1. Vyuma muka twasaka vatu vatachikize hali etu?

UNO mweji kwivwanga ngachilihi nge mutu uze mwatachikiza chikuma mwamilweza ngwenyi navulyama lijina lyenu, chipwe ngwenyi noku amitachikijila vene kwauchi? Chuma kana chinahase kumihombesa. Mwomwo ika? Mwomwo tuvosena twasaka kututachikiza kuli vakwetu. Twasaka vatu vatachikize lijina lyetu, nomu twapwa, namilimo tweji kuzatanga.—Kula. 11:16; Yopa 31:6.

2, 3. Uno kututachikiza chikuma kuli vatu chinahase kutulingisa tufwile vyuma muka? (Talenu muvwimbimbi wakulivanga.)

² Numba tuhu twasaka vatu vatutachikize, oloze nge katwazangamineko, kaha tunahase kuputuka kufwila kuya fuma mukaye. Echi chinahase kutulingisa tuhone kulemesa Setu wamwilu Yehova mujila yize asaka.—Kuso. 4:11.

³ Vatwamina vamukwitava vamwe vamumakumbi aYesu vafwilililenga kuvatachikiza chikuma kuli vatu mwomwo yakusaka kuya fuma. Ngocho Yesu ahuhumwine vaka-kumukavangiza ngwenyi:  “Zangamenu navaka-kusoneka vaze vasaka kutambwojoka oku vanavwale vikuto nakusaka kuvamenejeka kuvilanjilo, nakusaka vitwamo [“vyamwaza,” kwinyikila chamwishi] mujisunangonga navihela vyaulemu chikuma kukulya chachingoloshi.” Ambile nawa ngwenyi: “Kusopesa chavo navakavasopesa nachikapwa chachinene.” (Luka 20:46, 47) Yesu alihandunwine navakulwane vamukwitava mwomwo ikiye asangejekele tuliwe uze ahanyine wana watujimbongo twachichele uze pamo kavatachikijile kuli vatuko. (Luka 21:1-4) Yesu asolwele ngwenyi mutu kavatela kumutachikiza mwomwo yaulemu wenyiko. Chino chihande nachitukafwa tufwilenga kutunga lijila lyamwaza naKalunga.

4. Uno twatela kufwila kutunga lijina lyamwaza kuli iya, kaha mwomwo ika?

⁴ Uno twatela kufwila kutunga lijina lyamwaza kuli iya? Vatu vavavulu veji kufwilanga kuvatachikijila hamilimo vazata, namukusekasana, namuvyakuhemahema vize vinalisale mukaye kano. Oloze Paulu asonekele ngwenyi: “Jino hakuwana nge munamutachikiza lyehi Kalunga, mokomoko ngwetu vanamitachikiza lyehi kuli Kalunga, nyi ngachilihize muli nakukindulukila cheka kuvyuma vyamaputukilo vyaufwefwelekete, vyamokomoko, nakusaka kwingila muundungo wakuvizachila cheka?” (Ngale. 4:9) Chapwa hikutokwa chachinene ‘kututachikiza kuli Kalunga’ uze apwa Muka-Kuyula vyuma vyakutenga vyosena mwomwo asaka tutunge usepa wakukola naikiye. Chikupu vene, Yehova atutachikiza kanawa, kaha nawa atuzanga chikuma ngocho asaka tulikate naikiye.—Kwambu. 12:13, 14.

5. Vyuma muka twatela kulinga numba Yehova atutachikize?

⁵ Mose nawa vamutachikijile kuli Kalunga. Chakutalilaho, omu alembelelele Yehova amukafwe kutachikiza jijila jenyi, Yehova amukumbulwile ngwenyi: “Nangulinga nawa chuma kanechi unalombo mwomwo unawane uselewa kumeso ami, kaha nawa ngunakutachikiza halijina lyove.” (Kulo. 33:12-17) Nayetu Yehova nahase kutukisula kachi nge mwatachikiza majina etu. Jino vyuma muka twatela kulinga numba Yehova atutachikize? Twatela kumuzanga nakulihana kumuzachilanga mukuyoya chetu chosena.—Tangenu Wavaka-Kolinde 1, 8:3.

6, 7. Chuma muka chinahase kujiha usoko wetu naYehova?

⁶ Twatela nawa kuzamisa usoko wetu naSetu wamwilu. Ngana mwavaka-Ngalesha vaze kaposetolo Paulu asonekelele mukanda, nayetu twatela kulihenda “kuvyuma vyamaputukilo vyaufwefwelekete” vyamuno mukaye nakufwila kuya fuma. (Ngale. 4:9) Vaka-Kulishitu vamulikulukaji lyamyaka lyakulivanga vazovolokele kaha vavatachikijile kuli Kalunga. Chipwe ngocho Paulu ambile ngwenyi vatu vovamwe vaputukile “kukindulukila cheka” kuvyuma vyaufwefwelekete. Chili kwijiva nge Paulu apwile nakuhanjika ngwenyi: “Hakuwana nge munakilikita nakuheta haseteko kaneyi, kahaze mwomwo ika muli nakukindulukila cheka kuvyuma vyauleya, vyamokomoko vize mwaseza lyehi?”

⁷ Uno ukalu kana unahase kutusolokela nayetu tahi? Eyo. Omu twalinangwile muchano wamuMbimbiliya, nayetu pamo twakanyine kuyafuma mukaye kaSatana. (Tangenu Wavaka-Fwilipi 3:7, 8.) Pamo twakanyine kuya kumashikola ahelu, chipwe kukana kutuhaka havihela vyavinene, chipwe kukana kwazana mukusekasana chakufwila kupwa najimbongo jajivulu. Kaha nawa pamo twapwile nauhashi wakwimba chipwe wakwazana muvyakuhemahema uze watelelele kutulingisa  tuyenga fuma, oloze twasezele vyuma vyosenevi. (Hepe. 11:24-27) Shikaho nachipwa chakuhenga kuputuka kuliveya nakushinganyeka ngwetu twalimbenjele hakuseza vyuma kana. Vishinganyeka kana vinahase kutulingisa tuputuke kufwila “vyuma vyamaputukilo vyaufwefwelekete” vize twaseza lyehi. *

8. Chuma muka nachitukafwa tutwaleho lika kumona vyuma twasakwile kupwa vyavilemu?

⁸ Chuma muka nachitukafwa tutwaleho lika kumona vyuma twasakwile kupwa vyavilemu nakutunga lijina lyamwaza naYehova? Twatela kwanuka vyuma vino vivali. Chatete, Yehova atachikiza vaze veji kumuzachilanga nakashishi. (Tangenu WavaHepeleu 6:10; 11:6) Amona vangamba jenyi kupwa vavalemu, kaha amona ngwenyi nge mwavulyama vyuma vyamwaza veji kumulingilanga, kaha mwasoloka nge apwa ‘wakuhenga.’ Mbimbiliya ngwayo, “Yehova atachikiza vaze vanapu venyi.” (Chimo. 2, 2:19) Kaha nawa “atachikiza jila yavaka-kwoloka” namwakuvayowela nge vali muvyeseko.—Samu 1:6; Petu. 2, 2:9.

9. Hanenu chakutalilaho chize chasolola nge Yehova eji kuzakamanga vatu jenyi.

⁹ Shimbu jimwe, Yehova akafwilenga vatu jenyi mujijila jakulisezaseza mangana asolole ngwenyi avatachikiza. (Miji. 2, 20:20, 29) Chakutalilaho, Yehova ayowele vaIsalele haKalungalwiji Uchila omu vapwilenga nakuvahangasana kuli Fwalo nalizavu lyenyi lyavaka-kwasa jita. (Kulo. 14:21-30; Samu 106:9-11) Chuma alingile Yehova chapwile chakulipwila chikuma, mwomwo hamyaka kafwe 40 vatu vahanjikilenga lika hachuma kana. (Yoshu. 2:9-11) Chapwa chachilemu chikuma nayetu kushinganyekanga havyuma alingile Yehova kuli vaIsalele chikumanyi omu tuli kwakamwihi nakulitalasana naNgonge wakuMangonge. (Ezeke. 38:8-12) Halwola kanelu, natukasakiwa chikuma kutunga lijina lyamwaza naKalunga keshi nge nakayeko.

10. Chuma muka twatela kwanuka hajila yize Yehova eji kusolwelangamo nge atachikiza vatu jenyi?

¹⁰ Chuma chamuchivali twatela kwanuka shina: Yehova nahase kutukafwa mujila yize katwashinganyekeleko. Vatu vaze vasaka kulinga vyuma vyamwaza mwomwo yakusaka kuvatachikiza kuvatu, Yehova keshi kavahana fwetoko. Mwomwo ika? Mwomwo veji kutambulanga fweto omu veji kuvatohwesanga kuli vatu. (Tangenu Mateu 6:1-5.) Yesu ambile ngwenyi Ise ‘eji kumonanga kupenge,’ kaha atachikiza vaze kavasaka kuvatohwesa kuli vatuko. Eji kumonanga nawa vyuma vyamwaza vyosena veji kulinganga nakuvafweta kweseka navilinga vyavo. Shimbu jimwe, Yehova eji kufwetanga vatu jenyi mujila yize kavashinganyekeleko. Tuchishimutwilenu havyakutalilaho vimwe.

11. Yehova asolwele ngachilihi ngwenyi atachikijile Maliya?

¹¹ Shimbu kanda mwanaKalunga ezenga hano hamavu nakusemuka, Yehova asakwile mwanapwevo Maliya uze apwile kanda achilisavaleho lyehi nalunga mangana apwenga naye yayou mwana wakulipwila. Maliya atwaminenga munganda yaNazaleta yize yapwilile kwakusuku naYelusalema natembele yaukelenga. (Tangenu Luka 1:26-33.) Mwomwo ika Yehova asakwilile Maliya? Kangelo Ngavalyele alwezele Maliya ngwenyi ‘Kalunga  amwivwililile uselewa.’ Maliya asolwele nge apwile wakuhya kushipilitu omu ahanjikile kuli kausoko kenyi Elizaveta. (Luka 1:46-55) Chikupu vene, Yehova atachikijile kanawa Maliya, ngocho amuhanyine mulimo kanou waulemu mwomwo yakushishika chenyi.

12, 13. Mujila muka yakulipwila vatohweselelemo Yesu halwola asemukile nomu vamutwalile kutembele omu apwile namakumbi 40?

¹² Omu Maliya asemene Yesu, Yehova kavumbikile vatu vavalemu chipwe vaka-kuyula vamuYelusalema namuMbetelema hakuvalweza vyuma vyasolokeleko. Oloze atumine kangelo ayenga nakulweza tufunga vaze vapwile nakufunga mikoko kuweluka waMbetelema. (Luka 2:8-14) Ava tufunga jino vayile nakumona uze kemba asemukile. (Luka 2:15-17) Maliya naYosefwe pamo valikomokelele hakumona Yesu navamutohwesa mujila yakukomwesa ngana. Shikaho vyuma eji kulinganga Yehova vyalihandununa navize eji kulinganga Liyavolo. Chakutalilaho, omu Satana atumine vaka-kuzachisa vatanganyika vayenga nakumona Yesu navisemi jenyi, vatu vamuYelusalema vosena vapihililile hakwivwa mujimbu wakusemuka chaYesu. (Mateu 2:3) Kutandakanyisa mujimbu wakusemuka chaYesu chajihishile vana vavavulu chakuzeneka mulonga.—Mateu 2:16.

¹³ Omu mwahichile makumbi 40 kufuma hakusemuka chaYesu, Maliya ayile nakuhana wana kuli Yehova hatembele muYelusalema yize yapwile kafwe jikilomita 9 kufuma kuMbetelema. (Luka 2:22-24) Omu Maliya apwile nakuya ungeji naYosefwe naYesu, pamo ashinganyekele numba nge kapilishitu mwatachikiza mulimo mwakazata ou mwana kulutwe.Chikupu vene, Yesu vamutohwesele oloze keshi ngana muze ashinganyekele Maliyako. Yehova azachishile Shimeyone lunga “wakwoloka, muka-kulemesa Kalunga” naAna tuliwe wamyaka 84 uze nawa apwile kapolofweto mangana vahanjike ngwavo ou mwana ikiye Meshiya chipwe Kulishitu uze vashikile.—Luka 2:25-38.

14. Yehova akiswile ngachilihi Maliya?

¹⁴ Kutala naMaliya vamutohwesele kuli Yehova hakushishika chenyi nahakulela Yesu tahi? Eyo. Kalunga ahwiminyinyine vatu vasoneke muMbimbiliya vyuma alingilenga Maliya navize ahanjikilenga. Pamo Maliya kahashilenga kutambuka naYesu hamyaka yitatu nachimbwa yize azachilenga mulimo wakwambululako. Hakuwana nge apwile tuliwe, ngocho pamo asalile muNazaleta. Numba tuhu kahashilenga kupwa namwanenyi Yesu lwola lwosenako, oloze halikumbi lize afwile naikiye kwapwile. (Yowa. 19:26) Kutwala muze, Maliya apwile muYelusalema hamwe natumbaji hamakumbi akukokela haPendekoseta omu vatambwile shipilitu yajila. (Vili. 1:13, 14) Pamo naikiye vamuwavishile. Nge mukiko, kaha atwama nakutokwa chakupwa hamwe naYesu mwilu haya myaka yosena. Chikupu vene, Yehova amwene mulimo azachilenga Maliya kupwa waulemu chikuma ngocho amukiswile.

15. Omu Yesu apwilenga hano hamavu, Yehova asolwele ngachilihi nge amwivwililile kuwaha?

¹⁵ Yesu kasakilenga vamuvumbike kuli vatwamina vamukwitava chipwe vaka-mapolitiki vapwileko mulwola kanako. Oloze evwile kuwaha chikuma hakwivwa Yehova mwahanjika naikiye mapapa katatu. Omu Yesu vamumbapachishile muKalwiji Yotau, Yehova ahanjikile ngwenyi: “Ou ikiye Mwanami, ou ngwazanga, ou ngwevwila kuwaha.” (Mateu 3:17) Yowano Muka-kumbapachisa ikiye kaha evwile mazu aze ahanjikile Yehova.  Omu kwasalile kafwe mwaka umwe nakufwa chaYesu, vaposetolo jenyi vatatu vevwile Yehova mwahanjika ngwenyi: “Ou ikiye Mwanami, ou ngwazanga, ou ngwevwila kuwaha. Mwivwililenunga.” (Mateu 17:5) Kaha nawa omu kwasalile makumbi amandende shimbu kanda Yesu afwenga, Yehova ahanjikile cheka naMwanenyi.—Yowa. 12:28.

16, 17. Yehova atohwesele ngachilihi Yesu mujila yakulipwila?

¹⁶ Numba tuhu Yesu atachikijile ngwenyi navamujiha mujila yayipi, nakumusaula, oloze alombele ngwenyi mwaya muchima waYehova mulingiwe keshi mwaya muchima wenyiko. (Mateu 26:39, 42) Hakuwana nge asakile kaha kutunga lijina lyamwaza naIse keshi nakayeko, ngocho “omikile hachitondo chakuyanjishila, [nakulumbilisa] sonyi.” (Hepe. 12:2) Uno Yehova amutohwesele ngachilihi?

¹⁷ Omu Yesu apwile hano hamavu, afwililile kukinduluka mwilu mangana akapwe naupahu uze apwilenga nawo omu apwilenga naIse. (Yowa. 17:5) Kakweshi unjiho wakusolola nge Yesu asakile vamutohwese chikumako. Kafwililile kuya mwilu mangana vakamuhane chihela chachineneko. Vyuma muka alingile Yehova? Atohwesele Yesu mujila yakulipwila hakumusangula nakumuhaka “hachihela chahelu” nakumuhana kuyoya chakuzeneka kufwa. * (Fwili. 2:9; Chimo. 1, 6:16) Chikupu vene, Yehova amwene mulimo azachilenga Yesu kupwa waulemu chikuma.

18. Chuma muka nachitukafwa tuhone kufwila kuya fuma mukaye?

¹⁸ Chuma muka nachitukafwa tuhone kufwila kuya fuma mukaye? Mwatela kwijiva ngwenu Yehova atachikiza vangamba jenyi vakushishika, kaha eji kuvahananga fweto mujila yize kavashinganyekeleko. Tuvosena katwatachikiza fweto yize mwakatuhana kulutweko. Oloze omu tuli nakuyoyela mukaye kano kakuhuka twatela kwanuka ngwetu kaye navyuma vyako vili nakuhita. (Yowa. 1, 2:17) Setu wazangi Yehova ‘kapwa wakuhengako numba avulyame milimo yetu, nazangi tunasolola yakuzanga lijina lyenyi.’ (Hepe. 6:10) Chikupu vene, pamo mwakatutohwesa mujila yize katwashinganyekako.