ikiye kaha twatela ‘kwivwa woma, nakuzachilanga, nakulinjilila kuli ikiye.’—Lushi. 10:20.