1-2. (a) Mwomwo ika katwatela kulikomokelako nge mulimo wetu vanaukanyisa? (b) Vyuma muka natushimutwila muchihande chino?

MUMWAKA wa 2018 vandumbwetu vakuhambakana 223,000 vapwile kuvihela kuze vakanyishile mulimo wetu. Katwatela kulikomokela hachuma kanako. Ngana muze twashimutwilanga muchihande chinafumuho, vaka-Kulishitu vamuchano vatachikiza ngwavo navavayanjisanga. (Chimo. 2, 3:12) Chamokomoko nakuchihela twatwama, kala lwola vaka-fulumende vanahase kutukanyisa kulemesa Kalunga ketu wazangi Yehova.

² Kachi nge fulumende nayimikanyisa kulemesa Yehova kuchihela mwatwama, kaha munahase kulihulisa ngwenu: ‘Uno kutuyanjisa chasolola nge Yehova natuhungu tahi? Uno twatela kulitwamina kulemesa Yehova nge mulimo wetu vanaukanyisa tahi? Uno ngwatela kwalukila kulifuchi kuze kavakanyishile mulimo wetuko tahi?’ Muchihande chino natushimutwila vihula kanevi. Natushimutwila nawa havyuma vize navitukafwa tutwaleho lika kulemesa Yehova nge mulimo wetu vanaukanyisa, navyuma vize katwatela kulingako.

3. Kweseka namukanda Wavaka-Kolinde 2, 11:23-27, luyanjisa muka amwene kaposetolo Paulu, kaha chuma muka tunalinangula kuli ikiye?

³ Kachi nge fulumende yinakanyisa mulimo wetu, tunahase kushinganyeka ngwetu Yehova natuhungu. Oloze tachikizenu ngwenu, kutuyanjisa kachasolola nge Yehova natuhunguko. Chakutalilaho chakaposetolo Paulu chinahase kutukafwa.  Yehova amwivwililile uselewa. Asonekele nawa mikanda 14 yachiHelase yaVaka-Kulishitu, kaha nawa apwile kaposetolo kuli vaka-mafuchi eka. Oloze vamuyanjishilenga. (Tangenu Wavaka-Kolinde 2, 11:23-27.) Chakutalilaho kana, chasolola nge Yehova eji kwitavisanga vangamba jenyi vakushishika vavayanjise.

4. Mwomwo ika vatu veji kutuyanjishilanga?

⁴ Yesu alumbunwine ovyo vaka-kole jetu navatuyanjishilanga. Ambile ngwenyi navatuhunganga mwomwo katweshi tuvaka-kayeko. (Yowa. 15:18, 19) Kutuyanjisa kachasolola nge Yehova keshi nakutukisulako, oloze cheji kusololanga nge tuli nakulinga vyuma vyakwoloka.

5. Uno vatu vaze veji kutufumbukilanga vanahase kutuhonesa kulemesa Yehova tahi? Lumbununenu.

⁵ Vatu vaze veji kutufumbukilanga kaveshi kuhasa kutuhonesa kulemesa Kalunga ketu wangolo josena Yehovako. Vatu vavavulu vanesekanga kulinga ngocho, oloze vanahono. Tutalenu vyuma vyasolokele halwola kwapwile Jita yaKaye yamuchivali. Vangamba jaKalunga vavayanjishile chikuma kuli vaka-fulumende mumafuchi amavulu. Mulimo waVinjiho jaYehova vaukanyishile kuliuka lyaNazi mulifuchi lyaGermany, nakufulumende yamulifuchi lyaAustralia naCanada namumafuchi eka. Oloze munahase kulikomokela hakutachikiza vyuma vyasolokele. Omu jita yaputukile mu 1939, mukaye kosena mwapwile kaha vaka-kwambulula vakuheta ku 72,475. Mijimbu yasolola ngwayo, omu yakumine jita mu 1945, vaka-kwambulula vahetele ku 156,299. Chikupu vene, vaka-kwambulula vavulilileko chikuma.

6. Vyuma muka twatela kulinga kachi nge vanakutuyanjisa? Hanenu chakutalilaho.

⁶ Kachi nge vanakutuyanjisa, kaha twatela kutwalaho kuzachila Yehova muchishishisa chakwivwa woma. Chakutalilaho, lunga napwevo vakulimbata vaze vapwile namwanavo walunga vatwaminenga mulifuchi muze vakanyishile mulimo wetu. Muchishishisa chakwivwa woma, ou lunga napuwenyi vaputukile kuzata upayiniya washimbu yosena. Pwevo echele kuzata milimo yajimbongo jajivulu mangana azate kanawa upayiniya. Lunga nawa ambile ngwenyi, kukanyisa mulimo wetu chalingishile vatu vavavulu vafwile kutachikiza vyuma vyavivulu hali Vinjiho jaYehova. Echi chamukafwile aputuke vilongesa vyaMbimbiliya. Kukanyisa  mulimo wetu chanehele nganyo yikwavo. Kalama umwe mulifuchi kana ambile ngwenyi, vatu vavavulu vaze vazeyele kushipilitu vaputukile cheka kukunguluka nakuyanga muwande.

7. (a) Vyuma muka natulinangula hali waVyavaLevi 26:36, 37? (b) Vyuma muka namulinga nge mulimo wetu vanaukanyisa?

⁷ Omu vaka-kole veji kukanyisanga mulimo wetu, veji kufwilanga kutwivwisa woma mangana tulitwamine kuzachila Yehova. Kaha nawa veji kwambululanga vyuma vyamakuli hali etu, nakulweza vilolo vafulumende vatukwate nakututwala kuzango yakusopela chipwe vatukase mutumenga. Veji kushinganyekanga ngwavo natwivwa woma hakumona vandumbwetu vamwe vanavahake mukamenga. Nge natulizuzukila nawoma kaha tunahase kulitwamina etu vavene kulemesa Yehova. Katweshi nakusaka kupwa ngana mwavatu vaze vavuluka hali waVyavaLevi 26:36, 37. (Tangenu.) Woma kawatela kutulingisa tuzeye kushipilitu chipwe tulitwamine kuzachila Yehovako. Katwatela kulizakaminako oloze twatela kufwelela Yehova. (Isa. 28:16) Tweji kulombanga Yehova atutwaminyinenga. Ngocho, kakweshi fulumende yavatu yize yinahase kutuhonesa kulemesa Kalungako.—Hepe. 13:6.

8-9. (a) Vyuma muka atela kulisakwila mutu himutu chipwe mutwe watanga? (b) Vyuma muka navikafwa mutu mangana ahase kusakula kanawa vyakulinga?

⁸ Kachi nge fulumende yamulifuchi mwatwama yinamikanyisa kuzachila Yehova, kaha munahase kushinganyeka kwalukila kulifuchi lyeka. Nge chili ngocho, kaha mwatela kulisakwila enu vavene vyakulinga. Vamwe vanahase kulondezeza muze valingile vaka-Kulishitu vamulikulukaji lyamyaka lyakulivanga omu vaputukile kuvayanjisa. Omu vaka-kole vajihile Setefwano hakumwasa malolwa, tumbaji vavavulu vafumine kuYelusalema nakuya kuSamaliya, nakuYuleya, nakuFwenyisha, nakuKupulusu nakuAndeyoka. (Mateu 10:23; Vili. 8:1; 11:19) Oloze vaka-Kulishitu veka, vanahase kulondezeza vyuma alingile Paulu. Omu vayanjishilenga vaka-Kulishitu mulikulukaji lyamyaka lyakulivanga, Paulu kayile kulifuchi lyekako. Ahakile kuyoya chenyi muponde hakutwalaho lika kwambulula nakukolezeza vandumbwenyi mujinganda muze vapwile nakumona luyanjisa.—Vili. 14:19-23.

⁹ Vyuma muka natulinangula hamijimbu kaneyi? Mutwe watanga atela kusakula numba nge vatela kwalukila kulifuchi lyeka nyi chiku. Shimbu kanda asakule vyakulinga, atela kulomba nakushinganyeka hachiyoyelo chavaka-tanga yenyi nakutachikiza ukalu wakwalukila kuchihela cheka. Muka-Kulishitu himuka-Kulishitu atela kulimbachila “vyuma vyenyi ivene.” (Ngale. 6:5) Katwatela kuhana mulonga vakwetu havyuma navasakula kulingako.

10. Uno ofesi yamutango natulama muvikungulwilo navakahana jindongi muka?

¹⁰ Vyuma muka navikamikafwa mukatwaleho kulemesa Yehova nge mulimo wetu vanaukanyisa? Ofesi yamutango nayikahana jindongi tulama muvikungulwilo nakuvalweza jila yakutambwilamo kulya chakushipilitu, namwakukungulukila namwakwambulwila mujimbu wamwaza. Oloze nge nayikahona jila yakutuminamo jindongi kana, kaha vakulwane navakamikafwa mangana mukatwaleho kulemesa Yehova. Navakamilweza vyakulinga kweseka navyuma yahanjika Mbimbiliya namikanda yetu.—Mateu 28:19, 20; Vili. 5:29; Hepe. 10:24, 25.

11. Mwomwo ika mwatela kufwelela ngwenu namukapwa lika nakulya chakushipilitu, kaha vyuma muka mwatela kulinga mangana mukakinge mikanda yenu najiMbimbiliya jenu?

 ¹¹ Yehova ashika ngwenyi vangamba jenyi mwakavahana kulya chakushipilitu chakutamo. (Isa. 65:13, 14; Luka 12:42-44) Shikaho mwatela kufwelela ngwenu liuka lyenyi nalikamizakama kanawa kushipilitu nakumikafwa muvyuma vyosena. Oloze mwatela kukalingako vyuma vimwe. Kaswekenu Mbimbiliya yenu namikanda yetu yeka yize namukapwa nayo. Kanda kukahaka hatoma mikanda kanako numba yipwa yahamakina chipwe yakupulita kuchina navakayiwana kuli vaka-kole. Shikaho tuvosena twatela kulingako vyuma vimwe mangana tukapwe lika vakuzama kushipilitu.

12. Uno tulama navakawahisa ngachilihi vyuma mangana mukakunguluke chakuzeneka vaka-kole kutachikiza?

¹² Nyi ngachilihi kukunguluka chachalumingo hichalumingo? Tulama navakawahisa vyuma mangana mukakunguluke kanawa chakuzeneka vaka-kole kutachikiza. Vanahase kukamilweza mukalikungulwile mutumazavu twatundende, kaha nawa navakalumunanga lwola nachihela namukaliwanyinanga kuswakumwe. Omu namukayanga kukunguluka chipwe hakufumako, kahanjikilenunga mwishi kuchina namukahaka vandumbwenu muponde. Kavwalenu nawa mujila yize nayikalingisa vatu vakahone kutachikiza ngwavo muli nakuya kukukunguluka.

13. Vyuma muka natulinangula kuli vandumbwetu muchiyulo chaSoviet Union?

¹³ Jila yakwambulwilamo nayikalihandununa kweseka nakuchihela twatwama. Hakuwana nge twazanga chikuma Yehova, kaha nawa twasaka kulwezako vakwetu vyaWangana wenyi, shikaho natukawanako jila mangana tukatwaleho lika kwambulula. (Luka 8:1; Vili. 4:29) Emily B. Baran uze alinangula vyakushikulu ahanjikile hamulimo wakwambulula waVinjiho jaYehova muchiyulo chaSoviet Union ngwenyi: “Omu fulumende yalwezele Vinjiho jaYehova ngwavo kavatela kwambululako, vakiko vaputukile kushimutwila havyuma vafwelela navatu valihata navo, navakwavo muvazachila namasepa javo. Kahomu vavatwalile mukamenga mwomwo yakutwalaho kwambulula, vakiko vatwalilileho lika kwambulilako vakwavo vafunge.” Chamokomoko nakukanyisa mulimo wetu, ava vandumbwetu kavalitwaminyinyine kwambululako. Shikaho nge mulimo wetu vaukanyisa kungalila mwatwama, kaha fwilenu kuvalondezeza.

14. Chisoneka chaSamu 39:1 nachitukafwa tuhone kulinga vyuma muka?

¹⁴ Kamwatela kulweza vatu mijimbu yakuswekako. Kachi nge mulimo wetu vanaukanyisa, kaha twatela kutachikiza “lwola lwakuhola kulu.” (Kwambu. 3:7) Katwatela kulweza vatu majina avandumbwetu, nachihela tweji kulikungulwilanga, najila tweji kwambulwilangamo nomwo tweji kutambwilangamo kulya  chakushipilituko. Katwatela kulweza vaka-fulumende vyuma kanako, chipwe vene kuvilweza masepa jetu chipwe vausoko wetu chipwe vene vaze vatwama mumafuchi eka. Kachi nge natukambulula vyuma kana, kaha natukahaka vandumbwetu muponde.—Tangenu Samu 39:1.

15. Vyuma muka afwila kulinga Satana, kaha tunahase kuhonesa ngachilihi cheseko kana?

¹⁵ Kanda kwitavila ukalu waundende unehe chihandwako. Satana atachikiza ngwenyi kachi nge zuvo nayilimbalaka yivene kaha kayeshi kuzamako. (Mako 3:24, 25) Satana mwatwalaho lika kufwila kuneha chihandwa mukachi ketu. Mwomwo afwila tulimanyine nakole etu vavene muchishishisa chakumwimanyina ikiye nakole.

16. Ndumbu Gertrud Poetzinger atuhana chakutalilaho muka chamwaza?

¹⁶ Navaka-Kulishitu vakuhya vatela kupwa vakuvanguluka kuchina navengila mucheseko kana. Tushimutwilenu hachakutalilaho chavandumbwetu vamapwevo vavali vakuwavisa, vaGertrud Poetzinger naElfriede Löhr. Vosena vapwile muchilombo chakulamina vafunge muNazi hamwe navandumbwetu veka vamapwevo. Ndumbu Gertrud evwilenga lwiso omu ndumbu Elfriede ahanjikilenga vihande vyakolezeza vandumbwetu muchilombo. Kutwala muze Gertrud aliveyele hachuma kana, kaha alombele Yehova amukafwe. Asonekele ngwenyi: “Twatela kusakwilila vakwetu kachi nge vali nauhashi wakulinga vyuma vize katweshi kuhasa kulingako.” Uno ahonesele ngachilihi muchima walwiso? Ndumbu Gertrud atalile kaha havilinga vyamwaza apwile navyo ndumbwenyi Elfriede. Echi chamulingishile atunge cheka usepa wamwaza nayou ndumbwenyi. Vosena vavali vavafumishile muchilombo chakulamina vafunge kaha vatwalileho lika kuzachila Yehova nakashishi palanga nomu vamanyishile kuyoya chavo hano hamavu. Nge natuzata nangolo mangana tuhonese vikokojola mukachi ketu, kaha katweshi kulinga vyuma vize navineha chihandwako.—Kolo. 3:13, 14.

17. Mwomwo ika katwatela kupwa nakazamuzamuko?

¹⁷ Kanda kupwa nakazamuzamuko. Kachi nge natukavangiza jindongi navatulweza vakulwane, kaha nachitukafwa tulihende kuukalu. (Petu. 1, 5:5) Chakutalilaho, mulifuchi limwe muze vakanyishile mulimo wetu, tulama vahanyine jindongi ngwavo vaka-kwambulula kavatela kuhana mikanda muwandeko. Oloze ndumbwetu umwe walunga uze apwile payiniya mungalila kana kakavangijile jindongi kanako, kaha ahanyine mikanda. Vyuma muka vyafuminemo? Ou ndumbwetu navakwavo veka omu vakumishile kwambulula mukutulukila, tupokola vavakwachile. Chasoloka nge, vilolo vafulumende vakavangijile vaze vandumbwetu nakukatambula mikanda yize vahanyine.  Mujimbu kana nautukafwa ngachilihi? Twatela kukavangizanga jindongi navatulweza tulama numba tuhu twatachikiza vyavivulu. Yehova mwatukisulanga kachi nge natwononokanga vandumbwetu vaze atongola mangana vatutwaminyine.—Hepe. 13:7, 17.

18. Mwomwo ika katwatela kutungila vakwetu jishimbi jakuhona kutamoko?

¹⁸ Kanda kutunga jishimbi jakuhona kutamoko. Kachi nge vakulwane navatunga jishimbi chamutungila kaha nachipwa chiteli kuli vandumbwavo. Ndumbwetu walunga Juraj Kaminský ahanjikile vyuma vyasolokele mulifuchi vavulukilenga ngwavo Czechoslovakia omu mulimo wetu vaukanyishile. Ambile ngwenyi: “Omu tulama vavakashile, vaze vapwile nakutwaminyina vikungulwilo, nakukunguluka chachihanda vaputukile kutungila jishimbi vaka-kwambulula.” Yehova katuhana ngolo jakutungila vakwetu jishimbiko. Mutu uze eji kutungilanga vandumbwenyi jishimbi eji kuhakanga kuyoya chavakwavo muponde, nakulilingisa kupwa mwata halufwelelo lwavo.—Koli. 2, 1:24.

19. Kweseka namazu ahali Mijimbu 2, 32:7, 8, mwomwo ika twatela kutwalaho kupwa vakumika chamokomoko nakutufumbukila kuli Satana?

¹⁹ Muka-kole wetu Satana Liyavolo mwatwalaho lika kuyanjisa vangamba jaYehova. (Petu. 1, 5:8; Kuso. 2:10) Satana navaze veji kumukundwizanga navatwalaho lika kweseka kutukanyisa kulemesa Yehova. Chipwe ngocho, katweshi kulitwamina kuzachila Yehovako. (Lushi. 7:21) Hakuwana nge Yehova ali kusali yetu, twafwelela chikupu ngwetu mwatwalaho kutukafwa numba vene nge mulimo wetu vanaukanyisa.—Tangenu Mijimbu 2, 32:7, 8.

20. Vyuma muka muli nakufwila kulinga?

²⁰ Shikaho, tufwilenu kulondezeza vandumbwetu vamulikulukaji lyamyaka lyakulivanga vaze valwezele vaka-kuyula ngwavo: “Yulenu enu vavene, numba nge chakwoloka kumeso aKalunga kumivwilila enu kuhambakana kwivwilila Kalunga. Oloze etunyi katweshi kuhasa kulitwamina kuhanjika vyuma tunamono nakwivwako.”—Vili. 4:19, 20.