1. Mwomwo ika natwambila ngwetu vyuma vyosena vyapwa vyaYehova? (Talenu muvwimbimbi wakulivanga.)

VYUMA vyosena vyapwa vyaYehova. ‘Melu namavu navyuma vyosena vize vyatwamaho’ vyapwa vyenyi. (Lushi. 10:14; Kuso. 4:11) Vatu vosena nawa vapwa venyi mwomwo ikiye avatengele. (Samu 100:3) Chipwe ngocho, kufuma vene kushikulu, Yehova nasakulanga vatu vamwe vapwenga venyi mujila yakulipwila.

2. Vatu muka vaze Mbimbiliya yavuluka ngwayo vapwa vatu jaYehova vakulipwila?

² Mukanda waSamu 135 wahanjika ngwawo vaka-kulemesa Kalunga vakushishika vakushikulu vamuIsalele vapwile “vatu jenyi vakulipwila.” (Samu 135, 4) Kaha nawa mukanda waHozeya wahanjikilile chimweza ngwawo vatu vaze kavapwile vaIsaleleko, navakalumuka nakupwa vatu jaYehova. (Hoze. 2:23) Upolofweto waHozeya wateselemo omu Yehova asakwile vatu vaze kavapwile vaYuleyako mangana vakayule naKulishitu. (Vili. 10:45; Loma 9:23-26) Ou “muyachi wajila,” wapwile “luheto lwakulipwila” lwaYehova. Vatu kana vapwa vaka-Kulishitu vawavisa nashipilitu yajila mangana vakayoyele mwilu. (Petu. 1, 2:9, 10) Nyi ngachilihi vaka-Kulishitu vakushishika vavavulu vaze vatwama nalutalililo lwakukayoyela hamavu? Navakiko nawa Yehova avavuluka kupwa “vatu” jenyi vaze ‘asakula.’—Isa. 65:22.

3. (a) Veya vatwama nausoko wamwaza naYehova makumbi ano? (b) Vyuma muka natushimutwila muchihande chino?

 ³ Makumbi ano, “utanga wamikoko waundende” vaze vatwama nalutalililo lwakuyoyela mwilu, ‘namikoko veka’ vaze vatwama nalutalililo lwakuyoyela hano hamavu vapwa “utanga umwe” uze Yehova amona kupwa vatu jenyi. (Luka 12:32; Yowa. 10:16) Tweji kusakwililanga chikuma Yehova hakutukafwa tutunge usoko wakukola naikiye. Muchihande chino natushimutwila hajijila jakulisezaseza jakusolwelamo kusakwilila chetu.

4. Mujila muka tweji kusolwelangamo kusakwilila chetu kuli Yehova hakutwitavisa tulikate naikiye, kaha Yesu alingile ngachilihi chuma chochimwe?

⁴ Tweji kusololanga kusakwilila chetu kuli Yehova hakulihana kuli ikiye namuchima wosena. Kaha nawa omu veji kutumbapachisanga tweji kusololanga hatoma kuli vatu ngwetu twasaka kulinga mwaya muchima waYehova. (Hepe. 12:9) Yesu nawa alingile mwomumwe omu vamumbapachishile. Chili kwijiva nge apwile nakulweza Yehova ngwenyi: “Ove Kalunga kami, ngweji kwivwanga kuwaha kulinga mwaya muchima wove.” (Samu 40:7, 8, kwinyikila chamwishi) Yesu alisuwile kulinga mwaya muchima waYehova numba tuhu asemukilile kumuyachi wavatu vaze vapwile vakulihana kuli Kalunga.

5, 6. (a) Vyuma muka alingile Yehova omu Yesu vamumbapachishile? (b) Hanenu chakutalilaho chize chasolola nge Yehova eji kuwahililanga hakulihana chetu kuli ikiye numba tuhu vyuma vyosena vyapwa vyenyi.

⁵ Uno Yehova alingile vyuma muka omu Yesu vamumbapachishile? Mbimbiliya ngwayo: “Omu Yesu vamumbapachishile, hahaze vene afumine mumeya, kaha mwilu mwasokolokele. Jino Yowano amwene shipilitu yaKalunga nayifuma mwilu nge liyembe nakuwila hali ikiye. Mwilu mwafumine nawa lizu ngwavo: ‘Ou ikiye Mwanami, ou ngwazanga, ou ngwevwila kuwaha.’” (Mateu 3:16, 17) Numba tuhu Yesu apwile mwanaKalunga oloze Yehova awahililile chikuma hakumumona mwalihana kuli ikiye namuchima wenyi wosena. Namakumbi ano eji kwivwanga kuwaha nge natulihana kuli ikiye, ngocho mwatukisulanga mwamunene.—Samu 149:4.

⁶ Chakutalilaho, achishinganyekenu chisemi nalimi wande walupa. Jino likumbi limwe mwanenyi mwafula mukamba nakumutelekela. Twatachikiza vene ngwetu lupa kana lunafumu muwande wenyi. Oloze mwevwa kuwaha mwomwo mwanenyi namusolwela zangi hakumuhana uze mukamba. Tunafwelela ngwetu ou chisemi mwamona mukamba uze namuhane mwanenyi kupwa waulemu chikuma kuhambakana yize yili muwande. NaYehova nawa eji kwivwanga kuwaha nge natulihana kuli ikiye namuchima wetu wosena.—Kulo. 34:14.

7. Uno mazu asonekele Malaki asolola ngachilihi omu eji kwivwanga Yehova hali vatu vaze veji kumuzachilanga?

⁷ Tangenu Malaki 3:16. Nge kanda muchilihane kuli Yehova nakumimbapachisa, kaha mwatela kuzachilaho washi washi. Ngana muze twahanjikanga, vatu vosena vapwa vaYehova kufuma vene kukusemuka chavo. Chipwe ngocho, Yehova eji kwivwanga kuwaha chikuma omu tweji kusololanga kuliluula chetu kuwata wenyi hakulihana kuli ikiye mangana tulingenga mwaya muchima wenyi. (Vishi. 23:15) Yehova nawa atachikiza vaze vasaka kumuzachila namuchima wakulisuula, kaha majina avo eji kuwasonekanga ‘mumukanda wenyi wakwanukilaho.’

8, 9. Vyuma muka asaka Yehova ngwenyi tulingenga numba majina etu awasoneke ‘mumukanda wakwanukilaho’?

⁸ Chipwe ngocho twatela kulingako vyuma vimwe numba Yehova asoneke majina etu ‘mumukanda wakwanukilaho.’ Chakutalilaho, Malaki asonekele ngwenyi twatela ‘kwivwa lijina lyaYehova woma.’ Shikaho nge natutangukila  kuvyuma vyeka nakuhona kuzachila Yehova namuchima wetu wosena, kaha majina etu navawajima mumukanda wakuyoya wachifwanyisa.—Kulo. 32:33; Samu 69:28.

⁹ Shikaho kulihana chetu kuli Yehova chasakiwa kulinga vyuma vyavivulu keshi nge kumushika ngwetu natulinganga mwaya muchima wenyi nakutumbapachisa kahako. Vyuma kana vyapwa kaha himaputukilo. Hakusaka tutwaleho lika kupwa kusali yaYehova, twatela kwononokanga jishimbi jenyi mukuyoya chetu chosena.—Petu. 1, 4:1, 2.

10. Chihandwa muka chatwama havatu vaze veji kuzachilanga Yehova navaze kavamuzachilako?

¹⁰ Muchihande chinafumuho twashimutwilanga hali Kena naSolomone, navaIsalele. Vatu kana valemeselenga Yehova, oloze kavamuzachililenga namuchima wosenako. Vyuma valingile vyatunangula nge vatu jaYehova vosena vatela kutwalaho lika kupwa kusali yenyi nakuhunga vilinga vyakuhuka. (Loma 12:9) Ngocho omu Malaki akumishile kuvuluka ‘vyamukanda wakwanukilaho,’ Yehova ahanjikile ngwenyi vatu navakamona “chihandwa chatwama hali muka-kwoloka namuka-kuhuka, nahali ou eji kuzachilanga Kalunga nayou azeneka kumuzachila.”—Mala. 3:18.

11. Mwomwo ika vatu vatela kumona ngwavo twalihana kuli Yehova namuchima wosena?

¹¹ Kwatwama nawa jila yikwavo tweji kusolwelangamo kusakwilila chetu kuli Yehova hakutusakula tupwenga tuvatu jenyi. Kuzovoloka chetu kushipilitu vatela ‘kuchimona kuli vatu vosena.’ (Chimo. 1, 4:15; Mateu 5:16) Lihulisenu ngwenu: ‘Kutala vatu vatachikiza ngwavo ngwapwa nguwakushishika kuli Yehova tahi? Kutala ngweji kukilikitanga nangolo mangana ngulijimbule kuvatu ngwami ngwapwa nguChinjiho chaYehova tahi?’ Nge natuliswekanga kuvatu nakuhona kulijimbula ngwetu twapwa tuVinjiho jaYehova, kaha Yehova mwevwa kupihya chikuma.—Samu 119:46; tangenu Mako 8:38.

12, 13. Vandumbwetu vamwe veji kuliswekanga ngachilihi mangana vahone kuvatachikiza kupwa Vinjiho jaYehova?

¹² Chaluvinda, vandumbwetu vamwe veji kulondezezanga “shipilitu yakaye,” ngocho vatu  kana “cheji kukaluhwanga kuvatachikiza numba nge vapwa vaka-kuzachila Kalunga chipwe chiku.” (Koli. 1, 2:12) Eyi shipilitu kana yikiko yeji kuzondolanga vatu valinge mwaya “kufwila chamujimba.” (Efwe. 2:3) Chakutalilaho, Yehova natuhuhumunanga mapapa kakavulu hachihande chakuvwala nakulilenga mwamupi. Oloze vandumbwetu vamwe vachili lika nakukavangiza vwaliso nakulilenga chakukaye. Veji kuvwalanga uvwalo wakuvakwata chikuma hamujimba chipwe wakusolola vili mukachi numba vene nge vali kukukunguluka chavaka-Kulishitu. Kaha nawa veji kulondezezanga vinjiso natewiso yavaka-kaye. (Chimo. 1, 2:9, 10) Ngocho nge vatu kana vali halizavu lyavakwavo, chapwa chachikalu kuhandununa vaze vapwa vatu jaYehova navaze vapwa ‘masepa jakaye.’—Yako. 4:4.

¹³ Echi cheji kusololanga nge Vinjiho vamwe kavambilile vilinga vyakukaye namuchima wosenako. Chakutalilaho, nge vali hachilika veji kukinanga mwamupi nakusolola vilinga vize kavyatela vaka-Kulishituko. Kaha nawa veji kuhakanga mivwimbimbi yavo haInternet nakuhanjika vyuma vize vyeji kuvasololanga nge kavapwa vakuhya kushipilituko. Numba tuhu vatu kana kanda vavahanjikilengaho lyehi mwomwo yakulinga mulonga washili waunene, oloze vanahase kuhungumwisa vandumbwavo vaze vasaka kupwa navilinga vyamwaza.—Tangenu WaPetulu 1, 2:11, 12.

14. Vyuma muka twatela kulinga mangana tukinge usoko wetu naYehova?

¹⁴ Kaye keji kukundwizanga “kufwila chamujimba, nakufwila chameso, nakutembesa vyuma atwama navyo mutu mukuyoya chenyi.” (Yowa. 1, 2:16) Oloze hakuwana nge twapwa tuvatu jaYehova, ngocho vatuhuhumuna “tukane vilinga vyakuhona kumwivwa Kalunga woma, namuchima wakufwila vyuma vyahakaye, oloze tupwenga tuvaka-kushinganyeka mwamangana, vakwoloka, vakwechi muchima wakuzachila Kalunga mukatwamino kamyaka yino.” (Chitu. 2:12) Vyuma vyosena tweji kulinganga vyatela kutusolola nge twalihana kuli Yehova namuchima wetu wosena. Tunahase kulinga ngocho kuhichila muhanjikiso yetu, nahakulya nakunwa, navwaliso nakulilenga chetu namilimo tweji kuzatanga.—Tangenu Wavaka-Kolinde 1, 10:31, 32.

15. Mwomwo ika twatela kusolwelanga vandumbwetu likoji nazangi?

¹⁵ Tweji kusololanga nawa kusakwilila chetu kuli Yehova mujila tweji kutwaminangamo navandumbwetu. Twatela kwanuka ngwetu navakiko vapwa vatu jaYehova. Shikaho twatela kuvasolwelanga likoji nazangi lwola lwosena. (Teso. 1, 5:15) Yesu alwezele vaka-kumukavangiza ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.”—Yowa. 13:35.

16. Chakutalilaho muka chamuJishimbi vahanyine Mose chize chasolola omu eji kwivwanga Yehova hali vatu jenyi?

¹⁶ Hakusaka tutachikize ovyo chapwila chachilemu kuvumbikanga vandumbwetu muchikungulwilo, tutalenu chakutalilaho chino. Vinoma vize vazachishilenga hatembele yaYehova kavavizachishilenga kumulimo wekako, oloze vavizachishilenga kumulimo wakukundwiza kulemesa chamuchano. MuJishimbi jize vahanyine Mose vasonekelemo lushimbi lwamwakuzachishila vinoma kana, kaha vaze vahokwelenga lushimbi kana vavajihilenga. (Kula. 1:50, 51) Kachi nge Yehova akingilenga vinoma vazachishilenga hakumulemesa, kutala keshi kuhasa kukinga vaka-kumulemesa vakushishika vaze asakulako tahi? Yehova afwelelesele vatu jenyi ngwenyi: “Weshowo mwamikwata, nakwate hakatutu kahaliso lyami.”—Zeka. 2:8.

17. Yehova eji ‘kutengelekanga matwitwi enyi nakwivwilila’ kuvyuma muka?

¹⁷ Malaki asonekele ngwenyi “Yehova atengelekele matwitwi enyi nakwivwilila” omu vatu vapwilenga nakulihanjikisa. (Mala. 3:16) Echi chasolola nge chikupu vene “Yehova atachikiza vaze vanapu venyi.” (Chimo. 2, 2:19) Kaha nawa atachikiza vyuma vyosena tweji kuhanjikanga nakulinga. (Hepe. 4:13) Shikaho nge vandumbwetu natuvalinga mwamupi, kaha ‘Yehova eji kutengelekanga matwitwi enyi nakwivwilila.’ Chipwe ngocho, eji kumonanga nawa omu tweji kusolwelanga vandumbwetu chisambo, nazumbu, nalikoji, nomu tweji kuvakonekelanga.—Hepe. 13:16; Petu. 1, 4:8, 9.

18. Natuhasa kusolola ngachilihi kusakwilila chetu kuli Yehova hakutwitavila tupwenga tuvatu jenyi?

¹⁸ Chikupu vene, twafwila kusololanga kusakwilila chetu kuli Yehova hakutwitavisa tupwenga tuvatu jenyi. Twamona chuma kana kupwa chachilemu chikuma, ngocho twalihana kuli ikiye namichima yetu yosena. Numba tuhu tuli nakutwama “muchisemunwino chino chakuhenga chakuhingama,” oloze twasaka kupwa ‘tuvakuzeneka chuma chakutuhanyina mulonga, tuvatoma nakumunyika nge manongo mukaye.’ (Fwili. 2:15) Ngocho twatela kuhunganga chikuma vilinga vyakuhuka. (Yako. 4:7) Kaha nawa twazanga vandumbwetu nakuvavumbika hakutachikiza ngwetu navakiko nawa vapwa vatu jaYehova.—Loma 12:10.

19. Yehova eji kufwetanga ngachilihi vaze vapwa venyi?

¹⁹ Mbimbiliya yatufwelelesa ngwayo: “Yehova keshi kukaseza vatu jenyi[ko].” (Samu 94:14) Kakweshi chuma nachikahonesa Yehova kutesamo lushiko kanako. Numba vene nge natufwa oloze Yehova mwatwalaho kutwanukanga. (Loma 8:38, 39) Ngocho, “chipwe nge natuyoya, natuyoya mwomwo yaYehova, kaha chipwe nge natufwa, natufwa mwomwo yaYehova. Shikaho, numba nge natuyoya numba nge natufwa, tunapu vakuli Yehova.” (Loma 14:8) Tuli nakutalilila kulwola luze Yehova mwakasangula masepa jenyi vakushishika vaze vafwa. (Mateu 22:32) Oloze noholyapwa tuli nakulivwisa kuwaha jikisu jajivulu. Mbimbiliya ngwayo: “Wawahilila muyachi uze ukwechi Kalunga kawo Yehova, vatu vaze nasakula kupwa luheto lwenyi.”—Samu 33:12.